ТАШАККУРНОМА 

Юртимизда адолатли ислоҳотлар олиб бораётган ҳурматли Президентимиз Шавкат Мирзиёевга, Ўзбекистон мусулмонлари идораси раиси, муфтий Усмонхон Алимов ва диний идора раҳбариятига имконияти чекланган (кар, соқов) инсонлар номидан ўз миннатдорчилигимни билдираман. 

Яқин кунларгача ҳам кар, соқовлар жамиятига аъзо ҳар бир инсонга эътиқод масаласида, соф ислом динини ўрганиш борасида етарли билим олишга эътибор қаратилмаган эди. Шунинг учун ҳам ўзи мусулмон бўлиб, миссионерликка кириб кетганлар сони кўпчиликни ташкил қилган эди. Отаси мусулмон ҳолида вафот этсада, масиҳийликда бўлган ўғли насронийларни қабристонига олиб бораман деб, қаршилик қилади. Қизлари черковга бораётганини билган ёлғиз она тўғри йўлга сололмай оилавий низолар келиб чиқади. Миссионерликни танлаганлар орасида оилавий низолар кўпайиб, бошқа динни ихтиёр этганлар орасида ёшларни кўпчилиги эса ачинарли ҳолдир. 

Миссионерликка кириб кетганларга Аллоҳнинг улуғлигини, Исо алайҳиссалом ҳам бир пайғамбар эканлигини, Ислом дини охирги дин эканлиги, Пайғамбаримиз Муҳаммад алайҳиссалом охирги пайғамбар эканликлари ҳақида тушунтирсак, улар “Бизга ислом дини ҳақида тушунтирадиган жойлар йўқ, ота-оналаримиз ҳам тушунтириб бера олмайди. Черковда эса масиҳийлик ҳақида тушунтирадиган сурдо таржимонлар бор. Бизларга махсус байрамлар, сайёҳатлар ташкиллаштиришади”, деб жавоб қайтаришарди. 

Алҳамдулиллаҳ, Ўзбекистон мусулмонлари идораси раиси, муфтий ҳазратлари ислом динини атрофлича тушуниш мақсадида йўллаган мактубимизни эътиборсиз қолдирмадилар. 

Диний идора раҳбарияти томонидан тавсия этилган ходимлар билан ислом дини арконларини, пайғамбарлар тарихини тушуниб боряпмиз. Айниқса бизни қизиқтирган саволларга мутахассислар томонидан берилган жавоблар ўз динимизни чуқурроқ тушунишимизга яқиндан ёрдам бермоқда. Илк суҳбатда имконияти чекланганлар сони 3-4 та билан бошланган бўлса, ҳозирда бизларнинг сонимиз 100га яқинлашиб қолди. 

Энг қувонарлиси миссионерликка аъзо бўлганлар нотўғри йўлдан қайтиб, уларнинг ислом динига бўлган муҳаббати ортиб бормоқда. 

Тошкент шаҳар “Исломобод” жоме масжиди бош имом-хатиби Жуманов Абдулҳамид домланинг маърузалари алоҳида эътиборга лойиқ. Кар, соқов эркакларимиз поклик, намоз масалаларида ҳам ўзларини қизиқтирган саволларга жавоб олишди. Ҳозирда жамиятимизга аъзо эркакларнинг 80га яқини “Исломобод” масжидига Жума намозини ўқиш учун боришмоқда. Масжидда кар, соқовлар учун сурдо таржимон ва бошқа қулайликлар яратилган. Абдулҳамид домла борганларга ҳадялар бериб, кўнгли яримларни дуосини олмоқдалар. 

Олиб борилаётган ҳайрли ишлар биз кар-соқов мусулмонларни қалбида ҳам ҳаётга ижобий ёндашиш, Ислом динини ўрганиш, намоз, рўза, закот ва ҳаж амалларини бажаришга иштиёқ ва ғайрат пайдо қилди. 

Бошқа динга кирганлар эса тавба қилишиб, исломга киришди. Оилаларда, болалар тарбиясида, қариндош-уруғчиликда, эр-хотин муносабатларида ижобий томонга ўзгаришлар бўлди. Бир-бирига ҳурмат, меҳр-шавқат ҳисси пайдо бўлди. Биз ҳам ўзимизни жамиятнинг тўлақонли аъзоси сифатида ҳис қиляпмиз. 

Кечагина Ўзбекистон мусулмонлари идораси раҳбарияти ташаббуси билан “Ҳазрати Имом” мажмуасига таклиф қилишди. Жамиятимиздан 50 яқин кар-соқовлар иштирок этишди. Ислом тарихи, Усмон мусҳафи ҳақида маълумотлар, шунингдек миллий ҳунармандчиликлар бизда катта қизиқиш уйғотди. 

Бизга кўрсатилаётган бундай ғамҳўрликлар, эътибор ва меҳрдан кўнглимиз кўтарилиб, динимизга бўлган муҳаббатимиз яна ортиб боряпти. Неча йиллардан бери биз орзу қилган ниятларимизни амалга оширган, ҳар биримизга ҳидоят ва тавфиқ берган Аллоҳ таолога ҳамду-санолар бўлсин! Ушбу эзгу  ишларимиз қиёматга қадар давомли бўлсин! Дуоларимиз ва ибодатларимизни  Ўзи даргоҳида қабул қилсин! Омин!

Моҳира Кубаева

Кар-соқовлар жамиятининг аъзоси

2018 йил 13 март куни диний идорада Ўзбекистон ёшлар иттифоқи ва Ўзбекистон мусулмонлари идораси ҳамкорлигида ўқувчи ёшлар иштирокида давра суҳбати ташкил этилди. Ушбу тадбирда Тошкент шаҳар Шайхонтоҳур туманидаги 157 умумий ўрта таълим мактабининг 50 нафарга яқин ўқувчиси иштирок этди.
Тадбир Қуръони карим тиловати билан очилди. Дастлаб, ўқувчиларга диний идоранинг мақсад ва вазифалари ҳақида батафсил маълумот берилди. Сўнгра, диний идора ходими Исҳоқжон домла Бегматов сўзга чиқиб, таълим ва тарбия, одоб-ахлоқ, ёшлар ўртасида жиноятчиликни олдини олиш мавзусида маъруза қилди.

У ўз нутқида жиноят содир этиш жуда ҳам оғир гуноҳ экани, Қуръони карим оятлари ва ҳадиси шарифларда бундай хатти-ҳаракатлардан қаттиқ қайтарилганини жонли мисоллар орқали таъсирчан қилиб, тушунтирди. Жумладан, “Бир ишнинг гуноҳ эканини билган одам албатта ундан қайтади. Жиноятнинг қайси бир турини олиб қараманг, динимиз, инсонийликка хилофдир. Одам ўлдириш, ўғрилик, фирибгарлик, товламачилик – буларнинг барчаси инсон ҳаётига зарар” деб таъкидлади Исҳоқжон домла.

Учрашув жуда ҳам кўтаринки руҳда, савол-жавобларга бой бўлди. Ўқувчилар бугунги давра суҳбатидан нақадар катта маънавий озуқа олишганини уларнинг ёниб турган кўзларидан англаш мумкин эди.
Эслатиб ўтамиз, 2018 йилнинг 5 январь куни ёшлар билан ишлаш борасидаги ишларни янги босқичга олиб чиқиш учун Ўзбекистон Ёшлар иттифоқи билан Ўзбекистон мусулмонлари идораси ўртасида ҳамкорлик қилиш тўғрисидаги меморандум имзоланган эди. Ҳозирда ушбу меморандум доирасида ҳамкорлик ишлари давом этмоқда.

ЎМИ Матбуот хизмати

2017 йил 1 июль ҳолатида Самарқанд вилоятида 1749 нафар шахс ички ишлар идоралари махсус ҳисобига олинган эди. Ҳаётда тўғри йўлдан адашган, билиб-билмай турли диний оқимлар сафига қўшилиб қолган, ёт иллатлар таъсирига берилган бу юртдошларимизнинг 1625 нафари Президентимизнинг бағрикенглиги ва ғамхўрлиги туфайли махсус ҳисобдан чиқарилиб, уларга жамиятда ўз ўрнини топиш учун имконият берилди.

ЎзА хабарига кўра, ушбу тоифа вакилларининг 177 нафарига қарийб 41 миллион сўм моддий ёрдам кўрсатилди. 25 нафарига жами 697 миллион сўмлик имтиёзли кредит ажратилди. Натижада махсус ҳисобдан чиқарилган 69 нафар фуқаро тадбиркорлик фаолиятини йўлга қўйди. 195 киши иш билан таъминланди. 71 нафар беморнинг даволаниши учун кўмак кўрсатилди.

Давлатимиз раҳбарининг афв этиш тўғрисидаги фармонига кўра, Самарқанд вилоятидан 84 нафар шахс, жумладан, диний экстремизмга алоқадор 41 киши афв этилди. Уларнинг 34 нафари бандлиги таъминланган бўлса, 5 нафари меҳнатга лаёқатсиз бўлгани учун ногиронлик нафақасига чиқарилган, 2 нафари ёшга доир пенсияга чиққан.

Афсуски, бугунги кунда 124 нафар фуқаро турли сабаблар билан доимий яшаш манзилларидан хорижга чиқиб кетгани сабабли ҳали ҳам махсус ҳисобда турибди. Вилоят ҳуқуқ-тартибот идоралари томонидан 269 нафар шахс турли жиноятларни содир қилганлиги учун қидирилмоқда.

Самарқанд вилояти ҳокимлигида ҳуқуқ-тартибот идоралари, давлат ва жамоат ташкилотлари вакилларининг қидирувдаги фуқароларнинг яқин қариндошлари ва махсус ҳисобдан чиқарилган шахслар билан ўтказилган учрашувида шу каби маълумотлар берилиб, махсус ҳисобга олинган ва айни пайтда хорижда юрган юртдошларимизни Ватанимизга қайтариш, уларни тўғри йўлга бошлаш ҳақида сўз юритилди.

Вилоят ҳокими Т.Жўраев вилоятда амалга оширилаётган кенг кўламли ислоҳотлар, бунёдкорлик ишлари ҳақида маълумот бериб, ушбу жараёнда жамиятнинг ижтимоий муҳофазага муҳтож қатлами манфаатларини ҳимоя қилиш, уларни ҳар томонлама қўллаб-қувватлашга давлатимиз томонидан алоҳида эътибор қаратилаётганини таъкидлади.

– Бу юртда ҳар бир фуқаронинг яхши яшашга ҳақи бор, – деди вилоят ҳокими. – Президентимиз ҳар бир чиқишларида алоҳида қайд этганидек, улар келажакда эмас, бугун фаровон ҳаёт кечириши керак. Ҳатто, тўғри йўлдан адашган, билиб-билмай турли диний оқимлар сафига қўшилиб қолган юртдошларимизни ҳам кечириб, уларга бағримизни очишимиз, ижтимоий муаммоларини ҳал этишга кўмаклашишимиз лозим. Давлатимиз раҳбарининг бағрикенглиги туфайли мана кейинги бир йилда махсус ҳисобдан чиқарилган юзлаб шахсларни тўғри ҳаётга қайтардик. Улар ҳам бугун юртимиз равнақига баҳоли қудрат ҳисса қўшмоқда. Маҳалла-кўй ишида қатнашяпти. Бугунги кунда махсус ҳисобда турган, хорижда юрган фуқароларнинг яқинларига мурожаат қилмоқчиман. Агар улар билан алоқангиз бўлса, айтинг, юртимизга қайтсин. Вилоят ҳокими сифатида ваъда бераман, ҳеч қайсини қамамаймиз. Уларни тўғри йўлга соламиз, иш билан таъминлаймиз, уйи бўлмаса, бу борада ҳам ёрдам берамиз.

– Турли диний экстремистик оқимлар сафидаги ноқонуний ҳаракатлари учун қидирувда бўлган шахсларга нисбатан олиб борилган тезкор тадбирлар жараёнида олинган маълумотларга кўра, уларнинг айримлари Ўзбекистон Республикасидан ташқарида бўлатуриб, яқин қариндошлари билан доимий алоқада, – дейди Миллий хавфсизлик хизмати Самарқанд вилояти бошқармаси бошлиғи У.Мирзааҳмедов. – Улар яшаш манзилларига қайтиб келиш истаклари мавжудлиги, бироқ муқаддам содир этган жиноятлари учун ҳуқуқ-тартибот идоралари томонидан ушланиб, қамоқ жазоси қўлланилишидан қўрқаётганини маълум қилмоқда. Лекин уларнинг бир нечтаси аввалги ҳаракатлари ноқонуний эканлигини англаб етиб, ҳозирги вақтда диний экстремистик ва террорчилик ташкилотлари фаолиятига аралашмасдан, ҳалол йўл билан меҳнат қилмоқда. Уларнинг хатти-ҳаракатларида давлатимиз миллий хавфсизлигига таҳдид солувчи омиллар мавжудлиги тўғрисида маълумотлар олинмаган. Шундан келиб чиқиб, қидирувда бўлган 12 нафар самарқандликнинг жиноят ишлари ўрганиб чиқилди. Уларнинг ҳаракатида жиноят аломатлари мавжуд бўлса-да, агар аввалги ҳаракатлари нотўғри эканлигини тушуниб етган ҳолда, ўз ихтиёри билан яшаш манзилига қайтиб келса, озодликдан маҳрум этиш билан боғлиқ бўлмаган жазо тури қўлланилиши мақсадга мувофиқлиги тўғрисида хулосага келинди.

Шунингдек, йиғилишда вилоят прокурори Ф.Зуфаров, Жиноят ишлари бўйича вилоят суди раиси О.Ҳайитов ва вилоят бош имом-хатиби З.Эшонқулов адашган, ўзга юртда қочиб юрганлар хатти-ҳаракатларининг ҳуқуқий оқибатлари, улар ўз ихтиёрлари билан қайтишса, бериладиган қонуний енгилликлар ҳақида сўзлади.

Тадбир давомида турли диний оқимларга кириб, тақдири аянчли якунланган ва ўзга юртда хору зор бўлиб юрган кимсалар ҳақида ҳикоя қилувчи “Адашганлар” номли фильм намойиш этилди.

Ўзбекистон мусулмонлар идораси матбуот хизмати