muslim.uz
Билганимизни етказайлик!
Дарҳақиқат, самовий шариатлар башариятни ҳидоят қилиш ва инсонларни зулумотдан нурга чиқариш учун юборилгандир.
Илм дини бўлмиш ислом дини бизни илм талаб қилиб, уни етказишга ва адашган кишиларни тўғри йўлга бошлаб, Аллоҳнинг ҳақ йўлига чақиришга буюради. Аллоҳ таоло ҳаққа далолат қилувчи очиқ*ойдин оятларини инсонлар манфаати ва башариятни тўғри йўлга ҳидоят қилиш учун нозил қилди.
У зот Азза ва Жалла бандага фойдали илмлар ато этган бўлса-ю, банда уни беркитса ва одамларга етказмасдан Аллоҳ таоло юборган пайғамбарларнинг вазифаси деб ташлаб қўядиган бўлса, У буюк омонатга хиёнат қилган ҳисобланади.
Абу Ҳурайра розияллоҳу анҳудан ривоят қилинган ҳадиси шарифда Пайғамбаримиз алайҳиссалом: “Илм олиб уни гапириб етказмайдиганлар худди бойликни инфоқ қилмасдан кўмиб қўйган кимсага ўхшайди”, дедилар.
Аллоҳ таоло ўзининг охирги ва мукаммал китоби Қуръони каримда шундай марҳамат қилади
Эслaнг (Эй, Муҳaммaд,) Aллoҳ aҳли китoблaрдaн, уни (китoбни) oдaмлaргa, aлбaттa, aниқ бaён қилaсизлaр, уни (ҳeч кимдaн) сир тутмaйсизлaр, дeб aҳд oлгaн эди (Оли Имрон сураси 187-оят).
Аллоҳнинг хитоби гарчи оятда аҳли китобларга қаратилган бўлса-да, диний китоблардаги барча маълумотни диндорларга тўла ҳолда етказишнинг зарурлиги барча ислом уламоларига тааллуқлидир.
Аллоҳ таоло ушбу оятда, хоссатан, диний ишларда инсонлар муҳтож бўладиган нарсаларни беркитиб сир тутганларга танбеҳ беряпти.
Имом Буҳорий Абу Ҳурайра розияллоҳу анҳудан ривоят қилишларича, у киши: Агар Аллоҳнинг китобида бир оят бўлмаганида ҳеч кимга ҳеч нарса гапирмас эдим, деган эканлар. Абу Ҳурайра розияллоҳу анҳу бунда Бақара сурасининг 159-оятини кўзда тутганлар.
Инсонларга манфаат келтирадиган илмни тарқатиш – ибодатдир, уни беркитиш эса жиноят ҳисобланади.
Бу ҳақда Набий соллаллоҳу алайҳи васаллам: “Мендан бир оят бўлса ҳам етказинглар”, деб марҳамат қилганлар.
Яъни, менинг билганим оз нарса, фақат биргина оят, деб ўтирманглар, ўшани бўлса ҳам одамларга етказинглар, демоқдалар.
Ушбу ҳадиси шарифни ҳаётимизга татбиқ қилишга жуда муҳтожмиз. Оз-оздан бўлса ҳам билган нарсаларимизни ўз биродарларимизга ўргатишимиз зарур.
Янгийўл тумани
“Имоми Аъзам” жоме масжиди имом ноиби
Нуриддин Акромов тайёрлади
Яна бир хайрия тадбири
Ўтган ҳафта Тошкент вилояти бош имом-хатиби Хайруллоҳ Турматов домла ташаббуси билан Бўка туманидаги 15-сонли «Меҳрибонлик уйи» тарбияланувчилари учун Конституциямизнинг 25 йиллиги ҳамда Мавлид ойи муносабати билан хайрия тадбири ташкил этилди.
Бўка тумани имом-хатиблари болажонлар учун байрам дастурхони ёзиб, ош тайёрлашди.
Тадбирда тарбияланувчилар учун спорт жиҳозлари ва китоблар туҳфа қилинди.
Болажонлар ўтказилган тадбир ва берилган совғалардан жуда хурсанд бўлганини айтиб, ташкилотчиларга миннатдорчилик изҳор қилдилар ва тез-тез ташриф буюриб туришларига умид билдирдилар.
ЎМИ Матбуот хизмати
ШАФҚАТСИЗ ГУРУҲЛАР НЕГА “ХАВОРИЖ” ДЕБ АТАЛАДИ
Аҳли сунна вал-жамоа уламолари ҳамиша “жаҳолатга қарши маърифат” билан курашиб келган. Адашган фирқаларнинг хатоларини тушунтириб, уларни тўғри йўлга солиш ҳамда мусулмонларнинг бирдамлиги-ю тинчлигини асраш йўлида жонбозлик кўрсатганлар. Бунга илк хаворижлар билан Абдуллоҳ ибн Аббос розияллоҳу анҳу орасидаги баҳс ёрқин далилдир.
Маълумки хавориж фирқаси ўзларига қарши бўлганларни кофирга чиқариб, уларнинг қонларини тўкишни ҳалол санаганлар. Ўзларига қарши чиқувчиларнинг диёрларини “Дорул ҳарб” (мусулмон бўлмаган диёр) деб номлаганлар. Улар Али розияллоҳу анҳунинг “таҳким”ни (Муовия розияллоҳу анҳу билан битим) қабул қилганини куфр деб ҳисоблаганлар. Яъни, Расулуллоҳ соллаллоҳу алайҳи васалламнинг тарбияларини олиб улғайган, тириклигидаёқ жаннат башорати берилган “Ашъараи мубашшара”дан (Жаннатий экани айтилган ўн киши) бири бўлган зотни кофирга чиқарганлар. Али розияллоҳу анҳу ўзларига нисбатан бундай ҳукм чиқарган шоввозларнинг ғаройиб даъволарига жавоб бериш ва уларни тўғри йўлга солиш учун Абдуллоҳ ибн Аббос розияллоҳу анҳуни элчи қилиб юборган. Абдуллоҳ ибн Аббос розияллоҳу анҳу ва хавориж етакчилари ўртасида қуйидаги басҳ-мунозара бўлиб ўтган:
Абдуллоҳ ибн Аббос розияллоҳу анҳу:
– Уни (яъни мўминлар амири Али розияллоҳу анҳуни) нимада айблайсизлар? – сўради.
Хаворижлар:
– Уч нарсада, – деб жавоб беришди.
Абдуллоҳ ибн Аббос розияллоҳу анҳу:
– Қандай нарсалар? – деди.
Хаворижлар:
– 1. Аллоҳнинг амри бўлган нарсада кишиларни ҳакам қилди. Ваҳоланки, Аллоҳ таоло: “Ҳукм фақат Аллоҳ ихтиёридадир”, деган;
- Урушди-ю лекин таҳқирламади ҳам, ўлжа ҳам олмади. Агар нариги тараф мўмин бўлса, улар билан урушиш ҳалол эмас эди. Агар улар кофир бўлсалар, улар билан урушиш ҳам, уларни таҳқирлаш ҳам ҳалол бўлган бўларди.
- Барча мўъминларнинг амири бўлишидан ўзини озод қилди. Агар у мўъминларнинг амири бўлмаса, кофирларнинг амири бўлади-да, – дейишди.
Абдуллоҳ ибн Аббос розияллоҳу анҳу:
– Агар сизга Аллоҳнинг китобидан ва Расулининг суннатидан сўзларингиз хато эканига далолат қиладиган далил келтирсам қайтасизми? – деб сўради.
Хаворижлар бир овоздан:
– Нега қайтмас эканмиз? – дейишда.
Абдуллоҳ ибн Аббос розияллоҳу анҳу:
– Аллоҳнинг амрида кишиларнинг ҳукм қилишига келадиган бўлсак, Аллоҳ таолонинг Ўзи китобида бундай деган: “Эй, иймон келтирганлар! Эҳромда бўла туриб, овни ўлдирмангиз! Сизлардан кимки уни қасдан ўлдирса, (жазоси) худди (хонаки) ҳайвон ўлдириш билан баробар жазодир: у (ҳам бўлса) Каъбага (юриб) бора оладиган қурбонлик бўлиб, унга ўзларингиздан икки адолатли киши ҳакамлик қилур”.
Бошқа бир оятда эр-хотин ҳақида:
“Агар улар (эр-хотин)нинг оралари бузилиб кетишидан қўрқсангиз, эр оиласидан бир ҳакам, хотин оиласидан бир ҳакам юборингиз. Агар (эр-хотин) ислоҳни хоҳласалар, Аллоҳ ўрталарини мувофиқлаштиргай” деган. Демак, Аллоҳ таоло ҳакамликни кишиларга топширган. Сиздан Аллоҳ ҳаққи билан сўрайман, айтинг-чи, мусулмонларнинг қони ва ораларидаги ислоҳ тўғрисида кишиларнинг ҳакам бўлишлари афзалми ёки нархи тўрт дирҳам бўлган қуён тўғрисида ва хотин билан яшаш тўғрисида ҳакам бўлишлари афзалми? – деди.
Хаворижлар:
– Йўқ, албатта, бу афзал, – дейишди.
Абдуллоҳ ибн Аббос розияллоҳу анҳу:
– Сизни бу фикрдан қайтардимми? – деб сўради.
Хаворижлар:
– Ҳа, албатта, – дейишди.
Абдуллоҳ ибн Аббос розияллоҳу анҳу:
– Сизнинг уришди-ю, таҳқирламади ҳам, ўлжа ҳам олмади, деган сўзларингизга келадиган бўлсак, онангиз Оишани таҳқирламоқчи эдингизми? Агар онамиз эмас, десангиз кофир бўласиз. (Агар онамиз десангиз, қилаётган даъволарингизни ўзингиз инкор қилган бўласиз) Сиз иккита залолат орасида тараддудланиб қолгансиз. Энди сизни бу фикрдан қайтардимми? – деб сўради.
Хаворижлар:
– Ҳа, албатта, – дея эътироф этишди.
Абдуллоҳ ибн Аббос розияллоҳу анҳу:
– Барча мўминларнинг амири бўлишидан ўзини озод қилди, деган сўзингизга келадиган бўлсак, сиз рози бўладиган бир нарсани айтаман. Аллоҳнинг Пайғамбари соллаллоҳу алайҳи васаллам Ҳудайбия кунида Абу Суфён ва Суҳайл ибн Амрлар билан сулҳ тузганда: “Эй Али, бу Аллоҳнинг элчиси Муҳаммад сулҳ тузган нарсалар, деб ёз”, дегандилар. Шунда Суҳайл ибн Амр: “Сени Аллоҳнинг элчиси деб билмаймиз. Агар сени Аллоҳнинг элчиси деб билганимизда сен билан урушмас эдик”, дейди. Расулуллоҳ соллаллоҳу алайҳи васаллам: Эй, Аллоҳим, Сенинг элчинг эканимни Ўзинг биласан, дедилар-да: Эй Али (ёзганингни) ўчириб ташлагин ва: “Бу Муҳаммад ибн Абдуллоҳ ҳамда Абу Суфён ва Суҳайл ибн Амрлар сулҳ тузган нарсалар деб ёзгин”, дедилар, – деди.
Ушбу суҳбатдан сўнг икки мингдан зиёд киши хаворижликдан қайтган эди.
Ҳозирги кунимизда ҳам замонамизнинг юздан ортиқ энг мўътабар уламолари “замонавий хаворижлар”га худди шу услубда “очиқ хат” билан мурожаат қилдилар. Кошки эди улар ҳам ҳақиқатни англаб етиб, тўғри йўлга қайтсалар.
Аллоҳ таоло содир бўлиб турган турли нотинчликларни бартараф этиб, бутун дунёда тинч-тотувликни барқарор қилсин.
А.Раҳимов
Хазорасп тумани «Сулаймон Боқирғоний»
масжиди имом-хатиби
Матбуот хабарномаси
2017 йил 18 декабрь куни Ўзбекистон мусулмонлари идорасида шарқшунос олим, дин ва жамоат арбоби, дипломат Шамсиддинхон Бобохонов таваллудининг 80 йиллигига бағишлаб нашр этилган фалсафа фанлари доктори, профессор Саидмухтор Саидқосимовнинг “Улуғ инсонлар маънавияти” номли китобининг тақдимот анжумани бўлиб ўтди. Унда ЎзФА академиги, филология фанлари доктори, профессор Неъматуллоҳ Иброҳимов, Иқтисод фанлари доктори, профессор Нурислом Тухлиев ва Ўзбекистон мусулмонлари идораси раиси, муфтий Усмонхон Алимов ҳазратлари ўз маърузалари билан иштирок этдилар. Шамсиддинхон Бобохоновнинг ҳаёти ва фаолиятига бағишланган видеолавҳа намойиш этилди.
Тадбирда Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита, Ўзбекистон мусулмонлари идораси, Ўзбекистондаги Ислом цивилизацияси марказининг раҳбар ходимлари, профессор-ўқитувчилар, шарқшунос олимлар, уламолар, имом-хатиблар, Тошкент ислом институти ва Тошкент ислом университети талаба-ёшлари қатнашди.
Тадбирда сўзга чиққан “Улуғ инсонлар маънавияти” номли китоб муаллифи, профессор Саидмухтор Саидқосимов Бобохоновлар сулоласининг оғир ва таҳликали даврларда Ислом дини ҳимояси йўлида чеккан заҳматлари ва ўз навбатида шоду хурсандчилик онларини ўзининг мазкур китобида содда ва халқчил тилда ифода этганини баён қилди.
Асар қизиқиш билан “бир нафас”да ўқилиб, катта таассурот қолдириши, унда Шамсиддин Бобохоновнинг ҳаёт йўли ва мазмунли фаолияти билан бирга Бобохоновлар сулоласи, улар билан замондош бўлган давлат ва жамоат арбоблари, олим ва ёзувчилар билан боғлиқ ҳаётий лавҳалар ҳам ўрин олгани тўғрисида профессор Нурислом Тухлиев тадбир иштирокчиларига маълумот берди.
Анжуманда сўзга чиққан муфтий Усмонхон Алимов ҳазратлари Шамсиддинхон Бобохонов 1982–1989 йиллардаги муфтийлик фаолиятлари шўролар давлатида парокандалик бошланган, қалтис бир даврга тўғри келгани, даҳрийлар ҳийла-найранг қилиб, кўп жабру ситамлар ўтказганини алоҳида таъкидладилар. Муфтий ҳазратлари сўзларида давом этиб, мана шундай замонлар ҳақида ҳазрат Расулуллоҳ соллаллоҳу алайҳи ва салламнинг: “Ҳали одамларга шундай бир замон ҳам келадики, унда динида сабр қилувчи киши ҳудди чўғни чангаллаб турган одамга ўхшайди”, деган ҳадисларида диний фаолият кўрсатиш ўта қийин бўлган вақтларда динни ҳудди чўғни ушлагандек тутиб туришга қиёсланганини изоҳладилар. Шунингдек, Қуръони каримда: “Албатта, ҳар бир қийинчилик билан бирга енгиллик бордир”, деб хабар қилингани (Шарҳ, 6) ва яна бир ояти каримада: “Эй имон келтирганлар! Сабр қилинг, бағрикенг бўлинг ва Аллоҳ йўлига тахт бўлиб туринг ва Аллоҳдан қўрқинг, зора, охиратда нажот топсангиз!” (Оли Имрон, 200) деб таъкидланганини муфтий ҳазратлари тадбир иштирокчиларига тушунтирдилар.
Сўзга чиққан нотиқлар одамлар мана шундай олимларнинг ҳаётларидан ибрат олиши ҳақида тўхталиб, мазҳаббошимиз Имоми Аъзамнинг “Олимлар ҳақида ҳикоя қилиш, улар билан бирга ўтириш мен учун кўп фиқҳ ўқиш ва ўрганишдан яхшироқдир. Чунки, бу ҳикоялар қавмнинг одобу ахлоқлари манбаидир”, деган сўзларини келтиришди. Шунингдек, Пайғамбаримиз Муҳаммад алайҳиссаломнинг “Мўминларнинг имон жиҳатидан комилроғи хулқи яхши бўлганларидир”, деган ҳадисни маърузачилар атрофлича шарҳлашди.
“Улуғ инсонлар маънавияти” номли асар кенг китобхонларга мўлжаллангани билан ҳам аҳамиятли экани анжуманда кўп бор таъкидланди.
Ўзбекистон мусулмонлари идораси
Матбуот хизмати
Бош отинойилар йиғилиши бўлиб ўтди
Ўтган ҳафта Тошкент вилояти шаҳар ва туманлари бош имом-хатибларининг аёл-қизлар масалалари бўйича ёрдамчиларининг навбатдаги йиғилиши бўлиб ўтди. Йиғилиш кун тартибида Президентимиз Шавкат Мирзиёев раислигида 15 ноябрь куни мамлакатимизда ҳуқуқбузарликлар профилактикаси ва жиноятчиликка қарши курашиш борасида белгиланган вазифалар ижроси, бу борада мавжуд муаммолар ва уларни ҳал этиш масалаларига бағишланган видеоселектор йиғилиши ҳамда 20 ноябрь куни Жиноятчиликка қарши курашиш ва ҳуқуқбузарликларнинг олдини олишда давлат ва жамоат ташкилотлари ҳамкорлигига бағишланган йиғилишда белгиланган вазифалардан келиб чиққан ҳолда аёл-қизлар ўртасида бузғунчи ғоялар таъсирига тушиб қолиш, ўз жонига қасд қилиш, вояга етмаган қизларни эрта турмушга бериш, ахлоқсизлик, ҳуқуқбузарлик ва жиноятчилик, одам савдоси, оилавий ажрим, ОИТС каби салбий ҳолатларнинг олдини олиш юзасидан жойларда олиб борилаётган тарғибот тадбирларини, тушунтириш ишларини янада ривожлантириш лозимлиги, «Менинг маҳалламда жиноят содир бўлмаслиги керак», деган туйғуни ҳар бир фуқаро, айниқса, ёшлар онгида шакллантириш, бефарқлик, лоқайдликка барҳам бериш, ҳар бир оила, ҳар бир маҳалланинг жиноятчиликдан холи бўлиши, жамиятда тинч ва осойишта ҳаётни таъминлашнинг муҳим шартлари муҳокама қилинди, отинойиларга тегишли кўрсатмалар берилди ва вазифалар юкланди.
Шунингдек, Мавлид ойи муносабати билан Пайғамбаримиз соллаллоҳу алайҳи васалламнинг сийратлари ҳақида суҳбат ташкил этилиб, қизиқарли савол- жавоблардан иборат викторина ўтказилди. Викторинада фаол иштирок этган отинойиларга эсдалик учун илм зиёси бўлган китоблар совға қилинди.
ЎМИ Матбуот хизмати
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.