Буюк саҳобий Адий ибн Ҳотам розияллоҳу анҳу чумолиларга нон ушоқларини бера туриб: “Булар бизнинг қўшниларимиздир. Устимизда уларнинг ҳам ҳақлари бор” дер эдилар.

*****

Умар ибн Абдулазиз раҳимаҳуллоҳ вафот этганларида Византия императори Лев III қаттиқ йиғлади. Буни кўрган аъёнлар ва епископлар бу йиғининг сабабини сўради. Шунда император: “Адолатли подшоҳ вафот этди. Мен бир роҳиб уйига кириб, ичидан беркитиб олиб, таркидунё қилиб, умрини ибодатда ўтказса ажабланмайман. Лекин дунё оёқлари остида бўлган бир инсоннинг дунёдан юз ўгириб, зоҳидона ҳаёт кечирганидан ажабланаман” деди.

*****

Ҳозир дунёнинг аксар мусулмонлари Қуръони Каримни Имом Ҳафснинг Имом Осимдан ривоят қилган тиловатида ўқишади. Хўш, Имом Ҳафс ва Имом Осим ким?

Имом Ҳафс ибн Сулаймон ибн Муғийра Асадий ҳижрий 90 санада таваллуд топганлар. У киши қироатни Имом Осим ибн Абуннажуд ибн Баҳдала ал-Асадий ал-Кўфийдан ўрганганлар. Имом Осим қироатни Абу Абдурраҳмон ас-Суламий, Зирр ибн Ҳубайш ва Саъд ибн Илёслардан олганлар. Буларнинг ҳар уччови ҳам Қуръонни Абдуллоҳ ибн Масъуд розияллоҳу анҳудан таълим олган. Зирр ибн Ҳубайш ва Абу Абдурраҳмонлар Али  розияллоҳу анҳуга ҳам Қуръонни ўқиб берганлар. Абу Абдурраҳмон Суламий Убай ибн Каъб ва Зайд ибн Собит розияллоҳу анҳумларга ҳам ўқиб берган. Усмон, Али, Убай ва Зайд розияллоҳу анҳум бу қироатни Расулуллоҳ соллаллоҳу алайҳи васалламдан олганлар. Демак, имом Осим қироатни Расулуллоҳ соллаллоҳу алайҳи васалламдан икки восита орқали ривоят қилган.

*****

Ҳорун ар-Рашид сув ичмоқчи бўлиб, идишни оғзига қўйди. Ибн Саммок раҳимаҳуллоҳ Ҳорун ар-Рашиднинг томоғига қўлини қўйиб: “Шу бир қултум сувни ичишни сендан ман қилсам, у сувни мендан қанчага сотиб олган бўлардинг?” деб сўради. Ҳорун: “Салтанатимни ярмига” деди. Олим унинг томоғидан қўлини олди. Халифа сувни ичиб бўлгач, Ибн Саммок яна сўради: “Агар шу ичган сувингни баданингдан чиқишини ман этсам, сув танангдан чиқиши учун қанча берардинг?” деб сўради. Ҳорун: “Салтанатимнинг қолган ярмини” деб жавоб берди. Шунда Ибн Саммок раҳимаҳуллоҳ: “Сенинг салтанатингнинг қиймати бир қултум сувчаликдир. Шунинг учун бу молу давлат мусобақа қилинишга арзимайди” деди. Буни эшитган Ҳорун йиғлади.

*****

Саъд ибн Муоз розияллоҳу анҳу Исломга кирганларида ёшлари 30 да эди. Вафот этганларида эса ёшлари 36 да эди. Бу улуғ саҳобий шу 6 йил ичида қандай амаллар қилдиларки, у кишининг вафоти сабабли Раҳмоннинг Арши титраб, жанозаларига 70 мингта фаришта ҳозир бўлди. Расулуллоҳ соллаллоҳу алайҳи васаллам ушбу буюк инсонни дафн қилганларидан сўнг: “Албатта, қабрнинг бир қисиши бордир. Агар бирор киши шу қисишдан қутулиб қолганда, Саъд ибн Муоз қутилиб қолган бўларди” дедилар.

*****

Салоҳиддин Айюбий раҳимаҳуллоҳ шундай дедилар: “Модомики Масжидул Ақсо босқинчилар қўлида экан, Аллоҳга қасамки, кулгани Аллоҳ таолодан ҳаё қиламан”.

*****

Қуртуба амири Муҳаммад Биринчи ибн Абдураҳмон 852-886 йиллар давомида амирлик қилган. У мана шу 34 йиллик ҳукмронлиги давомида кўп ислоҳотлар олиб борди. Шулардан бири Мажрит, яъни ҳозирги Мадрид шаҳрига асос солди.

Интернет маълумотларидан Нозимжон Иминжонов таржимаси

Wired илмий-оммапоп журнали Истанбулдаги Боязид давлат кутубхонасини дунёнинг энг гўзал кутубхоналари ўнталигига киритди. Ушбу кутубхона тўртинчи ўринда қайд этилган бўлиб, 1884 йилда асос солинган. Ушбу кутубхона дастлаб "Умум Усмоний кутубхонаси" дея номланган.

Ушбу кутубхона ўқувчиларга 1 миллиондан ортиқ ҳужжутлар билан танишиш имкониятини беради. islamisemya.com нашрининг маълум қилишича, кутубхона фондида 11 120 дона қўлёзма асарлар ўрин олган бўлиб, уларнинг ичида нодирлари ҳам мавжуд.

Wired илмий-оммапоп журнали томонидан тузилган рўйхатда 1-ўринда Даниядаги Dokk1 кутубхонаси, 2-ўринда АҚШнинг Вермонт штатидаги Лоуренс жамоат кутубхонаси, 3-ўринда эса Хитойнинг Чжэнь Юань шаҳридаги Янчжоу кутубхонаси қайд этилган.

5-6 ўринларни Норвегиядаги Веннесла ва Будё кутубхоналари эгаллаган.
7-ўрин Чикаго, 8-ўрин Бирминҳем, 9-ўрин Галифакс (Канада), 10-ўрин эса Монтерре шаҳри (Мексика)даги Конарт кутубхоналарига насиб этган.

Ўзбекистон мусулмонлари идораси Матбуот хизмати

Президент Шавкат Мирзиёевнинг Бирлашган Араб Амирликларига расмий ташрифига Ҳиндистон матбуоти ҳам алоҳида эътибор қаратди.

Жумладан, “India Blooms” интернет-портали Ўзбекистон билан Бирлашган Араб Амирликлари ўртасида 1992 йил 25 октябрда дипломатик муносабатлар ўрнатилгани тўғрисида “Ўзбекистон билан БАА савдо-иқтисодий ва сармоявий ҳамкорликни кенгайтиришга келишиб олди" номли мақола чоп этди.

Нашрнинг таъкидлашича, 2018 йилда мамлакатлар ўртасидаги товар айланмаси 400 миллион АҚШ долларини ташкил этган ва бу кўрсаткич аввалги йилларга нисбатан кўпдир. Шунингдек, мақолада ташриф доирасида ўзаро муносабатларни ҳар томонлама кенгайтириш, савдо-иқтисодий, сармоявий, инновацион, банк-молия ва маданий-гуманитар соҳаларда амалий ҳамкорликни мустаҳкамлаш масалалари муҳокама қилингани қайд этилган.

Бундан ташқари, Ўзбекистон билан БАА ўртасида туризм соҳасидаги ҳамкорликни ривожлантириш учун улкан салоҳият мавжудлиги таъкидланган. Ўзбекистоннинг тарихий обидалари ва муқаддас қадамжолари, бой маънавий ва маданий мероси, гўзал табиати Амирликлар аҳолисида катта қизиқиш уйғотади. Ўтган йили БААдан юртимизга келган саёҳлар сони 1,5 баробар ўсди.

Ҳиндистоннинг энг оммабоп «News18.com» ахборот портали Ўзбекистон билан Бирлашган Араб Амирликлари ўртасида инвестиция, молия ва муқобил энергия манбалари каби соҳаларда ҳамкорлик бўйича умумий қиймати 10 миллиард доллардан ортиқ бўлган келишувларга эришилганига урғу берди.

«Diplomacy India», «Diplomacy Today» ва «Sarkaritel» онлайн нашрлари ҳам давлатимиз раҳбарининг ташрифга бағишланган мақолалар эълон қилди. Ушбу мақолаларда Ўзбекистон Республикаси билан БАА ўртасида Қўшма баёнот қабул қилингани алоҳида таъкидланади. Шунингдек, томонлар инвестициялар, молия, муқобил энергия, саноат ва инфратузилмани ривожлантириш, қишлоқ хўжалиги, божхона маъмуриятчилиги, маданият ва бошқа соҳалардаги ҳамкорлик бўйича ҳужжатлар имзолагани қайд этилди.

Ўзбекистон мусулмонлари идораси Матбуот хизмати

Россия фанлар академияси Доғистон илмий маркази Тарих, археология ва этнография институти архивида рақамлаштириш чоғида олимлар Қуръони карим ва Тавротнинг ноёб нашрларини топишди, хабар бермоқда Islam-today нашри.

«Бизда VI асрга тегишли грузин тилидаги Инжилнинг таржимаси мавжуд. Эрон ҳукмдори Нодиршоҳнинг шахсий коллекциясига тегишли бўлган улкан форматдаги Қуръоннинг етти жилдлари бор. Ушбу китоб кейинчалик доғистонлик ҳукмдорлардан бирига туҳфа этилган», - дейди Россия фанлар академияси Доғистон илмий маркази Тарих, археология ва этнография институти Шарқ қўлёзмалари фонди мудири Шамиль Шихалиев.

Айтилишича, рақамлаштирилган барча ҳужжатлардан яқин орада эркин фойдаланиш имкони яратилади.

Ўзбекистон мусулмонлар идораси матбуот хизмати

Янги Зеландиялик спортчи, регби ўйинчиси Офа Туунгафаси бир ҳафта олдин терроричилик ҳужумига учраган Крайстчерч масжидига ташрифи чоғида исломни қабул қилди.

Ummamag.kg хабарига кўра, ушбу масжидга у ўз жамоадош дўсти Сонни Билл Вильямснинг таклифига кўра борган. Вильямснинг онаси ҳам шу куни исломни қабул қилди.

azan.ru нашрининг маълум қилишича, Сонни Билл Вильямснинг ўзи исломни 2008 йилда Сиднейдаги масжидда намоздан кейин қабул қилган. Офа Туунгафаси ва унинг жамоадошлари террорчилик ҳужуми чоғида яраланган жабрланувчиларнинг ҳолидан хабар олиш ва уларга далда бериш мақсадида касалхоналарга боришган. Яраланганлар уларнинг қўлларини сиқиб, суратга тушишган.

Ўзбекистон мусулмонлари идораси Матбуот хизмати