Google бугунги кунда интернет тармоғида катта улушга эга бўлган интернет хизматларини таклиф этаётган компания ҳисобланади.

Компания мусулмонларнинг муқаддас ойи Рамазон муносабати билан, мусулмонларнинг кўнглига хуш ёқувчи дизайндаги Google қидирув тизими дизайнини тақдим этди. GoogleDoodleнинг Рамазонга бағишланган янгиликларидан бири сифатида баннернинг жойлангани бўлди. Бундан ташқари компания ушбу ойда қиблани излаш билан боғлиқ сўровлар кўпайгани сабабли Qibla Finder (қиблани топувчи) хизмати ва Qalam номли лойиҳасини ишга туширди.

Qalam лойиҳасида хаттотлик санъатини виртуал оламга кўчирилган. Исталган инсон ўз табригини араб ёзувида юбориши мумкин бўлади.

ЎМИ Матбуот хизмати

Швеция шимолидаги Кируна шаҳрида яшовчи мусулмонлар Рамазон давомида 20-22 соатлаб рўза тутади. Бу ҳақда "aa.tr.com" нашри хабар берди.

Ер шарининг шимолий нуқтасида жойлашган мамлакатларда айрим шаҳарларнинг маҳаллий мусулмон аҳоли Рамазоннинг биринчи кунида рўза тутиш вақти 19 соат 53 дақиқа бўлиши айтиб ўтилди.

Рамазоннинг охирги кунида эса бу вақт 21 соат 58 дақиқа давом этиши қайд этилган. Ўз навбатида кўриниб турибдики ушбу ҳудуд аҳолиси ифторлик ва сахарлик орасида 2-4 соат давомида хуфтон ва таровеҳ намозларини адо этишлари ва сахарлик қилишга тайёрланишлари керак бўлади.

Норвегиянинг Тромсо шаҳрида бу муддатлар 19 соат 50 дақиқа ва 21 соат 59 дақиқани, Исландия пойтахти Рейкявикда 19 соат 11 дақиқани ва 21 соат 48 дақиқани ташкил этади.

“Қиш ўртасида 9-10 соат қисқа муддатли рўза тутиш билан узун муддатли рўза тутиш ўртасида фарқ йўқ. Аллоҳ сабр беради”, – дейди Швеция Ислом федерацияси раиси Тоҳир Акан.

ЎМИ Матбуот хизмати

Ўзбекистон Республикаси Президенти Ш.Мирзиёевнинг 2018 йил 16 апрелдаги «Диний-маърифий соҳа фаолиятини тубдан такомиллаштириш чора-тадбирлари тўғрисида»ги фармонига кўра, Ўзбекистон Мусулмонлари идораси ҳузурида Вақф хайрия жамоат фонди ташкил этилган эди. Фонднинг ижрочи директори этиб Тошкент ислом ислом институти «Таҳфизул Қуръон» кафедраси мудири лавозимида ишлаб келаётган Жалолиддин Ҳамроқулов тайинланди.

Кеча, 16 май куни «Таҳфизул Қуръон» кафедрасида институт раҳбарияти, ўқитувчилар ва ходимлари иштирокида мажлис ўтказилди. Ректор У.Ғафуров йиғилганларни Рамазони шариф билан муборакбод этиб, «Таҳфизул Қуръон» кафедрасининг Қуръони карим қироати ва тажвид фани ўқитувчиси, кўплаб қориларнинг устози Жаҳонгир қори Неъматовни кафедра мудири лавозимига тайинланганини эълон қилди.

Анъанага кўра, Қуръон тиловат қилиниб, Аҳмаджон домла Бобомурод мудир Жаҳонгир Неъматовнинг бошланажак масъулиятли меҳнати баракали ва фойдали бўлишини сўраб дуо қилди.

Тадбир якунида «Таҳфизул Қуръон» кафедраси устозлари Аҳмадхон қори Рашидов, Зафар қори Маҳмудов, Жаҳонгир қори Рўзиев, Элёржон қори Аҳматқулов бугун бошланажак Рамазоннинг биринчи таровиҳ намозида Хатми Қуръонни бошлашлари муносабати билан кафедра мудири Жаҳонгир қори Неъматовдан дуо олишди ва келажакда кафедра фаолиятида ҳамда Қуръон таълимида бир тану бир жон бўлиб аҳилликда меҳнат қилишга ният қилишди.

Эслатиб ўтамиз, Жаҳонгир қори Неъматов бу йилги Рамазони шарифда ҳам Тошкент шаҳридаги «Минор» жомеъ масжидида Қуръон хатмига ўтади.

ЎМИ Матбуот хизмати

Ўзбек қорилари хориж масжидалирда таровеҳ намозларини адо этиб бермоқда.
Қадимдан юртимиздан етишиб чиққан диний уламолар ва қориларга хориж давлатларида катта ҳурмат билан қаралган. Ўзбекистон мустақилликка эришгандан сўнг диний таълимга катта эътибор берилди. Бунинг натижаси ўлароқ юртимиздан юзлаб, минглаб қорилар етишиб чиқди ва чиқмоқда.
Бир неча йилдан буён хориж давлатлари диний идораларидан келган таклифлар асосида қориларимиз чет мамлакатларида диний-маърифий тадбирларда иштирок этиб, таровеҳ намозларини адо этиб бермоқдалар.

Жорий йил Рамазон ойида ҳам қориларимиз бир қанча давлатларга, хусусан, АҚШ, Россия, Украина каби мамлакатларга жўнаб кетдилар.
Жумладан Туркистон – Америка жамияти таклифига биноан Тошкент шаҳридаги “Минор” масжиди ноиб-имоми Кабиров Муроджон қори АҚШга жўнаб кетди. У ерда қоримиз Рамазон ойи давомида мусулмонларга таровеҳ намозини адо этиб, диний – маърифий суҳбатлар ўтказиб бериши режалаштирилган.

ЎМИ Матбуот хизмати

“Аллоҳ сизларни тупроқдан, сўнгра нутфадан яратиб, кейин жуфт-жуфт қилиб қўйди” “Ва Унинг оят-белгиларидан сизларга сокинлик топишингиз учун ўзингиздан жуфтлар яратганлиги ва ораларингизда меҳру муҳаббат ва марҳаматини солиб қўйгандир. Албатта, бунда тафаккур қиладиган қавмлар учун оят-белгилар бордир”, деб инсонларни бир-бири билан муҳаббат ила яшашлик учун меҳрибонлик қилган зотга ҳамду санолар бўлсин.

“Эй ёшлар жамоаси, сиздан ким никоҳга қодир бўлса, уйлансин. Албатта, у кўзни тўсувчи ва фаржни сақловчидир. Ким қодир бўлмаса, рўзани лозим тутсин, бу унинг учун бичилишдир”, деб ёшлик даврида муносиб оила қуришга тарғиб қилган Расулуллоҳ соллаллоҳу алайҳи васалламга салавоту саломлар бўлсин.

Севикли Пайғамбаримиз соллаллоҳу алайҳи васаллам саҳобаларга: “Ахлатхонада битган гулдан эҳтиёт бўлинг”, дедилар.

Асҳоблар:  “Ахлатхонада битган гул қандай гул, ё Расулуллоҳ?” деб сўрадилар.

Пайғамбаримиз алайҳиссалом: “Ёмон муҳитда, исломий тарбиядан узоқ, ахлоқсиз бир оилада етишган аёл”, деб жавоб бердилар.

Саҳобийлар: “Эй Аллоҳнинг Расули, аёлларнинг қандоғи энг яҳшисидир”, деб сўрадилар.

Пайғамбаримиз алайҳиссалом: “Қачон назар солса, сурур бағишлайдигани; қачон амр қилса, итоат қиладигани ва эрига ўз жонида ва молида у ёқтирмайдиган нарса ила хилоф қилмайдигани”, дедилар

“Бир киши аёлига муҳаббат билан боқса ва аёли ҳам унга шу кайфиятда юзланса, Аллоҳ таоло иккаласига ҳам раҳмат назари билан қарайди ва қўлларини қўлларига қўйганларида иккаласининг ҳам гуноҳлари бармоқлари орасидан тўкилиб кетади” (Саҳиҳи Муслим).

Али ибн Абу Толиб айтадилар: “Ёмон хотин мисоли чиройли кийинган чаённинг ўзидир”.

Умар ибн Хаттоб: “Хотинларга итоат этманг. Уларга қаршилик қилиб турмасангиз, уйдан барака кетади”, дедилар. Хотиннинг нафсоний орзуларига бўйсунган ҳар бир эркакни Аллоҳ жаҳаннам оташига отмай қўймайди.

Абулқосим Замахшарий айтадилар: “Хотин зоти агар қалбинг улар ишқига гирифтор бўлганини сезса, бурнингни тупроққа ишқалайди”.

Ушбу насиҳатларга амал қилган ҳолда мазкур сўзларга ҳам қулоқ солайлик. “Энг яхши хотин шундай хотинки, у ҳаёли ва ориятли бўлади. Энг муҳими, оилада тўкин-сочинлик ва бараканинг сабабчиси бўлади”. Шундай одамлар борки, муҳаббат бўстонини оралаб, уйланишга қадам қўймайдилар ва бу файзу боғининг гулзоридан гуллар термайдилар, доимо ғам уйида ўзлари якка-ю танҳо ўтирадилар.

Эркакларнинг камолоти шуки, ким ота-онасига яхшилик қилса, силаи раҳим ришталарини боғласа, аҳли аёли ва фарзандлари билан ҳам хулқини яхши қилса, динини сақласа, молини ҳаромдан ислоҳ қилса, унинг ортиғидан инфоқ-эҳсон берса, тилини сақласа, ўз уйини лозим тутса, (яъни ишдан вақтида келса), ўша эркакнинг камолотидир (Фузайл ибн Иёз).

Афсуски бугун шундай эркаклар кўпайиб бормоқдаки, мўъжазгина оиласи, гулдай аёли, кўзмунчоқдек фарзандлари туриб, бошқа “ахлатхона”да ўсган гулзорларга оралаб кетмоқда.

Шундай аёллар борки, бир юмуш излаб ишга киради-ю унга раҳим қилиб ишга олган раҳбарининг молу давлати ва шуҳратига кўз олайтиради, ҳар хил нозу ишвалар қилиб ўзига қаратиб олади-да сўнг унинг оиласини бузишга, фарзандларини тирик етим қилишга киришади.

Бу – энг жирканч ва қабиҳ ишдир. Айни дамда шуни ҳам айтиб ўтиш жоизки, қайси касб эгаси бўлмасин ўз қўл остидаги ишчи-хизматчи аёллар билан ишқий муносабатга киришиб кетадиганлар ҳам бор. Бу иш ақлсиз бошни елкда кўтариб юришдир. Бегона аёлни севиш – саримсоқ ейишнинг ўзгинаси. Уни ҳарчанд беркитишингга қарамай, охир-оқибат унинг хиди билиниб қолади.

Ўз оиласи бўла туриб қандайдир иффатсиз аёлга меҳрибончилик қиламан деб уни яширинча никоҳига оладиганлар ҳам бор. Оҳир-оқибат, сири бир кун ошкора бўлганида дўст-у  душманининг олдида уятга қолади. Меҳр-муҳаббатдан, соф иффатли аёлидан, исломий оиласидан мосуво бўлади. Синган нарса ўз аслидай бўлмайди. Йўқотилган ишонч қайтиб тиккаланмайди. Покиза, иффатли хотиннинг ўз эридан кўрган хиёнати ҳеч қачон қалбдан ўчмайди. Ачинарлиси, ишонч ва беғуборлик йўқолади. Эркак киши салобатидан мосуво бўлади.

Аллоҳ таоло ана шундай шармандаликдан сақласин. Оила мўъжазгина бир жамиятдир, бутун инсоният жамиятининг дахлсизлиги ҳам унинг жипслигига боғлиқ. Барчамизни оилаларимиз билан муҳаббат риштаси воситасида жипслаштирсин. Омин...

Абдужаббор РАСУЛОВ,

Марҳамат туманидаги “Сулаймон Сирли” жоме масжиди имом-хатиби