Тошкент ислом институтида ташкил этилган Махсус сиртқи бўлимга 2017-18 ўқув йили учун 181 нафар абитуриент ҳужжат топширди.  

Бугун абитуриентлар “ақоид”, “фиқҳ” ва “араб тили” фанларидан ижодий имтиҳонлар топширишни бошлади.

Имтиҳон бошланишидан олдин Ўзбекистон мусулмонлари идораси раиси ўринбосари Иброҳим Иномов абитуриентларга Аллоҳ таолодан омад тилаб, қабул имтиҳонларини муваффақиятли топшириб, институт талабалари сафидан жой олиш бахтига мушарраф бўлишларини тилаб дуо берди.

Шунингдек, имтиҳон аввалида янги очилган Махсус сиртқи бўлим муҳтарам Президентимиз раҳнамолигида олиб борилаётган улкан ислоҳотларнинг таълим соҳасидаги намунаси экани алоҳида таъкидланди. Ўз навбатида ушбу сиртқи бўлим Ўзбекистон мусулмонлари идораси раиси, муфтий Усмонхон Алимов ҳазратларининг доимий эътиборида экани билдирилди.

Барча абитуриентларга омад тилаймиз. 

Ўзбекистон мусулмонлари идораси

Матбуот хизмати

Аллоҳга шукрки, юртимиздаги икки мингдан зиёд масжидларимиз кундан-кунга обод бўлмоқда. Янгидан-янги масжидлар қурилмоқда, кўплари таъмирланиб, чиройли ҳолатга келтирилмоқда. Намозхонлар бундай жоме масжидларда ибодатларини хотиржам адо этаётганларидан мамнунлар.

Мана шундай ишларни узвий давом эттириш йўлида бугун Ўзбекистон мусулмонлари идораси раиси, муфтий Усмонхон Алимов ҳазратлари жойлардаги масжидлар ҳолатини яхшилаш, имом-хатиблар фаолиятини жадаллаштириш, мўмин-мусулмонларимизнинг талаб ва истакларини таъминлаш мақсадида, Самарқанд вилоятига ташриф буюрдилар. Қатор ислоҳот ва бунёдкорлик ишлари қизғин давом этаётган паллада муфтий ҳазратларининг вилоятга ташрифи алоҳида маъно ва аҳамият касб этиб, самарқандлик уламолар, имом хатиблар ва мўмин-мусулмонлар томонидан алоҳида эҳтимом билан қарши олинди.

Муфтий ҳазратлари дастлаб, Ургут туманига ташриф буюриб, “Мерганча” маҳалласида қад ростлаётган туман марказий масжидининг янги биноси қурилиши жараёни билан танишдилар. Шунингдек, ушбу тумандаги “Домла Қурбон”, Самарқанд туманидаги “Имоми Аъзам”, Самарқанд шаҳридаги “Намозгоҳ” масжидларида олиб борилаётган қурилиш ва таъмирлаш ишлари билан яқиндан танишиб, бунёдкорлик ишларини замонавий ва миллий меъморчилигимизга мос шаклда амалга ошириш бўйича тавсиялар бердилар.

Таъкидлаш жоизки, қурилиш ишларига энг моҳир уста ва муҳандислар жалб этилган. Бундай эзгу ишга ҳисса қўшиш истагидаги қурувчилар ўз маҳоратларини кўрсатиб, бор куч-ғайрат ила меҳнат қилишмоқда. Зеро, масжид қуриш, уни обод этишнинг савоби улуғ экани Ислом манбаларида кўп баён қилинган. Бу ҳақда Анас ибн Молик (розияллоҳу анҳу)дан бундай ривоят қилинади: “Ким масжидда битта чироқ ёқса, ўша чироқнинг нури ўчгунича фаришталар у кишининг ҳаққига истиғфор айтиб турадилар”.

Дарҳақиқат, масжидлар ободлиги юрт ободлигидир. Зеро, масжидга ибодат қилиш учун келган кишилар она-Ватан тинчлиги, халқ осойишталигини сўраб, дуо қилишади. Бу мустажоб дуоларнинг шарофати ила Яратган юртимизни янада фаровон қилади.

Самарқанд вилоятида янгидан қад ростлаётган ушбу жоме масжидлар, мўмин-мусулмонларимиз учун жуда ҳам катта туҳфалар бўлади, иншоаллоҳ.

Зайниддин ЭШОНҚУЛОВ,

Ўзбекистон мусулмонлари идорасининг

Самарқанд вилояти вакили

2017 йилнинг 9 октябрь куни Франция Ташқи ишлар вазирлигининг дин ишлари бўйича маслаҳатчиси Жан Кристоф Посель Ўзбекистон мусулмонлари идорасига ташриф буюрди. Меҳмонга Франциянинг Ўзбекистондаги элчиси Виолен де Вильмор хоним ва элчихона маслаҳатчиси Алена Гранда хоним ҳамроҳлик қилди.

Меҳмонларни Дин ишлари бўйича қўмита раиси Ортиқбек Юсупов, Ўзбекистон мусулмонлари идораси раиси, муфтий Усмонхон Алимов ва Ислом цивилизацияси маркази директори Шоазим Миноваров кутиб олди.

Учрашувда юртимиздаги масжидлар, диний таълим муассасалари ва ҳаж – умра сафарларини ташкил этиш ҳақида тўхталиб ўтилди. Шунингдек, Ўзбекистондаги 16 та диний конфессиялар, уларнинг фаолияти, 2 та ноисломий семинариялар, черков ва бошқа ибодатхоналар мавжудлиги бўйича маълумотлар бериб ўтилди.

Шу билан бирга юртимизда сўнги йилларда соҳада олиб борилаётган ислоҳотлар, бунинг натижасида Президентимиз ташаббуслари билан турли илмий мактаблар, Ислом цивилизацияси марказининг  ташкил этилиши кабилар ҳам айтиб ўтилди.

Учрашув якунида меҳмонларга муфтий ҳазратлари томонидан эсдалик совғалари тақдим қилинди.

Ўзбекистон мусулмонлари идораси ахборот хизмати

Бугун Ўзбекистон мусулмонлари идорасида Вазирлар Маҳкамаси ҳузуридаги Дин ишлари бўйича қўмита, Ўзбекистон мусулмонлари идораси, Ислом цивилизация маркази, Ислом академияси ҳамкорлигида Ислом цивилизацияси марказига бағишланган тадбир бўлиб ўтди.

Унда юқорида номи тилга олинган ташкилотлар, “Мовароуннаҳр” нашриёти ходимлари, Тошкент ислом институти, “Кўкалдош” ўрта махсус ислом билим юрти ўқитувчилари ва талабалари ҳамда оммавий ахборот воситалари вакиллари иштирок этди.

Тадбирда Ислом цивилизацияси марказининг мақсад ва вазифалари юзасидан фикр алмашилди.

Дастлаб Ислом цивилизацияси раҳбари Шоазим Мунавваров марказ қурилишига доир ахборот берди ва шу аснода марказ қошида очиладиган музейга ҳар бир юртдошимиз ўз фикри билан қатнашиши, топа олса, экспонатлар сирасига кирадиган ашёлар билан ёрдам этиши даркорлигини айтди. Шунингдек, масжидларнинг имом-хатиблари бир донадан бўлса ҳам қўлёзма ёки шунга ўхшаш бир ашё топиб келишидан умидвор эканини маълум қилди.

Марказ раҳбарининг таъкидлашича, бу музей учраган экспонат дуч келган жойга ўрнатиб қўйиладиган музей бўлмайди. Унинг ҳар бир қарич ерига нималар ўрнатиш кераклигини мутахассис олимлар пухта ўрганмоқда. Бундан ташқари, музейга ашё топширган кишининг номи ўзи топширган экспонат ёнига ёзиб қўйилади.

Шундан сўнг сўз навбати берилган Ўзбекистон халқлари тарихи музейи директори Жаннат Исмоилова музейшунослик борасидаги тажрибаларини сўзлаб бераркан, жумладан, бундай деди: “Бизнинг юрт муҳташам бинолари, ўзига хос меъморий ечимга эга обидалари, зукко инсонлари ва бошқа фазилатлари билан ислом дини тараққий этиши учун ғоят ўнғай жой бўлган”.

Марказнинг фаолияти, музей ва кутубхона юзасидан таниқли олимлар ва ижодкорлар кўплаб ажойиб фикрлар айтишганидан кейин Ўзбекистон мусулмонлари идораси раиси ўринбосари, Шайх Абдулазиз Мансур ҳазратлари

– Биз Давлатимиз раҳбарининг ташаббуси билан барпо бўлаётган, бутун олам аҳли кўз тикиб турган ниҳоятда жиддий масала хусусида суҳбатлашяпмиз. Шунинг учун шошилмасдан аудиторияга бир оз вақт берайлик – ҳафта, ўн кун ичида кишилар ўзлари ўйлаган фикрларни миясида пишитиб олади. Ундан кейин эса идорамизнинг Ахборот хизматига етказса, яхши бўлади, – дедилар.

Бу таклиф барчага маъқул бўлди ва шундай қарорга келинди.

Муҳтарам ўқувчи, агар музейбоп ашёлар ёки кутубхонани бойитадиган қадимий китоблар ёхуд ушбу мавзуга оид фикрлар сизда ҳам бўлса, марҳамат, Ўзбекистон мусулмонлари идорасининг Ахборот хизматига ёки “muslim.uz” порталига ёзиб юборсангиз мамнун бўламиз.

Дамин ЖУМАҚУЛ

Аллоҳ таоло жуда кўп неъматларни биз бандалар учун яратди. Неъматларнинг баъзиларини тановул қилсак, баъзиларини кўриб қувонамиз. Яна баъзилари оғиримизни енгил қилса, бошқалари узоғимизни яқин қилади. Аллоҳ таоло Ўз каломи шарифида марҳамат қили:

وَالْخَيْلَ وَالْبِغَالَ وَالْحَمِيرَ لِتَرْكَبُوهَا وَزِينَةً وَيَخْلُقُ مَا لَا تَعْلَمُونَ 

 Ушбу ояти каримада Аллоҳ таоло инсонларга минишлари учун ҳайвон уловларни яратганини билдирганидан сўнг инсонлар билмайдиган нарсаларни яъни уловларни яратишини маълум қилди. Муфассир уламоларимиз оятдаги бу қисмни шундай тафсир қилганлар:

“Бу оят ҳозирги кунимиздаги сув, ҳаво ва қуруқликдаги транспорт воситаларининг яратилишига ишорадир. Негаки, ўша транспорт воситаларини ихтиро қилиш Аллоҳ таолонинг инсонларга берган имконияти, ақл-заковат ва куч-қудрати билан  амалга ошган, Аллоҳ таолонинг ўзи инсонларни мана шу ишга муваффақ айлаган. Аллоҳ  таоло бу борада Ўз каломи шарифида шундай марҳамат қилади:

 وَاللَّهُ خَلَقَكُمْ وَمَا تَعْمَلُونَ 

“Ҳолбуки, сизларниҳам, сиғинаётган бутларингизни ҳам Аллоҳ яратган-ку?!” (Соффат сураси, 96 оят).

Шундан келиб чиқиб, инсонлар қўли билан ясалганига қарамай, еру кўкдаги барча транспорт воситалари Аллоҳ таолонинг инсонларга берган улкан неъмати деб  айта оламиз.

Ҳар бир неъматнинг масъулияти бўлганидек, транспорт воситаларидан фойдаланишда ҳам ўзига яраша масъулиятли жиҳатлар мавжуд. Биринчи навбатда ўша транспортдан фойдаланиш борасидаги илмларни мукаммал эгаллаш муҳим. Кейинги ўринларда эса мазкур неъматнинг шукри, уни яхши ишларга сафарбар қилиш каби мезонлар туради.

Ҳар яхшининг бир ёмони бор деганларидек, бугунги кунимизда мана шу транспорт воситалари иштирокида кўплаб кишиларнинг ҳаётига якун ясаётган ҳалокатлар ҳақида эшитяпмиз, баъзида  ўзимиз ҳам ўшандай ҳодисаларнинг гувоҳи бўлаяпмиз.

Бундай фалокатларнинг аксар қисми биз юқорида айтган масъулиятларни ҳамда йўл ва унга боғлиқ одоб-ахлоқ ҳамда қонун-қоидаларни  билмаслик, йўл транспорт воситаларидан нотўғри фойдаланиш, қонун-қоидаларга риоя қилмаслик оқибатида келиб чиқмоқда, десак хато қилмаган бўламиз.

Баъзида одамлар орасида йўл ҳаракати қоидаларига риоя қилиш динимизда йўқ, фақат Қуръон ва суннатдаги ҳукмларга бўйсуниш керак холос, бошқасига амал қилинмайди, деганини эшитиб қоламиз. Улар бу гапларни қайси диний асосга кўра айтаётганидан ҳайрон қоласан киши. Уларнинг йўл-ҳаракат қоидаларига амал қилмаслигининг ўзи ҳам динимиздаги буйруқларга итоат этмаслигининг нишонидир. Биринчидан, улар йўл-ҳаракат қоидаларига риоя қилмаслиги оқибатида аввало ўзларининг ҳаётига хавф туғилади. Бу борада Қуръони каримда:

...وَلَا تُلْقُوا بِأَيْدِيكُمْ إِلَى التَّهْلُكَةِ وَأَحْسِنُوا إِنَّ اللَّهَ يُحِبُّ الْمُحْسِنِينَ  

“...ва ўз қўлларингиз билан ўзларингизни ҳалокатга ташламангиз!..”  (Бақара сураси, 195 оят) деб буюрилган. Иккинчидан, бошқаларнинг ҳаётига хавф туғдиради, бировларнинг умрига зомин бўлиши мумкин. Инсонларнинг жонини эса динимиз ҳимоя қилган. Аллоҳ таоло ўз каломи шарифида бошқаларни умрига зомин бўлганларга нисбатан шундай оят нозил қилган:

مِنْ أَجْلِ ذَلِكَ كَتَبْنَا عَلَى بَنِي إِسْرَائِيلَ أَنَّهُ مَنْ قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ...

“...Бирор жонни ўлдирмаган ёки Ерда (бузғунчилик ва қароқчилик каби) фасод ишларини қилмаган инсонни ўлдирган одам худди ҳамма одамларни ўлдирган кабидир. Унга ҳаёт бахш этган (ўлимдан қутқариб қолган) одам эса барча одамларни тирилтирган кабидир...” (Моида сураси, 32 оят).

Йўл-ҳаракат қоидаларга амал қилмаслик “иш боши” яъни бошлиқларга ҳам итоат қилмасликдир. Бу эса Аллоҳ таолонинг:

 يَا أَيُّهَا الَّذِينَ آَمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ ... 

“Эй, имон келтирганлар! Аллоҳга итоат этингиз, Пайғамбарга ва ўзларингиздан (бўлмиш) бошлиқларга итоат этингиз!..” (Нисо сураси, 59) оятига тескаридир.

Бундан ташқари, динимизда йўл борасида алоҳида кўрсатмалар мавжуд. Ўша кўрсатмалар асоси Расулуллоҳ соллаллоҳу алайҳи васалламнинг қуйидаги ҳадиси шарифларида жамланган:

Абу Саъид Худрий розияллоҳу анҳудан ривоят қилинади: “Расулуллоҳ соллаллоҳу алайҳи васаллам: “Йўлда ўтиришдан сақланинглар”, дедилар. Шунда саҳобаи киромлар: “Ё, Расулуллоҳ, бизни бундан бошқа суҳбатлашиб ўтирадиган жойимиз йўқ”, дедилар. Расулуллоҳ соллаллоҳу алайҳи васаллам: “Агар йўлни танласангиз унинг ҳаққини адо этиб қўйинглар!”, дедилар. Саҳобаи киромлар: “Эй, Аллоҳнинг Росули, йўлнинг ҳаққи нима?”дедилар. Расулуллоҳсоллаллоҳу алайҳи васаллам: “Кўзни юмиш, озор беришдан тийилиш, саломга алик олиш ва яхшиликка буюриб, ёмонликдан қайтариш”, деб жавоб бердилар (Имом Бухорий ривояти).

Уламоларимиз ҳам транспорт воситаларини ҳайдовчи мусулмонларга йўл билан боғлиқ бир қанча одоб-ахлоқ ва кўрсатмалар бериб ўтганлар. Энди, ўша кўрсатмаларга назар солсак.

Аввало, ҳайдовчи киши Аллоҳ таоло буюрган нарсаларни қилиш, қайтарган ишлардан сақланиш ила Аллоҳга тақво қилмоғи лозим. Зеро, барча ишлар тақво туфайли гўзал хотима топади. Қийинчиликлардан чиқиш йўли ҳам, енгиллик сабаби ҳам тақво билан бўлади. Аллоҳ таоло бу борада Қуръони каримда шундай деб ваъда беради:

وَمَنْ يَتَّقِ اللَّهَ يَجْعَلْ لَهُ مَخْرَجًا 

“...Кимки Аллоҳга тақво қилса, У унга (ташвишлардан) чиқиш йўлини (пайдо) қилур”(Талоқ сураси, 2 оят).

وَمَنْ يَتَّقِ اللَّهَ يَجْعَلْ لَهُ مِنْ أَمْرِهِ يُسْرًا

“...Кимки Аллоҳга тақво қилса, (Аллоҳ) унинг ишини осон қилур”. (Талоқ сураси, 4 оят).

Иккинчидан, уловни минаётганда ёки уйдан чиқаётганда тақдирга Аллоҳдан эканини ҳис қилиб, кучли таваккал қилиш. Чунки ким Аллоҳга таваккал қилса Аллоҳнинг ўзи унга ёрдам беришда етарлидир. Сабабларни ҳам қилиб қўйишлик гўзал таваккалнинг аломатидир. Анас ибн Молик розияллоҳу анҳудан ривоят қилинган ҳадиси шарифда Расулуллоҳ соллаллоҳу алайҳи васаллам марҳамат қиладилар:

“Агар бирор киши уйидан чиқаётганда “бисмиллаҳи таваккалту ъалаллоҳи, ла ҳавла ва ла қуввата илла биллаҳ” деб айтса бир фаришта у учун “ҳидоят қилиндинг, кифоя қилиндинг, ҳимоя қилиндинг” дейди. Шайтон ундан қочиб кетади. Шунда бошқа шайтон у(шайтонга) қараб: қандайқилиб сенга ҳидоят қилинган, кифоя қилинган ва ҳимоя қилинган киши (томон)га  йўл бўлсин, дейди” (Абу Довуд ривояти.)

Учинчидан, уловга минишда ва сафарга чиқишда албатта, дуоларини доимо ўқиб юришлик. Мазкур дуолар сабабли улуғ баракотлар бўлади, бироқ буни кўпчилик ҳайдовчилар билмайдилар.

Тўртинчидан, ҳайдовчилик вақтида ҳаром қилинган ишлар, шаҳватни қўзғатадиган турли мусиқалар, спиртли ичимликлар ичишдан сақланиш лозим. Чунки бу гуноҳлар Аллоҳ таолонинг ҳимоясидан узоқлаштиради, Унинг азобини тезлаштиради. Аллоҳ таоло Ўз каломи шарифида инсонларни  гуноҳлари туфайли тутишни қуйидагича баён қилган:

 فَكُلًّا أَخَذْنَا بِذَنْبِهِ ...

“Биз (уларнинг) ҳар бирини ўз гуноҳи билан тутдик...” (Анкабут сураси, 40 оят).

Бешинчидан, бомдод намозини жамоат билан адо қилишлик. Банда бу иши билан Аллоҳнинг зиммасига ўтади. Зеро, ҳадиси шарифда “Ким бомдод намозини жамоат билан адо қилса, у Аллоҳнинг зиммасида бўлади”, деб бежизга айтилмаган.

Олтинчидан, “Зуҳо” намозини ҳам ўқиб юриш. Чунки, Аллоҳ таоло  мазкур намозни адо қилган кишини сақлашни ҳадиси қудсийда қуйидагича ваъда қилган:

“Эй одам боласи, куннинг аввалида тўрт ракаат (намозни адо қилишдан) ожиз қолма!(Агар шуни қилсанг) куннинг охиригача сенга Ўзим кифоя қиламан”.

Еттинчидан, мусулмон кишининг қони, моли ҳаром қилинганини доимо ёдда сақлаб туриш, бировга озор бериб қўйишдан сақланиш.

Саккизинчидан, миниб юрган уловининг ҳам Аллоҳ таолонинг неъмати эканини ёдда тутиш, унинг шукрини адо қилиш.

Тўққизинчидан, уловни минишдан ёки у билан сафарга чиқишдан олдин яхшилаб текшириб, кўздан кечирмоқ . Бу шаръан матлуб сабабларни қилиш ҳисобланади.

Ўнинчидан, ҳайдовчилик, йўл-ҳаракати қонун-қоидалари ва илмларига қатъий риоя қилмоқ. Чунки бунда мусулмонларга кўплаб фойдали жиҳатлари ҳам мавжуд.     

Мазкур кўрсатмалар ҳар бир мусулмон киши билиши, амал қилиши керак бўлган билимларнинг асосийлари холос. Бундан ташқари, яна бир қанча йўлда ҳаракатланишга доир динимиз тақозо этадиган  одоб-ахлоқ қоидалари бўлиб, ҳайдовчиларнинг аксари буларни билишади.

Кимда ким ўз улови бировнинг ҳаётига якун ясовчи қуролга айланишини, у сабаб оилалар бошлиқсиз, аёллар эрсиз, болалар ота-онасиз, ота-оналар фарзандсиз қолишини хоҳламаса, йўл ҳаракати қоидаларини яхши билмоғи, энг асосийси ўша билим ва кўникмаларига амал қилмоғи лозим.

Аллоҳ таоло барчаларимизни Ўзининг тўғри йўлига ҳидоят қилиб, доимо бошқаларга манфаати етадиган инсонлардан айласин.

Жалолиддин Ҳамроқулов,

Тошкент ислом институти

 “Таҳфизул Қуръон” кафедраси мудири