www.muslimuz
ЖОНЛИ: Жума маърузаси — Илм ўрганиш ҳар бир мусулмон учун фарздир 26.11.21
Ўзбекистон мусулмонлари идораси Матбуот хизмати
muslim.uz
Муфтий ҳазрат Нур-Султон шаҳридаги "Ҳазрати Султон" жоме масжидида жума намозини адо этадилар
Хабар берганимиздек, Ўзбекистон мусулмонлари идораси раиси, муфтий Нуриддин домла ҳазратлари “Мустақил Қозоғистон ва Ислом қадриятлари” номли халқаро анжуман доирасида Қозоғистон Республикасида сафарда бўлиб турибдилар.
Бугун, 26 ноябрь куни Муфтий Нуриддин домла ҳазратлари қардош халқ уламолари билан бирга Нур-Султон шаҳридаги "Ҳазрати Султон" жоме масжидида жума намозини адо этадилар.
Маълумот учун, “Ҳазрат Султон”– Нур-Султондаги жоме масжиди, Қозоғистондаги илк йирик масжид.
Масжид қурилиши 2009 йил июнь ойида бошланган эди. 2012 йил 6 июль куни пойтахтнинг ноёб объектлари қаторига қўшилган масжид очилди.
Бино анъанавий қозоқ безакларидан фойдаланган ҳолда, анъанавий ислом услубида қурилган. У беш минг намозхонни, байрамларда эса 10 минг кишини сиғдиради. Бугун “Ҳазрат Султон” масжидининг майдони 11 гектардан ортиқ. Масжид Қозоғистондаги энг катта гумбазга эга бўлиб, гумбаз тагида баландлиги 51 метр ва диаметри 28,1 метрни ташкил қилади. Масжид бурчакларида баландлиги 77 метр бўлган 4 та минора ўрнатилган.
Тафсилотларни сайт ва ижтимоий тармоқларимиз орқали кузатиб боринг.
Ўзбекистон мусулмонлари идораси матбуот хизмати
Муфтий Нуриддин домла ҳазратлари юксак медал билан тақдирландилар
2021 йил 25 ноябрь куни Нур-Султон шаҳрида бўлиб ўтган халқаро конференцияда Ўзбекистон мусулмонлари идораси раиси, муфтий Нуриддин домла Холиқназаров ҳазратлари Қозоғистон мусулмонлари диний бошқармаси томонидан таъсис этилган юксак медал билан тантанали равишда тақдирландилар.
Таъкидлаш жоизки, “Мустақил Қозоғистон ва Ислом қадриятлари” номли халқаро илмий-амалий конференция юксак савияда ташкил этилгани, 200 дан зиёд иштирокчи қатнашгани, ZOOM платформаси орқали юзлаб хорижий ва маҳаллий мутахассислар кузатиб боргани, мартабали дин ва давлат арбоблари, профессор ва академиклар араб, рус, турк ва қардош тилларда маърузалар қилганлари ҳамда анжуман жараёнлари тўғридан-тўғри бутун дунёга онлайн намойиш этилгани билан яна аҳамиятли бўлди.
Халқаро конференцияда бугунги мураккаб даврда дин пешволарининг ҳамжиҳатликда фаолият юритиши муҳимлиги, шунингдек, глобал замонда уламоларнинг ўзаро ҳамкорлиги муаммоларни ечишда катта омил экани баралла айтилгани билан унинг нуфузи янада ошди.
Нотиқлар томонидан сўнгги йилларда Ўзбекистон заминида Ислом дини маърифатини кенг ёйиш, мўмин-мусулмонлар эҳтиёжини таъминлаш, масжид-мадрасаларни обод этиш ва улуғ алломалар меросига эҳтиром кўрсатиш йўлида олиб борилаётган ишлар юқори баҳоланди.
Конференцияда мана шундай ишларнинг муносиб эътирофи сифатида ҳам муфтий Нуриддин домла Холиқназаров ҳазратлари Қозоғистон мусулмонлари диний бошқармаси буйруғи асосида юксак медал билан тақдирландилар.
Аллоҳ таоло Муфтий ҳазратларига ушбу медални муборак айласин.
Ўзбекистон мусулмонлари идораси Матбуот хизмати
Халқаро анжуман ўтказилмоқда (фотолавҳа)
Бугун, 25 ноябрь куни Қозоғистоннинг Нур-Султон шаҳрида Қозоғистон мусулмонлари диний бошқармаси томонидан мамлакат мустақиллигининг 30 йиллигига бағишланган “Мустақил Қозоғистон ва ислом қадриятлари” мавзусида халқаро илмий-амалий конференция бошланди.
Анжуманда Қозоғистоннинг мустақиллик йилларида маънавий соҳада эришган ютуқлари, Қозоғистоннинг Биринчи Президенти Нурсултон Назарбоевнинг Ислом дини ривожи ва динлараро тотувликни мустаҳкамлашга қўшган ҳиссаси ҳамда Қозоғистон Республикаси Президенти Қасим-Жомарт Токаев ташаббуси билан боғлиқ масалалар муҳокама қилинмоқда.
Шунингдек, қўшни ва хориж мамлакатлар билан дўстона алоқалар, мўмин-мусулмонларнинг иттифоқлиги йўлида диний пешволар томонидан амалга оширилаётган ишлар ва ҳамкорлик алоқаларининг янги босқичи тўғрисида сўз бормоқда.
Ушбу нуфузли тадбирда Ўзбекистон мусулмонлари идораси раиси, муфтий Нуриддин домла ҳазратлари, Россия Федерацияси мусулмонлари диний идораси раиси, муфтий Шайх Равил Гайнутдин, Россия мусулмонлари Марказий диний идораси раиси, Шайх-ул Ислом, муфтий Талгат Сафо Тажуддин, Қирғизистон мусулмонлари идораси раиси, муфтий Замир ҳожи Ракиев, Тожикистон ислом маркази раиси, муфтий Саидмукаррам Абдуқодирзода ҳазратлари, Мўғилистон мусулмон ташкилотлари иттифоқи раиси Ҳадис Ботирбек ҳожи, Қозоғистондаги “Нур-Муборак” Миср ислом маданияти университети ректори Муҳаммад аш-Шаҳҳат ал-Жиндий, Россия Олтой Республикаси мусулмонлари диний бошқармаси муфтийси, Осиё мусулмонлари диний бошқармаси раиси Жанболат Охтаубаев, Омск ва Омск вилояти раиси Бота Бакулин сингари Ислом оламининг мартабали уламолари, муфтийлари, экспертлари ва маҳаллий йирик дин пешволари қатнашмоқда.
Шунингдек, халқаро анжуманда давлат ва жамоат арбоблари, зиёлилар, тарихчилар, хорижий давлатлар элчилари, вилоятлар бош имом-хатиблари ҳам иштирок этмоқда.
Халқаро анжуман фаолиятини сайт ва ижтимоий тармоқларимиз орқали кузатиб боринг.
Ўзбекистон мусулмонлари идораси Матбуот хизмати
Ўзбекистон ва Қозоғистон муфтийлари мулоқот қилдилар
Бугун, 25 ноябрь куни Нур-Султон шаҳрида Ўзбекистон мусулмонлари идораси раиси, муфтий Нуриддин домла ҳазратлари “Мустақил Қозоғистон ва Ислом қадриятлари” номли халқаро анжуман олдидан Қозоғистон мусулмонлари идораси раиси, бош муфтий Наврўзбай ҳожи Тағанули жаноблари билан учрашув ўтказдилар.
Самимий мулоқот чоғида Қозоғистон бош муфтийси Наврўзбай ҳожи жаноблари муфтий Нуриддин домла ҳазратларига нуфузли анжуманга ташриф учун ташаккур айтиб, янги лавозимга сайланганлари муносабати билан муборакбод этиб, хайрли дуо ва тилакларни билдирдилар. Ўз навбатида муфтий Нуриддин домла ҳам Наврўзбай ҳожи Тағанулига самимий таклиф, хайрли дуо ва тилаклар учун миннатдорлик билдириб, у кишининг дин йўлидаги фаолиятига улкан муваффақият тиладилар.
Учрашув аввалида Ўзбекистон билан Қозоғистон ўртасидаги ҳамкорлик диний-маърифий жабҳада ҳам изчил ривожланиб, халқларимиз ўртасидаги биродарликни янада мустаҳкамланиб бораётгани, бу икки Давлат раҳбарларининг оқилона сиёсати туфайли ўзаро муносабатлар янги босқичга кўтарилгани алоҳида таъкидланди.
Қозоғистон муфтийси Наврўзбай ҳожи Ўзбекистондаги тарихий обидалар, муборак қадамжолар зиёратчиларнинг дунёқараши ва руҳий оламини бойитишини мамнуният ила қайд этди.
Муфтий Нуриддин домла Ўзбекистон мусулмонлари идорасида амалга оширилаётган хайрли ишлар, мўмин-мусулмонларнинг диний эҳтиёжларини қондириш, хусусан Фатво бўлимини кенгайтириш, диний савол-жавобларга ихтисослашган колл-марказ фаолиятини ривожлантириш ва диний таълим сифатини ошириш, кадрлар тайёрлаш тизимини такомиллаштириш каби ўзгаришларга алоҳида тўхталдилар.
Мулоқот якунида Ўзбекистон ва Қозоғистон муфтийлари икки давлат раҳбарларининг динга муҳаббатлари зиёдалиги боис мамлакатларимизда Ислом маърифатини кенг таратиш бўйича катта саъй-ҳаракатлар олиб борилаётганини алоҳида эътироф этишди.
Маросим охирида Қозоғистон бош муфтийси Наврўзбай ҳожи Ўзбекистон мусулмонлари идораси раиси, муфтий Нуриддин домла ҳазратларига ҳадялар улашдилар.
Икки давлат диний идоралари раислари мулоқотидан сўнг муфтий Нуриддин домла бошчилигидаги Ўзбекистон делегацияси вакиллари Қозоғистон муфтийси наиби Ўнгар домла Ершат Aгибай ўғли ҳамроҳлигида Қозоғистон мусулмонлари диний бошқармаси фаолияти билан яқиндан танишдилар.
Ўзбекистон мусулмонлари идораси матбуот хизмати
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.