Кеча 2019 йилнинг 14 апрель куни Ислом дунёсининг машҳур олими Шайхул ислом, муфтий Муҳаммад Тақий Усмоний ҳафизаҳуллоҳ юртимизга ташриф буюрдилар. Шайхул ислом Москва ташрифидан сўнг, тўғридан-тўғри Бухорои шариф йўл олдилар.

Муҳаммад Тақий Усмоний ҳафизаҳуллоҳ Бухоро аэропортида ҳурмат ва эҳтиром ила кутиб олинди. Шундан сўнг азиз меҳмон тунги Бухорои шарифнинг диққатга сазовор жойларини, хусусан, Эски шаҳар, қадим мадрасалар ва масжидларни, тунги чироқлар ёғдусида дилларга ҳузур бахш этиб турган Мир араб мадрасасини ҳам томоша қилдилар.

Хуфтон намози Масжиди Калонда Муҳаммад Тақий Усмоний ҳафизаҳуллоҳ иштирокида адо этилди. Шу аснода азиз меҳмоннинг биринчи кунги зиёратлари ўз ниҳоясига етди.

Шу ўринда Шайхул ислом Муҳаммад Тақий Усмонийнинг таржимаи ҳолларига қисқача тўхталиб ўтсак:

Муҳаммад Тақий Усмоний ибн Шайх, муфтий Муҳаммад Шафеъ ибн Шайх Ёсин ибн Халифа Таҳсин Али ибн Миёнжий ҳофиз Каримуллоҳ ибн Миёнжий Хайруллоҳ ибн Миёнжий Шукруллоҳ ҳазратлари 1362-ҳижрий, 1943-мелодий санада Ҳиндистоннинг Саҳорнафур вилоятига қарашли Девбанд қишлоғида таваллуд топдилар. Ҳинд тилида Миёнжий деган сўз муаллим, деганини билдиради. У кишининг силсилалари Усмон ибн Аффонга бориб тақалади.

Муҳаммад Тақий Усмоний Дубай, Баҳрайн, Британия, Америка ва Австралия каби бир неча давлатларда илмий сафарда бўлганлар.

Холид Муҳаммад Бушофеъ айтадилар: «Мен бирор кишини Тақий Усмонийдек янги масалаларда, хусусан банк масалаларида аввалги уламолар китоблари билан ҳозиргилар китобини жамлаганини кўрмадим. У зот бирор муаммони ечиш асносида кучли тақво соҳиби эканлари яққол намоён бўлар эди. Мен Ҳинд қитъасида бу кишидек муаммони ечишда мазҳаблар орасини жамлашдек қобилиятли кишини ҳам кўрмадим».

Ташрифга доир маълумотлар интернет ижтимоий тармоқларидаги расмий саҳифаларимизда ёритиб борилади. Бизни кузатиб боринг.

Манба: https://islom.uz

Шу кунларда ижтимоий тармоқларда покистонлик мусулмонлар томонидан Янги Зеландияда содир этилган террорчилик актидан жабр кўрганларга ҳамдардлик мақсадида акция ўтказилгани ва бунда юзлаб мусулмонлар ҳамкорликда асжид шаклини қурганларининг фотосурати тарқалди. Кун.уз нашрида ҳам "Покистонда минглаб кишилар тизилишиб улкан масжид тасвири ва «Ислом — бу тинчлик» ёзувини ҳосил қилишди" номли хабар эълон қилинди.

Покистоннинг Панжоб вилоятидаги Жанг шаҳрида минглаб маҳаллий кишилар тизилишиб улкан масжид тасвири ва «Ислом — бу тинчлик» ёзувини ҳосил қилишди. Улар буни яшил майдонда оппоқ яктак ва дўппиларда амалга оширишди. Мазкур акция тасвирланган фотосуратни AFP агентлиги тақдим этди.

«Бу жуда ажойиб бўлди, биз кун бўйи шундай туришга тайёр эдик», — деди акция иштирокчиларидан бири.

Масжид тасвири юқорисига Янги Зеландия ва Покистоннинг улкан байроқлари жойлаштирилди.

Хабарда айтилишича, акция Янги Зеландиянинг Крайстчерч шаҳрида содир этилган теракт қурбонлари хотирасига бағишлаб ўтказилди. Мазкур фожиада 50 киши ҳалок бўлганди.

Ўзбекистон мусулмонлари идораси Матбуот хизмати

Туркиянинг Истанбул шаҳрида жойлашган Истанбул кўргазмалар марказида 6-масжид қурилиши жиҳозлари кўргазмаси ташкил этилди. Бу ҳақда «Анадолу» агентлигига таяниб Азон интернет нашри хабар берди.

Ушбу кўргазма 14 апрелга қадар давом этиши маълум қилинган. Кўргазмада меҳроб, минбар, ёғоч эшиклар ва овоз кучайтириш тизимлари каби масжид қурилишида фойдаланиладиган буюмлар намойиш этилган.

Кўргазмада иштирок этаётган «Проактиф» ширкатининг бошқарув кенгаши раиси Ҳусайн Шоҳиннинг сўзларига кўра, кўргазмада 103 та ширкат иштирок этмоқда ва уларнинг 5 таси Туркия ташқарисидан келган ширкатлардир.

Шоҳин кўргазмада иштирок этиш учун Туркия ва дунёнинг бошқа мусулмон давлатларидан зиёратчилар келиши кутилаётганини айтган.

Ўзбекистон мусулмонлари идораси Матбуот хизмати

Малайзия исломий фанлар университети доценти самарқандлик талабаларга замонавий архитектура муаммолари бўйича маъруза ўқиди. Бу ҳақда ОТМ телеграм канали хабар берди.

Самарқанд давлат архитектура-қурилиш институти ва Малайзия Исломий фанлар университети ўртасида тузилган ҳамкорлик шартномасига кўра малайзиялик мутахассис Элина Бинти Моҳд Ҳусини Самарқандга ташриф буюрган.

Малайзиялик олима Самарқанд давлат архитектура ва қурилиш институтуи “Интерьер лойиҳалаш, архитектуравий графика ва компьютер моделлаш”, “Ландшафт дизайни” ва бошқа таълим йўналишлари ҳамда мутахассисликлари талабаларига 18 соатлик дарс машғулотларини олиб борди.

Элина Бинти Моҳд Ҳусини институтнинг профессор-ўқитувчилари ва магистрантлари билан замонавий архитектурадаги янги йўналиш ва услубларни муҳокама қилди ҳамда фанни ўқитишнинг илғор технологиялари бўйича семинар-тренинглар ўтказди.

Ўзбекистон мусулмонлари идораси Матбуот хизмати

Ўзбекистондаги Ислом цивилизацияси маркази ва Имом Бухорий халқаро илмий-тадқиқот маркази вакилларидан иборат делегация Германиянинг нуфузли университетлари, исломшунослик соҳасига ихтисослашган илмий марказлар, музей ва маданий муассасаларда учрашувлар ўтказди. Бу ҳақда ЎзА хабар берди.

Ўзбекистон делегацияси Лейбницдаги замонавий шарқшунослик марказида бўлиб, германиялик ҳамкасбларига Ўзбекистонда кечаётган ижобий ўзгаришлар, турли конфессияга мансуб фуқароларга эътиқод эркинлигини тўлиқ кафолатлаш, ўзларини жамиятнинг тўлақонли аъзоси сифатида ҳис қилиб яшаши, ибодатларини эмин-эркин адо этишини таъминлашга қаратилган чора-тадбирлар ҳақида маълумот берди. Дунёнинг айрим мамлакатларида кўп миллатлилик, турли конфессияларга мансублик ижтимоий муаммоларни келтириб чиқарувчи салбий омил сифатида қаралаётган бир вақтда этник хилма-хиллик Ўзбекистоннинг чинакам бойлиги экани, халқнинг яратувчилик кучи ва қудратини оширадиган муҳим мезонлиги қайд этилди.

Эътиборингизга германиялик етакчи исломшунос, шарқшунос олимларнинг Ўзбекистонда амалга оширилаётган фаол ислоҳотлар ҳақидаги фикр-мулоҳазаларини тақдим этамиз.

Гудрун Крэмер, Берлин эркин университети Исломшунослик институти директори:
– Мен асосан Яқин Шарқда, хусусан, араб дунёсидаги замонавий ислом мавзусида изланишлар олиб бораман. Ўзбекистон делегациясининг университетимизга ташриф буюрганидан жуда хурсандман. Бугунги учрашувда ўзбекистонлик мутахассислар билан ҳамкорликни йўлга қўйиш борасида ўзаро фикр алмашдик. Дарҳақиқат, Германияда Ўзбекистон учун муҳим аҳамиятга эга бўлган кўплаб қўлёзмалар мавжуд. Биз мана шу қўлёзмаларни биргаликда ўрганиш борасидаги илмий ҳамкорлик бўйича маслаҳатлашдик.

Ҳамкорликнинг яна бир йўналиши сифатида талабалар ва ёш олимлар учун махсус ўқув курслари ташкил этиш ҳам мақсадга мувофиқдир.

Мен Ўзбекистонга кўп маротаба саёҳат қилиш бахтига муяссар бўлганман. Хусусан, 2000-2006 йиллар оралиғида Самарқанд ва бошқа шаҳарларда ўтказилган халқаро анжуманларда иштирок этганман. Сафарларим давомида мамлакатингиз билан яқиндан танишиб, ўзбек халқининг маданий-маърифий мероси ва урф-одатлари ҳақида кўп маълумотга эга бўлдим. Ўзбекистон исломшунослари билан яқин алоқалар ўрнатиш ва илмий ҳамкорликни йўлга қўйишдан жуда мамнунман.

Конрад Ҳиршлер, Берлин эркин университети исломшунослик бўйича профессори, Мусулмон жамиятлари ва маданиятлари Берлин Олий мактаби директори:

– Ўзбекистон делегациясининг Берлинга ташрифи самарали бўлди, деб ўйлайман. Бугунги кунда мамалакатингизда исломшунослик марказларининг ташкил этилгани ва соҳани ривожлантириш борасида республика ҳукумати томонидан амалга оширилаётган чора-тадбирлар таҳсинга сазовор. Ушбу йўналишда олиб борилаётган ишлар кўлами мени жуда ҳайратлантирди ва ўзаро ҳамкорликка бўлган қизиқишим янада ошди. Тарихий қўлёзмаларни ўрганиш борасидаги алоқаларни катта истиқболга эга, деб ҳисоблайман. Келажакда мазкур йўналишда ўзбек олимлари билан кенг кўламли тадқиқот ишлари олиб борамиз, деб умид қиламан.

Улрике Фрайтаг, Замонавий шарқшунослик маркази директори, профессор:
– Ўзбекистонда исломшуносликка кенг йўл очилганлиги ва ҳукумат томонидан марказлар ташкил этилишини ижобий баҳолайман. Ўзбекистондаги Ислом цивилизацияси маркази ва Имом Бухорий халқаро илмий-тадқиқот маркази вакилларининг Германиядаги тегишли илмий-тадқиқот марказлари ҳамда олий ўқув юртлари билан ҳамкорлиги бизни жуда қувонтиради. Биз бугун Ислом маданиятининг тарихий илдизларини ўрганиш ва ислом динида бағрикенглик мавзуси бўйича биргаликда илмий тадқиқотлар олиб боришдан манфаатдормиз.

Ҳайке Лиебау, Замонавий шарқшунослик маркази илмий тадқиқотлар раҳбари:
– Мен бундан 30 йил аввал Тошкент давлат университетининг Шарқшунослик факультетида ўқиганман. Талабалик йилларим ўтган ўша дамларни, устозларим ва бирга ўқиган дўстларимни соғинч билан эслайман. Шунинг учун ҳам Ўзбекистондан келган меҳмонларни катта қувонч билан кутиб олдим. Самимий кечган суҳбат чоғида Ўзбекистонда ташкил этилган Ислом марказлари ҳақида батафсил маълумотга эга бўлдик. Тошкент ва Самарқанддаги Ислом марказлари фаолияти Лейбниц номидаги Замонавий шарқшунослик маркази тадқиқот йўналишларига ҳамоҳанг эканини инобатга олган ҳолда, тез орада марказларимиз ўртасида мазмунли ва самарали ҳамкорликни амалга оширамиз, деган умиддаман.

Ўзбекистон мусулмонлари идораси Матбуот хизмати