Абу Зарр Ғифорий розияллоҳу анҳунинг асл исмлари Жундуб ибн Жунода розияллоҳу анҳу бўлиб, уламоларимиз у кишининг Ислом динига тўртинчи ёки бешинчи бўлиб кирганликларини айтишади.

Абу Зарр Ғифорий розияллоҳу анҳу мулоҳазали, сертавозеъ, камтар киши эдилар.

У киши ҳижратдан олдин Маккада Исломни очиқ эълон қилган зотларнинг бири эдилар. Имом Заҳабий ўзининг “Сияру аъламин нубала” китобида у киши ҳақида шундай деган: “У зоҳидлик, сидқ, илм ва амалда етакчи эди. Ҳақни баралла айтувчи инсон бўлиб, Аллоҳ розилиги йўлида қиладиган ишларида маломатчининг маломатидан қўрқмасди”.

У киши Табук ғазотида туялари секин юргани сабабли мусулмонлар қўшинидан ортда қолганлари учун Набий соллаллоҳу алайҳи васаллам:

«Аллоҳ Абу Заррга раҳмат қилсин, ёлғиз юради, ёлғиз ўлади, ёлғиз тирилади», дедилар».

Абу Зарр Ғифорий розияллоҳу анҳудан ривоят қилинади: «Расулуллоҳ соллаллоҳу алайҳи васаллам:

«Абу Заррдан кўра тили ростгўй ва вафодорга осмон соя солмаган ва ер уни кўтармаган. У Ийсо алайҳиссаломга ўхшайдир», дедилар.

Бас, Умар унга ҳасад қилгандек бўлиб:

«Унинг бундоқлигини ҳурматини қилайликми, Эй Аллоҳнинг Расули,», деди.

«Ҳа, унга шундоқ қилинглар!» дедилар у зот».

Термизий ривоят қилган.

Ушбу ҳадиси шарифда Абу Зарр Ғифорийнинг фазилатлари нақадар юқори экани маълум бўляпти. Чунки Расулуллоҳ соллаллоҳу алайҳи васалламнинг бу ҳадиси шарифда келган гаплари бошқа бирор саҳоба ҳақида келмаган.

Аллоҳ таоло Абу Зарр Ғифорий ҳазратларидан рози бўлсин!

Интернет маълумотлари асосида Нозимжон Ҳошимжон тайёрлади

Аллоҳ таоло Қуръони Каримда шундай деган:

وَسَارِعُواْ إِلَى مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالأَرْضُ أُعِدَّتْ لِلْمُتَّقِينَ الَّذِينَ يُنفِقُونَ فِي السَّرَّاء وَالضَّرَّاء وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللّهُ يُحِبُّ الْمُحْسِنِينَ

“Роббингиздан бўлган мағфиратга ва кенглиги осмонлару ерча бўлган, тақводорлар учун тайёрлаб қўйилган жаннатга шошилинг. Улар енгилликда ҳам, оғирликда ҳам нафақа қиладиганлар, ғазабини ютадиганлар ва одамларни авф қиладиганлардир. Аллоҳ яхшилик қилувчиларни ёқтиради” (Оли Имрон сураси, 133-134-оятлар).

Роббимиз “ғазаб қилмайдиганлар” демади, балки, “ғазабини ютадиганлар” деди. Ҳаммаям ғазабланади. Ғазаб ҳаммада бор. Ғазаб инсон табиатида бор нарса. Ўз ўрнида ғазабланиш ҳам керак, ҳатто шарт бўлади. Масалан, Аллоҳнинг дини, шиорлари масхара қилинаётган пайтда. Набий соллаллоҳу алайҳи васаллам ҳам ғазабланар эдилар. Аммо у зот алайҳиссаломнинг ғазаблари Аллоҳ учун бўларди, ўз нафслари учун эмас. У зот агар ғазаблансалар, юзларини тескарига ўгириб, бурилиб олардилар. Агар хурсанд бўлсалар, кўзларини пастга қаратиб олар эдилар.

У зот алайҳиссалом “Курашда енгган кучли эмас. Кучли деб ғазаби келганда ўз нафсига эгалик қила олган кишига айтилади” деганлар. Муттафақун алайҳ.

Аммо ноўрин ғазабланишдан, шариатимиз таъқиқлаган ғазабланиш пайтида ғазабни ташқарига чиқаришдан қайтарилган.

Оятда мақталаётганлар ана ўша ғазаби келганда ўзини тутиб олган, ғазабини ташқарига чиқармаган, ғазаби келиб турса ҳам, бошқаларга сездирмаган, уларга гўзал ва юмшоқ муомала қиладиганлардир. Бундай инсонлар муҳсинлар бўлиб, Аллоҳ таоло уларни яхши кўришини эълон қилмоқда.

Аллоҳ таоло барчамизни ушбу оятда айтилганидек, нафақа қиладиган, ғазабини ичга ютадиган ва кечиримли бандалардан бўлишимизни насиб этсин!

Нозимжон Ҳошимжон тайёрлади

Аллоҳ таоло Қуръони Каримнинг Ҳужурот сурасида инсонлар ўртасидаги муомалаларда амал қилиниши лозим бўлган бир қанча тавсияларни буюрган.

1. Адолатли бўлинглар!

وَأَقْسِطُوا إِنَّ اللَّهَ يُحِبُّ الْمُقْسِطِينَ

“Одил бўлинг, албатта, Аллоҳ адолат қилгувчиларни суядир” (Ҳужурот сураси, 9-оят).

2. Ислоҳ қилинглар!

إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ وَاتَّقُوا اللَّهَ لَعَلَّكُمْ تُرْحَمُونَ

“Албатта, мўминлар биродардирлар, бас, икки биродарингиз ўртасини ислоҳ қилинг, Аллоҳга тақво қилинг, шоядки, раҳм қилинсангиз” (Ҳужурот сураси, 10-оят).

3. Текшириб кўринглар!

يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ

“Эй иймон келтирганлар! Агар фосиқ хабар келтирса, аниқлаб кўринглар, бир қавмга билмасдан мусибат етказиб қўйиб, қилганингизга надомат чекувчи бўлманглар” (Ҳужурот сураси, 6-оят).

4. Масхара қилмасин!

ا أَيُّهَا الَّذِينَ آمَنُوا لَا يَسْخَرْ قَومٌ مِّن قَوْمٍ عَسَى أَن يَكُونُوا خَيْراً مِّنْهُمْ وَلَا نِسَاءٌ مِّن نِّسَاءٍ عَسَى أَن يَكُنَّ خَيْراً مِّنْهُنَّ

“Эй иймон келтирганлар! Бир қавм бошқасини масхара қилмасин, эҳтимол улар булардан яхшироқдир. Ва аёллар ҳам бошқа аёлларни (масхара қилмасин), эҳтимол улар булардан яхшироқдир” (Ҳужурот сураси, 11-оят).

5. Мазах қилманглар!

وَلَا تَلْمِزُوا أَنفُسَكُمْ

“Ва ўзингизни ўзингиз мазах қилманг” (Ҳужурот сураси, 11-оят).

6. Лақаблар қўйиб олманглар!

وَلَا تَنَابَزُوا بِالْأَلْقَابِ بِئْسَ الاِسْمُ الْفُسُوقُ بَعْدَ الْإِيمَانِ وَمَن لَّمْ يَتُبْ فَأُوْلَئِكَ هُمُ الظَّالِمُونَ

“Бир-бирингизга лақаб қўйманг. Иймондан кейин фосиқлик исми нақадар ёмон! Ва ким тавба қилмаса, бас, ана ўшалар ўзлари золимлардир” (Ҳужурот сураси, 11-оят).

7. Кўп гумондан четланинглар!

يَا أَيُّهَا الَّذِينَ آمَنُوا اجْتَنِبُوا كَثِيراً مِّنَ الظَّنِّ إِنَّ بَعْضَ الظَّنِّ إِثْمٌ

“Эй иймон келтирганлар! Кўп гумонлардан четда бўлинглар, чунки баъзи гумонлар гуноҳдир” (Ҳужурот сураси, 12-оят).

8. Жосуслик қилманглар!

وَلَا تَجَسَّسُوا

“Жосуслик қилманглар” (Ҳужурот сураси, 12-оят).

9. Ғийбат қилмасин!

وَلَا يَغْتَب بَّعْضُكُم بَعْضاً أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتاً فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَّحِيمٌ

“Баъзиларингиз баъзиларингизни ғийбат қилманглар. Сизлардан бирорталарингиз ўзининг ўлган биродарининг гўштини ейишни яхши кўрадими? Ҳа, ёмон кўрасизлар. Аллоҳдан қўрқинглар! Албатта, Аллоҳ тавбани кўп қабул қилувчи ва раҳмлидир” (Ҳужурот сураси, 12-оят).

Интернет манбалари асосида Нозимжон Ҳошимжон тайёрлади

Бугун, 22 сентябрь куни Ўзбекистон мусулмонлари идораси раиси, муфтий Усмонхон Алимов ҳазратлари Россия Федерациясининг Москва шаҳрида бўлиб ўтадиган халқаро анжуман ва унинг доирасидаги тадбирларда иштирок этиш учун жўнаб кетдилар.

 2019 йилнинг 23–24 сентябрь кунлари Москва шаҳрида Россия Федерацияси мусулмонлари идораси қурултойи, муфтий-шайх Равиль Гайнуддин таваллудининг 60 йиллиги, “Глобал дунёда Ислом: мусулмон мероси ва маданиятлараро мулоқот” мавзусидаги халқаро анжуман бўлиб ўтади. 

Шунингдек, Москва жоме масжидининг 115 йиллиги, Россия Федерацияси мусулмонлари диний идорасининг 25 йиллиги ва Москва ислом институтининг 20 йиллигига бағишланган маросимлар ҳам режалаштирилган.

Тадбирларда дунёнинг барча мамлакатларидан келган таниқли уламолар, машҳур муфтийлар, профессор-олимлар, етук экспертлар, давлат ва дин арбоблари ҳамда турли конфессия етакчилари иштирок этади. 

Мазкур халқаро нуфузли тадбирларда муҳокама қилинган масалалар сайтимиз орқали ёритиб борилади.

Ўзбекистон мусулмонлари идораси Матбуот хизмати

20 сентябрь куни ижтимоий тармоқларда “Вақф” фонди фаолияти ҳақида яна асоссиз хабарлар тарқалди. Биз ушбу хабарларда нима дейилгани, қандай ёлғон тўқилгани тўғрисида тўхталмоқчи эмасмиз.

Фонд томонидан шу йил 9 ойи давомида бажарилган энг асосий хайрия ишларни баён қиламиз, хулоса эса Сиз азизлардан.

1593 нафар фуқарога моддий ёрдам берилди

1593 нафар кам таъминланган, ёрдамга муҳтож оилаларга 1 миллиард 841 миллион 587 минг сўмлик моддий ёрдам ҳамда 80 миллион сўмлик 40 дона ногиронлик аравачалари тарқатилди.

3 кишининг турар жойи таъмирланди

Ёрдамга муҳтож 3 нафар фуқаронинг уйлари 8 923 000 сўмлик Фонд маблағлари ва ҳомийларни жалб этган ҳолда қайта таъмирланди.

770 та имомга 370 миллион сўм ойлик маош берилди

“Вақф” фонди томонидан шу йил январь ойидан бошлаб жойлардаги 770 та олис ҳудудда жойлашган ва кам даромадли масжидлар имом-хатибларига ойлик маошлари учун ҳар ой 370 миллион сўм миқдорда маблағ ажратилмоқда.

“Модул” янги диний таълим тизимига 190 миллион сўм ажратилди

Тошкент ислом институтида янги ташкил этилган “Модул” таълим тизимида жойлардаги масжидларда меҳнат қилаётган ўрта махсус маълумотга эга бўлган имомларни олийлаштириш бошланди. Шу муносабат билан 60 ўринга мўлжалланган дарс хоналар, ўқув предметлари, таълим дастгоҳлари, ошхона ва ётоқхона учун 190 миллион сўм маблағ сарфланди.

8 минг аҳоли ичимлик суви билан таъминди

Шу йил февраль ойида Сурхондарё вилоятидаги “Боғи Обод”, “Себзор” ва “Эҳтиром” маҳаллаларида истиқомат қилаётган 8 минг нафар аҳоли тоза ичимлик суви билан таъминди. Бу ишларга жами 70 000 000 (етмиш миллион) сўм сарфланди.

157 миллион сўмлик Рамазон туҳфалари

Қорақалпоғистон Республикаси, Тошкент шаҳри ва вилоятлардаги ижтимоий ҳимояга муҳтож оилаларга Рамазон ойида 157 миллион сўмлик озиқ-овқат маҳсулотлари тарқатилди.

2 миллиард сўм закот маблағлари ҳақдорларга етказилди

Рамазон ойида 2 миллиард сўм закот ва хайрия маблағлари ҳақдорларга етказди.

70 та йирик ва 260 та кичик қорамол гўштлари улашилди

Фонд ва ҳудудий филилаллар томонидан “Қурбонлик – 2019” хайрия тадбирлари ташкил этилиб, улар доирасида 70 га яқин йирик ва 260 га яқин кичик қорамол қурбонлик қилинди. Йигирма мингга яқин кам таъминланган, боқувчисини йўқотган фуқароларга қурбонлик гўштлари тақсимлаб берилди.

Мурувват карвони

“Мурувват карвони” хайрия тадбирида 200 нафар ижтимоий ҳимояга муҳтож, имконияти чекланган ва боқувчисини йўқотган шахсларга озиқ-овқат маҳсулотлари, ногиронлиги бор шахсларга ногиронлик аравачалари тақдим қилинди. Тадбирлар доирасида жами 190 миллион сўм маблағ сарфланди.

3000 дона Қуръони карим ҳадя қилинди

“Ҳилол-нашр” нашриётида чоп этилган 93 миллион сўмлик 3000 дона Қуръони карим китоблари барча вилоятлардаги жоме масжидларга ҳадя қилинди.

14 миллион сўмлик китоб улашилди

14 миллион сўмлик диний китоблар Навоий вилоятидаги 15 та масжидга етказилди. Тошкент шаҳридаги “Сузук ота” масжиди кутубхонаси учун 3,7 миллион сўмлик диний китоблар тақдим этилди.

Ўқув-тўлов шартномалари тўланди

Тошкентдаги Хадичаи Кубро ўрта махсус аёл-қизлар ислом билим юртининг 10 нафар талаба қизларига 2-семестр учун 27 050 000 сўм ўқув шартнома пули тўлаб берилди.

“Кўкалдош” ўрта махсус ислом билим юртининг 5 нафар эҳтиёжманд талабасига 16 250 000 сўмлик ўқув-шартнома пули тўлаб берилди.

Бухоро вилоятидаги “Жўйбори Калон” аёл-қизлар ўрта махсус ислом билим юртига 30 миллион сўмлик 10 дона компьютер жамланмаси берилди.

Оққон беморларга дори-дармон берилди

Республика гематология ва қон қуйиш илмий текшириш институтида даволанаётган оқ қон (лейкоз) касаллиги билан касалланган беморларнинг 85 нафарига 137 миллион сўм ёрдам пуллари берилди.

70 миллион сўм сурдо таржимага сарфланди

Эшитиш ва гапиришда нуқсони бор фуқаролар учун барча вилоятларда жума маърузаларини сурдо таржималарини намойиш қилиш лойиҳаси бўйича 70 миллион сўм маблағ ажратилди.

7 та никоҳ ва 35 та суннат тўйи

Навоий шаҳрида ҳомийлар ёрдамида 7 та никоҳ ва 35 нафар боланинг суннат тўйи ўтказиб берилди. Ёш оилаларга хайрия тариқасида 3 500 000 сўмлик электр-техника жиҳозлари, суннат тўйи ўтказилаётган болаларга эса велосипед ва кийим-кечаклар етказиб берилди.

“Вақф-мед” дорихоналари

Тошкент шаҳридаги “Олтинтепа” маҳалласи ҳудудида биринчи “Вақф-мед” дорихонаси ташкил этилди. Савдодан тушган маблағ вақф мулкларини шакллантириш ва хайрия ишларига йўналтирилмоқда. Айни пайтда дорихонани дори маҳсулотлари билан бойитиш ишлари олиб борилмоқда.

Нон ва нон маҳсулотлари

Нон ва нон маҳсулотлари ишлаб чиқариш корхонасида бир кунда 2 минг дона қолипли нон ишлаб чиқарилмоқда. Ўз навбатида айтиш керакки, нон ва нон маҳсулотларини ишлаб чиқариш ўзига хос қатъий талаблари бўлгани боис, ушбу шароитларни ҳозирлаш учун мазкур цех бир неча кун фаолият олиб бормади. Шунингдек, ушбу цехга тоза ичимлик суви олиб келиш учун ҳам бир неча кун сарфланди. Айни кунларда цехнинг фаолияти бир маромда давом этмоқда.

Вақф ерлари

Тошкент вилояти Қибрай туманида жойлашган 16 гектар Фондга ажратилган ер майдонида бугунги кунда лимон ва кунгабоқар экинлари парваришланмоқда.

Ўз навбатида айтиш керакки, “Вақф” фонди Устави фаолиятига асосан вақф мулкларини шакллантириш учун ишлаб чиқариш корхоналари, савдо дўконлари ва хизмат кўрсатиш шаҳобчалари очиш мумкин. Тушган даромаднинг тегишли қисми хайрия ишларига йўналтирилади.

Зиёратгоҳларни обод қилиш

2018 – 2019 йиллар давомида зиёратгоҳларни қурилиш-таъмирлаш, ободонлаштириш, коммунал тўловларни тўлаш ва 750 нафарга яқин зиёратгоҳларда меҳнат қилаётган ишчи-хизматчиларнинг иш ҳақлари ва бошқа харажатларга жами 17,1 млрд. сўм маблағ сарфланган.

Ҳомийлар маблағларини жалб этиш ва йўналтириш

Ўз навбатида айтиш керакки, “Вақф” фонди ҳисоб рақамларига тушган маблағлардан ташқари Фонд масъулларининг саъй-ҳаракатлари ва қўли очиқ кишиларнинг мурувватлари билан ҳам жуда катта хайрия ишлари амалга оширилмоқда. Масалан, Қашқадарё, Самарқанд, Бухоро, Жиззах ва Наманган вилоятларининг энг олис ва чекка ҳудудларида жойлашган бир неча масжидларнинг бунёд этиш ишларига 1 миллиард сўмдан зиёд маблағ миқдоридаги қурилиш материаллари етказилган.

Хулоса

Юртимиздаги ўзгаришлар натижасида юз йилдан кейин тикланган, эндигина 1,5 ёшга тўлиб-тўлмаган “Вақф” фондини барчамиз қўллаб-қувватлайлик!

Фонд фаолияти шаффоф бўлиб, маблағлар айланиши ва сарф-ҳаражатларини онлайн кузатиш мумкин.

Ҳар қандай саъй-ҳаракат бор жойда хато бўлиши мумкин, иш-ҳаракатсиз жойдагина нуқсон бўлмайди.

Шундай экан Сиз азизларнинг Фонд равнақи йўлида берган ҳар бир таклиф ва мулоҳазаларингизни самимий қабул қиламиз.

Ҳақ таоло барчамизни тўғри йўлда собитқадам айласин!

“Вақф” хайрия жамоат фонди Матбуот хизмати