muslim.uz
Туркманистон Президенти Шавкат Мирзиёевга мактуб юборди
Туркманистон Республикаси Президенти Гурбангули Бердимуҳамедов Ўзбекистон Республикаси Президентига икки мамлакат ўртасидаги дипломатик муносабатлар ўрнатилганининг 25 йиллиги муносабати билан табрик мактубини йўллади. Ушбу мактубнинг тўлиқ матни ЎзА да эълон қилинди.
Ўзбекистон Республикаси Президенти Шавкат Мирзиёев Жаноби Олийларига
Муҳтарам Шавкат Миромонович!
Азиз қардошим!
Туркманистон халқи ва ҳукумати номидан ҳамда шахсан ўз номимдан Туркманистон ва Ўзбекистон Республикаси ўртасида дипломатик муносабатлар ўрнатилганининг 25 йиллиги муносабати билан Сиз ва бутун қардош Ўзбекистон халқини самимий табриклаш ва эзгу тилакларимни йўллаш мен учун улкан шараф.
Дипломатик муносабатлар ўрнатилганидан буён ўтган 25 йилда қардошлик алоқаларимиз фаол ривожланди ва изчил мустаҳкамланиб бормоқда. Давлатлараро муносабатларнинг бугунги юксак даражасини қайд этар эканман, Туркманистон ва Ўзбекистон ўртасидаги яхши қўшничилик, дўстлик ва ўзаро англашув тамойилларига асосланган ҳамкорлик янада жадал ва изчил, ўзаро ишонч, тенг ҳуқуқлилик, очиқлик руҳида ривожланаётганини алоҳида таъкидламоқчиман.
Икки томонлама алоқаларни ривожлантирар эканмиз, биз туркман ва ўзбек халқлари ўртасида шаклланган азалий қардошлик ва ўзаро ҳурмат анъаналарига, маънавий ва тарихий қадриятлар муштараклигига, давлатларимизнинг халқаро муносабатларда тинчликсеварлик ва инсонпарварлик тамойилларига содиқлигига таянамиз. Бугунги кунда мамлакатларимиз нафақат икки томонлама, балки халқаро тузилмалар доирасида ҳам муваффақиятли ҳамкорлик қилмоқда. Глобал ва минтақавий миқёсдаги нуфузли ташкилотлар доирасида мамлакатларимиз томонидан илгари сурилаётган халқаро ташаббус ва таклифлар ўзаро қўллаб-қувватланаётгани шундан далолат беради.
Туркманистон ва Ўзбекистон ўртасидаги савдо-иқтисодий алоқалар изчил ривожланмоқда. Маданият, илм-фан соҳаларидаги ҳамкорлик тобора кенгаймоқда ва мустаҳкамланмоқда. Савдо-иқтисодий, илмий-техник ва маданий ҳамкорлик бўйича Туркманистон – Ўзбекистон қўшма комиссиясининг фаолияти бунда муҳим аҳамият касб этмоқда.
Ҳурматли Шавкат Миромонович!
Туркманистон мамлакатларимиз ўртасидаги вақт синовидан ўтган сиёсий, иқтисодий, маънавий-маданий алоқаларни бундан буён ҳам мустаҳкамлашга тайёр. Ишонаманки, Туркманистон ва Ўзбекистон муносабатлари келажакда ҳам қардош халқларимиз фаровонлиги йўлида муттасил ривожланиб бораверади.
Азиз қардошим, мактубим якунида Сизнинг Туркманистон – Ўзбекистон ҳамкорлигига шахсан қаратаётган алоҳида эътиборингиз учун миннатдорлик билдиришга, Сизга мустаҳкам соғлиқ, давлат раҳбари сифатида қардош Ўзбекистон Республикаси тараққиёти ва унинг халқи фаровонлиги йўлидаги масъулиятли фаолиятингизга янги зафарлар тилашга ижозат бергайсиз.
Юксак ҳурмат билан,
Гурбангули Бердимуҳамедов,
Туркманистон Президенти
Ўзбекистон “Осиё лочини” деб эътироф этилди
Швейцарияда нашр этиладиган “Diva International” журнали саҳифасида “Осиё лочинининг парвози: Ўзбекистоннинг 2018 йилга мўлжалланган юксак режалари” сарлавҳали мақола босилди. Унда мамлакатимизнинг замонавий ривожланиши ҳамда истиқболига оид маълумотлар атрофлича қаламга олинган, деб ёзади “Жаҳон” ахборот агентлиги.
“Худди лочин ерни пастда қолдиргани ҳолда тобора юқорига кўтарилиши сингари Ўзбекистон ҳам ўзининг янги раҳбари бошчилигида ривожланиш ва фаровонликнинг янги қирраларини забт этиш йўлида чуқур ва туб ислоҳотларни ҳаётга тадбиқ этиш асносида қанотлари билан юксалмоқда.
Президент Шавкат Мирзиёевнинг узоқни кўзлаган бошқаруви остида Ўзбекистоннинг замонавий ривожланишини айнан шундай таърифлаш мумкин. 2017 йилнинг декабрида у миллий парламентга Мурожаатнома тақдим этиб, ўтган йилнинг якунларини сарҳисоб қилгани баробарида яқин истиқболга мўлжалланган кенг қамровли ислоҳотлар тўғрисида ҳам батафсил тўхталди.
Қайд этилганидек, давлат раҳбари Мурожаатномаси Ўзбекистон етакчисининг иқтисодиёт, жамият ва сиёсатдаги мавжуд муаммоларни нақадар теран англашини ҳамда уларни бартараф этиш бўйича жуда оқилона таклифлар билдирилганини намоён этди. Мамлакат парламенти аъзолари ҳамда сиёсатчиларга аниқ ва лўнда қилиб “Уйғониш вақти етди, халқ давлат органларига эмас, балки давлат органлари халққа хизмат қилиши керак”, дея даъват этгани тушунарли ҳолдир”.
Мақолада Ўзбекистон тарихида биринчи маротаба бўлган мазкур Мурожаатномада ўз ифодасини топган айрим жиҳатларга алоҳида эътибор қаратилган.
“Биринчидан, бу ўтган йиллар давомидаги ҳаққоний бўлмаган рақамлар ортидан қувиш ва номақбул иш услубларини танқид қилиш. Шу боис Марказий банк ҳамда халқаро молиявий институтлар томонидан текширилган аниқ-равшан рақамларга мувофиқ, 2017 йилда ялпи ички маҳсулот ўсиши 5,5 фоизни ташкил этиши эълон қилинди.
Шавкат Мирзиёев 2017 йил cентябрида валюта тизимини либераллаштиришга киришгани ҳолда иқтисодиётни ислоҳ этиш йўлида жуда дадил қадам ташлади. У, шунингдек, мамлакат фаровонлигининг қудратли ҳаракатлантирувчи кучи сифатида кичик ва хусусий бизнес мустаҳкамланишининг жиддий тарафдори ҳамдир. Тадбиркорларни қўллаб-қувватлашни давом эттиргани ҳолда Президент барча тадбиркорлик субектларининг молиявий-хўжалик фаолиятини текширишни 2 йилга тўхтатишни таклиф этди. Шунингдек, давлат раҳбари 2018 йили Ўзбекистон Жаҳон савдо ташкилотига аъзо бўлиш бўйича музокараларни қайта бошлашини ҳам маълум қилди”, деб ёзади Швейцария нашри.
Нашр эътироф этганидек, давлатимиз раҳбарининг Президент виртуал қабулхонаси ва жойларда Халқ қабулхоналарини очиш, 2017 йилни мамлакатда “Халқ билан мулоқот ва инсон манфаатлари йили” деб эълон қилиш тўғрисидаги ташаббуслари кўпчилик томонидан, шу жумладан, ўтган йили республикага ташриф буюрган БМТ Бош котиби Антонио Гуттериш ва Бирлашган Миллатлар Ташкилоти Инсон ҳуқуқлари бўйича Олий комиссари Зайд Раад ал-Ҳусайн томонидан ҳам юқори баҳоланди.
“Президент парламентга Мурожаат чоғида бу ғояни ривожлантириш, яъни мамлакат фуқаролари давлат ва жамият ҳаётига дахлдор муҳим масалалар бўйича ўз фикрларини билдиришлари учун Интернет тармоғида “Менинг фикрим” деб номланган махсус веб-саҳифа ташкил этишни таклиф қилди. Бундан ташқари, у фуқаролар томонидан илгари сурилган ташаббусларни Олий Мажлис ёки халқ депутатлари Кенгашлари кўриб чиқиши мажбурий экани қонунда белгилаб қўйилиши лозимлигини ҳам тавсия этди”.
Маҳаллий органларга катта ваколатларни бериш асносида ҳокимият марказлашувидан чекиниш бўйича чуқур ислоҳотларнинг кўзланаётгани ҳам журнал эътиборидан четда қолмаган. Шу ўринда нашр мамлакат минтақаларини ривожлантириш, одамларнинг эркин ҳаракатланиши, ички ва ташқи савдо ҳажмларини ошириш, иқтисодий фаолият ва сайёҳликни ривожлантириш таъминланиши юзасидан кўрилаётган чора-тадбирлар ички сайёҳликни рағбатлантириш ва корруптсия даражасини кескин пасайтиришга қаратилганини қайд этган.
“Президент мамлакатда 2018 йилга “Фаол тадбиркорлик, инновацион ғоялар ва технологияларни қўллаб-қувватлаш йили”, деб ном беришни таклиф этди. Давлат раҳбари бу билан ислоҳотлар ўтказишдан бошқа йўлнинг йўқлигини ва одамлар ишончини қозониш учун ҳали кўп ишларни амалга ошириш лозимлигини маълум қилди. Шубҳа йўқки, 2018 йили Ўзбекистон катта эътибор қаратиладиган мамлакатлардан бири бўлади, чунки лочин ўз парвозини энди бошламоқда”, деб ёзади “Дива Интернатионал”.
“Дива Интернатионал” – инглиз, франтсуз ва испан тилларида 2000 йилдан буён чоп этиладиган журнал. Нашр адади 5 минг нусха. Нафақат Швейцариядаги, балки дунёдаги бошқа мамлакатларнинг дипломатлари, халқаро ташкилотлар ходимлари, тадбиркор ва жамоатчилик арбоблари ушбу журналнинг асосий ўқувчилари ҳисобланишади.
ЎМИ Матбуот хизмати
Пайғамбаримиз нега рўйхатнинг бошида бўлганлар?
Майкл Ҳартнинг “100 талик: тарихдаги энг кучли таъсирга эга бўлган инсонлар рейтинги” асарида пайғамбаримиз Муҳаммад (с.а.в.)нинг номлари рўйхатнинг биринчи ўрнига қўйилгани ҳақида аввал хабар берган эдик. Ушбу рўйхат 1978 йилда Нью-Йоркда чоп этилган.
Муаллиф нега Расулимизни биринчи ўринга қўйганини қуйидагича изоҳлайди, “Муҳаммад (с.а.в)ни дунёнинг энг аҳамиятли ва таъсирга эга бўлган шахслари рўйхатининг биринчи ўрнига қўйишим баъзи китобхонларни ажаблантириши мумкин, бундан ташқари айримларда савол ҳам туғдириши мумкин. Аммо, тан олиш керак, фақат Муҳаммад (с.а.в.)гина инсоният тарихида ҳам диний ҳам дунёвий жиҳатдан юқори даражага эга бўлган шахсдир”.
ЎМИ Матбуот хизмати
Арипов Тожикистонга боради, президент расмий ташрифига тайёргарлик муҳокама этилади
Ўзбекистон бош вазири Абдулла Арипов Тожикистон пойтахти Душанбега 10-11 январь кунлари амалий ташриф билан келади. Бу ҳақда «АП» Тожикистон ҳукуматидаги манбага таянган ҳолда хабар бермоқда.
Ўзбекистон бош вазирининг Душанбега ташрифи чоғида Тожикистон президенти Имомали Раҳмон ва республика бош вазири Қоҳир Расулзода билан учрашув ўтказилиши кутилмоқда.
Абдулла Ариповнинг Тожикистон расмийлари билан учрашувлари ва музокаралари чоғида Ўзбекистон президенти Шавкат Мирзиёевнинг Душанбега баҳор ойлари бошида кутилаётган расмий ташрифига тайёргарлик кўриш масалалари муҳокама қилинади.
Бундан ташқари, Ариповнинг Душанбега ташрифи чоғида томонлар Тожикистон ва Ўзбекистон ўртасидаги савдо-иқтисодий ҳамкорликни кенгайтириш, икки давлат чегарасидаги баҳсли қисмларнинг демаркацияси ва делимитациясини тезлаштириш бўйича масалаларни муҳокама қилади.
Эслатиб ўтамиз, президент Шавкат Мирзиёев Тошкент вилоятига ташрифи чоғида вилоят фаоллари билан учрашувда ушбу ташриф ҳақида ҳам айтиб ўтганди.
“Абдулла Неъматович Тожикистонга бориб, расмий ташрифга тайёргарлик кўриб келади. Биз катта-катта шартномаларга қўл қўйиб, Тожикистон билан темир йўл ҳам очилади, электр энергиясини узатишни очишга ҳам келишдик. Қўшни билан қандай яшаган бўлса, шундай яшаш керак. Ҳамма ўтади бу дунёдан, лекин қўшни билан яхши бўлмаганни ҳеч ким, ҳеч қачон кечирмайди. Шуни ҳамма билиши керак. Бу осон эмас – 20 йиллик музни эритиш керак. Дунё ҳамжамияти бизга нима дейди: сен олдин қўшнинг билан тил топишгин, кейин биз сен билан дўст бўламиз. Сен қўшнинг билан тил топишмасанг, сен қандай биз билан дўст бўлишинг мумкин, дейди”, - дея айтиб ўтди давлат раҳбари.
http://kun.uz
Кундузи меҳнат – тунда ибодат қиламиз
Қиш – мўминнинг баҳори рукнидан (8-мақола)
Парвардигоримизнинг меҳрибонлигини қарангки, тунлари ибодат қилувчи бандаларининг бу машаққатларини беэътибор қолдирмасдан уларни Ўзининг Каломида мақтаб қўйган. Собирлар, сиддиқлар, тасбиҳ айтувчилар, истиғфор айтувчилар, бошларини саждадан кўтармагувчилар, ёнбошлари ётоғидан йироқ қилиб, тоат-ибодатини самимий ихлос билан қилувчи бандаларига шундай мукофотлар ҳозирлаб қўйганини айтадики, ўша мукофотларни кўрганда уларнинг кўзлари қувонади.
Зотан, тун ярмида қилинган ибодат ҳар қандай риёдан холи бўлган энг самимий ибодатдир. Чунки ўша вақтда ибодат қилаётган одамни ҳеч ким кўрмайди. У Раббимиз билан ёлғиз қолади.
Бобораҳим Машраб:
Ҳар кишининг дарди бўлса, йиғласин ёр олдида,
Қолмасин армон юракда, этсин изҳор олдида, –
деганидек, кўнглида неки некбин туйғулари бўлса, фақат Унга айтади. Жонини бир нафас ҳимоясида қилиб қўйган Буюк Яратувчига ҳамду санолар айтади. Ана ўшаларни Аллоҳ таоло ояти карималарда қуйидагича мадҳ этади:
“Сабр қилувчилар, содиқлар, доимий тоат қилувчилар, нафақа қилувчилар ва саҳарда истиғфор айтувчилардир” (Оли Имрон, 17).
“Улар кечаю кундуз тасбиҳ айтарлар. Чарчамаслар” (Анбиё, 20).
“Улар тунларни Раббиларига сажда қилиб, бедор ўтказадилар” (Фурқон, 64).
“Уларнинг ёнбошлари ётар жойдан йироқ бўлур. Улар Раббиларига қўрқув ва умидворлик ила дуо қилурлар ва ўзларига ризқ қилиб берган нарсаларимиздан инфоқ қилурлар. Бас, ҳеч бир жон ўзлари учун қилиб ўтган амаллари мукофотига беркитиб қўйилган кўз қувончларини билмас” (Сажда, 16-17).
“Йўқса, у кечалари ибодат қилиб, сажда этган, бедор ҳолида охиратдан қўрқиб, Рабби раҳматидан умидвор бўлган одамга тенгми?! Сен: “Биладиганлар билан билмайдиганлар тенг бўлармиди?!” – деб айт. Албатта, ақл эгаларигина эсларлар” (Зумар, 9).
“Албатта, тақводорлар жаннат ва булоқлардадир. Раббилари берган нарсаларни олувчилардир. Чунки улар бундан олдин эҳсон қилувчилардан бўлганлардир. Улар кечалари оз ухлар эдилар” (Заарийаат, 15-18).
“Улар баробар эмаслар. Аҳли китоблардан Аллоҳнинг оятларини сажда қилган ҳолларида кечасида тиловат қиладиган яхши тоифалари ҳам бор” (Оли Имрон, 113).
Тунги ибодатнинг шунча фазилати борлигини кўргандан кейин ҳар бир қалби салим юртдошимиз узун тунларнинг фазилатидан фойдаланиб қолишга жидду жаҳд этиши табиий.
Бинобарин, кечаси оз ухласак ҳам тонг отади, кўп ухласак ҳам кун ёришади. Аммо ёнбошимизни ётоққа эмас, пешонамизни саждага кўпроқ қўйсак, Раббимиз айтганидек, ўзимиз тасаввур қила олмайдиган даражада катта мукофотларга эришамиз.
Раббимиз барчамизни ҳар бир кунимиздан фойда ва тунимиздан фазилат олувчилардан қилсин!
ЎМИ матбуот хизмати
Янгиликлар
