Ўзбекистонга кириш электрон визасини олиш учун мурожаат қилган хориж фуқаролари сони 18 июль ҳолатига кўра 366 нафарни ташкил қилган. KUN.UZ нашри Бош вазир ўринбосари Азиз Абдуҳакимов берган маълумотларга асосланиб, шу ҳақида хабар берди.

Дунёнинг 33 мамлакатида яшовчи 366 киши Ўзбекистонга кириш электрон визасини олиш учун мурожаат қилган, улардан 257 нафарини - эркаклар, қолган 109 нафарини эса аёллар ташкил қилади.

E-VISA учун мурожаатчилар орасида энг фаоллари АҚШ (57 нафар), Хитой (56), Буюк Британия (45), Польша (32), Франция (26) ва Ҳиндистон (25) фуқароларидир. Шу билан бирга, Испания (15), Германия (13), Канада (12), Италия (11), Нидерландия (10), Венгрия (8), Австралия (6), Португалия (6), Бельгия (5), Швейцария (5), Ирландия (5) ва бошқа мамлакатлар фуқароларидан ҳам қатор мурожаатлар келиб тушган.

Мурожаат қилган хориж фуқароларининг 131 нафарига E-VISA берилган, 235 нафар кишининг мурожаати текширув жараёнида.

Таъкидлаш жоизки, Ўзбекистонда 15 июль кунидан бошлаб хорижлик фуқароларга республикада туристик мақсадларда бўлиш учун электрон кириш визаларини расмийлаштириш ишлари бошланган.

Электрон виза хориж фуқаросига 30 кун муддатга Ўзбекистон ҳудудида бўлиш ҳуқуқини беради ва бу виза тақдим этилган кундан бошлаб 90 кун муддат ичида амал қилади. Берилган электрон виза хориж фуқаросининг «e-visa.gov.uz» порталига қилган мурожаатида кўрсатилган электрон манзилга жўнатилади.

Электрон визани расмийлаштириш учун мурожаат бериш Ўзбекистон Республикасига келиш санасидан уч иш кунидан кам бўлмаган муддатда амалга оширилади.

Электрон кириш визасини олиш мурожаатини кўриб чиқиш учун консуллик йиғими ҳажми 20 АҚШ долларини ташкил этади.

ЎМИ Матбуот хизмати

Жорий йилнинг 17 июль куни Қорақалпоғистон Республикаси Вазирлар Кенгаши мажлислар залида «Жаҳолатга қарши маърифат» мавзусида тадбир бўлиб ўтди.

Тадбирда Қорақалпоғистон Республикаси барча шаҳар ва туманлар ҳокимларининг жамоат ташкилотлари ва диний ташкилотлар билан алоқалар бўйича бош мутахассислари, Қорақалпоғистон Республикаси Адлия вазири ўринбосари, Республика маънавият-маърифат маркази Қорақалпоғистон Республикаси бўлими бошлиғи, Ўзбекистан ёшлар иттифоқи Қорақалпоғистон Республика Кенгаши Раисининг ўринбосари, Фуқароларнинг ўзини ўзи бошқариш органлари фаолиятини мувофиқлаштириш бўйича Қорақалпоғистон Республикаси Кенгаши Раисининг биринчи ўринбосари, Қорақалпоғистон мусулмонлари қозиёти қозиси, шаҳар ва туманлар бош имом-хатиблари иштирок этди.

Тадбирда бугунги кунда диний-маърифий соҳада амалга оширилаётган ижобий ишлар ҳақида атрофлича тўхтаб ўтилди. Аслида, динимиз меҳр-оқибат, раҳм-шафқат, инсонпарварлик, ўзгаларни ҳурмат қилиш, кечиримли бўлишга чақириши мисоллар билан айтиб ўтди.

Шунингдек тадбирда диний ташкилотларга оид қонунчиликдаги сўнгги ўзгаришлар, ёшлар тарбиясига салбий таъсир кўрсатаётган «Оммавий маданият» каби  мавзуларда маърузалар қилинди.

Исламатдин АЛЛАНОВ

Қорақалпоғистон мусулмонлари қозиёти ходими

ЎМИ Матбуот хизмати

Эндигина кўзи ёриган ёш она кучли ҳаяжонда:

– Чақалоғимни кўрсам бўладими? – деб сўради.

Қучоғига юмшоқ бир юргак берилди ва бахтли она чақалоғининг жажжи юзини кўрмоқ учун унинг юзини очди ва ҳайратга тушганидан тили тутилиб қолди. Она ва чақалоқни кузатиб турган дўхтир шартта орқасига ўгрилиб деразадан кўчани томоша қила бошлади.

Чақалоқнинг  қулоқлари йўқ эди... Таҳлиллар боланинг эшитиш қобилияти яхши экани, фақат қулоғининг супраси йўқлиги боланинг ҳуснини бузиб турганини кўрсатди. Орадан йиллар ўтди, бола мактабга чиқди. 

Бир куни мактабдан уйга югуриб келди ва ўзини онасининг бағрига отди. Тўлиқиб йиғлар эди. Бу унинг ҳаётидаги биринчи мазахланиши ва умидсизлиги эди: 

– Бир катта бола менга махлуқ деди.

Болакай ана шу кемтиклик билан улғая бошлади. Уни синфдошлари яхши кўрар ва ниҳоятда зеҳни тез ўқувчи эди.  Агар синфдошларига аралашиб юрганида эди, шубҳасиз, синфком бўлар эди.

Аммо онаси ҳар доим унга:

– Ёш болаларнинг орасига аралашмайсан, – деб тайинлар эди.

Айни пайтда у қалбида теран бир ачиниш ва шафқатни ҳис қилар эди.

Боланинг отаси оила дўхтири билан қулоғи хусусида сўзлашди.

– Бирор нарса қилишнинг иложи йўқми? – деб сўради.

Дўхтир:

– Агар бир жуфт қулоқ топишнинг иложи бўлса, уни ёпиштириб қўйиш мумкин, – деди.

Шундан сўнг  болага қулоқларини фидо этиши мумкин бўлган бир жавонмардни ахтара бошладилар. Орадан икки йил ўтди.  Бир куни отаси:

– Шифохонага борасан, ўғлим, онанг иккаламиз сенга қулоқларини беришга рози бўлган бир одамни топдик. Фақат унинг кимлигини сенга айта олмаймиз – сир, – деди.

Операция муваффақиятли ўтди ва бутунлай янги бир инсон қиёфаси пайдо бўлди. Янги кўринишидан руҳияти юксалган бола ўқишда ва ижтимоий ҳаётда катта ютуқларни қўлга киритди. Сўнгра уйланди ва кўзга кўринган дипломат бўлди. Орадан йиллар ўтди, бир куни отасининг олдига кириб:

– Отажон, менга бу қадар катта яхшилик қилган одам ким? Мен унинг яхшилигига ҳеч қандай жавоб қайтара олмадим... – деди.

Отаси:

– Бирор нарса қила олишингга кўзим етмайди. Фақат жиддий шартлашганмиз, ҳали унинг кимлигини айта олмайман, вақти етмади... – деб жавоб берди.

Бу сир йиллар давомида сақланди ва бир куни очилиш вақти келди. Бошига мусибат тушган кунда онасининг жонсиз танаси бошида отаси билан бирга жаноза ўқилишини кутаётган эди. Отаси мулойим ҳаракат билан онасининг бошига қўл чўзди, қаҳваранг сочларини силаб орқага таради, онасининг қулоқлари йўқ эди.   Отаси:

– Нега онажоним, уйда ўтирганда ҳам рўмолини бошидан олмайди, сочларига оро бермайди, деб ҳеч ўйламадингми? – дея шивирлади.

Дамин ЖУМАҚУЛ

  таржимаси