muslim.uz

muslim.uz

Австриянинг «Kurier» нашри "Ўзбекистон саёҳат қилиш учун қўриқланадиган табиатга эга энг яқин экзотик йўналишдир" мақоласини чоп этди, деб хабар бермоқда "Дунё" ахборот агентлиги.

Ўтган йилнинг май ойида Ўзбекистонга ташриф буюрган Австрия нашри туризм ва ҳаёт санъати департаменти директори Аксель Халбхубернинг мақоласида мамлакатимизнинг бутунлай янги сайёҳлик қиёфаси, мамлакат тарихий меросининг қадр-қиммати, Буюк Ипак йўлини ривожлантириш учун республика шаҳарларининг кўп асрлик аҳамияти, шунингдек, Осиё қитъасида маданият, савдо, билим ва халқаро муносабатлар ҳақида сўз боради.

Нашр ўқувчилар эътиборини республика туризм индустриясининг кўп қирралилигига қаратади. "Агар сиз барча асосий сайёҳлик маршрутларини зиёрат қилиб бўлганман деб ҳисобласангиз, унда сиз Ўзбекистонга боришингиз керак: беғубор табиат ва жуда меҳмондўст одамлар билан Буюк Ипак йўлининг романтикаси", - дейди Аксель Халбхубер.

Ўзбекистоннинг барча асосий сайёҳлик масканларига ташриф буюрган мақола муаллифи Қорақалпоғистоннинг туристик салоҳиятига алоҳида урғу беради. "Бу алоҳида ҳикоя - Қорақалпоғистоннинг ғурури баланд кишилари ҳақидаги ҳикоя. Мана, дунёдаги энг ақл бовар қилмас қабристонлардан бири - Мўйноқдаги кемалар қабристони. Ушбу ҳодисани кўришда кўплаб саёҳатчилар ўз тасаввурлари чегараларига эришадилар. Қорақалпоғистонда сиз ниҳоятда самимий инсонлар ва рус авангард санъатининг энг йирик коллекцияси - Нукус шаҳридаги Савицкий санъат музейини кашф этасиз", - таъкидлайди муаллиф.

Нашр республикада амалга оширилаётган ислоҳотлар ва урбанизация натижаларини очиб берар экан, "Тошкент нафақат жойлашуви, балки ёш аҳоли ва турмуш даражасининг жадал ўсиши туфайли Марказий Осиёнинг иқтисодий марказига айланиш арафасида турибди. Шаҳар шу қадар суръатда янгиланмоқдаки, тез орада совет даврида қурилган бинолар антиквариатга айланиб қолади".

Шунингдек, муаллиф ўқувчиларга "Президент Шавкат Мирзиёев бошчилигидаги Ўзбекистон 2016 йилдан буён бутун дунёга очилиш йўлидан бораётганлиги"дан хабар беради. Ички ва зиёрат туризмини ривожлантириш алоҳида таъкидланади. Ислом цивилизацияси дурдоналарига тенглаштирилган шаҳар ва диққатга сазовор жойлар санаб ўтилган.

Хива шаҳрининг асл ҳолида сақланиб қолган ноёб мақбаралари, миноралари ва мадрасалари ҳам халқаро, ҳам маҳаллий сайёҳларни ўзига жалб этиш марказига айланмоқда, дейилади мақолада.

Нашрнинг барча ўқувчиларини Ўзбекистонга туристик саёҳат қилишга чорлаган Аксель Халбхубер хорижий сайёҳлар орасида катта шуҳрат қозонаётган республиканинг чанғи курортларини ҳам қайд этади.

Ўзбекистон мусулмонлари идораси матбуот хизмати

Ўзбекистон мусулмонлари идораси раиси, муфтий

Нуриддин домла ҳазратлари

Туркиянинг шимоли-ғарбидаги Эдирне вилоятида 1453 йилда Истанбулни забт этган Усмонли султони Меҳмет Иккинчи (Фотиҳ) давридаги масжид реставрация қилинди. Энез Фотиҳ масжиди, шунингдек, "Энез Аё София черкови" деб номланувчи, тахминан византияликлар томонидан XII асрда бунёд этилган, Усмонли қўшинлари томонидан Тошоз, Лимни ва Семадирек ороллари, шунингдек, Энез тумани забт этилгандан сўнг, у 1456 йилда масжидга айлантирилган.

Бинонинг жануби-шарқий қисмида меҳроб (Макка йўналишини кўрсатувчи токча), ғарбий қисмида эса минбар (масжидда минбар) жойлашган. Бундан ташқари, тош минораси ўрнатилди. XVIII асрда масжид қайта-қайта таъмирланиб, 1965 йилги зилзила натижасида у жиддий зарар кўрган.

2015 йилда Туркия Ислом жамғармалари идораси Энез Фотиҳ масжидини барпо этиладиган маданий объектлар рўйхатига киритди.

Islam.ru хабарига кўра, Эгей соҳиллари яқинидаги Энез қалъаси ҳудудида жойлашган масжидни қайта тиклаш ва таъмирлаш ишлари 2016 йилдан буён давом этмоқда.

56 йилдан бери фаолият юритмаган масжиднинг очилиши шу йил охиригача режалаштирилган.

Ўзбекистон мусулмонлари идораси матбуот хизмати

Аллоҳ таоло ер юзидаги инсонларнинг ҳаммасини ҳар хил микдорда мол-мулк билан ризқлантирган. Одамларнинг турли қабила ва элатларга бўлиниши уларнинг бир-бирлари билан танишиб дўст бўлишлари учун бўлганидек, мол-дунёларнинг турли миқдорда бўлиши ҳам бир-бирларини қўллаб-қувватлаб, ўзаро ёрдам беришлари учундир. Қайси кишига қандайдир одамларнинг ҳожати тушиб турган бўлса, Аллоҳ таоло унга кўп яхшиликларини хоҳлаган бўлади.

Аллоҳ таоло марҳамат қилади: “Аллоҳга “чиройли қарз” берадиган (Унинг йўлида ўз бойлигидан сарфлайдиган) киши бормики, унга бир неча баробар кўп қилиб қайтарса? Ҳолбуки, Аллоҳ (ризқни) танг ҳам, кенг ҳам қилур ва (сизлар) Унинг ҳузурига, албатта, қайтарилажаксизлар”(Бақара сураси 245-оят).

Ушбу муборак оятда яхшилик йўлида, савоб ҳосил қилиш мақсадида сарф қилинадиган маблағ, мол-мулк Аллоҳ таолога қарз бериш сифатида баҳоланмоқда. Шу боис ҳам динимизга кўра садақа беришдан кўра қарз беришнинг савоби кўпроқдир. Зеро, садақа ва эҳсонлар ихтиёрий равишда муҳтож ва номуҳтож кишиларга берилаверади. Аммо қарз фақат эҳтиёж соҳибларигагина берилади.

Пайғамбаримиз Муҳаммад мустафо соллаллоҳу алайҳи ва саллам: “Жаннатга кирдим ва унинг эшигида садақа ўн (баробар савоб) билан, қарз ўн саккиз (баробар савоб) билан (мукофотланади) деган ёзувни кўрдим. Шунда эй Жаброил, қандай қилиб садақа ўн, қарз ўн саккиз баробар бўлади? - деб сўрадим. У айтдики: Чунки, садақа бойнинг ҳам, фақирнинг ҳам қўлига тушаверади. Қарз эса, фақат унга муҳтож бўлган одамнинг қўлига тушади” - деб марҳамат қилганлар (Имом Табароний ривояти).

Қарз олди-бердиси жамият аъзолари ўртасидаги ўзаро муносабатлардан биридир. Инсон ҳаётининг барча жабҳаларидаги каби динимизда бу борадаги барча йўл-йўриқлар ҳам мукаммал ва чиройли баён қилиб берилган. Аллоҳ таоло Қуръони каримдаги энг узун ояти каримани айнан шу масалага атаб нозил қилган.

Замонамиз уламоларидан машҳур муфассир Ваҳба Зуҳайлий «Тафсирул Мунир» асарида бундай дейди: “Қуръони каримдаги энг узун оятнинг қарз олди-бердисига бағишланиши, молиявий ҳукмнинг баён қилиниши Аллоҳнинг наздида мол-дунёнинг таҳқир қилинишини эмас, балки унинг ҳурмати нақадар баландлигини кўрсатади”.

Аллоҳ таоло хоҳлаган бандасига беҳисоб ризқ берса, хоҳлаган бандасини етишмовчилик, молиявий муаммолар билан синайди. Шунинг учун кишилик жамиятини қарз олди-бердисиз тасаввур қилиш мумкин эмас. Қуш тирикчилик қилиши учун қанот қоқишга мажбур бўлганидек, ризқ топиш, мол-дунёни қўлга киритиши учун инсондан ҳам маълум бир саъй-ҳаракатлар талаб этилади. Уларнинг машруъ йўлларини белгилаб бериш эса диннинг вазифасидир.

Аллоҳ таоло Қуръони каримда мол-дунё топиш, тирикчилик қилиш учун ҳаракат қилиш лозимлиги ҳақида кўпгина оятлар нозил қилган: «Ва кундузни тирикчилик қилиб қўйдик» (Наба сураси, 11-оят). «Намоз тугаганидан сўнг ер юзи бўйлаб тарқалинг ва Аллоҳнинг фазлидан талаб қилинг ҳамда Аллоҳни кўп зикр қилинг. Шоядки, зафар топсангиз» (Жумъа сураси, 10-оят).

Баъзилар динда мол-дунё, бойлик қораланган деб ўйлашади. Аммо бу динимизнинг моҳиятини, илоҳий ҳикматларини нотўғри тушуниш оқибатидир. Исломда мол-дунёнинг ўзи эмас, балки унга ўч бўлиш, ружу қўйиш ва натижада Аллоҳ кафолатлаб қўйган ризқни деб тоат-ибодатдан чалғиш, гуноҳга ботиш қораланган. Агар динимизда мол-дунё қоралаган бўлса, шариатимизда садақа, хайр-эҳсон, закот, ҳаж каби молиявий ибодатлар жорий қилинмаган бўлур эди.

Аллоҳ таоло Бақара сурасининг 282-оятида бундай марҳамат қилади: «Эй имон келтирганлар! Бир-бирингиздан бирор муддатга қарз олиб, қарз берсангиз, уни ёзиб қўйингиз!».

Маълумки, бугунги кунда молиявий муомалаларга оид барча муҳим ишлар нотариал идоралар томонидан гувоҳлар ҳузурида ёзиб, расмийлаштирилсагина қонуний кучга эга бўлади. Шундай қилинса, ҳеч ким норози бўлмайди, ҳеч кимнинг ҳаққига тажовуз қилинмайди. Қуръони карим эса бундан ўн беш аср олдин бу қоидани гўзал ва мукаммал тарзда, ҳеч бир тўлдиришга ўрин қолдирмай баён қилиб берган.

«Орангизда бир котиб уни адолат билан ёзсин». Демак, қарз ҳақидаги тилхатни қарз бераётган одам ҳам, олаётган одам ҳам ёзмайди. Буни бетараф, холис одам – котиб ёзсин. Таомил шундай.

«Ҳеч бир котиб Аллоҳ билдирганидек қилиб ёзишдан бош тортмасин».

Афсуски, ушбу илоҳий қонундан узоқлашилгани боис бугунги кунда қарзни вақтида адо этмаслик жамиятда одатий ҳол бўлиб қолган. Қаерга қараманг, жуда кўплаб низо, уруш-жанжал, қариндош-уруғ, дўст-ёрлар орасининг бузилиши, ҳатто оғир жиноятлар қарз муаммоларидан келиб чиқмоқда. Ақл бовар қилмас даражадаги катта қарзлар бир неча йиллардан бери тўланмаган. Кимдир қарз берган, кимдир олган, аммо қуруқ сўзга ишониб, ялиниб-ёлворганига раҳми келиб, на гувоҳ чақирилмаган, на кимдир бирон нарса ёзган. Энди эса омонатга хиёнат юзага келади – қарз берувчи талаб қилади, олувчи бермайди. Мабодо кимдир ўртага тушган бўлса, қарзини қайтариб ололмаган одам жон аччиғида унинг ўзига ёпишяпти, яхшилик қиламан деган одам балога қолиб кетяпти. Шунинг учун кўпинча одамлар бундай ғалвали масалага аралашишдан, ўртага тушишдан ўзларини олиб қочадилар. Аммо Аллоҳ таоло бир киши гувоҳликка чақирилса, Аллоҳ билдирганидек ёзишдан бош тортмасин, дейилмоқда. Чунки бу савоб иш. 

Аллоҳ таоло бир мушкулини ҳал қилиш учун қарз олган, сўнгра оғир кунида ёрдам берган биродарининг омонатига хиёнат қилмай, уни ўз вақтида узишга ният қилган кишига ёрдамчи бўлади. Абу Ҳурайра розияллоҳу анҳудан ривоят қилинади: «Набий соллаллоҳу алайҳи васаллам бундай дедилар: «Ким одамларнинг молини (қарзга) олиб, уни адо этишни ирода қилса, уни Аллоҳ (Ўз ёрдами ила) адо этади. (Бировнинг молини) йўқ қилишни ният қилиб олган одамни Аллоҳ йўқ қилади» (Имом Бухорий ривояти).

Демак, қарз олмоқчи бўлган одам, аввало, ниятини тўғрилаши лозим экан. Агар у «Аллоҳим, шу биродаримдан қарз оляпман, уни қайтаришга Ўзинг ёрдам бер» деса, Аллоҳ таоло қарзни қайтаришга албатта ёрдам беради. Лекин «Бойга бало урармиди, топганда бераманда» деб олса, Аллоҳ таоло унинг ўзини йўқ қилади.

Ҳаётда бундай ҳолатга кўп марта гувоҳ бўлганмиз. Одамларни алдаб, ишончига кириб, найранг йўли билан пул олишни касб қилганларнинг бало-офатларга йўлиқиб, йўқ бўлиб кетаётгани мазкур ҳадиси шарифнинг исботидир.

«Расулуллоҳ соллаллоҳу алайҳи васаллам зиммасида қарзи бўла туриб ўлган одамга жаноза намози ўқимас эдилар. Бир маййитни олиб келинди. Бас, У зот алайҳиссалом: «Унинг зиммасида қарз борми?» дедилар. «Ҳа, икки динор», дейишди. «Соҳибингизга ўзингиз жаноза ўқинг», дедилар. «Ўша иккови менинг зиммамга, эй Аллоҳнинг Расули», деди Абу Қатода. Шунда Пайғамбар соллаллоҳу алайҳи васаллам у(маййит)га жаноза ўқидилар. Аллоҳ ўз Расулига Фатҳ ато қилганидан кейин: «Мен ҳар бир мўмин учун унинг ўзидан ҳам яқинман. Ким қарз қолдирса, уни адо этиш менинг зиммамда. Ким мол тарк қилса, меросхўрларига», дедилар». Бу ҳадиси шариф ҳам зиммасида қарзи бўла туриб ўлиш ўзига яраша муомала талаб қилишини кўрсатади. Ушбу ҳадисга амал қилароқ, ҳозирда ҳам ҳар бир маййитга жаноза намози ўқишдан олдин унинг қарзи бор-йўқлиги сўралади. Унинг қарзларини яқин кишилардан бири ўз зиммасига олганидан кейингина жаноза намози ўқилади. Шариат ҳукми бўйича бирор маййитнинг қарзини ўз зиммасига оладиган киши топилмаса, унинг қарзи хазинадан узилади. 

Қарз бериш бандани Аллоҳ таолога яқин қиладиган амаллардандир, чунки унда одамларга раҳм-шафқат қилиш, уларнинг ишларига енгиллик бериш, ғамларини аритиш бор. Расулуллоҳ соллаллоҳу алайҳи васаллам бундай деганлар: «Ким бир мусулмоннинг дунёдаги ғамларидан бирини аритса, Аллоҳ унинг Қиёматдаги ғамларидан бирини аритади. Ким қийналиб қолган кишига енгиллик қилса, Аллоҳ дунё-ю охиратда унга енгиллик қилади. Модомики банда биродарининг кўмагида бўлар экан, Аллоҳ унинг кўмакчиси бўлади» (Имом Муслим ривояти).

Аллоҳ таоло қарздорлар қарзларини ўз вақтида адо этишларига муяссар айласин, қарз ва омонат борасидаги масъулиятни яхши биладиган омонатдор бандалардан бўлишимизни барчаларимизга насиб қилсин.

Манбалар асосида

Хўжаобод туман “Етти чинор”

жоме масжиди имом  ноиби

Муҳаммадқуддус АБДУЛМАННОН 

тайёрлади

Сторінка 8 з 2411
Top