Манғистов вилояти бўйича амалга оширилган экспедицияси чоғида аввал минтақа ҳокимияти вакилларига номаълум бўлган қадимги диний иншоотлар топилди, деб хабар бермоқда «Хабар 24» телеканали.
Май ойидан ноябрь ойигача ўтказилган экспедиция чоғида тадқиқотчилар XIX—XX асрларда қурилган бешта масжид ва йигирмадан ортиқ эски қудуқларни аниқлашди.
Sputniknews.kz хабарига кўра, ҳар бир ерости масжидида меҳроб ва бошқа зарур шароитлар мавжудлиги аниқланган.

Ўзбекистон мусулмонлар идораси Матбуот хизмати

Мамлакатимизга ташриф буюрган Саудия Арабистони Қироллиги Савдо-саноат палатаси кенгаши раиси Сами бин Абдуллоҳ ал-Убайдий бошчилигида делегация билан Ўзбекистон Республикаси Давлат туризм қўмитаси раисининг биринчи ўринбосари вазифасини бажарувчи У.Қосимхўжаев учрашув ўтказди.
Давлат туризм қўмитаси матбуот хизматига кўра, учрашув давомида мамлакатимизнинг сайёҳлик салоҳияти тўғрисида роликлар намойиш этилди. Хусусан эркин иқтисодий ҳудудлар, туристик ҳудудлар ва зиёрат туризмини ривожлантириш имкониятлари ҳақида ахборотлар тақдим этилди.
Саудия томони Ўзбекистоннинг сайёҳлик салоҳияти ва ҳамкорлик учун имкониятларни юқори баҳолашди.
– Саудия Арабистонининг 2030 йилгача белгиланган режалари мамлакатга инвестицияларни жалб қилиш билан бирга чет давлатларига сармояларни йўналтиришни ҳам ўз ичига олган, – деди Сами бин Абдуллоҳ ал-Убайдий. – Ўйлайманки, мамлакатларимиз ишбилармон доиралари ўртасидаги учрашувлар, музокаралар Саудия Арабистонининг Ўзбекистонга инвестиция киритишини енгиллаштиришга хизмат қилади.
ЎзА билдиришича, Саудия Арабистони делегацияси таркибида озиқ-овқат, қишлоқ хўжалиги, тўқимачилик саноати, минерал ресурслар, қурилиш, электроника каби соҳаларда фаолият олиб борувчи 20 дан зиёд компания вакиллари ўрин олган. Саудия Арабистони Қироллиги Савдо-саноат палатаси вакиллари азим пойтахтимизнинг диққатга сазовор жойларини, хусусан, "Ҳазрати Имом" мажмуасини зиёрат қилдилар. Меҳмонлар мажмуадаги тарихий обидалар, мақбаралар ва "Ҳазрати Усмон Мусҳафи" тарихи билан таншидилар.

Ўзбекистон мусулмонлар идораси матбуот хизмати

Буюк олим, тасаввуфнинг улуғ вакилларидан бири Шақиқ Балхий раҳимаҳуллоҳ билан унинг шогирди Ҳотамул Асом раҳимаҳуллоҳ ўртасида савол-жавоб тарзида ажойиб суҳбат бўлиб ўтган. Қуйида ана шу суҳбатни эътиборингизга ҳавола этамиз.

• Менинг ёнимда неча йилдан бери юрибсан?
• Ўттиз уч йилдан бери.
• Шу муддат ичида мендан нималарни ўргандинг?
• Саккизта масала ўргандим.
• Иннаа лиллааҳи ва иннаа илайҳи рожиъуун. Умримнинг кўп қисми сен билан ўтди, аммо сен фақат саккизта масала ўргандингми?
• Устоз, ёлғон гапиришни ёқтирмайман, ҳа, шундай, ўша саккизтадан бошқа нарса ўрганмадим.
• Қани, ўша ўрганганларингни айтчи, эшитайчи. 

• Биринчиси, мен одамларга назар солсам, ҳар бирлари бирор шахсни яхши кўришар, вафот этиб, қабрга боришганда эса ўша яхши кўрганларидан ажралишар экан. Шунинг учун мен ўзимнинг ҳасанотларимни яхши кўрдим. Қабрга кирганимда ҳам ўша ҳасанотларим мен билан бирга киради. 

Иккинчиси, мен Аллоҳ таолонинг “Ва, аммо ким Роббисининг мақомидан қўрққан ва ўз нафсини ҳаволаниб кетишидан қайтарган бўлса. Бас, албатта, жаннат ўрин бўладир” (Назиат, 40-41-оятлар) деган оятига назар солдим ва нафсимни ҳавойи нарсаларни даф қилишга мажбур этдим. Охири у Аллоҳнинг тоатини қиладиган бўлди. 

Учинчиси, қарасам, ҳар бир одам ўзи учун қадрли бўлган бирор нарсани ўзида сақлаб, эҳтиётлаб юрар экан. Кейин Аллоҳ таолонинг “Сизнинг ҳузурингиздаги нарса тугайдир. Аллоҳнинг ҳузуридаги нарса эса, боқийдир” (Наҳл, 96-оят) деган оятига назар солдим ва ҳар сафар қўлимга қадрли, қимматли нарса (пул, мол) тушса, уни Аллоҳ таолонинг йўлида ишлатиб, охиратимга захира қилиб қўявердим. 

Тўртинчиси, инсонларга назар солдим ва уларнинг ҳар бирлари ўзининг моли, насаби, аждодлари билан мақтанишини кўрдим. Кейин Аллоҳ таолонинг “Албатта, Аллоҳнинг ҳузурида энг ҳурматлигингиз энг тақводорингиздир” (Ҳужурот, 13-оят) деган оятига аҳамият қаратдим ва Аллоҳ таолонинг наздида ҳурматли бўлиш учун тақвога қаттиқ эътибор бердим. 

Бешинчиси, инсонларга назар солдим ва уларнинг бир-бирларига таъна қилишларини, бир-бирларини лаънатлашларини кўрдим. Буларнинг ҳаммаси ҳасад туфайли эканини тушундим. Кейин Аллоҳ таолонинг “Биз ҳаёти дунёда уларнинг ораларида маишатларини тақсимладик” (Зухруф, 32-оят) деган оятига назар солдим ва ҳасадни тарк этдим, одамлардан четландим. Билдимки, ризқ борасидаги тақсимот Аллоҳ таолонинг ҳузуридан экан. 

Олтинчиси, инсонларга назар солдим ва уларнинг бир-бирларига душманлик қилишларини, бир-бирлари билан урушишларини кўрдим. Кейин Аллоҳ таолонинг “Албатта, шайтон сизга душмандир. Бас, уни душман тутинг” (Фотир, 6-оят) деган оятига аҳамият қаратдим ва одамларнинг душманчилигини тарк этиб, шайтоннинг ўзини душман тутиб, ундан эҳтиёт бўлдим. 

Еттинчиси, инсонларга назар солдим ва уларнинг ризқ талабида ўзларини қийнаб, хор қилиб, ҳалол бўлмаган йўлларга ҳам кириб кетишларини кўрдим. Кейин Аллоҳ таолонинг “Ер юзида ўрмалаган нарса борки, уларнинг ризқи Аллоҳнинг зиммасидадир” (Ҳуд, 6-ояти) деган оятига назар солдим ва мен ҳам ўша ўрмалаганларнинг бири эканимни англаб етдим. Шунинг учун Аллоҳ таолонинг менга юклаган нарсалари (ибодат) билан машғул бўлдим, У ўз зиммасига олган нарса (ризқ) учун ғам қилишни тарк этдим. 

Саккизинчиси, инсонларга назар солдим ва уларнинг ўзларига ўхшаган махлуққа суянишларини кўрдим. Бири дала-ҳовлисига суянади, бошқаси тижоратига суянади, яна бири қўлидаги ҳунарига суянади, буниси эса танасининг соғломлигига суянади. Кейин Аллоҳ таолонинг “Ким Аллоҳга таваккал қилса, бас, унга У зотнинг Ўзи кифоядир” (Талоқ сураси, 3-оят) деган оятига назар солдим ва одамларга суяниш, таваккул қилишни тарк этиб, Аллоҳ таолога таваккул қилиб, У зотга суянишга жидду-жаҳд қилдим, бас, Унинг Ўзи менга кифоядир. 

• Аллоҳ сенинг илмингга, умрингга, ризқингга барака берсин!  

Манбалар асосида Нозимжон Иминжонов тайёрлади

14 декабрь куни Тошкент шаҳридаги “Шайх Зайниддин” жоме масжидининг мажлислар залида Тошкент шаҳар отинойилари учун Фарғона вилояти бош имом-хатиби Салим қори Қодировнинг “Аёлни эъзозлаган дин” китобининг тақдимоти бўлиб ўтди.

Тақдимотда Дин ишлари бўйича қўмита раисининг ўринбосари Нуриймон Абулҳасан, Ўзбекистон мусулмонлари идораси мутахассиси Мунира Абубакирова ва Тошкент шаҳар отинойилари қатнашишди.

Нуриймон Абулҳасан ҳозирги вақтда оилаларда аёлларга нисбатан қилинаётган салбий муносабатларнинг кўпайиб кетганлиги ҳақида гапириб ўтди. Сўзга чиққан нотиқлар Ислом дини аёлни нақадар улуғлаганини таъкидлаб, “Аёлни эъзозлаган дин” китобининг нашр этилгани айни муддао бўлганини билдирдилар.

Отинойилар томонидан берилган саволларга жавоб берилди. 

13 декабрь куни Ўзбекистон мусулмонлари идораси ташаббуси билан кўзи ожизлар иштирокида тадбир ўтказилди. Тадбирда кўзи ожизлар жамиятининг 60 нафардан зиёд аъзолари катнашди. Унда “Қабристонга бориш одоблари” мавзусида маъруза қилинди. Маърузадан сўнг иштирокчилар ўзларини қизиктирган саволлари билан мурожаат қилишди. Барча иштирокчиларга “Бидьат-хурофотларни бартараф этиш бўйича тавсиялар” мавзусида буклет тарқатилди. 

Ўзбекистон мусулмонлари идораси Матбуот хизмати

уйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган. 

*****

Агар сенга сифатли хизмат қилишларини хоҳласанг, ўзингга ўзинг хизмат қил.

“Тарих муҳрлаган сўзлар”

*****

Сўзларида мантиғи йўқ киши билан суҳбат қилишга уриниш ўлик жасадга дори беришга уринишга ўхшайди.

“Тарих муҳрлаган сўзлар”

*****

Нафсга оғир келадиган нарсалардан бири – айтишга муҳтож бўлиб турган нарсангни яширишингдир.

Нажиб Маҳфуз

*****

Қисқача қилиб айтганда, одамларга сен ҳақингда кўп нарса билишларига имкон берма!

“Тарих муҳрлаган сўзлар”

*****

Маймунлар машинани эгаллаб олдилар. Лекин улар уни бошқара олмайдилар. Эгаллаб олиш дегани, уни яхши бошқариш дегани эмас. Босиб олувчилар, тортиб олувчилар, эгаллаб олувчилар жуда кўп, аммо уни эплаб бошқара оладиганлар жуда ноёбдир.

“Тарих муҳрлаган сўзлар”

*****

Заковатинг ошгани сайин (атрофингда бўлаётган ноҳақликларни кўриб) ғам, ножамлигинг ҳам ошиб боради. Аҳмоқлар эса ҳеч нарсага эътибор бермай, шоду хуррамликда хурсанд бўлиб юраверадилар.

“Тарих муҳрлаган сўзлар”

*****

Кўпинча сен эшитишни хоҳламаётган насиҳат, аслида сен муҳтож бўлган (эшитишинг керак бўлган) насиҳатдир.

“Тарих муҳрлаган сўзлар”

*****

Бироз сабр қил. Ёлғонлар узоқ яшамайди. Ҳақиқат эса замон ўтиши билан кўринади. Сен яқин орада буни тушуниб етасан.

“Тарих муҳрлаган сўзлар”

*****

Бўри арслон ва йўлбарсдан заифроқ ҳайвон. Лекин у ҳеч қачон циркда томоша кўрсатмайди.

“Тарих муҳрлаган сўзлар”

Интернет материалларидан тўплаб, таржима қилувчи

Нозимжон Иминжонов