Ўзбекистон мусулмонлари идораси раиси, муфтий

Нуриддин домла ҳазратлари

Фарғонадаги "Ҳазрати Аббос" жоме масжидидаги суҳбат (17.12.2021)

Аллоҳ таоло ўлим фариштасидан: сен Одам боласининг жонини олаётганингда бирор марта бўлса ҳам раҳминг келиб йиғлаганмисан?-деб сўради.

Ўлим фариштаси: мен бир марта кулганман, бир марта йиғлаганман ва бир марта қўрққанман, деб жавоб берди.

Нима сабабдан кулгансан?-деди.
Бир кишининг жонини олишга тайёргарлик кўраётган эдим. У эса, ўлишидан хабари йўқ ҳолда пойафзалини созлаётган устага: пишиқроқ қилиб тузат, бир йилга етадиган бўлсин, дер эди. Мен эса, кулиб турар эдим, пойафзалини кийишга ҳам улгурмай жонини олдим, деди.

Аллоҳ таоло: қачон йиғлагансан?-деб сўради.
Сен менга бир ҳомиладор аёлнинг жонини олишимга буюрдинг. Унинг олдига борсам у кимсасиз саҳрода, фарзандини дунёга келтираётган экан. Фарзандини туғиб бўлгунча кутиб турдим. Бепоён кимсасиз саҳрода фарзандини дунёга келтирганидан кейин жонини олдим. Жонини олар эканман, кимсасиз саҳрода чинқириб йиғлаётган норасида гўдакнинг ҳолига ачиниб йиғлар эдим, деди.

Қачон қўрққансан?-деб сўради.
Олим бандаларингдан бирини жонини олишга буюрганингда қўрққанман. Ўшанда унинг ҳужрасидан нур чиқиб турарди. Ҳар гал мен унинг жонини олиш учун яқинлашганим сари, ҳужрадан чиқаётган нур авжланиб мени унга яқинлашишга қўймасди. Шунда қўрққанман, деди.

Шунда Аллоҳ таоло: сен ўша олим киши ким эканлигини биласанми? У ўша кимсасиз саҳрода сен жонини олган аёлнинг норасида ўғли. Мен Ўзим уни кафолатимга олган эдим, деди.

Субҳаналлоҳ. Ҳар қандай ғам андуҳларни кетказадиган Парвардигор ҳар нарсага қодир.

Масжидимиз атрофида аҳолиси зич жойлашгани, кўчалар тор бўлгани, айниқса, жума ва ҳайит намозларнинг сиғмаслиги каби муаммолар бўйича ҳудуд мўмин-мусулмонларининг муржаати ўрганилиб, мутасадди раҳбарлар томонидан янги масжид қурилишига 70 сотих ер ажратилди ва жорий йилда масжид қурилиши бошланди. Айни пайтда пойдевори кўтарилиб, ғишт теришга тайёр ҳолатда эди.

Айни шу кунларда Ўзбекистон мусулмонлари идора раиси, муҳтарам муфтий Нуриддин ҳожи Холиқназаров ҳазратларининг Фарғона сафари ва Фарғона шаҳридаги “Аҳмаджон қори” масжидига ташрифидан масжид қавми ва ҳудуд мўмин-мусулмонларининг боши осмонга етиб, кўнгли тоғдек кўтарилди.

Ташриф давомида муҳтарам Муфтий ҳазратлари масжид пойдеворига илк ғиштни табаррукона қўйиб бердилар, сўнг қурилиш лойиҳаси ва иш жараёни билан яқиндан танишдилар. Кейин масжид қурилишига муфтийлик фондидан дастлабки 20 000 000 сўм ёрдам пули бериш тўғрисидаги сертификатни топширдилар. Муфтий ҳазратларининг масжидимизга ташрифи, насиҳатлари ва барча ўрнак сифатидаги ҳимматлари қавмимиз ва қурувчиларни руҳлантириб, қалбига хурсадчилик киритди ва янада шижоатлантирди.

Динимизда инсонларга яхшилик қилиш, уларнинг кўнглини кўтариш улкан савобли амаллардан. Ибн Умар разийаллоҳу анҳудан ривоят қилинади: “Бир киши Расулуллоҳ соллаллоҳу алайҳи ва салламнинг ҳузурларига келиб: “Ё Аллоҳнинг Расули, Аллоҳга энг севимли киши ким, Аллоҳ азза ва жаллага энг севимли амал қайси?”, деб сўради. Расулуллоҳ соллаллоҳу алайҳи ва саллам: “Аллоҳга энг севимли киши – одамларга кўпроқ манфаати тегадиган киши. Аллоҳга энг севимли амал – мусулмоннинг қалбига хурсандчилик киритмоғинг...”, дедилар (Имом Табароний ва Имом Ибн Абуд Дунё ривояти).

Аллоҳ таоло юртимиздаги барча бунёдкорлик, хусусан, масжидлар қурилишига ҳисса қўшаётган инсонларга мададкор бўлсин, элимиз фаровонлиги, динимиз ривожи йўлида жой куйдириб хизмат қилаётган барча раҳбарларимиз, жумладан, муфтий ҳазратлари фаолиятига ривожлар ато этсин!

Фарғона шаҳридаги “Аҳмаджон қори” масжиди қавми

Ҳамдамжон домла Мўминов