Борини эл-юрт билан баҳам кўрадиган халқимиз ўзининг тўйлари билан машҳур. Нуронийларимиз ҳам дуларида “Топганинг тўйларга буюрсин, илоҳо” дейишади. Азал-азалдан шаклланиб келган, тўйларимиз билан боғлиқ чиройли урф-одатларимиз, эзгу-қадрият даражасида кўтарилган. Сабаби, уларга ўзбек халқининг бой маънавий мероси, маданияти акс этган. 

Аммо, кейинги пайтларда дабдабабозлик, манманлик, ким ўзарга тўй қилиш, катта исрофгарчиликка йўл қўйиш каби ортиқча иллатлар, турли одамлар томонидан ўйлаб топилиб, жорий этилаётган қадриятларимизга мутлақо мос келмайдиган янгича урф-одатлар авж олаётгани кишининг дилини хира қилади. 

Бу жиддий масалани Президентимиз Шавкат Мирзиёев ижод аҳли билан учрашганларида шахсан тилга олиб ўтдилар. Беҳуда одатлардан воз кечган ҳолатда, аввало, юртдошларимизнинг соғлигини, моддий ва маънавий дунёсини асрашга қаратилган сўзларни таъкидлаб ўтдилар. 

Тўй қилаётган оилаларга қийин бўлмаслиги учун “Янги пайдо бўлган урф-одатларни” бажараман дея мутлақо ўзини оқламайдиган ортиқча сарф харажатларга қилиб, қарзга ботиб, соғлигини йўқотиб қолаётган ҳамюртларимизни ўйлаб, бундай кўнгилсизликларни олдини олиш тўғрисида куйиниб гапирдилар. 

Дарҳақиқат, муқаддас динимиз ҳам айни шундай авж олаётган исрофгарчилик ва бидъатларга доимо қаршидир. 

Қуръони каримда: “Чунки, исрофгарлар шайтонларнинг биродарларидир. Шайтон эса, Парвардигорига нисбатан ўта ношукур эди (Исро сураси, 27-оят). 

Довуд ва Насаий ривоят қилган ҳадисда Расулуллоҳ (с.а.в.): “Енглар, ичинглар, кийининглар ва садақа қилинглар, исроф ва мутакаббирлик бўлмаса бас”, дедилар. 

Бир хонадонда туғилиб ўсган, бўйи етган, тарбия кўрган қиз йигитнинг уйига бир умрга келин бўлиб, оила аъзоси бўлиб тушишга рози бўлиши ўша хонадон учун йигитнинг уйи учун шарафдир. Никоҳ тўйи мана шунга рози бўлиб келган келиннинг шарафига қилиб берилади. Бундай шароитга кўниб келин бўладиган қиз учун қанча сарф-харажат қилсак ҳам оз, албатта. Агарда дабдабали тўйлар учун қиладиган сарф-харажатларимизни ихчамлаштириб, барпо этилаётган ёш оиланинг келажаги учун сарфлаб, ушбу ёш оилага кейинги ҳаётига ёрдам берсак нур устига, аъло нур бўлар эди. 

Олим ОРИПОВ

Бухоро вилояти Шофиркон тумани

  “Искогаре” жоме масжиди имом-хатиби 

ЎМИ Матбуот хизмати

Қорақалпоғистон Республикасида ғолиблар маълум бўлди

Қорақалпоғистон Республикасида бўлиб ўтаётган Қуръон мусобақасининг ҳудудий босқичлари ғолиблари номи эълон қилинди.

Тиловат йўналиши

18-25 ёш

1. Аметниязов Нурмуҳаммад
2. Қулабоев Икрам
3. Боранбаев Айбек

26-40 ёш

1. Рафелапов Султанбой
2. Джулаушиев Айбек
3. Алламбергенов Илҳам

Ҳудудий босқичнинг ғолиблари Ўзбекистон мусулмонлари идораси ҳамда ҳомийлар томонидан ташкил этилган диплом ва қимматбаҳо совғалар билан тақдирландилар.

Ўзбекистон мусулмонлари идораси Матбуот хизмати

Тошкент вилоятилик бўлажак ҳожи ота ва ҳожи оналар учун Самарқандга зиёрат турлари ташкил этилди. 

Ўзбекистон Республикаси Президентининг ташаббуси билан ташкил этила бошланган “Ўзбекистон бўйлаб саёҳат қил!” шиори остида ўтказилаётган ички туризм дастури бўйича Тошкент вилояти янги йўналишни очиб берди дейиш мумкин. Тошкент вилояти ҳокимлиги ташкил эта бошлаган ушбу янгилик – Тошкент вилоятининг Ҳаж ва Умра сафарига борувчилар рўйхатига киритилган фуқороларни Самарқанднинг муқаддас қадамжолари ва тарихий обидаларига сафар уюштиришдан иборат бўлиб, январь ойининг ўзида 400 нафардан ортиқ маҳаллий сайёҳлар зиёрат амалларини ўз юртимиздан бошлаш имкониятига эга бўлишди. Бу ҳақда Туризмни ривожлантириш давлат қўмитаси Матбуот хизмати хабар берди. 

Тошкент вилоятидан 2018 йилда Умра сафарига борувчи фуқоролар Самарқанд вилоятидаги “Имом ал-Бухорий” йодгорлик мажмуаси, “Гўри Амир” мақбараси, Регистон ансамбли, Шохи Зинда, Хўжайи Донёр мақбаралари ҳамда Ўзбекистон Республикасининг биринчи Президенти И.Каримов қабрларига зиёрати ташкил этилди. Зиёратчиларга замонавий қулай автобусларда хизмат кўрсатмоқда ва уларнинг дам олиш ҳамда овқатланишлари учун шинам меҳмонхоналар, ресторанлар ажратилган. 

Вилоят ҳокимлиги томонидан ташкил этилган 2017 йилнинг 26-27 декабрь ҳамда шу йилнинг 13-14 январь кунлари давом этган саёҳатда 300 дан зийод сайёҳ қатнашиб, маҳаллий зиёратгоҳларга сафар қилишган бўлса, жорий йилнинг март ойига қадар яна 700 нафар зиёратчи ушбу қизиқарли дастур иштирокчиси бўлиш нийятини билдирган.

ЎМИ Матбут хизмати

“Ўзбекистон Қуръон мусобақаси-2018” мамлакатимизнинг бир қанча ҳудудларида кўтаринки руҳда бошланди. Жумладан, шу кунга қадар Сирдарё, Жиззах, Самарқанд, Бухоро, Навоий вилоятларида мусобақанинг саралаш босқичи якунланган бўлса, бугун, 24 январь куни мусобақанинг ҳудудий босқичи Қорақалпоғистон Республикаси ва Хоразм вилоятида бўлиб ўтмоқда.

Саралаш босқичлари бўлиб ўтмаган ҳудудларда эса нафақат иштирокчилар, балки мухлислар ҳам мусобақанинг бошланишини интизорлик билан кутишмоқда. Буни шаҳар марказларида осилган реклама баннерларининг ижтимоий тармоқларда жойлаштирилаётгани ва уларга интернет томонидан билдирилаётган фикр-мулоҳазалардан ҳам билиш мумкин.

Жумладан, Ўзбекистон мусулмонлари идорасининг Қашқадарё вилояти вакиллигининг Фейсбук саҳифасида Қуръон мусобақасига тайёргарлик шукуҳи вилоятда ҳам ўзгача экани айтилади. Қуръон мусобақаси 2018 йил 5 февраль куни Шаҳрисабз шаҳридаги Ёшлар саройида, 6 февраль куни Қарши шаҳридаги “Бахтли оила” кошонасида ҳамда 7 февраль куни қориялар (аёллар) учун Қарши шаҳридаги “Қум қишлоқ” жоме масжидида ўтказилиши белгилангани таъкидланади.

Вилоят вакиллиги Қуръон мухлисларини мусобақа таклиф қилиб, кўчаларда катта ҳажмдаги эълонларни жойлаштирган.

ЎМИ Матбуот хизмати