Тошкентда Ислом Тараққиёт Банки бошқарув кенгашининг 46-йиллик анжумани очилиш маросими бўлиб ўтмоқда. Тадбир аввалида Ўзбекистон мадҳияси янгради, сўнг Қуръон тиловат қилинди. Маросимда президент Шавкат Мирзиёев сўзга чиқди ва ўз нутқини “Бисмиллаҳир роҳманир роҳим!” дея бошлади.

Президент сўзи аввалида йиғилганларни Ўзбекистонда кўриб турганидан мамнунлигини билдирди.

“Албатта, Банкнинг йиллик анжумани Тошкентда ўтказилиши ўзига хос рамзий маънога эга. Биз буни Ўзбекистоннинг ислом дунёси ривожига қўшган ҳиссаси, шунингдек, мамлакатда сўнгги 5 йил давомида олиб борилаётган изчил ислоҳотларнинг эътирофи деб ҳисоблаймиз”, – деди Шавкат Мирзиёев.

Давлат раҳбари ўз сўзида пандемия бўлишига қарамай, анжуманни жонли равишда ўтказишга имкон бўлганини қайд этди.

“Ўзбек халқининг буюк аждоди, бутун мусулмон оламининг улуғ намояндаси имом Ал-Бухорий ҳазратлари жамлаган “Саҳиҳи Бухорий” китобида зикр этилган ҳадиси шарифда айтилганидек, “Албатта, амаллар ниятга боғлиқдир”.

Барчамиз холис ният қилган эканмиз, Яратганнинг марҳамати билан бугун Ислом Тараққиёт Банки гуруҳининг йиллик учрашувини жонли равишда ўтказишга муваффақ бўляпмиз.

Таъкидлаш жоизки, мазкур тадбир пандемия бошлангандан бери дунёдаги халқаро молиявий институтлар орасида биринчи бўлиб ташкил этилган нуфузли анжумандир”, – дея таъкидлади президент.

Шавкат Мирзиёев Ислом Тараққиёт Банкининг янги президенти этиб сайланган Сулаймон Ал-Жассирни қутлади.

“Менга берилган ушбу қулай имкониятдан фойдаланиб, Ислом Тараққиёт Банкининг барча аъзо давлатлари вакиллари номидан ҳурматли биродаримиз – Ал-Жассир жанобларини банк президенти лавозимида иш бошлагани билан муборакбод этаман.

Муҳтарам Ал-Жассир жаноблари! Бу юксак лавозимдаги фаолиятингизни Ўзбекистонга ташрифдан бошлаётганингиз чуқур рамзий маънога эга. Шу сабабли юртимиз билан ҳамкорлик Сизнинг масъулиятли ва шарафли фаолиятингизнинг муҳим қисмига айланади, деб ишонаман.

Мамлакатимиз тимсолида Сиз яқин ҳамкор ва садоқатли дўст топдингиз, десам, муболаға бўлмайди. Зиммангиздаги эзгу вазифани адо этишда Аллоҳ таоло Сизни ҳамиша қўлласин!” – деди Ўзбекистон президенти.

манба: https://kun.uz/09750735

Президент Шавкат Мирзиёевнинг қарорига мувофиқ, Ислом Каримов вафот этган 2 сентябрь санаси Хотира куни сифатида белгиланган. Бу кунда жамоатчилик йиғилиб, Биринчи Президентимизни ёд этиш эзгу анъанага айланган.

Давлатимиз раҳбари бугун Ислом Каримов номидаги илмий-маърифий ёдгорлик мажмуасига ташриф буюрди. Биринчи Президентимиз ҳайкали пойига гулчамбар қўйиб, унинг хотирасига ҳурмат бажо келтирди.

Қуръон тиловат қилинди.

Ўтганларни яхшиликлари билан эслаш - эзгу фазилат. Аждодлар ҳурматини жойига қўйган инсоннинг ўзи ҳам ҳурматга лойиқ.

Шавкат Мирзиёев истиқлолимизнинг 30 йиллик байрамига бағишланган тантанали маросимда Ислом Каримов Ўзбекистон мустақиллигини эълон қилиб, тарихимизнинг энг мураккаб ва оғир даврларида давлатимизни бошқарганини таъкидлади.

Ушбу хотира тадбири ҳам халқимизнинг Биринчи Президентга ҳурмати ифодасидир.

Маросимда Ўзбекистон Республикаси Олий Мажлиси Сенати ва Қонунчилик палатаси, Президент Администрацияси, Вазирлар Маҳкамаси, вазирлик ва идоралар, пойтахт жамоатчилиги вакиллари ҳам иштирок этди.

Ислом Каримовнинг Самарқанд ва Қарши шаҳарларидаги ҳайкаллари пойига ҳам гуллар қўйилди.

манба: https://president.uz/uz/lists/view/4600

Мана, Мамлакатимиз Мустақил бўлганлига ҳам ўттиз йил бўлди. Бу ўтган йиллар давомида Ватанимизда ва шахсий ҳаётимизда кўплаб ижобий ўзгаришлар бўлди. Айниқса, диний соҳада қилинган ислоҳот ўзининг яхши самарасини бера бошлади. Ислоҳотлар туфайли рўй берган янгиликларнинг барчасини бу мўъжазгина мақолада айтиб ўтишнинг имкони йўқ.

Маълумки, бутун дунёда коронавирус хасталиги тарқаб, инсоният ҳаётига хавф солмоқда. Қўшни Афғонистон мамлакатида эса нотинчлик ҳукм сурмоқда. Ўз юртидан бошқа юртларга кетаётган қочқинлар кўпайган, бегуноҳ кишиларнинг қони тўкилмоқда. Мана шундай даврда биз ўз юртимизда соғ-саломат, тинч–хотиржам яшашимизнинг ўзи катта бир неъмат.

Умуман айтганда, барча неъматлар учун Аллоҳ таолога қанча шукр қилсак, шунча оз. Аллоҳ таоло Ўзининг китобида бундай марҳамат қилади: "... агар (берган неъматларимга) шукр қилсангиз,  албатта, (уларни янада) зиёда қиламан..." ( Иброҳим сураси, 7-оят).

Ушбу оятнинг тафсири ҳақида “Тафсири Ирфон”да бундай дейилади: “Шукр сўзи аслида "миннатдор бўлиш", "раҳмат айтиш" маъноларида бўлиб, неъматларни ёлғиз Аллоҳ таолодан деб билиш ва у рози бўладиган тарзда сарфлашни англатади. Аллоҳ таоло бандаларига беҳисоб неъматларни ато этиб қўйган. Ҳаммамиз энг афзал неъматлар ичидамиз. Нафасимизнинг кириб-чиқиб тургани,  танамизнинг соғлиги, юртимизнинг тингчлиги, етарли озуғимиз ва кийим-кечагимизнинг борлиги, ҳаво ва сувнинг мавжудлиги, фарзандлар бериб қўйилгани – буларнинг ҳаммаси Аллоҳ таолонинг улуғ инъомидир. Бунинг эвазига эса биздан фақат бир нарсани – Ўзига итоат қилишимизни, неъматлартга шукр айтишимизни талаб қилади, холос”.

Барчаси учун Аллоҳ таолога шукр қилган ҳолда, мамлакатимиз фуқароларини Ватанимиз Мустақиллигининг 30 йиллик байрами билан табриклаймиз. Барчамизга байрам муборак бўлсин!

Р. Акбаров,

ЎМИнинг Қашқадарё вилоят вакиллиги ходими.

Жорий йилнинг 30 август куни Ўзбекистон бош вазири ўринбосари – инвестициялар ва ташқи савдо вазири Сардор Умрзоқов Ислом тараққиёт банки (ИТБ) президенти Муҳаммад Сулаймон ал-Жассир билан учрашув ўтказди.

Учрашув чоғида ҳамкорликнинг бугунги ҳолати, қўшма лойиҳалар амалга оширилиши, шунингдек, Ўзбекистон ва ИТБ ўртасидаги муносабатларни чуқурлаштириш истиқболлари муҳокама қилинди.

Кичик ва ўрта бизнесни қўллаб-қувватлаш, таълим, инфратузилмавий қурилиш, соғлиқни сақлаш ва қишлоқ жойларда ҳаёт сифатини яхшилаш соҳаларида 6та янги инвестиция лойиҳасини келишиш борасида ишларни фаоллаштириш бўйича келишувга эришилди.

Хусусий секторни ривожлантириш бўйича Ислом корпорацияси, Халқаро Ислом савдо-молия корпорацияси ҳамда Инвестициялар ва экспорт кредитларини суғурталаш Ислом корпорацияси каби ИТБ ва унинг шуъба ташкилотларининг Ўзбекистонда тадбиркорликни ривожлантириш, аҳоли бандлигини ошириш ва ижтимоий қўллаб-қувватлашга урғу берган ҳолда қўшма лойиҳалар портфелини кенгайтиришга оид ўзаро манфаатли ҳамкорликни кучайтиришга тайёрлиги билдирилди.

Бундан ташқари, томонлар жорий йилнинг 1 сентябридан 4 сентябрига қадар Тошкентда бўлиб ўтадиган ИТБ бошқарувчилар кенгашининг Йиллик анжуманига тайёргарлик кўриш ишларини муҳокама қилдилар. ИТБ президенти анжуман ва у билан боғлиқ тадбирлар юқори савияда ташкил этилаётгани учун Ўзбекистон томонига миннатдорлик билдирди.

Унинг қайд этишича, мазкур тадбир халқаро ҳамжамият ҳамда ИТБга аъзо мамлакатларнинг ишбилармонлик доиралари вакилларида катта қизиқиш уйғотди: ҳозирги пайтга келиб учрашувда иштирок этиш учун 2 мингдан ортиқ киши рўйхатдан ўтган ва уларнинг сони ўсишда давом этмоқда. Тадбирда банкка аъзо 57 мамлакатдан 2500дан ортиқ вакиллар, шунингдек, халқаро ташкилотлар ва тараққиёт институтлари вакиллари қатнашиши кутилмоқда.

Учрашув якунлари бўйича томонлар ўзаро муносабатларнинг муҳокама қилинган йўналишлари доирасида ҳамкорликни янада кучайтириш йўлларини белгилаб олди.

Манба: https://kun.uz/news/2021/08/31/ozbekiston-islom-taraqqiyot-banki-bilan-6ta-yangi-investitsiya-loyihasini-amalga-oshiradi

Азиз ва муқаддас ватанимиз истиқлол неъматини қўлга киритгандан сўнг барча соҳалар қаторида биз мусулмонлар  ҳам миллий ва диний урф одатларимизни эркин ва озод амал қилиш бахтига мушарраф бўлдик. Масжид ва мадрасаларнинг очилиши, Рамазон ва Қурбон ҳайитлари кунини дам олиш куни деб эълон қилиниши, муборак Ҳаж ва Умра ибодатларини осонлик билан адо этишимиз шулар жумласидандир. Барча ислоҳотлар қаторида ислом таълимоти моҳиятини эътиборга олиб Президентимиз ташаббуслари билан Тошкентда Ислом Цивилизацияси маркази, Бухорода Баҳоуддини Нақшбанд (қуддиса сирруҳу) ёнларида Тасаввуф илми, Самарқандда Имом Бухорий (раҳимаҳуллоҳ) ёнларида  “Ҳадис илми” ва Имом Бухорий халқаро илмий тадқиқот” маркази очилиши, Бухорои шарифда “Мир араб” олий таълимгоҳига ижозат берилиши,  Қашқадарёда Абу Муин Насафий (раҳимаҳуллоҳ) ёнларида эътиқод илми, Фарғонада Бурҳониддин Марғиноний наздларида фиқҳ илми, Сурхондарёда Имом Термизий (раҳимаҳуллоҳ) мажмуаларини обод қилиб, Термизда мадраса ва “Имом Термизий халқаро илмий тадқиқот маркази” очилишини йўлга қўйилиши таҳсинга сазовордир.

“Агар менинг берган неъматларимга шукр қилсаларинг албатта уни сизларга зиёд қиламан" (Иброҳим, 7-оят) деб мужда берилган Қуръони каримда. Бошқа бир оятда “Агар Аллоҳнинг  неъматларини санасангизиз, ҳеж қачон саноғига ета олмайсизлар” (Иброҳим, 34-оят) деб марҳамат қилинган. Аллоҳ таоло кимга кўп неъмат берган бўлса, шунча кўп шукр айтмоқни ҳам талаб қилар экан. Аммо биз саноғига етиб бўлмайдиган неъматларнинг замонида яшаб турганимиз учун неъматларнинг шукрини одо қила олмаслигимиздан Аллоҳ таолога узр айтиб ожизлигимизни билдиришимиздан бошқа иложимиз йўқ. Зеро, бошимиздаги оқилу одил раҳбарлар, ноз-неъматларнинг тўкин-сочинлиги,  танимизнинг сиҳатлиги, диёримизнинг тинчлигию осудалигини  Аллоҳ таолонинг бизга берган улуғ неъматлардан деб билиб, шундай азиз ватанда яшаётганимизга шукр қилиб, қадрига етишимиз шарт ва лозимдир.

      Аллоҳ таоло “Наҳл” сурасининг 80-оятида кўп неъматлар қаторида бандаларни уй-жойлар билан таъминланганини ҳам улуғ неъматлардан эканлиги ва унга шукр айтмоғимиз лозимлгини эслатиб бундай марҳамат қилган. “Ва Оллоҳ сизларга (иссиқ-совуқдан сақланишингиз, зарарли нарса ва жониворлардан саломат қолишингиз учун) ўйларингизни сукунат (оромгоҳ) қилди...” .

Аммо мазкур суранинг 113-оятида тинч ва сулҳу омонликда яшаган шаҳар (Макка) аҳли ношукрлик қилганлари учун уларни хавф (қўрқинч) ва очлик билан жазолангани ҳақида ҳам хабар берилган.

Биз бандалар ҳожатимиз учун бир киши бир нарса берса унга минг таъзим қиламиз. Аммо бизга беминнат берган тинчлик, фаровонлик, мислсиз нозу неъматлар, ўй-жой, ватан, аҳлу-аёл, фарзанддек улуғ неъматларни ато этган Зотни унутамиз, фармонига итоат этмай, мол-мулклармизни исроф ва азиз умримизни беҳудага сарф қиламиз, доруломон кунларни қадрига етмаймиз ва ҳатто нон, тузини еб мусаффо ҳавосидан нафас олиб вояга етган азиз ватанимизга хиёнат қиламизки, бу айни хато ва ношукрликдир.

   Ношукрлик бор жойдан меҳр-оқибат, имон-эътиқод, диёнат қочади. Буни ҳар бир мусулмон тўғри англаши керак. Ҳар бир қарич ер, тупроқ биз учун қанчалар азиз. У бизнинг ватанимиз, у бизнинг оиламиз, унга киндик қонимиз тўкилган. Шундай муқаддас заминимиз борлигидан шукроналар айтсак арзийди. Бу тупроқни ёт унсурлардан асраб-авайлаш, ҳимоялаш ўзини «Алҳамдулиллаҳ, мусулмонман» деган ҳар бир инсоннинг шарафли вазифасидир.

  Юрт тинч бўлса, оиламиз тинч, болаларимиз соғ-омон бўлади. Шунинг учун Ватан осойишталигига ҳар биримиз ўз ҳиссамизни қўшайлик! Зеро, огоҳ ва ҳушёр бўлмоқ ҳар кимнинг виждони ва эл-юрт олдидаги муқаддас бурчидир.

Фазлиддин КАРОМАТУЛЛОҲ,

Сурхондарё вилояти Сариосиё тумани Шарғун шаҳарчаси

"Хожа Алоуддин Аттор" жоме масжиди имом-хатиби.