Ака ва сингил Шоҳида Раҳмон ва Кали Карим пандемиядан кейин кўпчилик дуч келган қийинчиликлардан одамлар омон қолишига ёрдам беришга қарор қилишди. Кембриждан бир оила маҳаллий масжид билан ҳамкорликда Этник жамоалар форуми (CECF) ва машҳур Mill Road Al-Amin озиқ-овқат дўкони эгаси Абдулла Қаюм, Covid-19 га жавобан Кембриж мусулмон жавобини ташкил этишди.

Ака ва сингил қисқа вақт ичида 5 600 фунт стерлинг тўплашди. Уларнинг саъй-ҳаракатлари туфайли коронавирус пандемияси туфайли ўзини озиқ-овқат билан таъминлай олмаган инсонларнинг кўпларининг ҳаёти сақлаб қолинди.

Кейинчалик Шоҳида ва Кали ўз ташаббусларини раҳматли оталари шарафига "Карим жамғармаси" деб номланган хайрия ташкилотига расмийлаштирди.

"Этник гуруҳларнинг айрим вакиллари озиқ-овқат банкидан ёрдам сўрашни хоҳламайди ёки уялади, кўпчилик эса сукут сақлаганча жабр чекмоқда", - дейди мусулмонлар.

Islam.ru хабарига кўра, 2020 йилнинг сентябрида "Карим" жамғармаси ташкил этилганига бир йил бўлганини нишонлайди, уларнинг қарамоғида озиқ-овқат оладиган, ёқилғи, кўрпача, иситгич ва дори-дармон билан таъминланадиган 450 нафар киши бор.

Ўзбекистон мусулмонлари идораси матбуот хизмати

Ота-оналар қизлари вояга етгач уни турмушга беришда ҳар хил йўлни тутишади. Баъзи бировлар қизларининг розилиги билан  уни турмушга берсалар, айрим кишилар эса қиздан изн олишга унчалик ҳам эътибор бермайдилар.

Аслида, қиз болани турмушга беришда унинг изнига қараш керакми?

Ҳа, қиз бола вояга етгач унинг розилигига-изнига қараш керак.  Ислом динида қиз болани розилигини, изнини олмасдан, уни мажбурлаб эрга бериш мумкин эмас. Ҳар бир мўмин-мусулмон қизининг розилигини, изнини олиб сўнгра уни турмушга узатади. Вояга етган қиз боланинг розилигини, изнини олиб турмушга бериш ҳақида Пайғамбаримиз соллаллоҳу алайҳи васаллам бундай деганлар: “Жувон (aввaл турмуш кўрган aёл) ўзи билан маслаҳат қилинмагунча турмушга берилмайди. Бoкирa қизни эса унинг изни-рoзилиги олинмагунча турмушга берилмайди”. Сaҳoбaлaр: “Ё Расулуллоҳ, унинг рoзилиги қaндaй (билинади)?” деб сўрашди. “Сукут сaқлaши (розилигидир)”, дeдилaр (Муттафақун алайҳ).

Албатта, ота-онанинг розилиги ва қиз боланинг изни билан қурилган оила энг бахтли оилалардан бўлади, иншааллоҳ. Аллоҳ таоло ўғил-қизларимизнинг икки дунёда саодатли бўлишларини насиб этсин!

Р. Акбаров,

Ўзбекистон мусулмонлар идорасининг

Қашқадарё вилоятдаги вакиллик ходими.

Хабарингиз бор, марҳум муфтий Усмонхон Темирхон ўғли ҳазратлари томонидан нашр этилган “Тафсири Ирфон” китобининг мухтасар шаклда таълиф этилган – “Қуръони карим ва ўзбек тилидаги маънолари таржимаси” китоби чоп этилиб, хайрия тариқасида кенг тарқатилмоқда.

Айни кунларда ушбу Қуръони карим китобининг нусхалари мадрасалар устозлари, талабалари, имом-домлалар, диний соҳа ходимлари ва Қуръони карим ўқишга иштиёқи бор, лекин имконияти йўқ фуқароларга ҳам бепул тарқатиш ишлари давом этмоқда. 

Шундай тадбирлардан бири Ўзбекистон мусулмонлари идораси ҳузуридаги “Вақф” фонди ташаббуси билан ЎМИ Самарқанд вилоят вакиллиги томонидан Самарқанд шаҳрида эшитиш ва сўзлашишда нуқсони бор, ижтимоий химояга муҳтож юртдошларимизга “Сиз бизга кераксиз!” шиори остида маърифий тадбир ўтказилди. Унда Ўзбекистон мусулмонлари идораси Самарқанд вилоят вакиллиги, “Вақф” фондининг ҳудудий филиали ва ҳамкор ташкилот ходимлари иштирок этди.

Тадбирни Ўзбекистон мусулмонлари идораси Самарқанд вилояти вакили  Зайниддин домла Эшонқулов  кириш қисми билан очиб бердилар.

Вилоят бош имом-хатиби ўз маърузаларида  диний жабҳада олиб борилаётган эзгу ишлар борасида сўзлади.

Тадбирни “Миссионерликдан огоҳ бўлинг” мавзусида вилоят бош имом-хатиби ўринбосари Хайрулло домла Саттаров ўз маърузаси билан давом эттирди.

Маърифий тадбирда сўзга чиққанлар Ислом динининг мазмун-моҳияти, иймон-эътиқод масаласи ҳақида маълумот бериш билан бирга, миссионерлик хатаридан огоҳ бўлиш лозимлигини таъкидладилар.

Шундан сўнг, имконияти чекланган фуқаролардан 2 нафари сўзга чиқиб, уларга берилаётган эътибор, қилинаётган ҳурмат-эҳтиромдан мамнун эканлигини айтиб ўтди. Қолаверса, Миссионерликнинг салбий оқибатлари борасида етарлича тушунчалар ҳосил қилганлигини ва буларни ўз дўстларига ҳам тушунарли қилиб етказишини таъкидладилар.  

Тадбир давомида марҳум муфтий Усмонхон Алимов ҳазратлари таржима қилган “Қуръони карим ва ўзбек тилидаги маънолар таржимаси” китоби имконияти чекланган ҳамюртларимизга ҳадя тариқасида тарқатилди, шунингдек, озиқ-овқат маҳсулотлари берилди.

Йиғилиш якунида “Вақф” хайрия жамоат фонди томонидан учрашув иштирокчилари учун эҳсон дастурхони ёзилиб, ош тарқатилди.

ЎМИ Самарқанд вилоят вакиллиги мабуот хизмати

Ислом жиҳодига чақирувчилардан бири бундай деганди: "Шариат ҳукмларини татбиқ этмаслик, умматнинг устига ёғаётган балоларнинг бош сабабчисидир. Мана шу жоҳилиятга қарши курашиш ва куфрга тиргак бўлаётган тоғут-шайтонларни йўқ қилиш лозим".

Салафий даъватчилардан бири эса бундай деганди: "Оятларни таъвил қилиш қалбларни адаштира бошлади. Кейин бунга оддий одамларнинг қарашларига мувофиқ мазҳабларга эргашиш, суннати мутаҳҳарани тарк этиш ва сўфий тариқатларнинг ёйилиши қўшилди. Бу адашувлар бор экан, умматнинг ҳоли ислоҳ бўлмайди".

Униям гапини эшитдим ва буниям. Ва икковиям душманга бас келолмаслигини ва курашда ғолиб бўлолмаслигини англадим. Чунки улар ўзлари юзланган майдонни ва илонлар чиқиб келадиган ўрани яхши ўрганишмаган. Улар олдига бошидан яраланиб келган беморнинг оёғини боғлаган табибга ўхшашади.

Фаросатсизлик маҳсули бу "жиҳод"ларининг оқибатлари ҳақида ўйлай бошладим. Бир дўстим, булар ҳақида қандай фикрдасиз, деганди. Мен жавоб қилдим: "Буларнинг фаолиятига бир йил бўлмай, хонадон ва масжидларга жанжал ва келишмовчиликлар ёйилади. Бир тоифа ёшлар қамоқхоналарга ташланади. Мустамлака эса ваҳшийлашиб, янада мустаҳкам ўрнашади".

Тахминим тўғри чиқди, қанийди адашган бўлганимда!

Шайх Муҳаммад Ғаззолий раҳимаҳуллоҳ

Юртимизнинг Сирдарё вилоятига ташриф буюрган делегация аъзоларининг навбатдаги куни ҳам самарали ҳолатда давом этмоқда.

Кеча Ўзбекистон мусулмонлари идораси раиси ўринбосари устоз Иброҳим домла Иномов Мирзаобод туманидаги "Зиё" масжидига ташриф буюрди.

Дастлаб пешин намози жамоат бўлиб адо этилди, сўнгра намозхонлар билан дилдан суҳбат бошланди. Унда илм ўрганишнинг фазилатлари, одоблари ҳақида сўз борди. Хусусан, Иброҳим домла Иномов Аллоҳ таолонигн Қуръони каримдаги ушбу оятларини мисол қилиб келтирди: «Сен: "Биладиганлар билан билмайдиганлар тенг бўлармиди?!" деб айт. Албатта, ақл эгаларигина эсларлар» (Зумар сураси, 9-оят).

«Аллоҳ сизлардан иймон келтирганларни ва илмга берилганларнинг даражаларини кўтарур» (Мужодала сураси, 11-оят).

Бу оятларда илмли кишилар Аллоҳнинг ҳузурида бошқалардан кўра юқори даражада туришлари очиқ-ойдин айтилгани алоҳида таъкидлаб ўтилди.

Шунингдек, юртимиздан чет элга ишлаш учун чиқиб кетаётган меҳнат муҳожирлари турли ақидапараст кимсалар ва гуруҳлар таъсирига тушиб қолишдан эҳтиёт бўлишлари борасида ҳам зарурий маълумотлар берилди.

Дилдан қилинган суҳбатлар савол-жавобларга уланиб, намозхонларда катта таассурот қолдирди.

Ўзбекистон мусулмонлари идораси Матбуот хизмати