Президент Шавкат Мирзиёев Самарқандга ташрифини ҳар галгидек Ҳазрати Хизр мажмуасини зиёрат қилишдан бошлади.
Бу ҳақда давлат раҳбари матбуот хизмати хабар бермоқда.
Давлатимиз раҳбари Ўзбекистон Республикасининг Биринчи Президенти Ислом Каримов қабрига гул қўйди. Ўтганлар хотирасига Қуръон тиловат қилинди.
Имом Бухорий мажмуаси зиёрати чоғида қадамжони янада обод қилиш, Имом Бухорий номидаги илмий тадқиқот маркази қурилиши, унинг илмий назарий асосларини яратиш масалалари муҳокама қилинди.
Давлатимиз раҳбари вилоятнинг Оқдарё, Иштихон ва Пастдарғом туманларида бўлиб, ҳудудлардаги ижтимоий-иқтисодий ислоҳотларнинг бориши билан танишиб, халқ билан мулоқот қилди.
Ташрифининг иккинчи кунида Президент Шавкат Мирзиёев Миллий гвардия бўлинмаси фаолияти билан танишиди.
Тизимда амалга оширилаётган ишлар, ҳарбийларга яратилаётган шароитлар ҳақида ахборот берилди. Қўшинларнинг қурол-аслаҳа ва алоқа воситалари таъминланиши, ҳарбий хизматчиларнинг жисмоний ва жанговар тайёргарлигига эътибор қаратилди.
Ўзбекистон Қуролли Кучлар Олий Бош Қўмондони вазиятни доимий таҳлил қилиш, хатарларнинг олдини олдини олиш, жамоат хавфсизлигини мустаҳкамлаш бўйича кўрсатмалар берди. Жалолиддин Мангуберди, Амир Темур каби буюк саркардаларимиз ҳарбий маҳоратини ўрганиш, ўқув-тактик методикани ривожлантириш, ҳарбий хизматчиларнинг жисмоний ва руҳий тайёргарлигини ошириш зарурлигини таъкидлади.
Шавкат Мирзиёев замонавий ҳарбий техника ва қурол-яроғларни кўздан кечирди. Таклиф этилаётган ҳарбий кийимлар билан танишди.
Ҳарбий либослар миллийлигимизни акс эттирадиган, тарихда қоладиган бўлиши керак. Шунинг учун бу масалани ҳар томонлама ўйлаш, лойиҳаларни халқ муҳокамасига қўйиш зарур, деди давлатимиз раҳбари.
Президент Шавкат Мирзиёевнинг Самарқанд вилоятига ташрифи ниҳоясига етди.

Ўзбекистон мусулмонлар идораси матбот хизмати

Ўзбекистон мусулмонлари идораси Хоразм вилояти вакиллиги ташаббуси билан, туманлар марказий масжидлари қошида ўтказилаётган сайёр китоб ярмаркаси кеча Хонқа тумани “Халифаи Худойқули эшон бобо” жоме масжидида давом этди. Ушбу сайёр китоб ярмаркасининг ташкил этилиши Хонқалик китобсевар халқимизни мамнун қилмоқда.

Китоб ярмаркаси кейинги ҳафта, 23 март жума куни соат 11:00 дан 15:00 гача Янгиариқ туманидаги “Ҳазрати Ғоиб ота” масжидида бўлади. Китобсевар барча Янгиариқ аҳлини китоб ярмаркасига таклиф этамиз.

ЎМИ Хоразм вилояти вакиллиги

Юртимизда байрам шукуҳи. Қуёш чарақлаб чиққан, дарахтлар чапар уриб гулга кирган якшанба тонгида пойтахтимизнинг энг ҳашаматли тўйхоналаридан бири “Наврўз” ресторани атрофи одамлар билан гавжумлаша бошлади.

Ҳар доим бу ерга тўйу тантаналарга келувчиларни кутиб олиб, ўз бағрида не-не бахтиёр инсонларни меҳмон қилган ресторан бино бўлибдики, ҳали-ҳамон бундай шарафга етиша олмаган эди – бугун бу ерда Ўзбекистон Қуръон мусобақасининг Тошкент шаҳар босқичи бўлиб ўтаяпти.

Мусобақа бошланиши эрталабки 9.00 га мўлжалланган бўлса-да, 8.00 дан ўтиброқ бориб машинамизни қўярга жой тополмай қийналдик. Хавфсизлик ходимлари ёрдам қилиб, аранг бир жой топгандек бўлиб ичкарига кирсак, ичкари лиммо-лим одам.  Ҳамманинг кўзида ҳаяжон, дилида ажиб бир интиқлик – тезроқ бошлана қолса-ю,  тиловатларни тингласак. Ахир, бугун нафақат Тошкентда, балки бутун республикада, борингки, хорижий юртларга ҳам донг таратган қорилар машҳур қорилар, зўрлар беллашади...

Таомилга кўра, Қуръон тиловати билан бошланган мусобақани Тошкент шаҳар бош имом-хатиби Анвар қори Турсунов кириш сўзи билан очаркан, шу ерда ҳозир бўлган ёшларимизга қарата, жумладан, бундай деди: “Қуръонни фақат қулоқ билан эмас, бутун вужуд билан эшитилади. Чунки Қуръон ­– Раббимизнинг Каломи унинг ҳар бир ҳарфини инсоннинг ҳар бир аъзоси ўзининг хос “қулоғи” билан тинглайди. Шунинг учун ҳам уни тинглар эканмиз, танамиз жимирлаб, сўз билан таърифлаб бўлмас даражадаги бир роҳат-фароғатни, улуғвор бир қудратни ҳис қиламиз...”

Юртимизда қишнинг чилласида бошланиб кетган Қуръон мусобақаси шарофати билан Ватанимизга қут-барака  ёғилди. Олис-яқиндаги бизникига ўхшаган қуруқ иқлимли ўлкаларда бошланиб кетган қурғоқчилик юртимизни четлаб ўтиб кетди. Ушбу мусобақани кузатиб бораётган хорижлик биродарларимизни мусобақани тинглашга бунчалик кўп одам тўпланаётгани ва қориларимизнинг маҳорати ҳайратга солаётган экан.

Ахир, нега бормайлик, бу ерда Аллоҳнинг Каломи зикр этилса, дуоси мустажоб бўладиган азизлар қўлларини кўтариб биздан умидвор ётганларимизнинг ҳам ҳақларига дуолар қилса... ўша зотлардан бирини уйимизга чақириб келамиз деб дастурхонлар безасак, илтижолар қилсак, ­- ё вақти бўлади ё бўлмайди. Шундай қулайликдан фойдаланиб қолмасак нодонлик қилган бўлмаймизми!..

“Ўзбекистон Қуръон мусобақаси — 2018” ташкилий қўмитаси раиси Абдулҳаким Матқулов бир гапни айтдики, бу бизнингча, Қуръон мусобақаси ва унинг ташаббускорига берилган энг ажойиб таърифдир. Диққат қилинг: “Андижонда 94 ёшга кирган онахон бор экан. Фазилатли онахон эрта-ю кеч мусобақа масъуллари ва қатнашчилари ҳаққига дуолар қилиб ўтирар экан. Ўша онахон “Президентимиз мамлакатимизни, миллатимизни Қуръон билан даволамоқда”, деди”.

Дарҳақиқат, юртимизга Қуръони карим шарофати ила файзу барака ёғилиб, тараққиётнинг боғланиб турган йўллари очилиб кетган бўлса; инсонларнинг кўнгли оятлар билан ёришди, қалбидаги қурумлари кўзёшлари билан кўчди, гуноҳлари дуолар билан ювилди.

Мусобақада “энг яхши дуогўй” ҳам деган номинация бўлганида эди, шу номинация бўйича биринчи ўринга ўша онахон муносиб топилган бўларди, тўғрими?

Қуръон мусобақаси ҳозир авж палласига чиқди, энди мураттаб қориларимиз беллашуви бошланади. Унга шошилинг, азизлар!

Дамин ЖУМАҚУЛ

ЎМИ Матбуот хизмати

Ўзбекистон Республикаси Халқ таълими вазирлиги матбуот хизматидан олинган маълумотларга кўра, барча умумтаълим мактаби ўқувчиларининг учинчи чорак якунидаги таътил кунларини мазмунли ўтказишга оид режа тузилди. Унга кўра, юртимизнинг маданий мероси, тарихий обидалари, зиёратгоҳлари, муқаддас қадамжолари, ноёб табиати, замонавий иншоотлари билан яқиндан таништириш мақсадида ички туризм тадбирлари ташкил этилади. ЎзА хабарига кўра, унда ўқувчилар билан бирга, ота-оналар ҳам иштирок этади.
18-22 март кунларида 2 минг 200 оила (4 минг 400 нафар ота-она ва 6 минг 600 нафар фарзандлар) туристик саёҳатларда қатнашади. Шунингдек, 18-26 март кунлари умумтаълим муассасаларида ташкил этиладиган бир минг саксонта гуруҳда 2 мингдан зиёд ўқитувчи 16 минг 200 ўқувчини юртимизнинг диққатга сазовор жойлари бўйлаб саёҳатга олиб чиқади.
Пойтахтимиздаги Меҳрибонлик уйларининг 50 нафар тарбияланувчисини зиёратгоҳ ва муқаддас қадамжолар билан таништириш мақсадида “Соғлом авлод учун” халқаро хайрия фонди билан ҳамкорликда Самарқанд шаҳрига саёҳати уюштирилади.

Ўзбекистон мусулмонлар идораси матбуот хизмати