Бойлик – одамлар қалбидан энг кўп жой олган, инсонлар томонидан энг кўп севилган дунё зийнатидир.  

Анас ибн Молик розияллоҳу анҳу ривоят қилади: “Расулуллоҳ соллаллоҳу алайҳи ва саллам дедилар: “Охиратни деб дунёсини, дунёни деб охиратини тарк қилган банда яхшиларингиз эмас. Чунки иккисида ҳам жамғариши лозим бўлган жиҳати бор. Одамларга боқиманда бўлиб қолманглар – зинҳор  ўзгаларга оғирлигингиз тушмасин”.

         Мазкур ҳадис мўмин-мусулмонларни у дунёни унутмаган ҳолда, ўзгаларга юк бўлмасдан, меҳнат қилиб, ҳалол йўл билан бу дунё эҳтиёжларига етарли мулк, маблағ топишга ундайди. Аммо, мўмай даромад орттираман, осон бой бўламан деб, ҳаромга қўл уриш камбағал бўлишдан кўра оғирроқ мусибат ва азобларнинг сабабчисидир.                   

Сўнгги пайтларда, интернет саҳифалари, айниқса ижтимоий тармоқларда “уйдан чиқмасдан бой бўлишни хоҳлайсизми”, “Кўп пул топиш учун ажойиб имконият” ёки “Бир кунда 1 миллион топишни истайсизми?” каби жимжимадор рекламалар орқали турли каналлар ва гуруҳларга аъзо бўлишни таклиф қилаётган “bet”лар ҳаддан зиёд кўпайиб кетди. Ўзига оҳанрабодек жалб этаётган бундай сўзлар домига тушаётганлар сони эса кундан кунга ортиб бормоқда. Тўғрида, осонгина, ҳеч қандай меҳнатсиз ва ҳаракатсиз пул топиш, бойиб кетиш кимга ҳам ёқмайди?! Бироқ озгина ақл юритсангиз уларнинг фирибгар ва ёлғончи, камига очиқчасига ҚИМОРБОЗ эканлигини ва сизни ҳам қиморга тортаётганининг гувоҳи бўласиз. Қимор эса ҲАРОМ.   

Аллоҳ таоло Қуръони каримда қиморни қаттиқ қоралаб шундай марҳамат қилади:  
“Эй иймон келтирганлар! Албатта, хамр, қимор, бутлар ва (фол очадиган) чўплар ифлосдир. Шайтоннинг ишидир. Бас, ундан четда бўлинг. Шоядки, нажот топсангиз” (“Моида” сурасида, 90-оят).

“Албатта, шайтон хамр ва қимор туфайли ораларингизга адоват ва ёмон кўришликни солишни ҳамда сизларни Аллоҳнинг зикридан ва намоздан тўсишни хоҳлайдир. Энди тўхтарсизлар?!” (“Моида” сурасида, 91-оят).

Абу Ҳурайра розияллоҳу анҳудан ривоят қилинган ҳадисда: “Расулуллоҳ соллоллоҳу алайҳи васаллам: “...Ким бир биродарига: “Кел, қимор ўйнаймиз” деса, дарҳол садақа қилсин”, деганлар (Бухорий ривояти).

Қимор шу даражада оғир гуноҳки, уни ўйнаймиз, деган гапнинг ўзиёқ каффоротни тақозо қилади. Бунда, қимор ўйнамоқчи бўлган пулни садақа қилиш кўзда тутилган. Зинҳор қимордан ютиб олган пулни эмас. Қимордан ютилган пул ҳаромдир. Ҳаромни садақа қилиб бўлмайди.         

Хўш, айни дамларда одамларни пул топишга қизиқтираётган интернет тармоғидаги гуруҳлар ва каналларни бошқараётганлар, ўзларининг қилмишлари қимор, яъни ўта оғир гуноҳлигини ҳамда шу орқали топган пуллари ҳаром эканлигини билишармикан?!         Келинг,  бу “шоввоз”ларнинг пул топиш услублари билан яқиндан танишамиз.

Аввало, улар рекламаларда ўзларини гўёки қайсидир спорт ўйинидаги маълум бир жамоага пул тикиб, бойиб кетган (бу қимор!) ва шу бойликларини сизлар билан бўлишмоқчидек кўрсатади. Баъзилари эса каналга аъзо бўлганингиздан сўнг “фалон мусобақадаги унисига, бунисига пул тикинг” деган таклифни киритади. Бироқ, каналга ёки сайтга киришингиз билан олдиндан ҳисобни тўлириш кераклигини айтишади. Мана шу ерда сиз ҳам қимор ўйинига аралашасиз (қиморбоз бўласиз) ҳамда фирибгарнинг тузоғига тушасиз. Чунки, ҳали бу ҳаром ва жирканч қимор ўйинларида ютиб, пулини олган бирор кимсани танимайсиз. Демак, улар фирибгар.

Фирибгарлар...

Келинг, Аллоҳ таолонинг Каломида келтирилган бир оятга назар соламиз: “Мол ва бойликларингизни ўрталарингизда ботил йўллар билан емангиз. Шунингдек, била туриб, одамларнинг ҳақларидан бир қисмини гуноҳ йўл билан ейиш мақсадида уни ҳокимларга ҳавола этмангиз.”(Бақара сураси, 188-оят).

Юқорида сизни бой қиламан деган «свайпчилар»нинг фирибгар эканлигини таъкидладик. Аллоҳ таоло Ўз Каломида ботил йўл билан ўзгалар молини ейишни ман қилган. Ўзганинг молини ноҳақ ейиш эса ҲАРОМдир.

Ҳадисларда Расулуллоҳ соллаллоҳу алайҳи ва саллам: “Ким одамларнинг молини қайтариб бериш мақсадида олса, Аллоҳ таоло унга ёрдамчи бўлади. Ким одамларнинг молига талофат етказиш (чув тушириш) учун олса, Аллоҳ таоло унинг ўзига талофат етказади” – дея таъкидлаганлар (Имом Бухорий ривояти).

Яна бир ҳадисда, Расулуллоҳ соллаллоҳу алайҳи ва саллам: “Ким бизни алдаса, у биздан эмас. Макр ва алдов дўзахдадир” – дея бизларни ўзгани алдаш ва макр-ҳийла йўли билан одамлар молини ейишдан қайтарганлар (Имом Табароний ривояти).

Осон пул топиш ва тезда бойиб кетиш ниятида юрган ватандошларимиз, айниқса ёшларимизга хитобимиз шу:

• Аллоҳ таолога дуо қилиб, ризқингизга барака беришини сўранг;
• Меҳнат қилишни ўрганинг;
• Ҳалол йўл билан бойлик орттиринг;
• Пулингизни ҳалол ва пок ишларга сарфланг;
• Қимордан ҳазар қилинг. Қиморбознинг жойи жаҳаннамдадир;
• Фирибгарларга алданманг, ақлингиз ва иймонингизга қулоқ солинг;
• Фирибгарларнинг юқоридаги каби турли ҳийлаларини интернет ва мессенжерларда тарқатманг;
• Аллоҳ таолонинг ҳисоби ва АЗОБИДАН қўрқинг!

Ҳурматли, ижтимоий тармоқлардаги, хусусан телеграм мессенжерида фаолият олиб борувчи “админ”лар! Ўз каналингиз орқали қимор, фаҳш, гуноҳ, фирибгарлик ва бошқа, инсонларни йўлдан оздирувчи, иймонига салбий таъсир этувчи рекламалрни тарқатишни БАС ҚИЛИНГ!

 Қонуний, ҳалол ва адолатли бизнес режалар, таклифлар ва ҳамкорликларни тарғиб этинг!

Кимларнингдир гуноҳ амалларига шерик бўлиб қолманг! 

Азизлар, Сарвари коинот Пайғамбаримиз соллаллоҳу алайҳи ва саллам “Ҳаром еб ўсган вужуд жаннатга кирмайди”, деганлар  (Имом Ибн Ҳиббон ривояти).   

Чунки, ҳаром луқма еган кишининг дуолари ҳам, ибодату илтижолари ҳам қабул бўлмайди!

ҲАРОМДАН УЗОҚРОҚ ЮРИНГ!

Саидаброр Умаров

ЎМИ матбуот хизмати

Сайтимизда эълон қилинган “Доллар нархи ошдими?” сарлавҳали мақола ҳақида турли фикр-мулоҳазалар билдирилди. Аммо ушбу мақолани ўқиб, ундан кўзланган мақсад нима эканини тўғри тушунган мухлисларимиз ҳам бўлди. Қуйида ана шу мухлисларга тегишли фикрларининг аслий (скриншот) ва матнли кўринишини тақдим этамиз.

1. Фейсбук ижтимоий тармоғи фойдаланувчиси “Asadulloh Alqosim”нинг фикри:

"Доллор нархи ошдими?"

Бу сарловха шунчаки мақолага ўқувчининг эътиборини тортишлик учун қўйилган эди... мақолада умумий қимматчилик тўғрисида сўз боради "доллор" биргина мисол тариқасида эсга олинади....

Аммо ... ўқувчилар мухокамаси ўзларига яраша бўлди.

Истиғфор - Инсон гунохкорлигини тан олиб Яратгандан кечирим сўрашликдир”

2. Кейинги фикр “Muxlis Inson” номи билан Фейсбук ижтимоий тармоғига кирувчи мухлисимизга тегишли:

“Нозимжон ока манимча, мақолани самимий қабул қилиб истиғфор айтишни кўпайтирган одам иқтисодий муаммолар гарчи жамиятда умумий кенг тарқалган бўлсада, Аллоҳни ёрдами ила бу ҳолатни зарарларидан омонда қолади, аксинча, истиғфор айтишни тўғри чора деб билмай, бу ҳам сабаблардан бир сабаб эканини эътиборга олмаган кишилар ана шу иқтисодий муаммолар асоратида ўралашиб юраверади, энди, динсиз давлатларни мисол келтириш Аллоҳни уларга берган истидрожини унутиш бўлади, умуман олганда сиз яхши ниятда етказдингиз, кимлардир манфаат олди, бу чорадан қониқмаганлар майли ўзлари бошқачароқ чора излаб кўришсин, натижа Аллоҳдан...”

3. Кейинги фикр эса “Fozil Kayumov” исмли фейсбук ижтимоий тармоғи фойдаланувчисига тегишли:

“Moddaga ishongan sababni moddadan boshqa narsada ko‘rmaydi, borliqni yaratganga iymon keltirgan hamma narsani u zotning amri va hikmatiga bog‘laydi”

Аллоҳ таоло мақоладан тўғри хулоса чиқарган азизларимизни соғ-саломат айлаб, барчамизнинг гуноҳларимизни мағфират этсин!

Шу ўринда қуйида истиғфорнинг фойдалари, мусибат келганда қандай йўл тутишга оид мақолаларнинг ҳаволаларини бериб ўтамиз. Азиз мухлисларимиз ушбу ҳаволаларга кириб, мақолалардан баҳраманд бўладилар деган умиддамиз.

“Истиғфорнинг фойдалари” номли мақола:

https://muxlis.uz/uz/pages/istiforning-fojdalari

Қийинчилик қайтиб келмаслиги учун:

http://muslim.uz/index.php/maqolalar/item/13095

Ғафлатда қолманг! Дуо қабул бўладиган вақт ва ҳолатлар:

http://muslim.uz/index.php/maqolalar/item/13211
Ҳеч бир ҳолатда канда қилманг:

http://muslim.uz/index.php/rukn/quran/item/13054

Мусибатга учрасангиз 8 тавсия:

http://muslim.uz/index.php/maqolalar/item/13325

Ёлғоннинг кўпайиши қиёматнинг аломатидир:

http://muslim.uz/index.php/maqolalar/item/12844

Тақдирни рад этиш:

http://muslim.uz/index.php/maqolalar/item/12774

Сабр қилинг ҳар бир ишда чегара бор!:

http://muslim.uz/index.php/maqolalar/item/12420

Пайғамбаримиз соллаллоҳу алайҳи васалламнинг сабрлари:

http://muslim.uz/index.php/maqolalar/item/11889

Аллоҳ севган банда бўлсам, десангиз:

http://muslim.uz/index.php/maqolalar/item/11007

Сабрли бўлиш учун нима қилиш керак?:

http://muslim.uz/index.php/maqolalar/item/10851

Ушбу 5 гуноҳдан мўминлар узоқ бўлсинлар!:

http://muslim.uz/index.php/maqolalar/item/13839

ИЙМОННИНГ АЛОМАТИ:

http://muslim.uz/index.php/maqolalar/item/13542

Ажиб саволларга нозик жавоблар:

http://muslim.uz/index.php/maqolalar/item/13901

Мўминларнинг 4 ахлоқи:

http://muslim.uz/index.php/maqolalar/item/15094

Бемор бўлганда бажариладиган 4 амал:

http://muslim.uz/index.php/maqolalar/item/16155

У қоқилмас уловдир:

http://muslim.uz/index.php/maqolalar/item/15768

Ўзбекистон мусулмонлари идораси Матбуот хизмати

Туркиянинг хайрия ташкилоти Аддис Абеба университети билан ҳамкорликда Эфиопия масжидлари ва Қуръон мактабларида 15000 нусхада мусҳаф чоп этишни молиялаштирди. Бу ҳақда iqna хабар беради.

«Умар ибн Хаттоб» номли болалар боғчасида Қуръон дарсларига қатнашадиган 1200 га яқин бола китоб нусхаларига эга бўлди.
Тақдим этилаётган Қуръон 100 миллиондан ортиқ аҳолиси бўлган Эфиопияда давлат тили ҳисобланган амҳар тилига таржима қилинган. Уларнинг 34 фоизини мусулмонлар ташкил этади.

Қуръони карим тарқатилгандан сўнг, мактаб директори шайх Муҳаммад Авол ўз ўқувчиларига хайр-эҳсонни қабул қилиш ғурур ва шараф эканлигини айтди. «Қуръоннинг амҳар тилидаги нусхаси эфиопиялик талабаларга нафақат қироат қилишга, балки унинг мазмунини тушунишга ҳам ёрдам беради», деди у.
Май ойида гуруҳ Эфиопия пойтахти Аддис-Абебадаги Гранд Анвар масжидида амҳар тилидаги Қуръоннинг 1200 нусхасини тарқатган.

Ўзбекистон мусулмонлари идораси Матбуот хизмати

Дунёда инсон зотига берилган энг улуғ неъмат бу – иймон неъматидир. Ўз яратганини таниб, унга қуллик асосида яшаш одам болаларининг ҳаммасига ҳам насиб этмаётган улуғ саодатдир. Яратганнинг мўъжизаларини ҳар қадамда кўзлари билан кўриб, эшитиб турсада, бироқ ғафлат ва залолат домида умрини ўтказаётганлар қанча.  

Бунинг акси ўлароқ, синов берилиб, атрофидаги олам зийнатини кўриш имконига эга бўлмаган, Қуръони каримдек улуғ каломни эшитиб, қалби ором ҳиссини туя олмасада, ва лекин юксак идроки ила Парвардигорига муҳаббат боғлаган, вужуди иймонга тўла кишиларни нима деб аташ мумкин?

Улар баъзи аъзоларида имконияти чекланганликларига қарамай шубҳасиз инсониятнинг иймон ато этилган афзал тоифаларидандир. Улардаги жисмоний камчилик дунё ва охират саодатини топишда асло тўсқинлик қилмайди балки, ўзига хос ирода, матонат соҳиби сифатида сабр ва шукурнинг тимсоли бўлиб ўзгаларга ўрнак бўлади.

2018 йилдан Дин ишлари бўйича қўмита, Ўзбекистон мусулмонлари идораси ташаббуси билан жисмоний имконияти чекланган фуқаролар билан ҳар бир вилоятда белгиланган тартибда диний-маърифий учрашувлар йўлга қўйила бошланди. Масжидларда жума маърузаларининг тўғридан-тўғри сурдо таржималари, ҳафтанинг якшанба кунлари режа асосида ислом илмлари бўйича туркум суҳбатлар олиб борилмоқда.

Навоий вилоятида 1400 га яқин эшитиш ва сўзлаш қобилиятида нуқсони бор фуқаролар мавжуд. Ҳозирда уларнинг 200 дан ортиғи мунтазам равишда диний-маърифий тадбирларда икки дунё саодати бўлмиш ислом билимларини ўрганиб бормоқдалар. Диний идоранинг Навоий вилояти вакиллиги томонидан бу борадаги ишлар намунали йўлга қўйилган.

Навоий шаҳридаги “Ҳазрат Алишер Навоий” масжидида жума маърузаларининг тўғридан-тўғри сурдо таржимаси махсус мониторда узатилади.

Вакиллик ҳамда “Вақф” хайрия фонди вилоят филлиали томонидан  муқаддас қадамжоларга зиёратлар уюштирилади. Шу пайтгача “Мавлоно Ориф Девгароний”, “Тошмасжид ” “Чашма” каби тарихий масжид ва зиёратгоҳлар ҳамда Самарқанд вилоятига сафарлар ташкиллаштирилди.

 Ҳафатнинг ҳар якшанба кунлари тартиб асосида тажрибали имом-хатиблар томонидан Ислом арконлари, иймон шартлари, мусулмон хулқи, ижтимоий одоблар, ақоид, фиқҳ мавзуларига оид билимлар берилмоқда. Суҳбатлардан сўнг иштирокчиларга саҳовапеша инсонлар кўмагида тушлик дастурхонлари ёзилмоқда.

 Аллоҳ таолога шукурлар бўлсинким, натижада бу тоифа кишилар баъзи соғлом инсонлар билмаган илмларни билмоқдалар. Қалблари ҳаловат топиб, ҳаётлари, турмуш тарзи ўзгариб бораётганлигини ўзлари эътироф этмоқдалар:

“Аллоҳ таолонинг гўзал исмларини ёд олдик. Биласизми, 99 буюк сифатни хотирамга жо этган кунимдан қалбимда таърифлаб бўлмас бир оромни, Роббимга яқинликни ҳис қилдим. Мен учун бундан ортиқ бахт йўқ”, дейди жамият аъзоларидан бири. Энди инсоф билан ўйлайликчи: соғлом кишилар орасида Аллоҳ таолонинг 99 исмини ёддан айтиб бера оладиган мусулмонлар кўпми ёки озми?  

Тўғри бу йўналишдаги ишларда камчиликлар, муаммолар ҳам мавжуд. Суҳбатларда иштирок этаётганларнинг сони уларнинг умумий миқдорига нисбатан анча кам. Қолаверса, тадбирлар барча вилоятда рисоладагидек дея айтиб бўлмайди. Билимсизлик туфайли миссионерлик таъсирида бошқа динга ўтиб кетаётганлари ҳам кузатилмоқда. Демак ҳали бу борада қилиниши лозим бўлган ишлар кўп. Дин хизмати, ижтимоий ҳимоя ишларига масъул ҳар бир мутасадди зиммасида Аллоҳ олдида ҳам, жамият олдида ҳам бажариши лозим бўлган бир талай вазифалар бор. Уларга виждон амрини муқаддас кўрсатсин Роббимиз! Шундай бўлсада, бу эзгу лойиҳаларнинг ташаббускорлари дин учун, холис Аллоҳ ризолиги учун, шу пайтгача ўз ҳолига ташлаб қўйилаёзган, жамиятдан ажраб қолган инсонларга ғамхўрлик кўрсатиш, уларга ҳам иймон неъматини улашиш йўлида озми-кўпми ҳаракат қилмоқдалар, елиб югурмоқдалар. Аллоҳ таоло ана шу кишилардан рози бўлиб, ниятлари, ихлосларига яраша ишларида улкан муваффақиятларни ато этсин!