muslim.uz
Ўзбекистон мусулмонлари идораси раиси, муфтий Усмонхон АЛИМОВ ҳазратларининг Матбуот ва оммавий ахборот воситалари ходимларига байрам табриклари
Ассалому алайкум ва раҳматуллоҳи ва барокатуҳу!
Ҳурматли фидокор ва жонкуяр ижодкорлар!
Аллоҳ таолога чексиз ҳамду саноларимиз, Ҳазрати Пайғамбаримиз Муҳаммад мустафо соллаллоҳу алайҳи васалламга беҳисоб саловоту саломларимиз бўлсин.
Сиз азизларни “27 июнь – Матбуот ва оммавий ахборот воситалари ходимлари куни” муносабати билан чин қалбимдан самимий муборакбод этаман.
Муҳтарам Президентимизнинг шахсий ташаббуслари билан аксарият соҳалар каби оммавий ахборот воситалари фаолиятида ҳам эътирофга лойиқ янгиликлар, ўзгаришлар ва юксалишлар жорий этилди.
Куни кеча эълон қилинган муҳтарам Юртбошимизнинг Матбуот ва оммавий ахборот воситалари ходимларига йўллаган табрикларида: “Жаҳон миқёсида юз берган пандемия туфайли вужудга келган бугунги мураккаб вазият ва қийинчиликларга қарамасдан, аҳолига тезкор ва ишончли ахборот етказиб бериш, мамлакатимизда амалга оширилаётган демократик ислоҳотларни атрофлича акс эттириш йўлида ўз профессионал бурчини сидқидилдан адо этиб келаётган сиз, журналистлар аҳлига чуқур миннатдорчилик билдираман, деган илҳомбахш сўзлар барча ижод аҳли чексиз мамнун этди.
Ўз навбатида биз дин пешволари ҳам ушбу фидойи, мураккаб, масъулиятли ва олижаноб касб вакилларини шарафлаймиз. Бу касб байрами сўнгги йилларда янгича мазмун касб этди. Муҳтарам Президентимизнинг кучли иродаси, унинг халқ билан мулоқотни йўлга қўйиш, сўз ва ахборот эркинлигини таъминлашдаги тинимсиз ташаббуслари натижасида ташкилот ва муассасаларнинг очиқлиги ва шаффофлиги таъминланмоқда.
Ишонч билан айтиш мумкинки, журналистлар ва блогерлар мамлакат ҳаётининг ажралмас қисмига айланди, аҳоли орасида уларнинг нуфузи ошди. Бу эса уларнинг халқимиз ҳурмати ва эҳтиромига сазовор бўлаётганидан дарак беради. Бу ҳолат ҳеч кимга хотиржамликка берилишга йўл қўймаяпти, доим воқеа-ҳодисалардан хабардор бўлишни ва мутасаддиларга эса жамият олдидаги вазифаларини мунтазам эслатиб турибди.
Аллоҳ таолога шукрки, муборак динимизни кенг ёйиш, диний-маърифий ишларни халқимизга тўлақонли етказишда ижод аҳлининг жуда ҳам катта ўрни бор, албатта.
Мўмин-мусулмонлар манфаати, дин ғами ва Ватан тақдирини юрагидан ўтказиб ишлайдиган Сиз каби ижод аҳлининг даъваткор сўзи, ибратли фаолияти жуда ҳам таҳсинга лойиқдир. Зеро, Қуръони азимуш-шаънда шундай марҳамат қилинади:
«Эй Муҳаммад, Раббингиз йўли-динига ҳикмат ва чиройли насиҳат билан даъват қилинг! Улар билан энг гўзал услубда мунозара қилинг! Албатта, Парвардигорингизнинг ўзи Унинг йўлидан чалғиган кимсаларни яхши билувчи ва ҳидоят топганларни ҳам У билувчироқдир» (Наҳл, 125).
Шунинг учун ижод аҳлини Аллоҳ таолонинг мана шундай хитобига амал қилган ҳолда эзгуликни ёйиш, илму маърифатни тарқатишда энг гўзал услубни танлаган ҳолда имкониятлардан унумли фойдаланиш лозимдир.
Ҳазрати Алишер Навоий бобомиз “Муҳокаматул-луғатайн” асарида қуйидаги мисраларни келтиради:
Чу мен назм аро тортиб алам,
Айладим ул мамлакатни якқалам.
Олиб мен тахти фармонимға осон,
Черик чекмай Хитодин то Хуросон.
Яъни, Ҳазрати Навоий назм ила мамлакатни якдил қилдим, Хитойдан то Хуросонгача бўлган ҳудудни қўшинсиз эгалладим, деган мазмунни ифода этганлар.
Марҳум шоиримиз Абдулла Орипов шу мисралар таъсирида “Темур тиғи етмаган жойни қалам билан олди Алишер”, деб бежизга қайд қилмаган эдилар.
Демакки, кишиларни ҳамжиҳатликка чақиришда, ҳидоят йўлига бошлашда, илму маърифатини кенг ёйишда ижод аҳлининг панду насиҳати ва мазмунли чиқишларининг ўрни жуда ҳам каттадир.
Ҳурматли ижодкорлар!
Таъкидлаш жоизки, сўнгги йиллар давомида ахборот хизматлари фаолияти такомиллашиб, медиа маконда юзага келаётган чақириқларга тезкорлик билан муносиб жавоб кайтариш ишлари шаклланди.
Мамлакатда амалга оширилаётган ислоҳотлар тўғрисидаги маълумотларни ўз вақтида тақдим этиш, аҳолига тезкор ва тўлиқ ахборот етказиш, очиқлик ва шаффофликни таъминлашда сезиларли натижаларга эришилди.
Жаҳоннинг илғор давлатларида матбуот котиблари аллақачон жуда муҳим шахсларга айланиб улгурган. Жамоатчилик уларнинг баёнотини кутади, уларни излайди ва қадрлайди. Юртимизда ҳам бу йўналишда кўрилаётган чора-тадбирлар натижасида келгусида матбуот котибларимиз том маънода жамиятимиздаги муҳим шахсларга айланишига ишонаман.
Матбуот котибларини янада фаолликка, дадилликка ва тезкорликка чақирган бўлардим. Ушбу касб эгалари энг зарур пайтда, энг зарур ва рост гапни айтиши лозим. Ахборот хизматлари ходимлари нафақат матн ёзишни, балки замонавий медиа усулларидан кенг фойдаланишлари ҳам зарурдир. Шу орқали медиа маконда тўғри маълумотлар етказилиб, нохолис ва нотўғри хабарлар тарқалиши ҳолатлари ўз вақтида бартараф этилади.
Ўз ўрнида айтиш керакки, ижодкорларга муносиб шарт-шароит яратиб берилса, меҳнатларини муносиб тақдирланса, улар эркин ижод қилади, шунда кўзлаган мақсадларга эришилади, инша Аллоҳ.
Ижод аҳли меҳнатини нақадар машаққатли эканини англаган киши сифатида камина, сизларнинг саъй-ҳаракатингизни доимо қўллаб-қувватлайман, сизларни энг асосий таянчим ва энг яқин ёрдамчим деб биламан. Ҳар бир инсоннинг юрак-юрагига кириб борувчи ва ҳаётимизни янада яхшилашга хизмат қилувчи сўзингиз учун сиздан чин дилдан миннатдормиз. Сизларни доимо яхши кўриб қолишимни изҳор қилишдан эса жуда ҳам бахтиёрман. Ўз навбатида Ўзбекистон мусулмонлари идораси барча ижодкорлар билан яқиндан ҳамкорлик қилишга тайёр эканини маълум қиламан.
Имкониятдан фойдаланиб, ўта муҳим ва масъулиятли вазифаларни амалга оширишда барча оммавий ахборот воситалари вакиллари, ахборот соҳасида иш юритаётган жонкуярларимизга сиҳат-саломатлик, куч-ғайрат ҳамда улкан зафарлар тилайман.
Барча ижодкор ходимларни яна бир бор касб байрамлари билан муборакбод этаман.
Қаламингиз ўткир, сўзларингиз равон, чиқишларингиз таъсирчан бўлиб, доимо мўмин-мусулмонларимиз ардоғида бўлинг, барчангизга бахту саодат, ижодий ютуқлар тилайман.
Вассалому алайкум ва раҳматуллоҳи ва барокатуҳу.
Уламоларнинг самимий мулоқоти икки элни янада жипслаштирди
Бугун, 26 июнь куни Қирғизистон мусулмонлари идораси раиси, муфтий Мақсадбек Токтамушев бошчилигидаги Қирғизистон делегациясининг Фарғона вилояти Сўх туманига ташрифи доирасида маҳаллий аҳоли вакиллари билан мулоқотлар ўтказилди.
Меҳмонларга Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедов ҳамроҳлик қилдилар. Ушбу самимий мулоқотларни маҳаллий аҳоли вакиллари чексиз мамнунлик ва катта олқишлар билан қарши олдилар.
Таъкидлаш жоизки, Фарғона вилояти Сўх тумани тарихи узоқ ўтмишга бориб тақалади. Хусусан, чашма булоғи ҳам шундай. Бу ерда азалдан аҳил-иноқ ва ўзаро тотувликда яшаб келаётган ўзбек, тожик ва қирғиз халқлари шу булоқ сувидан бирдай фойдаланади. Сўнгги вақтлардаги Чашма қишлоғида содир бўлган нохуш воқеада бир қанча одамлар азият чекди. Аллоҳга шукрки, бундай қалтис вазиятга ўз вақтида барҳам берилди. Икки давлат раҳбарлари ҳар қандай масалани музокаралар асосида тинчлик йўли билан ечим топишди.
Муҳтарам Президентимиз ташаббуслари билан ташкил этилган икки давлатнинг чегарадош вилоятлари мутасаддилари мажлисларида бу каби масалаларга эътибор қаратилиб, ҳал этиш йўллари муҳокама қилинди.
Ташкил этилган қўшни мамлакатлар таниқли уламолари ва дин пешволарининг маҳаллий аҳолиси билан бўлган учрашувларида ҳудуддаги барча муаммолар тинч ва муроса йўли билан ҳал этилишини алоҳида таъкидланди. Узоқ йиллар давомида қирғизлар, ўзбеклар ва тожиклар азалдан ўзаро тинч-тотув, қуда-анда бўлиб яшаб келгани, бундан кейин ҳам шундай давом этиши аждодларимиз тутган йўл – чин мўминлик, биродарлик сифати эканини алоҳида баён этилди.
Сўз олган нотиқлар ўз навбатида, бугунги мураккаб даврда зиддиятли масалаларни ҳал этишда турли фитналарга берилмаслик, гап-сўзларга учмаслик ва ҳар қандай вазиятда оғир-босиқ бўлиш кераклигини алоҳида қайд этдилар.
Дарҳақиқат, ҳозирги кунда сўхликлар муҳтарам Президентимизнинг катта ғамхўрлигини ҳамиша ҳис қилиб яшамоқда. Ушбу туман юртимизнинг энг обод ва фаровон масканига айланиб, бу каби ишларнинг натижаси одамлар ҳаётида акс этишига шубҳа йўқ. Бунинг учун икки мамлакат муфтийлари таъкидлаганларидек, тинчлик-тотувлик, ўзаро тушуниш ва эзгу мақсад йўлида сидқидилдан ҳамкорлик қилиш талаб этилади, холос.
Ўзбекистон мусулмонлари идораси Матбуот хизмати
Муфтий ҳазратлари: динимиз ва мазҳабимиз бирлиги йўлида ҳамжиҳат бўлайлик!
Бугун, 26 июнь куни Қирғизистон мусулмонлари идораси раиси, муфтий Мақсадбек Токтамушев бошчилигидаги бир гуруҳ мутасаддилар Фарғона вилояти Сўх туманига ташриф буюрдилар. Меҳмонларни Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедов кутуб олди.
Куннинг биринчи ярмида икки давлат уламолари иштирокида “Динимиз ва мазҳабимиз бирлиги йўлида бирдам бўлайлик” мавзусидаги давра суҳбати бўлиб ўтди.
Мулоқотда муфтий Усмонхон Алимов ҳазратлари мазҳабга эргашиш бирлик рамзи экани, мўмин-мусулмонларнинг иттифоқлигини мустаҳкамлашни алоҳида таъкидладилар. Шунингдек, дини мубинимизда қўшни ҳақларига риоя қилиш муҳимлиги, меҳр-оқибат ришталарини яхшилашда қўшниларнинг ўрни беқиёс экани ҳақида тўхталдилар. Қуръони каримни маҳкам тутсак, мўмин-мусулмон эканимизни унутмасак, ҳеч қачон орамизга бегона кучлар киролмайди. Чунки мусулмон одам ўз диндошига фақат яхшиликни раво кӯради, дея муфтий ҳазратлари ўз сўзларини якунладилар.
Давра суҳбатида Дин ишлари бўйича қўмита раиси Абдуғофур Аҳмедов, Қирғизистон мусулмонлари идораси раиси, муфтий Мақсадбек Токтамушев, Ислом цивилизацияси маркази директори ўринбосари Шайх Абдулазиз Мансур ва бир гуруҳ мутасаддилар маъруза қилдилар.
Сўзга чиққан нотиқлар қўшниларнинг миллати ва ирқига қарамасдан уларга яхшилик қилишга буюрилгани, қўни-қўшниларга озор бермаслик, ҳурматларини сақлаш зарурлиги, қўшнилари билан тинч-тотув яшаган, уларга озор бермаган одам катта бахт-саодатга эришиши, аксинча, ёмон муносабатда бўлиш эса, хуник оқибатларга олиб келиши тўғрисида сўз қилдилар.
Қўшни ҳақларини адо этиш ўзаро меҳр-муҳаббатнинг ошиши, тинчлик, ҳотиржамликнинг мустаҳкамлашишига замин яратади. Халқимизда “қўшнинг тинч сен тинч” деган мақол бежизга айтилмаган. Агар икки юрт вакиллари ўзаро ҳамжиҳат бўлиб, динимиз кўрсатмаларига амал қилсалар нафақат савоб оладилар, балки бир қанча ютуқларга ҳам эришишлари мумкин.
Мулоқот ва учрашувлар давом этади.
Ўзбекистон мусулмонлари идораси Матбуот хизмати
Муфтий ҳазратлари: Икки қардош халқ бир-бирига фақат яхшиликни раво кўради
Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедов бошчилигидаги Ўзбекистон делегациясининг Қирғизистон давлатига сафарлари давом этмоқда.
Куннинг иккинчи ярмида делегация аъзолари Қирғизистон Чашма қишлоғи аҳолиси билан учрашиб, маърифий суҳбатлар ўтказдилар. Учрашувда муфтий Усмонхон Алимов ҳазратлари икки қардош халқ ўртасидаги кўп асрлик дўстлик, яхши қўшничилик муносабатлари йилдан-йилга ривож топиб бораётгани, муборак динимизда қўшничилик ришталарига алоҳида эътибор берилгани ҳамда қўшнига яхшилик қилиш ҳақида қўплаб тавсиялар келгани ҳақида Қуръони карим оятлари ва ҳадиси шарифлар асосида баён қилиб бердилар. Шунингдек, Қуръони каримни маҳкам тутсак, мусулмон, мўмин эканлигимизни унутмасак, ҳеч қачон орамизга бегона кучлар киролмайди. Мўмин мўминга фақат яхшиликни раво кӯради, – дея муфтий ҳазратлари ўз сўзларини якунладилар.
Мулоқотда Дин ишлари бўйича қўмита раиси Абдуғофур Аҳмедов сўзга чиқиб, муҳтарам Президентимиз Шавкат Мирзиёев қўшни республикалар билан яхши қўшничилик алоқаларини мустаҳкамлаш ва минтақа бирлигини таъминлашга жуда катта эътибор қаратаётганларини алоҳида таъкидлади.
Учрашувда сўзга чиққан мутасаддилар ва маҳаллий аҳоли ўзбек ва қирғиз замини азалдан бир тану бир жон экани, бугунги яхши қўшничилик муносабатлари, албатта давом этиши, келажак авлод ҳам аҳилликда, тотувликда, яхши қўшничилик муносабатларини сақлаган ҳолда фаровон ҳаёт кечиришини таъкидладилар.
Шубҳасиз, сўнгги йилларда икки давлат раҳбарларининг кўплаб масалаларда ҳамфикрлиги, интилишларининг муштараклиги туфайли барча соҳалардаги ҳамкорлик алоқалари янада мустаҳкамланди.
Ўз навбатида, самимий руҳда кечган мулоқотларда икки халқ аҳолиси азалий қадриятларни сақлаб қолишга бирдек ҳаракат қилиши, икки давлат Раҳбари олиб бораётган одилона сиёсатни қўллаб-қувватлаши, албатта, шу муборак, жаннатмакон жойларда тинч-хотиржам ҳаёт кечиришга асос бўлиши алоҳида қайд этилди.
Ўзбекистон делегациясининг қалбдан чиққан самимий сўзлари маҳаллий аҳолининг кайфиятини кўтарди, руҳий қувват берди, ўзаро қўшничилик алоқаларини мустаҳкамалашга катта асос бўлади.
Мулоқотлар якунида томонлар бир-бирларига эсдалик совғалари тақдим этдилар.
Ўзбекистон мусулмонлари идораси Матбуот хизмати
Ҳаж амалини адо этиш учун барча шароитлар мужассам бўлиши лозим
Саудия Арабистони Подшоҳлиги ҳукумати томонидан “Ҳаж-2020” мавсуми бўйича қабул қилган қарори Исломнинг энг олий рукни, ибодатларнинг афзали бўлган Ҳажнинг жорий йил бехавф ва бехатар ўтишини таъминлаш йўлидаги бирмунча қайқули, аммо тўғри қадам бўлди. Қисқа қилиб айтганда, ушбу қарор бу йил фақат Подшоҳлик ҳудудида истиқомат қилаётган одамлар учунгина улуғ ибодатни адо этиш имконини беради.
Аввало, мазкур қарор мусулмон дунёсининг нуфузли муассасалари бўлмиш Саудия уламолари кенгаши, Ислом ҳамкорлик ташкилоти, Ислом олами уюшмаси, Мисрдаги “Ал-Азҳар” мажмуаси ва “Дорул ифто” фатво ҳайъати ва кўплаб бошқа илмий марказлар томонидан якдиллик билан маъқулланганини таъкидлаб ўтиш жоиз. Улар қаторида Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита, Ўзбекистон мусулмонлари идораси, “Ҳаж” ва “Умра” тадбирларини ташкил этиш ва ўтказиш масалалари бўйича Жамоатчилик кенгаши ҳам Саудия Арабистони ҳукуматининг бу қарорини қўллаб-қувватлаб, ҳожилар манфаатлари, уларнинг ҳаёти ва соғлиғини сақлаш нуқтаи назаридан ўз вақтида ва энг тўғри йўл тутилганини қайд этди. Шу билан бирга, жамоатчилик кенгашининг махсус йиғилишида жорий йилги ҳаж сафарига боришни режалаштирган ҳамюртларимизнинг навбати тўлиқ сақланган ҳолда кейинги йилга ўтказилиши маълум қилинди.
Дарҳақиқат, коронавирус бутун дунёда авж олаётган, хусусан, Саудия Арабистонида кунига ўртача 4000 киши уни юқтираётган, 35-40 киши у туфайли ҳаётдан кўз юмаётган бир мураккаб шароитда хориждан ҳожиларни мамлакат ҳудудига киритмаслик тўғрисидаги қарор энг оқилона ишдир. Тўғри, Ҳаж – энг улуғ амал, аммо ҳеч бир инсон ўзини ёниб турган ўтга ташламаганидек, айни пайтда буюк зиёрат учун ўзи ва яқинлари ҳаётини аниқ-равшан таҳлика остига қўймаслиги керак. Зеро, саломатликни асраш ҳам Яратганнинг фарзларидан биридир.
Ҳаж ибодатининг эса ўз талаблари бор. Аллоҳ таоло Ўзининг муқаддас китобида “Одамлардан йўлга қодир бўлганларига Аллоҳ учун Байтни ҳаж қилмоқ вожибдир” (“Оли Имрон” сураси, 97-оят) деб марҳамат қилади. Яъни, соғлиғи яхши бўлган, ҳажга бориб-келишга оиласидан орттирган маблағи бор, йўлида хавф-хатар йўқ, бир сўз билан айтганда, ўзи ва яқинларига ҳеч қандай зиён-захмат етказмайдиган мўмин учунгина Ҳаж ибодати фарз бўлади.
Қадимда ҳажни ният қилган ёки Байтуллоҳ сари қутлуғ сафарга чиққан айрим мўмин-мусулмонлар турли тасодифлар туфайли зиёратни амалга ошира олмагани ёки ярим йўлдан ортга қайтгани, лекин шунга қарамай уларнинг бу улуғ ибодати Аллоҳ таолонинг даргоҳида ижобат бўлгани тўғрисида кўплаб ривоятлар бор. Масалан, улуғ аллома Абдуллоҳ бин Муборак ҳажга кетаётиб, Куфа шаҳрида ўта ночор бир оилага дуч келади ва бор маблағини ушбуйўқсилларнинг кийим-кечак ва озиқ-овқати харидиучун сарфлаб юборади. Оқибатда сафарни давом эттира олмай ортга қайтишига тўғри келади. Буни қарангки, уни кутиб олган ҳамюртлари ҳожилик мартабаси билан муборакбод этаркан, аллома улардан узр сўраб, ҳажни адо эта олмаганини билдиради. Яратганнинг карами шу қадар кенг эканки, айримлар унга эътироз билдиради: “Во ажаб, ахир, ҳажда бирга бўлиб, сиздан ёрдам олдим-ку”, “Ташна бўлиб, чарчаб қолганимизда бизга сув бериб, чанқоғимизни бостирдингиз”, “Фалон жойдан совға-салом олиб, бизга тортиқ қилдингиз...”. Шу тунда тушида Абдуллоҳ бин Муборакка садақа ва эҳсони эвазига Парвардигорнинг ҳузурида ҳажжи қабул бўлгани аён этилади.
Улуғ ибодат ниятида бўлган қадрли ҳамюртлар! Барчамиз мавжуд шароитдан келиб чиққан ҳолда, оқилона ва одилона фикр юритиб, Саудия Арабистони ҳукуматининг мазкур қарорига тўғри баҳо берайлик ва холисона ёндашайлик. Келаси ҳаж мавсумигача Қодир Аллоҳ ҳар биримизга сабру жамил ато этсин. Орамизда яхши ният билан Абдуллоҳ бин Муборакнинг хайрли амалини такрорлашни ихтиёр қилганларга Яратганнинг Ўзи ҳожилик мақомини бериб, садақа ва эҳсони воситаси ила уларни мана шу юксак мартабага кўтарсин.
ЎМИ Самарқанд вилоят вакили, вилоят бош имом-хатиби З.Эшонқулов