Ал Мустафо халқаро университетининг Ҳиндистондаги бўлими томонидан ушбу ҳафтада Қуръони каримдан таълим берувчи ўқитувчиларни тайёрловчи курслар ташкил этилди. Бу ҳақда iqnanews.ru хабар берди.

Қуръони каримни ўқиш ва ҳифз қилиш ушбу курсларнинг асосий таълим дастури ҳисобланади. Курслар Лакнав шаҳрида ташкил этилгани айтилмоқда.

Нурул Мустафо Қуръон ва Ҳадис маркази ҳамкорлигида ушбу курслар учун дастур тузилган.

Ўзбекистон мусулмонлари идораси Матбуот хизмати

Маккадаги Масжидул Ҳаром атрофидаги қурилиш ишлари ниҳоясига етказилмоқда. 3 минг квадрат метрли майдонда амалга оширилган бинокорлик ишлари муқаддас масжидга ташриф буюрувчи зиёратчиларга қулайлик яратиш мақсадида бажарилди.

Ишлар 85 фоизга амалга оширилгани қайд этилиб, бу ерда таҳоратхоналар ҳам барпо этилмоқда. Қурилиш ишлари жорий ой якунига қадар тугалланади.

Шундан сўнг, Масжидул Ҳаромнинг зиёратчилари сиғими сезиларли даражада ошиши маълум қилинган.

Ўзбекистон мусулмонлари идораси Матбуот хизмати

Индонезиялик 64 ёшли Марянининг узоқ йиллик орзуси амалга ошди – у ҳаж ибодатини адо этди.

Азон интернет нашрининг ёзишича, эрининг вафотидан кейин тўртта бола билан бева қолган Маряни ҳеч кимга сездирмай, то бомдодгача қайта ишласа бўладиган чиқиндиларни тўплаб, 26 йил давомида ҳаж учун пул йиғди. 2012 йилда аёлнинг пули 1750 долларга етди, бу ҳаж учун рўйхатдан ўтишга кифоя эди. Қолган 700 долларни тўплаш учун Маряни яна етти йил ишлади.

У Дин ишлари вазирлигидан барча керакли ҳужжатларни олгандан кейингина бу йил ҳажга боришини фарзандларига ошкор қилди.

“Энг муҳими, ўз мақсадимга эришдим, бунга ҳеч қачон шубҳа қилмаганман. Мен ҳеч қачон енгилмадим ва бу ишдан ҳеч қачон чарчамадим”, – дейди аёл.

Ўзбекистон мусулмонлари идораси Матбуот хизмати

Мисрнинг Миня вилоятида эшитиш қобилияти заиф қиз ва аёллар учун биринчи Қуръон мактаби очилган эди. Бу ҳақда Ислом.уз нашри хабар беради.

Вилоятнинг Авқаф бўлими Ҳукумат пойтахти Миня шаҳридаги масжидда мактаб очган. Унда Қуръонни ёдлаш ва шарҳлаш, диний таълимотлар, сийрат Набавий ва ибодатлар бўйича курслар ва дарслар мавжуд.

Губернатор Авқаф вазирлиги вакили шайх Салама Абдул Раззоқнинг маълумотига кўра, бу Мисрда эшитиш қобилияти заиф одамларга Қуръон ва диний таълим берадиган биринчи мактаб ҳисобланади.

Ўзбекистон мусулмонлари идораси Матбуот хизмати

Меган Лавледи 22 яшар кафе ходими. У Крайстчерч масжидида содир этилган терактдан ҳалок бўлганларга ҳамдардлик билдириш учун ҳижобга кириб, шундан сўнг Аллоҳни топди. Ҳозир у ҳижобда юради, номини ҳам исломий исмга ўзгартирган, деб хабар беради IslamNews ахборот сайти.

Янги Зелландиянинг Жанубий оролида яшовчи Меган Лавледи, Крайстчерчдаги терактдан сўнг қандай қилиб Ислом динини қабул қилганини шундай ҳикоя қилиб беради:

«Мен ҳар куни ҳаётда ўрнимни топишга ҳаракат қилардим ва ҳеч қаерда буни топа олмас эдим», дейди. — Бир неча йил олдин у даҳшатли фожиани бошдан кечирди. Унинг кўз ўнгида турмуш ўртоғини поезд уриб кетди. Нима сабабдан ҳаётимда бундай воқеа содир бўлганини тушуна олмадим. Қайси ишим учун бундай жазога лойиқ топилдим билмадим.

Бу воқеа Мегандаги Худога бўлган ишончни буткул йўқотиб юборди. Лекин 2019 йил 15 – март куни бўлиб ўтган воқеалардан сўнг, ўзидаги руҳий ўзгаришларни сеза бошлади. У террор ҳужумига учраган Ан-Нур масжидига боришни бошлади. Аллоҳ мени Ўз уйига таклиф қилаётгандек эди, – деб эслайди Меган.

Масжид имоми Низомул-Ҳақ Тханвининг сўзларига кўра, март ойида содир этилган қонли фожиадан сўнг, ҳар куни 3-5 нафар киши Веллингтон масжидига келиб Исломни қабул қилмоқда. Отаго шаҳридаги масжидда эса маҳаллий аҳолининг ислом динига бўлган қизиқишлари ортгани туфайли диний адабиётлар қолмаган.

Субҳаналлоҳ! Аллоҳ таоло бандалардан бир нарсани қилишни ёки тарк қилишни талаб қилган бўлса, албатта, уларга фойдани жалб қилиш ва зарарни даф қилишни ирода қилган бўлади. Гоҳида банда бунинг сирини билмай, ўша амр ёки қайтариқни ёқтирмаслиги ҳам мумкин. Аммо бу банданинг илми озлигидан содир бўлади, холос.

Аллоҳ таоло Қуръони каримда шундай марҳамат қилади:

«Ажаб эмаски, ёқтирмаган нарсангиз сиз учун яхши бўлса. Ва ажаб эмаски, ёқтирган нарсангиз сиз учун ёмон бўлса. Аллоҳ биладир, сиз эса билмассиз» (Бақара сураси, 216-оят).

Аллоҳ таоло бандаларининг ҳамма ҳолатларини яхши билади. Лекин Ислом одамларга ёқадиган нарсаларни эмас, балки уларга фойда бўладиган, икки дунёда бахт-саодат келтирадиган амалларни таклиф қилади.

Ўзбекистон мусулмонлари идораси Матбуот хизмати