Шу кунларда ҳудудларда фаолият юритаётган имом-хатиблар томонидан аҳоли билан юзма-юз мулоқот қилиш, уларнинг муаммоларини жойида ҳал этиш, бемор ва кам таъминлаганлар ҳолидан хабар олиш ҳамда турли нотинч оилалар ва ёшларни тўғри йўлга бошлаш борасида сезиларли ишлар қилинмоқда.
Айни кунда Самарқанд вилояти Булунғур туманида бўлиб ўтган сайёр йиғилиш ва унинг доирасида ўтказилган маҳаллабай учрашув ва маънавий-маърифий тадбирлар ҳам шулар сирасидандир.
Шу йилнинг 11 май куни сайёр йиғилиш Булунғур туманининг бир қанча масжидларида ташкил этилди. Вилоятдаги 16 та шаҳар ва туман бош имом-хатиблари тумандаги ўндан ортиқ маҳаллаларда бўлиб, жойларда аҳолининг кам таъминланган ва нотинч оилалар хонадонига ташриф буюрди. Шунингдек, маҳалла марказларида уюшмаган ёшлар билан суҳбатлар уюштирилиб, оилаларнинг ижтимоий ҳолати ва муаммолари таҳлил қилинди. Шу билан бир қаторда вилоят ишчи гуруҳи Булунғур тумандаги ўн бешдан ортиқ масжидда пешин намозини ўқиб, йиғилган намозхонларга “Тинчлик қадри”, “Ёшлар келажагимиз”, “Оилангизни асранг”, “Ёт ғояларга алданманг” мавзуларида маърузалар қилдилар ҳамда уларнинг муаммо ва таклифларини тингладилар.
Шунингдек, 16 та МФЙда уюшмаган ёшлар билан йиғилиш ўтказилиб, уларга илмий-маърифий суҳбатлар қилиб берилди.
Ушбу тадбирлар давомида умумий ўрганилган хонадонлар ва ўтказилган учрашувлар давомида ўнта оилада муаммолар борлиги аниқланиб, уларни ҳал этиш чоралари кўрилмоқда. Шунингдек, кам таъминланган 56 оилага моддий ёрдам кўрсатилди. Бундан ташқари вилоят бош имом-хатиби ўринбосари Х.Саттаров бошчилигида тумандаги 40 нафар кам таъминланган оилаларга 14 000 000 сўмлик озиқ-овқат маҳсулотлари эҳсон қилинди. Қолаверса, ногиронлиги бор ва касалманд 5 нафар фуқаролар ҳолидан хабар олиниб, 25 млн. сўмлик молиявий кўмак берилди.
Мазкур маҳаллабай ишлаш тизимининг муҳим жиҳати, нотинч оилалар билан мулоқот қилиб, уларни аҳил-иноқ оилага айлантиришга қаратилганлигидир. Шу мақсадда маҳаллаларда аниқланган беш нотинч оила билан суҳбатлар ўтказилиб, уларнинг келишмовчиликлари ҳал этилиб, ислоҳ қилинди. Қолаверса, оилалардаги нохўшликларда сабаб бўлаётган, ичкиликка ружу қўйган 3 нафар фуқаро билан тушунтириш ишлари олиб борилди ва ичкиликнинг ёмон оқибатлари ҳақида суҳбат ташкил этилди. Бундан мазкур фуқаролар тўғри хулоса қилганликларини билдирдилар.
Шуни таъкидлаш жоизки, гоҳида маҳаллаларда ён қўшни бўла туриб, йиллар мобайнида низолашиб юрганлар ёки ер-жой талашган оилалар ҳам учраб туради. Мазкур сайёр учрашувларда шу каби қўшниси билан низолашган 2 та оиланинг ўртаси ислоҳ қилинди. Ер ва уй-жой талашган бир оила билан суҳбат ўтказилди.Уларнинг келишмовчилигига сабаб бўлаётган масала ўрганилиб, тушунтириш ишлари натижасида оила яраштирилди.
Бу каби тадбирлар йил охирига қадар давом этади.
Ўзбекистон мусулмонлари идораси
Самарқанд вилояти вакиллиги матбуот хизмати
