Ўтган куни, “Вақф” хайрия жамоат фонди раҳбари Искандар Халилов Саудия Арабистонининг Мадина ислом университетидаги ўзбекистонлик талабалар билан учрашди.
Мулоқотда Фонд раҳбари бугунги кунда муҳтарам Президентимиз бошчиликларида амалга оширилаётган ислоҳотлар, янгиланишлар, хусусан, охирги икки йилда диний-маърифий соҳадаги кенг қамровли ўзгаришлар тўғрисида талабаларга гапириб берди. Айниқса, халқаро илмий-тадқиқот марказлари, илмий мактаблар фаолияти ва диний таълим муассасаларида “Араб тили”, “Қуръони карим ва тажвид” ўқув курслари очилганини алоҳида қайд этди.
Искандар Халилов давлатимиз Раҳбари ташаббуси билан “Вақф” хайрия жамоат фонди ташкил этилгани, унинг мақсад-вазифалари ва келгусидаги режалари ҳақида батафсил сўзлаб берди.
Ислом университети талабалари ўзларининг қизиқтирган саволларига жавоблар олишди. Жумладан, хориж мамлакатларидан Фондга маблағ йўналтириш усуллари, Ўзбекистондаги хайрия ишларида қатнашиш тартиби ва бугунги кунда Фонднинг қайси акцияси учун маблағлар зарурлиги тўғрисида саволлар берилди.
Учрашув дўстона ва самимий руҳда ўтди.
Саудия Арабистони сафари давом этмоқда.

“Вақф” хайрия жамоат фонди Матбуот хизмати

Оиша розияллоҳу анҳодан ривоят қилинишича, Расулуллоҳ соллаллоҳу алайҳи васаллам айтдилар: “Агар Аллоҳ таоло жаннат аҳлини жаннатга киритишни хоҳласа, бир фариштани ҳадя ва кийимлар билан юборади. Ўша кишилар жаннатга киришни хоҳлашса, фаришта уларга: “Тўхтаб туринглар, менда оламлар Рабби томонидан ҳадя бордир”, дейди. Жаннат аҳллари: “У қандай ҳадя?” деб сўрашганида, фаришта шундай дейди: “Ўнта муҳр урилган мактуб бордир. Мактубда:

1. “Сизларга тинчлик-омонлик бўлсин! Хуш келдингиз! Бас, унга мангу қолгувчи ҳолларингизда кирингиз”.
2. “Ғам-ғуссалар сизлардан кўтарилган”.
3. “Қилиб ўтган амалларингиз сабабли сизларга мерос қилиб берилган жаннат мана шудир”.
4. “Сизларга кийимлар ва зийнатларни кийдирамиз”.
5. “Биз сизларга оҳу кўз ҳурларни жуфти ҳалол қилиб қўйгандирмиз. Мен бугун сизларни сабр тоқат қилганликларингиз сабабли мукофотладим. Сизлар ҳақиқий бахт-саодатга эришгувчидирсизлар”.
6. “Бугунги мукофотларингиз қилган тоатларингиз сабабидандир”.
7. “Ёш йигитга айландинглар, абадий қаримайсизлар”.
8. “Омонликда бўлдинглар, сизларга абадий хавф етмайди”.
9. “Набийлар, сиддиқлар, шаҳидлар, солиҳлар билан бирга бўлинглар”.
10. “Арш соҳиби Карим ва Раҳмон сифатли Аллоҳнинг ёнидан макон топдинглар”, деб ёзиб қўйилган. Тинч-омонликда жаннатга киринглар”, деб айтади. Улар жаннатга кириб: “Биздан хафаликни кетказган Аллоҳга ҳамд бўлсин. Албатта Раббимиз мағфиратли ва озгина яхши амал учун кўп мукофот ато қилгувчидир. Ва бизларга ваъдасини рост қилган ва бизларни бу жаннат ерига ворис қилган ҳамда жаннатдан ўзимиз хоҳлаган тарафдан жой ўрин олишимизга (муваффақ қилган) Аллоҳга ҳамд бўлсин”, деб айтадилар. Бас, чиройли амал қилгувчи зотларнинг ажр-мукофоти нақадар яхшидир!

Шайх Аҳмад ибн Ҳажар Али ал-Асқалоний МУНАББИҲОТ китобидан

Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган. 

*****

Ишни ўз эгасига топшириш

• Агар от (омочга қўшилиб,) ер ҳайдагани олиб чиқилса;
• Эшак эса югуриш мусобақасига чиқарилса;

Деҳқончилик борасида зиёнга учраб, мусобақада енгиламиз.

Муайян лавозимга номзод танлашда ўрин алмашиб қолса ҳам шундай натижа юз беради.

«Тарих муҳрлаган сўзлар»

*****

Гина-кудурат муваффақиятсизликнинг сўнгги босқичидир.

«Тарих муҳрлаган сўзлар»

*****

Одамлар олдида пок инсон бўлиб кўриниб, ёлғиз қолганингда иблисдек бўлма!

«Тарих муҳрлаган сўзлар»

*****

Оқишдан тўхтаган сувлар бузилади. Сен ҳам бир жойда кўп туриб қолма.

Аҳмад Беҳжат

*****

Ишларнинг тиқилинчлигини ва кўп машаққат чекиб меҳнат қилишни тажриба қилиб кўрдим. Бекорчилик улардан кўра жуда оғирроқ экан.

Али Тантовий раҳимаҳуллоҳ

*****

Агар бир инсонни синаб кўрсанг-у, уни ўзингга дўст бўлишга лойиқ деб топмасанг, энди уни ўзингга душман қилиб олишдан эҳтиёт бўл!

«Тарих муҳрлаган сўзлар»

*****

Одобнинг чўққиларидан бири – киши аввало ўзидан уялишидир.

«Тарих муҳрлаган сўзлар»

*****

Гоҳида эшикни очишга уринамиз. Очолмаймиз. Куч билан итарамиз. Барибир очилмайди. Фақат ўзимизнинг қийналганимиз қолади. Кейин ўша эшикнинг бошқа томонга очилишини маълум бўлади. Ҳаётдаги муаммолар ҳам худди шундай бўлиб, улар куч билан эмас, ақл билан ҳал қилинади.

Иброҳим Фиқий

*****

Ҳаётнинг жуда кўп вақтлари ўтаётган бўлса-да, сен “Ҳали вақт келмади” дейсан. Бироз вақт ўтгач эса “Вақтни қўлдан бой берибман” дейсан.

«Тарих муҳрлаган сўзлар»

*****

Бургутлар жим турганда, тўтиқушлар сафсата сотишни бошлайди.

«Тарих муҳрлаган сўзлар»

*****

Кўп нарсага куч билан эриша оласан. Аммо муҳаббат ва эҳтиромга эмас.

«Тарих муҳрлаган сўзлар»

*****

Гуллар ёнида турган бошқа гуллар билан мусобақалашиш учун очилмайди. Улар очиладиган вақт келганда, очилади, тамом.

«Тарих муҳрлаган сўзлар»

*****

Жоҳиллик барча ёмонликнинг асли (боши)дир.

«Тарих муҳрлаган сўзлар»

Интернет материалларидан тўплаб, таржима қилувчи

Нозимжон Иминжонов

Ўзбекистон мусулмонлари идораси раҳбарияти Тошкент шаҳри Учтепа тумани бош имоми ва "Чўпон ота" жоме масжиди имом-хатиби Қувондиқ домла Боймуродовнинг падари бузруквори Боймуродов Ражаб ҳожи отанинг вафоти муносабати билан чуқур таъзия билдиради. Аллоҳ марҳум ҳожи отани мағфират қилсин, савоб амаллари билан қабрларини нурга тўлдирсин, жойларини жаннатда қилсин. Марҳумнинг яқинларига Аллоҳ сабри жамил берсин.

Ўзбекистон мусулмонлари идораси Матбуот хизмати

Кунларнинг бирида дўстимнинг уйига меҳмон бўлиб бордим, суҳбат қуриб ўтирган эдик чамаси тўрт ёшлик боласи келиб унинг бўйнига осилиб, ота бугун биз жаннатда бир қаср қурмадикку деди. Мен хато эшитдим деб ўйладим. У яна шу гапини такрорлади. Қолган фарзандлари келиб укалари айтган гапни такрорлашди. Шунда мен хайратда қолдим ва кузаттим. Дўстим менга фарзандаларим билан қандай қилиб жаннатда қаср қуришимизни кўришни хоҳлайсанми деди. Мен эса албатта хоҳлайман дедим. Шунда улар жамланиб ўтиришдида, Ихлос сурасини 10 марта ўқишди. Тугагач фарзандлар алҳамдулиллаҳ бугун биз жаннатда бир қаср қурдик деб хурсанд бўлишди.

Сўнг дўстим фарзандларидан у қасрда нима бўлишини хоҳлайсизлар деб сўради. Болалар бизни хурсанд қиладиган кўп нарсалар бўлишлигини хоҳлаймиз дедилар. Дўстим уларга “Ла ҳавла вала қуввата иллаа биллаҳ” ни айтди, улар ҳам бу дуони такрорлашди.

Дўстим яна болаларига савол берди. Қиёматда Пайғамбаримиз соллаллоҳу алайҳи васалламни кўришни ва узотнинг ҳавзларидан сув ичишни хоҳлайсизларми? деди. Улар ҳа дейишди. Шунда дўстим уларга ташаҳҳуддан кейин ўқиладиган “Аллоҳумма солли ала Муҳаммад ва алаа аали Муҳаммад” ни ўқиб берди, фарзандалари эса такрорлашди.

Сўнг болалар хурсанд бўлиб, бири дарс қилишга, бири ўйинини давом эттиришга яна бири ишини тугатиш учун тарқалдилар.

Мен эса дўстимнинг фарзандларига Пайғамбаримиз соллаллоҳу алайҳи васалламнинг суннатларини бу шаклда ўргатганлигидан жуда хайратланиб, мен ҳам фарзандларимга шу шаклда ўргатсам бўлар экан дея, уйга қайтдим.

Азиз дўстим сизнинг ҳам бу тарбия шаклини азиз фарзандаларингизга ўргатиш имконингиз бор.

Тошкент шаҳаридаги “Шайх Зайниддин” жомеъ масжиди имом хатиби Абдурахманов Яхё