Куннинг иккинчи ярмида Муфтий Нуриддин домла ҳазратлари ва Дин ишлари бўйича қўмита раиси Содиқ Тошбоев Қорақалпоғистон қозиёти қозиси Шамсуддин Бауатдинов ҳамрохлигида Нукус шаҳридаги Кўзи ожизлар мактаб-интернатига ташриф буюриб, у ерда таълим олаётган болалар ва жамият ходимлари билан дилдан суҳбат қурдилар ва ҳадялар ила қалбларига қувонч улашдилар.

Зеро, Ислом динида кўнгли ўксик, бемор, жисмоний имконияти чекланган болаларнинг ҳолидан хабар олиш, уларга ёрдам қўлини чўзишнинг савоби катта, ажри бисёр. Бу борада Давлатимиз раҳбари томонларидан амалга оширилаётган хайрли ишлар динимиз таълимотига ва инсонийлик мезонларига жуда ҳам ҳамоҳангдир.

Шу маънода муфтий Нуриддин домла ҳазратлари ва Дин ишлари бўйича қўмита раиси Оролбўйи минтақасига ташрифларининг учинчи кунида ана шундай ёрдамга муҳтожлар ҳолидан хабар олиб, улар билан самимий мулоқотда бўлдилар.
Улар билан суҳбатда ҳукуматимиз томонидан ногиронларга қаратилаётган эътибор, уларни қўллаб-қувватлаш, ижтимоий ҳимоя қилиш бўйича амалга оширилаётган ишлар ҳақида сўз юритдилар. Ташриф асносида кўзи ожизлар жамиятига газ плита, сув иситиш аристони каби маиший жиҳозлар ҳадя этилди.

Шунингдек, соҳа раҳбарлари Республика ихтисослаштирилган Онкология илмий-амалий тиббиёт маркази Қорақалпоғистон Республикаси ҳудудий филиали шифохонасида ҳам бўлиб, у ерда даволанаётган 16 нафар болалар ҳолидан хабар олиб, уларга ўйинчоқлар ва ширинликлар тортиқ этдилар.

Ҳар икки ташриф чоғида муассасаларга молиявий ёрдамлар ҳам қилинди.

Якунда Муфтий ҳазратлари жаннат райҳонлари бўлган болалар ҳаққига Аллоҳ таолодан шифои комил сўраб, дуою-илтижолар қилдилар.

Ўзбекистон мусулмонлари идораси Матбуот хизмати

Айни кунларда минглаб юртдошларимиз муқаддас заминда Умра зиёратини адо этишмоқда. Уларга ҳавас қилган яна кўплаб юртимиз мўмин-мусулмонлари муборак сафар орзусида.

Аллоҳга шукрки, юртимиз аҳлининг талаб ва истакларини инобатга олган ҳолда Ўзбекистон мусулмонлари идораси ва бир қатор ҳамкор ташкилотлар томонидан Умра сафари учун қулай шарт-шароитларни ҳозирлаш ишлари амалга оширилди. Жумладан, сафар рейсларни ошириш бўйича амалий чора-тадбирлар кўрилиб, натижада, шу йилнинг 10 февралидан бошлаб, муборак заминга умра ибодати учун рейслар ҳафтанинг ҳар сешанба ва шанба кунлари 3 марта, қолган 5 кунида 2 тадан рейс йўлга қўйилди. Шунда бир ҳафта давомида жами 16 марта авиапарвоз амалга оширилмоқда.

Яна бир қувончли хабар, Ўзбекистон мусулмонлари идораси томонидан “Умра қўлланмаси” мобил иловаси ишлаб чиқилди. “Умра қўлланмаси”да Умра сафари давомида лозим бўладиган зарур барча маълумотлар тафсилотларигача қисқа, содда ва лўнда баён этилган.

Маълумки, ҳамма ҳам Умра зиёрати одоблари, бу суннат амални бажариш тартиб-қоидалари, унинг дуолар ҳақида тўлиқ хабардор эмас. Умрани ният қилган айрим кишилар у ҳақда китобдан ўқиса, кимдир зиёратга бориб келганлардан суриштиради. Бошқа биров эса интернету YouTube тармоқларидан маълумотлар излаб, мустақил билим олиш пайида бўлади. Лекин буларнинг барчаси кишида тўлиқ тасаввур уйғотмаслиги мумкин.

Пандемия шароитида Саудия Арабистонида жорий этилган янги тартиб-қоидалар, аэропорт, меҳмоналарда нималарга эътиборли бўлиш кераклиги, Умра зиёратида қаерларга борилиши, зиёратгоҳларнинг тарихи ҳақида ҳам қисқача маълумотлар берилган. Мобил иловада муборак сафар давомида зарур бўладиган барча дуолар аудио шаклида берилгани зиёратни мукаммал адо этишда муҳим аҳамият касб этади.

Иловага батафсил тўхталадиган бўлсак, унда “Умра қўлланмаси”, “Умра дуолари”, “Сафарга тайёргарлик” ва “Ислом тарихига оид жойлар” номли бўлимлари мавжуд.

“Умра қўлланмаси” бўлимида Умра ибодатига оид барча масалалар келтирилган: “умра” сўзининг маъносидан то унинг амаллари-ю суннатларигача. Шу билан бирга, зиёрат қилиш одоблари, муборак шаҳар ва масжидларнинг фазилатлари, муборак сафар тартиб-қоидалари каби бир қатор рукнларда зарур маълумотлар тақдим этилган.

Шунингдек, “Умра дуолари” бобида муборак сафарда муҳим бўлган дуолар батафсил баён этилган. Сафарга тайёргарлик кўришда, сафар давомида, муборак шаҳарга киришдаги дуолар, тавоф асносида, зам-зам суви ичганда, табаррук жойларда, ватанга қайтишда ўқиладиган дуолар каби элликдан ошиқ дуолар берилган. Яна бир муҳим жиҳат, бу бўлимда Набий соллаллоҳу алайҳи васаллам билан бир қаторда Абу Бакр ва Ҳазрати Умар розияллоҳу анҳумога салом бериш одоб ва тартиблари баён этилган. Бу дуоларни мукаммал билиш зиёрату ибодатларни тўла-тўкис бўлишига омил бўлади.

Мазкур боблардан яна бири Ислом тарихига оиддир. Бунда сафар давомида бориладиган муқаддас жойлар ҳақида қизиқ ва тарихий манбалар берилган. Уларни ўқиган киши муқаддас қадамжоларга оид кенг тушунчага эга бўлади.
Яна бир муҳим бўлим – сафарга тайёргарлик бўлимидир. Унда муборак сафарга чиқмоқчи бўлган ҳар бир кишига муҳим тавсиялар, ман этилган тартиб-қоидалар, зиёратчилар эътибор қаратиш лозим бўлган масалалар баён этилган.
Шунингдек, иловада бир қатор эслатма ва хизматлар бор. Жумладан, пандемия шароитида Саудия Арабистонидаги тартиблар, қайси вакциналар олиш зарурлиги ҳамда об-ҳаво маълумотлари бериб борилмоқда. Қолаверса, муқаддас сафарга энг сўнгги рейслар қачон учиши ва қайтиши ҳақида ҳам аниқ хабарлар жойланган. Бундай замонавий хизматлар муборак сафарга отланганлар учун қулайдир.

Қисқаси, илова билан танишган киши Умра зиёрати хусусида тўлиқ маълумотга эга бўлади. Бу эса муборак зиёратга олдиндан тайёргарлик кўриш ва уни мукаммал адо этишда ўта муҳим қадамдир.

Кези келганда айтиш керакки, умра сафарига бориб келаётган ҳамюртларимиз муборак зиёратга бориш йўлга қўйилгани, ҳозирланган шароит ва хизмат кўрсатиш сифатининг юқорилигидан жуда ҳам миннатдор бўлишмоқда. Бунинг учун Ҳақ таолога шукроналар айтмоқдалар, Давлатимиз раҳбари ва бу савобли ишга мутасадди бўлганлар ҳаққига хайрли дуолар қилиб, юртимиз тинчлиги ва халқимиз фаровонлигини сўраб илтижолар қилмоқдалар. Мана шу шукрона ва дуолар шарофати ила юртимизда хурсандчиликлар бардавом бўлмоқда. Аллоҳ таоло неъматларини бундан-да зиёда этсин!

Аллоҳ таоло барчамизни умра зиёратини насиб этсин!

Umra qo'llanmasi – https://play.google.com/store/apps/details?id=uz.devteam.hajjumrahguide 

Ўзбекистон мусулмонлари идораси Матбуот хизмати

Аллоҳга шукрки, cўнгги йилларда мамлакатимизнинг турли ҳудудларида аҳоли эҳтиёжларидан келиб чиқиб, халқимизнинг эмин-эркин ибодат қилишлари учун барча шарт-шароитларга эга жомелар бунёд этилмоқда.

Ана шундай муборак масканлардан иккитаси Қорақалпоғистон ўлкасининг Нукус шаҳрида ажратилган ер майдонларида барпо этилмоқда.

Ўзбекистон мусулмонлари идораси раиси, муфтий Нуриддин домла ҳазратлари Оролбўйи минтқасига ташрифлари чоғида Нукус шаҳрида “Саманбай” ва “Қумовул” маҳаллаларида ҳашар йўли билан қурилаётган масжидлардаги иш жараёнлари билан яқиндан танишдилар. Муфтий ҳазратлари қурилиш ва бунёдкорлик жараёнларини кўздан кечириб, ўз тавсияларини ҳам бериб ўтдилар.

Келгусида мазкур иншоотларнинг ички томони анъанавий нақшлар билан безатилади. Уларда барча қулайликларга эга кутубхона, маъмурий бино ва замонавий таҳоратхона барпо этилади.

Ташриф якунида муфтий Нуриддин домла ҳазратлари маҳаллий аҳоли билан учрашиб, қорақалпоқ эли ва юртимиз ҳаққига хайрли дуолар қилдилар.

Ўзбекистон мусулмонлари идораси
Матбуот хизмати

Шу кунларда ижтимоий тармоқларда Масжидун-Набавий ҳудудидаги Равзаи муборакка аёллар киролмаяпгани тўғрисида хабарлар тарқалмоқда. Ўзбекистон мусулмонлари идораси ушбу масала юзасидан ваколатли мутасаддилар билан тегишли ўрганиш ишларини олиб борди.

Маълум бўлишича, айни кунларда Саудия Арабистони Ҳаж ва умра вазирлиги жорий этган янги тартибга биноан Мадинаи мунавварадаги Набий соллаллоҳу алайҳи васаллам равзаларига аёл зиёратчиларнинг аксарияти киритилмаяпти. Бошқача қилиб айтганда, аёллар учун Масжиди Набавийда ибодат ва намоз ўқиш учун кириш-чиқиш бемалол, фақатгина ушбу масжиднинг ҳудудида жойлашган Равза қисмига киришга вақтинчалик чекловлар ўрнатилган.

Шу муносабат билан Ўзбекистон Республикасининг Жидда шаҳридаги бош консулхонаси вакиллари 20 февраль куни Саудия Арабистони Ҳаж ва Умра вазирлиги вакили Абдулазиз бин Абдулраҳим Ваззан билан учрашув ўтказиб, Масжидун-Набавийдаги Равзаи шариф зиёратига қўйилган чекловлар муҳокама қилинди.

Ваззан жанобларига кўра, шу йилнинг февраль ойи бошларида карантин чекловлари қайтадан кучайтирилгани сабабли, сиғим имкониятларидан келиб чиққан ҳолда аёллар учун Равзаи шарифни зиёрат қилиш жадвал асосида, ҳар куни 2 маротаба (соат 08:00-12:00 ва 16:00-24:00)да амалга оширилиб, оралиқ масофани сақлаш шарти билан ҳар 30 минутда фақатгина 500 нафар аёл (шундан 200 нафари маҳаллий ахоли)га зиёрат учун рухсат берилган. Чекловдан олдин, яъни 5 февралга қадар бир вақтнинг ўзида 1500 нафар аёлга рухсат берилган эди.

Равзаи шарифни зиёрат қилиш навбати асосида, “Иътамарна” мобил иловаси орқали якка тартибда (зиёратчи томонидан) ёки ҳамкор ширкат томонидан “Tawof” платформасида жамоавий рухсатнома олиш орқали ташкил этилмоқда.

Айни вақтда карантин чекловлари ҳамда навбат юқорилиги сабабли кўп давлатларнинг аёл зиёратчилари, шу жумладан ўзбекистонлик аёллар учун ҳам Равзаи шарифни зиёрат қилиш вақтинча имконсиз бўлмоқда.

Таъкидлаш лозимки, аёллар учун Равзаи шарифга киришга рухсатнома олиш учун Подшоҳлик ҳудудига киргандан бошлаб ўртача 10 кунга қадар кутиш талаб этилмоқда.

Шу муносабат билан ҳамда Ҳаж ва Умра вазирлигининг “1443 ҳижрий йил умра мавсуми қоидалари ва иш юритиш механизмлари тўғрисида”ги Йўриқномасининг 2-бўлим 3-банди (“умрачиларнинг мамлакатга келишлари ва яшашлари билан боғлиқ барча шартлар ва қоидаларни зиёратчиларга етказиш”) асосида Равзаи шарифдаги чекловлар юзасидан зиёратчиларни хабардор этиш таклиф этилди.

Аллоҳ насиб этса, жорий йил март ойидан бошлаб карантин чекловлари юмшатилиб, Равзаи шариф қабул сиғими босқичма-босқич кўпайтирилиши кутилмоқда.

Маълум қиламизки, ушбу масалада енгиллик қилиш мақсадида, Ўзбекистон мусулмонлари идораси Ташқи ишлар вазирлиги орқали Ўзбекистон Республикасининг Саудия Арабистонидаги элчихонаси воситачилигида Ҳаж ва Умра вазирлигига бевосита хат йўллаган.

Ушбу жараёнларни Ўзбекистон мусулмонлари идораси диққат билан кузатиб бориб, умрачиларга зиёратларини тўлиқ амалга ошириш бўйича барча зарур чора-тадбирларни амалга оширади.

Ўзбекистон мусулмонлари идораси Матбуот хизмати

Аввал хабар берганимиздек, Ўзбекистон мусулмонлари идораси раиси, муфтий Нуриддин домла ҳазратлари Қорақалпоғистонга ташрифнинг учинчи кунида Дин ишлари бўйича қўмита раиси Содиқ Тошбоев билан биргаликда Муҳаммад ибн Аҳмад ал-Беруний номидаги ўрта махсус ислом билим юртида бўлиб, у ерда устоз ва талабалар учун яратилган шарт-шароитлар ва имкониятларни кўздан кечирдилар.

Шунингдек, меҳмонлар илм даргоҳи ёнида ташкил қилинган «Қуръони карим ва тажвид» курси фаолияти билан яқиндан танишиб, ўтган йили фойдаланишга топширилган 100 ўринли ётоқхона, 200 ўринга мўлжалланган ошхона ва кутубхонани кўрдилар.

Ташриф давомида Муфтий ҳазратлари билим юрти устозлари ҳамда талабалари иштирокида учрашув ташкил қилиниб, дилдан суҳбатлашилди. Учрашувда муфтий ҳазратнинг араб тилида берган саволларига талабалар ҳам араб тилида жавоб беришди. Нуриддин домла ҳазратлари ўз сўзларида толиби илмларга уларни яна ҳам билим олишга қизиқтириб, келаси йили энг аъло баҳоларга ўқиган 2 талабанинг шартнома пулларини тўлаб беришни айтдилар.

Учрашув якунида муфтий ҳазратлари мана шундай кенг имкониятларга эга бўлган ва барча қулайликлар яратилган билим юрти билан танишар эканлар, аввало, ушбу неъматларга шукр қилиш лозимлигини, унинг шукри эса ихлос ва иштиёқ билан ўқиш эканини таъкидлади. Келажакда шу даргоҳдан, юртига, халқига, динига хизмат қиладиган буюк боболаримизга муносиб толиби илмлар етишиб чиқишини тилаб, дуо қилдилар.

Ўзбекистон мусулмонлари идораси Матбуот хизмати