www.muslimuz
Қўқон шаҳрида замонавий туризм маркази ташкил этилади
Вазирлар Маҳкамасининг “Фарғона вилоятининг Қўқон шаҳрида саноат ва хизматлар соҳасини ривожлантириш орқали аҳоли бандлигини таъминлашга доир қўшимча чора-тадбирлар тўғрисида”ги қарори қабул қилинди.
Ҳужжат билан 2018-2020 йилларда Фарғона вилоятининг Қўқон шаҳрида кафолатли иш ўринларини ташкил этиш ҳамда саноат, хизматлар соҳаси ва қишлоқ хўжалигини ривожлантириш лойиҳаларининг манзилли рўйхати тасдиқланди.
Фарғона вилояти ҳокимлиги:
- Инвестициялар бўйича давлат қўмитаси, манфаатдор давлат ва хўжалик бошқаруви органлари, тижорат банклари, лойиҳаларнинг ташаббускорлари билан биргаликда тасдиқланган манзилли рўйхат параметрлари сўзсиз бажарилишини таъминласин ва бу борада инвестиция лойиҳаларининг ўз вақтида ва сифатли амалга оширилишини, ишлаб чиқаришнинг мўлжалланган ҳажмлари ўзлаштирилишини ва янги иш ўринлари ташкил этилишини назарда тутади;
- муаммоли масалаларни мунтазам равишда кўриб чиқиб, уларни ҳал этиш юзасидан тезкор ва амалий зарур чора-тадбирларни амалга оширган ҳолда лойиҳалар бажарилиши юзасидан тизимли мониторинг олиб боради.
- Фарғона вилояти ҳокимлигига Инвестициялар бўйича давлат қўмитаси ва хизмат кўрсатувчи тижорат банклари билан келишган ҳолда лойиҳанинг қийматини ва иш ўринлари сонини сақлаб қолиш шарти билан лойиҳаларнинг тасдиқланган манзилли рўйхатига, заруратга кўра, ўзгартиришлар киритиш ҳуқуқи берилди.
Бандлик ва меҳнат муносабатлари вазирлиги Фарғона вилояти ҳокимлиги билан биргаликда Қўқон шаҳри секторлари ва маҳаллалари бўйича 2018-2019 йилларда ҳақ тўланадиган жамоат ишларини, банд бўлмаган аҳолини касбга қайта тайёрлашни ташкил этиш бўйича манзилли дастурни бир ой муддатда ишлаб чиқади ва тасдиқлайди.
Туризмни ривожлантириш давлат қўмитаси, Иқтисодиёт вазирлиги, Инвестициялар бўйича давлат қўмитаси, Фарғона вилояти ҳокимлиги Қўқон шаҳридаги собиқ ўрмон хўжалигининг 17 гектар майдони ҳудудида “Ҳунармандлар маркази”, меҳмонхоналар, миллий таомлар ресторани, гипермаркет ва туристик инфратузилманинг бошқа объектларини қуришни назарда тутувчи туризм марказини ташкил этиш бўйича инвестиция лойиҳаси учун салоҳиятли инвесторларни жалб этиш ва 2018-2019 йилларда ушбу инвестиция лойиҳасини амалга ошириш чора-тадбирларини кўрадилар.
Бандлик ва меҳнат муносабатлари вазирлиги, Ўзбекистон Ёшлар иттифоқи, “Ҳунарманд” уюшмасининг Қўқон шаҳрида тажриба тариқасида қуйидагиларни назарда тутадиган “Усто-шогирд, Қўқон тажрибаси” лойиҳасини 2018-2019 йиллар мобайнида амалга ошириш тўғрисидаги таклифлари маъқулланди:
Қўқон шаҳрида юз нафар ишсиз ёшларни ҳунармандлар ва бошқа касб вакиллари бўлган устозларга бир календарь йилга шогирд сифатида бириктириш ва улар билан меҳнат шартномаси тузиш;
касб-ҳунарларни тўлиқ эгаллаган шогирдларни кейинчалик мазкур банднинг иккинчи хатбошида кўрсатиб ўтилган шартлар асосида камида икки нафар шогирдни бепул ўқитиш шарти билан мустақил ишни давом эттириш учун зарур бўлган асбоб-ускуналар билан таъминлаш.
ЎМИ Матбуот хизмати
Ўзбекистон ва Туркия президентлари телефон орқали мулоқот ўтказишди
Кеча, 8 август куни Ўзбекистон Республикаси Президенти Шавкат Мирзиёев ва Туркия Республикаси Президенти Ражаб Тоййиб Эрдўған ўртасида телефон мулоқоти ўтказилди.
Мулоқотда давлат раҳбарлари Ўзбекистон ва Туркия ўртасидаги дўстлик ва стратегик шериклик муносабатлари юқори суръатларда ривожланиб бораётганини чуқур мамнуният билан қайд этишган.
Ўзбекистон Президенти матбуот хизмати берган хабарга кўра, давлат раҳбарлари халқаро ва минтақавий сиёсатнинг томонларни қизиқтирган долзарб масалаларини муҳоқама қилдилар, шунингдек, бўлажак олий даражадаги тадбирлар режасини кўриб чиқишган.
«Мулоқотда давлат раҳбарлари Ўзбекистон ва Туркия ўртасидаги дўстлик ва стратегик шериклик муносабатларини, кенг кўламли ҳамкорликни янада кенгайтириш ва мустаҳкамлаш борасида интилишлари қатъий эканини яна бир бор тасдиқладилар», дейилади хабарда.
Маълум қилинишича, жорий йилнинг биринчи ярмида ўзаро товар айирбошлаш қарийб ўттиз фоиздан зиёд ошган. Туркиянинг етакчи саноат компаниялари ва банклари билан биргаликда мамлакатимиз ҳудудларида, аввало, юқори технологик ишлаб чиқаришларни ташкил этиш, энергетика, транспорт-коммуникация, логистика ва туризм инфратузилмасини модернизация қилиш, шаҳарсозлик, банк-молия соҳалари ва бошқа устувор йўналишларда йирик инвестиция лойиҳалари амалга оширилмоқда.
ЎМИ Матбуот хизмати
Аждодлардан бир ибрат…
Имом Бурҳониддин Марғиноний раҳматуллоҳи алайҳнинг “Ат тажнис вал мазид” – “Ўхшаш ва зиёда қилинган масалалар” китобида бир ажойиб масала келтирилади.
Агар ит инсоннинг бирор аъзосини ёки кийимини ғазаб ҳолатида тишлаган бўлса уни ювиш вожиб бўлмайди. Ҳазиллашиб тишлаган ҳолатида эса (теккан жой ва кийимни) ювиш вожиб бўлади. Биринчи кўринишда ит фақат тиши билан тишлайди, бошқача бўлмайди. Иккинчи кўринишда эса тиши ва ҳўл лаблари билан бирга тишлайди.
Ўтган аждодларимизнинг илми ва заковатига бир қаранг! Ҳақиқатда уларнинг илми, маърифати, маънавияти жуда кучли бўлган. Масалага эътибор қаратинг. Қарангки, инсоннинг бирор аъзоси ёки кийимига теккан жойни нажосат қилувчи итнинг сўлаги унинг лабида бўларкан. Шунинг учун итнинг ҳазиллашиб тишлаган ҳолатида теккан жой ва кийимни ювиш вожиб бўлар экан. Чунки бу кўринишда тиш ва нажосат жойлашган лаблар иштирок этади. Ғазаб билан тишлаган ҳолатда эса лабларини орқага тортиб, тишларнинг ўзи иштирок этади. Бунда кийим ҳам, бадан ҳам нажас бўлмайди.
Энди ўзингиз хулоса чиқаринг. Агар Марғилоний ҳазратлари зоология фанини ўрганмаганида бундай нозик фарқни қаердан билган бўлардилар?!
Қуруқ қошиқ оғиз йиртар, деганларидек баъзи ёшларнинг ўтган буюк аждодларимиз билан фахрланиб ўқишни, ўрганишни бир четга суриб, интернетга муккасидан кетиб, бор вақтини сарфлаб у билан “мароқли” ҳаёт кечираётганини кўриб таассуфда қоласан киши. Интернетдан яхши томонга фойдаланса қандай яхши. Ҳар хил ёт ғоялар йўғирилган ёки беҳаёликни тарғиб этувчи сайтлар қармоғига илиниб элга, юртга фойда етказиш ўрнига гулдек умрини мана шундай иллатларга сарфлаётгани ачинарли ҳол.
Ҳозирги ёшларга айтар сўзимиз: ўтган аждодларимизга муносиб фарзанд бўлинг. Ўткинчи ҳойу ҳавас эмас, илм-маърифат ортидан қувинг. Сизни ҳам шонли тарих кутмоқда. Ота – боболарингиз қолдириб кетган пешқадамлик таёқчасини ҳеч кимга берманг. Ўқинг, ўрганинг, кашфиётлар қилинг. Зеро, ҳақиқий бахт илм ўрганишдадир.
Равшанбек ЎРИНБОЕВ,
Андижон шаҳар “Ҳазрати Билол” жоме масжиди имом-хатиби
Зулҳижжа эшик қоқмоқда: унда нималар қилинади?
Аллоҳ таолонинг баъзи кунларни бошқаларидан кўра фазилатлироқ қилиб қўйганининг ҳикмати: бандаларига савобларини кўпайтириб олишлари учундир.
Муҳаммад ибн Маслама ал-Ансорий розияллоҳу анҳудан ривоят қилинади: “Расулуллоҳ соллаллоҳу алайҳи васаллам: “Замонингизда Раббингизнинг туҳфалари бор, уни қарши олинглар. Шояд, улардан бир туҳфа сизларга етиб, ундан сўнг ҳеч қачон бахтсизлик кўрмасангизлар”, дедилар (Тобароний ривояти).
Бандаларга туҳфа қилинган мавсумлардан бири зулҳижжа ойининг аввалги ўн куни ҳисобланади. Бу кунларни ғанимат билган, уларни бекорга ўтказиб юбормаган инсон қандай бахтли инсондир. Бундай улуғ кунлар бандадан уни гўзал қарши олиши ва унда кўпроқ солиҳ амаллар қилишини талаб қилади. Инсон дунёда гўёки мусофир кабидир. Мусофир сафарга тайёргарлик кўриб чиқса, сафари хайрли, баракотли бўлади. Биз дунёда охират сафарига тайёргарлик кўриб бормоғимиз лозим. Бу кунлар эса ўта қийматли ва қайтиб келмайдиган кунлардир.
“Раббингиздан бўлган мағфиратга шошилинглар” (Оли Имрон сураси,133-оят).
“Бaс, мусoбaқaлашувчилaр мaнa шундa мусoбaқa қилсинлaр!” (Мутаффифун сураси, 26-оят).
Зулҳижжада эътиборли бўладиган амалларимиз:
Фарз намозларини жамоат билан ўқиш ҳамда масжидга эртароқ келиш;
Нафл намозларини кўпайтириш. Чунки булар энг улуғ қурбатлардир;
Рўза тутиш;
Такбир, таҳлил ва таҳмид айтиш.
Саҳобалар ва тобеинлардан такбирнинг турли сийғалари ворид бўлган:
- Аллоҳу акбар, Аллоҳу акбар, Аллоҳу акбару кабиро
- Аллоҳу акбар, Аллоҳу акбар, лаа илааҳа иллаллоҳу валлоҳу акбар, валлоҳу акбару валиллааҳил ҳамд
- Аллоҳу акбар, Аллоҳу акбар, лаа илааҳа иллаллоҳу валлоҳу акбар, Аллоҳу акбару валиллааҳил ҳамд;
Аллоҳ таолони кўпроқ зикр қилиш.
Ҳақиқий тавба қилиш. Гуноҳлардан доим узоқлашиш лозим, хусусан, бу кунларда батариқа авлодир. Чунки улуғ кунларнинг ҳурматини поймол қилиб у кунларда қилинган гуноҳларнинг жазоси бошқа кунларникидан кўра оғирроқ бўлади;
Хайру эҳсон қилиш ва садақалар бериш. Ҳайит кунидан аввал ҳам хайру эҳсонни кўпайтирайлик. Камбағал, бечораларга совға-саломлар улашайлик. Чунки шунда улар ҳам ҳайитга хурсандчилик билан чиқишади. Ҳайит куни йўқлаб боришни ҳамма билади, кутади. Аммо ҳайитдан олдин, зулҳижжанинг аввалги тўққиз кунида қилинган хайр-эҳсонларимиз кутилмаган совға бўлади. Уламолар: кутилган катта совғадан кўра кутилмаган кичик совға инсонни кўпроқ хурсанд қилади, деганлар;
Кечаларни қоим қилиш. Агарчи камгина намоз ўқиса ҳам, намоз, Қуръон тиловати ва бошқа амаллар билан кечани қоим қилишлик. Саид ибн Жубайр раҳматуллоҳи алайҳ: “Ўн куннинг кечаларида чироқларингизни ўчирманглар”, деганлар. Бу билан зулҳижжанинг аввалги ўн кечасини қоим қилишга ишора килганлар. Чунки кечани қоим қилиш қалбни Аллоҳга боғлайди ва инсонни ҳаёт қийинчиликлари ва ташвишларига бардош бера оладиган қилиб қўяди, хулқини янада гўзаллаштиради;
Арафа кунига алоҳида эътибор қаратиш. Абу Қатода розияллоҳу анҳудан ривоят қилинади: “Набий соллаллоҳу алайҳи васаллам: “Арафа кунининг рўзаси олдинги сананинг ва ундан кейинги сананинг каффорати бўлишини Аллоҳдан умид қиламан”, дедилар (Муслим ривояти).
Келаси йил учун ҳам каффорат” дейилди. Бу дегани келаси йил гуноҳ қилишдан муҳофаза қилади ёки шундай савоблар берадики, келаси йил каффорати учун ҳам етади, деганидир. Оиша розияллоҳу анҳудан ривоят қилинади: “Расулуллоҳ соллаллоҳу алайҳи васаллам: “Арафа кунидан кўра Аллоҳ таоло бандаларини дўзахдан кўпроқ озод қиладиган бирор кун йўқ”, дедилар (Муслим ривояти);
Қурбонлик қилиш. Имкон қилиб ушбу ўн кун ичида Қуръони каримни бир марта Хатм қилиш;
Қабристонни зиёрат қилиб ўлимни эсга олиш;
Рўзадорларга ифторлик қилиб бериш;
Фарзандларга шу кунларда кўпроқ зикр, тасбеҳ ва одобларни ўргатиш. Чунки ота-оналар улар ҳақида қиёмат куни сўроққа тутилади. Қиёмат кундаги сўроқ оғир, ҳисоб қийин, қўрқинч катта, жаҳаннам эса: “яна борми?” деб туради.
Қудратуллоҳ СИДИҚМЕТОВ,
Тошкент шаҳар “Аҳмаджон қори” жоме масжиди имом ноиби
“Бўрижар” жоме масжидига янги имом-хатиб тайинланди
Бугун Тошкент шаҳридаги “Бўрижар” (“Илонлик ота” маҳалласи) жоме масжидига янги имом-хатиб тайинланди. Аср намозидан сўнг Ўзбекистон мусулмонлари идораси раиси ўринбосари Иброҳим домла Иномов жамоатга Алихонов Мирзатилло Абдуллажон ўғлини “Бўрижар” жоме масжиди имом-хатиби этиб тайинлаш тўғрисидаги Ўзбекистон мусулмонлари идораси раисининг буйруғини ўқиб эшиттирди.
Алихонов Мирзатилло Абдуллажон ўғли бунгача Тошкент шаҳар “Тепа” жоме масжиди имом ноиби вазифасида фаолият юритган ҳамда қўшимча равишда Ўзбекистон мусулмонлари идораси Котибият бўлимида хизмат қилиб келади.
Устозлар ёш, иқтидорли имом-хатибнинг келгусидаги фаолиятига Аллоҳ таолодан муваффақиятлар сўраб, динимизга, халқимизга садоқат билан фаол хизмат қилишларини тилаб дуолар қилдилар.
Эслатиб ўтамиз, яқинда Шайхонтоҳур тумани бош имом-хатиби ва “Шайх Зайниддин” жоме масжиди имом-хатиби вазифасига тайинланган Абдукаримов Ҳусниддин Чилонзор тумани бош имом-хатиби ва “Бўрижар” жоме масжиди имом-хатиби вазифаларида фаолият юритган эди.
ЎМИ Матбуот хизмати