Абу Ҳурайра розияллоҳу анҳудан ривоят қилинади: Расулуллоҳ соллоллоҳу алайҳи ва саллам: “Умрадан кейинги умра иккисининг орасидаги (гуноҳ ва хато)ларга каффорат бўлади. Мабрур (мақбул) ҳаж мукофоти фақат жаннатдур”, дедилар.

Мазкур китобда улуғ ибодат бўлган ҳаж ва умра зиёратлари ҳақида батафсил маълумотлар берилган. Китобда келтирилган далил ва ибодат қоидалари Ҳанафий мазҳабига оид манбалар билан асосланган. Китоб, улуғ ибодат сари йўл олган юртдошларимизга ҳаж амалларини нуқсонсиз бажаришларида муҳим қўлланма сифатида фойдаланишлари учун мўлжалланган. Ушбу китобнинг ўзига хослиги ва таркибий тузилиши қуйидагича:

• Қуръони Карим оятлари ва Пайғамбаримиз соллаллоҳу алайҳи ва саллам ҳадисларида ҳаж қилиш ҳақида;
• Сафар олдидан тайёргарлик, уларнинг одоблари, қилиниши керак бўлган ишлар ҳамда сақланиш лозим бўлган амаллар хусусида;
• Ҳажга борувчилар билиши лозим бўлган эҳром, мийқот, рухсат берилган ва ман қилинган нарсалар хусусида;
• Ҳаж амаллари маълум бир жойларда, муайян вақтларда адо этилишини эътиборга олиб, ҳар бир кунлик амаллар қайси жойда, қандай амалга оширилиши ҳақида алоҳида-алоҳида маълумот ва кўрсатмалар бериб борилди. Масалан: Зулҳижжа ойининг 9 ёки 10 кунларида қайси жойда қандай амаллар қилиниши ҳақида алоҳида кунларга ажратиб баён қилинди;
• Ҳажга тегишли ҳукмлар далиллар билан баён қилинди;
• Далиллар хусусида янада кўпроқ маълумотга эга бўлишни истаган китобхонлар учун уларнинг манбалари алоҳида изоҳ тарзида берилди;
• Аёлларга тегишли масалаларга ҳам алоҳида эътибор берилди;
• Илк маротаба ҳажга борувчиларнинг тасаввурлари тўлиқ бўлиши учун баъзи жойларнинг суратлари ҳам берилди;
• Керакли ўринларда эслатма ва огоҳлантиришлар берилди;
• Қайси дуоларни қайси жойларда ўқиш кераклиги баён қилиб берилди;
• Китобнинг ҳажми катталашиб кетмаслиги ва аксар китобхонларимиз араб ёзувини ўқий олмасликларини эътиборга олиб, араб тилидаги дуо ва зикрлар кирилл алифбосида берилди;
• Каъбатуллоҳ ва унинг ўлчамлари ҳақидаги маълумотлар ҳам ушбу китобдан ўрин олди;
• Масжидул Ҳарам ва Масжидун Набавийда олиб борилган кенгайтириш ишлари ҳақидаги маълумотлар ҳам жадвал кўринишида келтирилди.

Аллоҳ таоло ҳажни ният қилган ватандошларимизнинг ҳажларини мабрур ҳажлардан қилсин!

   Мурожаат учун:  +998 93 341-00-17.

Даҳшатли далиллар!

Беҳаёлиги оқибатида бутун бошли қавмлар, миллатлар, мамлакатлар, шаҳарлар ҳалокатга учрагани тарих китобларида ҳам ёзилган. Бандаларини беҳаёлик деган даҳшатли ва шармандали балодан сақлаш учун Аллоҳ таоло Қуръони каримда: “(Эй Муҳаммад!) Мўминларга айтинг, кўзларини (номаҳрам аёллардан) қуйи тутсинлар ва авратларини (зинодан) сақласинлар! Мана шу улар учун энг тоза (йўл)дир. Албатта, Аллоҳ улар қилаётган (сир) синоатлардан хабардордирлар” (Нур сурасининг 30-ояти), деб марҳамат қилган.

Шундай бўлса ҳам, беҳаёлик ХХI аср вабосига айланди. Замонавий порносаноатнинг катта ҳажмдаги ишлаб чиқариши, маҳсулотининг аноним тарзда етказиб берилиши оқибатида бугун сайёрамиздаги 75 миллион аҳоли порнога қарам бўлиб, ўзларининг ҳаётини бўшлиққа айлантириб олган.   

Бу – катта бизнес. 2006 йилда “вояга етганлар” учун “фильм” ишлаб чиқарувчилар  13 миллиард доллар фойда қилди. Уларнинг томошабинларининг сони эса АҚШдаги янгиликлар узатадиган етакчи каналлардан уч баробар ортди. 2007 йилда эса порнография ишлаб чиқарувчилар 20 миллиардга  яқин фойда олди. Интернетнинг ана шу майдони эгаларининг фойдаси уч баробарга ортди. 

Мана бу рақамларга эътибор қилинг!

дунё бўйича ҳар лаҳзада (секунд) порносаҳналарга кириш учун 3075,64 доллар сарфланади;

ҳар лаҳзада 28 258 киши порнографияни томоша қилади;

АҚШда ҳар 39 дақиқада янги порнографик видео тасвирга олинади;

интернетга юкланадиган видео тасвирларнинг 35 фоизи  – порнография;

интернетдан фойдаланувчиларнинг 42,7 фоизи порнография томоша қилади;

30 фоиз аёллар ва  70 фоиз эркаклар порнога қарам бўлиб қолган;

интернет тармоғида 4 200 000 порносайт мавжуд, улар бир йилда 13 000 янги порнофильмлар яратади;

ҳар куни қидирув хизматидан 68 000 000 порнографияга оид қидирувлар бўлади; АҚШнинг порносаноати унинг эгаларига бир йилда уч миллиард доллар фойда  келтиради;

жаҳон порносаноати – 5 миллиард доллар атрофида фойда олади;

фақат АҚШнинг ўзида 40 миллион киши доимий равишда порносайтга киради.

Социологлар, психологлар ва  биологлар порнография нима учун замонавий дунё бўйлаб бунчалик оммалашиб кетгани ҳамда унинг инсон учун қанчалик салбий таъсир кўрсатишини аниқладилар. АҚШнинг 47 фоиз аҳолиси порнография уларнинг ҳаётидаги катта муаммоси эканини маълум қилган.  Порнога қарам бўлиб қолган 40 фоиз аҳолининг оиласи барбод бўлади, моддий қийинчиликлар гирдобида қолади ва уч фоизга яқини ишидан ҳайдалади.   Оилавий ажримларнинг 68 фоизига порнография сабабчи бўлмоқда. Порнография педофилликнинг мисли кўрилмаган даражада ўсишига сабаб бўлмоқда. Интернет тармоғида вояга етмаганлар билан бирга бир миллион одам мавжуд. Порнога қарамлик беш босқичдан иборат:

1. Дастлабки қизиқиш. Порнога қарам бўлиб қолганларнинг кўпчилиги у билан жуда ёшлигида тақиқланган видеофильмлар орқали таниш бўлган
2. Қарамлик. Унга қарам бўлиб қолган киши ўзини назорат қила олмайди ва тақиқланган видеотасвирни қайт-қайта томоша қилаверади. Порно унинг ҳаётининг бир қисмига айланиб қолади.
3. Кучайиб бориш. Унга боғланиб қолган киши дастлабки вақтларда кўнглини беҳузур қилган жирканчли саҳналарни томоша қилишга кўникиб қолади.

4.Ҳис-туйғунинг ўлиши. Порнога қарам бўлган кишини энг жирканчли саҳналар ҳам қониқтирмасдан у янада бемазаларини излайди.

5. Кўрганларини амалда қўллашга уринади. Порнони томоша қилаётган вақтда муттасил ишлаб чиқарилган завқ гормонлари нейронларда оқсил FosB тўпланиб, мия тузилишида ўзгариш ҳосил қилади. Бошида атрофдаги оламдан завқланиб яшаган одамга кейинчалик ҳамма нарса қийинлашиб бораверади. Алалоқибат, эс-ҳуши порно бўлиб қолади – қолган ҳамма нарсани унга қиёслаганда зерикарли ва рангсиздек туйилади. Ниҳоят ундан эркинлик кучи ғойиб бўлади. Ана шу – бош миядаги курашувчанлик қобилияти учун жавобгар бўлган қисмининг жиддий жароҳат олганини билдиради.

Шайтоннинг васвасасига таслим бўлманг! Аллоҳ таоло бандаларига тақиқлаган нарсаларнинг яқинига ҳам йўламанг! Ана шундагина эминликда фаровон ҳаёт кечирасиз. Ўзингиздан мамнун бўлиб яшайсиз.

Русчадан Дамин ЖУМАҚУЛ таржима қилди.

2017 йил 26 июль куни Ўзбекистон мусулмонлари идораси тасарруфидаги Имом Бухорий номидаги Тошкент ислом институтига ҳужжат топширган абитуриентлар учун ижодий имтиҳонлар бошланди. Имтиҳондан олдин институт ректори Уйғун Ғофуров абитуриентларга имтиҳон жараёни ва тартибини тушунтириб ўтди.

Ижодий имтиҳон материаллари солинганконверт имтиҳон бошланиши олдидан Ўзбекистон мусулмонлари идораси кузатувчиси, Тошкент ислом институти қабул ҳайъати аъзолари, абитуриентлар ҳамда ота-оналар иштирокида очилиб, бу ҳақда далолатнома тузилди. Кузатувчи ота-оналар имтиҳон учун ажратилган хоналар ва имтиҳон топширувчилар учун яратилган шарт-шароитлар билан танишдилар.

Фарзандларига руҳий далда бўлиб, улар билан ҳамроҳ бўлиб келган ота-оналар ва меҳмонлар учун институт ҳудудида салқин ичимликлар ва шинам кутиш жойлари ташкил қилинди.  Имтиҳонларни талаб даражасида ўтказиш мақсадиди ички ишлар ва тиббиёт ходимлари ҳам жалб қилинди.

Тошкент ислом институтида қабул имтиҳонларини ўтказишда йилдан-йилга қўшимча қулайликлар яратилмоқда. Бу йилдан қабул ҳайъати ходимлари имтиҳон топширувчиларнинг навбатини тўғри ташкил этиш мақсадида абитуриентларни имтиҳон аудиторияларига чақириш учун алоқа воситаларидан фойдаланишни жорий қилди. Алоқа воситалари имтиҳон аудиторияси билан боғланган бўлиб, навбатдаги абитуриентни билет олиш учун чақириш имконини беради.

2017-2018 ўқув йили учун тузилган қабул ҳайъати томонидан абитуриентлардан 463 та аризалар қабул қилинган бўлиб, улар Ўзбекистон мусулмонлари идораси томонидан ажратилган 85 та ўрин учун ўз билимларини синаб кўришади. 85 та квотанинг 15 таси аёл-қизлар учун ажратилган.

Абитуриентлар ижодий имтиҳонда Чет тили ҳамда Маънавият ва маърифат фанларидан синовдан ўтишмоқда. Тошкент ислом институтига абитуриентларни қабул қилиш тартиби тўғрисидаги низомга кўра, Ўзбекистон тарихи, она-тили ва адабиёти фанларидан тест синовлари 2017 йил 1 август куни бўлиб ўтади. Ижодий имтиҳон бугун ҳам давом этмоқда. 

Таълим ва кадрлар тайёрлаш бўлими

Куни кеча Ўзбекистон мусулмонлари идораси Самарқанд вилояти вакиллиги тасарруфидаги масжид имом-хатиблари ва имом ноиблари ўртасида “Йил имоми – 2017” кўрик танловининг вилоят босқичи бўлиб ўтди. Унда танловнинг туман босқичида ғолиб бўлган 16 нафар имом-хатиб ва ноиблар беллашдилар.

 “Йил имоми – 2017” кўрик танловига вилоят бош имом-хатиби Зайниддин Эшонқулов, бош имом-хатиб маслаҳатчиси Мустафоқул Меликов,  бош имом- хатиб ўринбосари Хайрулла Сатторов, Имом Бухорий халқаро маркази директори Шовосил Зиёдов, Республика маънавият тарғибот марказининг Самарқанд вилоят бўлими раҳбари Ўткир Усмоновлар ҳакамлик қилдилар.

Танлов натижаларига кўра Пастдарғом тумани “Ошиқ ота” жоме масжиди имом- хатиби  Каримхон Азимов йил имоми деб  топилди. Шоҳсупанинг иккинчи поғонасини Самарқанд туманидаги “Янги масжид” жоме масжиди имом-хатиби Ҳалим Муҳиддинов ва Самарқанд шаҳридаги “Хўжа Абду Дарун” жоме масжиди имом-хатиби Зафар Маҳмудов банд этишди. Учинчи ўринга эса Пойариқ тумани “Соғиш ота” жоме масжиди имом-хатиби Нодир Қобилов муносиб топилди. Ғолиблар қимматбаҳо совғалар ва вакилликнинг фахрий ёрлиқлари билан тақдирландилар.

ЎМИ Самарқанд вилояти вакиллиги

Абу Ҳурайра (розияллоҳу анҳу)дан ривоят қилинади: “Набий (соллаллоҳу алайҳи ва саллам): “Яхши сўз садақадир”, дедилар” (Имом Бухорий ривояти).

Яхши сўз асалдан лаззатли, жазирама иссиқда муздек сувдан ҳам тотли бўлади. Баъзилар асални ёқтирмаслиги ва совуқ сувдан сақланиши мумкин, лекин ширин сўзни яхши кўрмайдиган инсонни ҳаргиз учратмайсиз. Ёш болалар ва эмизикли чақалоқлар ҳам ширин сўзнинг гадоси бўлади. Яхши сўзни эшитиши билан ҳурсанд бўлиб, қалби фараҳ ва сурурга тўлганининг аломати юзида акс этади.    

Бирор инсонга мол берилса, унинг қалби сурурга тўлиб, ҳадия берган одамга нисбатан қалбида муҳаббат пайдо бўлади. Натижада унга бўлган баъзи гина-кудратларни ҳам унутади. Шунингдек, яхши сўз яхши ҳам инсон қалбигa ҳурсандчилик ва фараҳ бахш этади. Шунинг учун Пайғамбаримиз Муҳаммад (соллаллоҳу алайҳи ва саллам) яхши сўзни садақадир деганлар. 

Ҳадиси шарифда зикр қилинган яхши сўздан умумий маъно тушунилади. Оддийгина салом бериш ва унга алик олиш кабилар ҳам яхши сўздир. Бу ҳақда Расулуллоҳ (соллаллоҳу алайҳи ва саллам) бундай деганлар: “Набий (соллаллоҳу алайҳи ва саллам) саҳоба (розияллоҳу анҳум)лар билан ўтирган эдилар. Бир киши келиб: “Ассалому алайкум”, деди. Унга алик олдилар. Пайғамбаримиз (соллаллоҳу алайҳи ва саллам) “Ўн”, дедилар. Бошқа одам келиб: “Ассалому алайкум ва раҳматуллоҳ”, деди. Унга ҳам алик олишди. Расулуллоҳ (соллаллоҳу алайҳи ва саллам): “йигирма”, дедилар. Учинчи одам келиб: “Ассалому алайкум ва раҳматуллоҳи ва баракотуҳ”, деди. Унга жавоб бердилар. Набий (соллаллоҳу алайҳи ва саллам): “Ўттиз”, дедилар. Саҳоба (розияллоҳу анҳум)лар: “Ё Расулуллоҳ, ўн, йигирма ва ўттиз нима?” деб сўрадилар. Набий (соллаллоҳу алайҳи ва саллам): “Битта яхшилик ўн баробар бўлади. Яъни, биринчи киши “Ассалому алайкум”, деди бу битта калима, иккинчиси “Раҳматуллоҳ”ни зиёда қилди, кейингиси “Баракотуҳу”ни қўшди ҳар бир калима яхшиликдир. Бир яхшилик ўн баробар бўлади. Яхши сўз қандай бўлса ҳам у садақадир”, дедилар (Имом Нававий ривояти).

Тилнинг яхши сўзларни гапириши Аллоҳ таолонинг буюк инъомидир. Шунинг учун мўмин-мусулмонлар доимо яхши сўзларни зикр қилиб, ҳақ бўлса ҳам ёмон сўздан сақланишлари лозим. Бу борада Расулуллоҳ (соллаллоҳу алайҳи ва саллам): “Шайтонга ланат айтманглар! Унинг ёмонлигидан Аллоҳдан паноҳ сўранглар!” деганлар. Тилимиз ланатга одатланмасин. Ҳар онда иблисга, шайтонга ланат айтилса, кейин инсонларга сўнгра бошқаларнинг ота-онасига, ланат айтилади. Шунинг учун банда тилини яхши сўзга одатлантирмоғи лозим. Баъзилар яхши сўзни одат қиладилар. Натижада узр сўрашга ҳаргиз муҳтож бўлмайдилар. Бу ҳақда Аллоҳ таоло шундай марҳамат қилади:

“…одамларга ширинсўз бўлинг…” (Бақара, 83).

Яхши сўзнинг изи қалбда боқий қолади. Ёмон сўз эса ғазабни келтириб, унинг изи нафсда бўқий қолади. Тиғ билан берилган жароҳат вақт ўтиши билан битади. Тил билан берилган жароҳат эса абадий битмайди.

Инсон фарзандлар, эр-хотин, қўни-қўшни, ёру дўст кабилар билан мулоқотда бўлади. Улар билан чиройли услубда гўзал ва ширин сўз билан муомала қилмоғи садақадир. Уларга айтган ҳар бир ширин сўзи садақа деб ёзилади. Бу борада Пайғамбаримиз (соллаллоҳу алайҳи ва саллам) ҳаётлари мобайнида умматларга намуна бўлдилар.

 Бирор кишини сизда ҳожати бўлса, унга ёрдам беришга сизни имкониятингиз бўлмаса, яхши сўз билан тушунтиринг. Шунинг учун Али (розияллоҳу анҳу): “Инсонларга молингиз билан ёрдам бера олмасангиз, уларга чиройли хулқингиз билан ёрдам беринглар” деган. 

Қуръони каримда марҳамат қилинади:

“(Садақа бермасдан) яхши гап (қилиш) ва (бера олмагани учун) кечирим (сўраш) кетидан озор етказиладиган садақадан яхшироқдир. Аллоҳ беҳожат ва ҳалимдир” (Бақара, 263).

Пайғамбаримиз (соллаллоҳу алайҳи ва саллам): “Дўзахни зикр қилиб, ундан паноҳ сўраб, юзларини бурдилар. Сўнгра яна дўзахни зикр қилиб, ундан паноҳ сўраб, юзларини бурдилар. Бир бўлак хурмо билан бўлса ҳам дўзахдан сақланинглар! Агар уни тополмасангиз яхши сўз билан сақланинг!” дедилар.                    

Манбалар асосида

Баҳриддин ЖЎРАБЕК ЎҒЛИ тайёрлади