muslim.uz

الأربعاء, 25 تموز/يوليو 2018 00:00

Зуҳо намозининг фазилати

Расулуллоҳ саллоллоҳу алайҳи ва саллам айтдилар: «Кимки ўн икки ракаат зуҳо намози ўқиса, Аллоҳ унга жаннатда олтиндан бир қаср бино қилгайдир».
(Термизий, Ибн Можа, Байҳақий, Табароний, Баззор ва Ибн Абу Осим ривоят қилишган.)

Юқоридаги ҳадис қуйидаги кўринишда ҳам ривоят қилинган:

«Ким икки ракаат зуҳо намози ўқиса, ғофиллардан деб ёзилмайди. Ким тўрт ракаат зуҳо намози ўқиса, қаноатлилардан деб ёзилади. Ким олти ракаат зуҳо намози ўқиса, у ўша кун учун унга кифоя қилади. Ким саккиз ракаат зуҳо намози ўқиса, Аллоҳ таоло уни обидлардан деб ёзиб қўяди. Ким ўн икки ракаат зуҳо намози ўқиса, у одам учун Аллоҳ жаннатда бир уй барпо қилади».
Абу Ҳурайра розияллоҳу анҳудан ривоят қилинади: «Менга Халилим саллоллоҳу алайҳи васаллам уч нарсани васият қилганлар: ҳар ойда уч кун рўза тутмоқни, икки ракаат чошгоҳ–зуҳо намоз ва ухлашимдан олдин витр ўқимоғимни». (Бухорий, Муслим, Насоий ривояти).

Абу Саъид ал-Худрий розияллоҳу анҳудан ривоят қилинади: «Набий саллоллоҳу алайҳи ва саллам зуҳо намозини (баъзи кунлар) шундай (узлуксиз) ўқир эдиларки, биз ҳатто, энди бу намозни ҳаргиз тарк қилмайдилар, дердик. Баъзан эса шундай ўқимай ташлаб қўяр эдиларки, биз ҳатто, энди бу намозни ҳаргиз ўқимайдилар, дердик».
(Термизий ва Аҳмад ривояти).

Зуҳо намози неча ракаат?

Абу Ҳурайра розияллоҳу анҳудан ривоят қилинади:
«Расулуллоҳ саллоллоҳу алайҳи ва саллам бундай дедилар: «Кимки икки ракаат зуҳо намозини мунтазам ўқиса,
гуноҳи денгиз кўпикларича бўлса ҳам, кечирилгайдир».
(Термизий, Ибн Можа, Аҳмад ва Исҳоқ ривояти).

Абу Зар розияллоҳу анҳудан ривоят қилинади:
«Расулуллоҳ саллоллоҳу алайҳи васаллам: «Сизларнинг ҳар бир аъзоингизга садақа вожибдир. Ҳар бир тасбиҳингиз – садақа, ҳар бир ҳамд айтишингиз – садақа, ҳар бир таҳлилингиз («Ла илаҳа иллаллоҳ», дейишингиз) – садақа, ҳар бир такбирингиз – садақа, яхшиликка буюришингиз – садақа, ёмонликдан қайтаришингиз – садақа. Энди буларнинг ҳаммаси учун икки ракаат зуҳо намоз ўқишингиз кифоядир», — дедилар (Имом Муслим ривояти).

Зуҳо намози – бу намоз 360 садақага тенгдир.

Инсоннинг жисими 360 бўғиндан иборат бўлиб, инсонга бу неъматларнинг шукронаси ўлароқ ҳар куни 360 садақа қилиш лозим бўлади. Чошгоҳ намози ана ўша шукронани адо этишга кифоя қилади.

Зуҳо намозининг вақти қуёш тўла чиққандан тахминан 3 соат ўтгач бошланади ва пешин вақтидан 10-15 дақиқа аввал (бу вақтда қуёш тиккага келади ва намоз ўқиш макруҳ саналади) тугайди. Энг афзал вақти – пешин вақти киришидан 30-45 дақиқа аввалги вақтдир.

М. АШУРОВ
«Кулла» жомеъ масжиди имом-хатиби

Published in Мақолалар

الأربعاء, 25 تموز/يوليو 2018 00:00

Огоҳ бўлган, абгор бўлмас!

Баъзи ота-оналар фарзандининг ёш бўлишига қарамай, уяли телефондан бемалол фойдалана олишини кўриб, хурсанд бўлишини айтади. Лекин уларнинг кўпи болалари телефон орқали нималар билан машғуллигини билмайди, тўғрироғи, назорат қилмайди. Болакай эса қўлида телефон, истаган, қизиққан маълумотларини ўртоқларидан кўчириб олиши ва ундан завқланиши мумкин. Шу тариқа, телефонга тушган ҳар хил бемаъни, ёшига мос бўлмаган маълумотлар ҳам боланинг онгини заҳарламоқда.

Маълумотларга кўра, ҳозирги кунда уяли телефон орқали ҳаёсиз тасвирларни тарқатиш тез ривожланмоқда. Бу эса дунё мамлакатларини жиддий ташвишга соляпти. Қатор давлатлар жамиятда, айниқса, ёшлар орасида одоб-ахлоқ меъёрларининг бузилишига йўл қўймаслик мақсадида кескин чораларни қўллашга мажбур бўлмоқда.

Хитой ҳаёсиз маҳсулотларни тарқатишга қарши кенг қамровли кураш ҳаракатларини бошлаб юборди.

Австралияда эса ҳаёсиз маҳсулотларнинг тарқатилиши қатъий тақиқланиб, бу борада махсус қонун қабул қилинган.

Мактаб ўқувчиларини тармоққа улашда аппаратнинг турига қараб, белгиланган меъёрлар асосида фақат оддийларига улаш керак. Яъни, уларда камера, диктофон, флеш карта, "bluetooth" бўлмаслиги керак. Ўқувчиларга фақат кириш чиқиш қўнғироқларини қабул қилувчи ва хабар йўлловчи аппаратлардангина фойдаланишга рухсат бериш лозим.

Бугунги ҳаётни интернетсиз тасаввур қилиш қийин. Шубҳасиз, интернет давримизнинг энг буюк ихтироларидан бири. Катта-кичик, ҳар ким унинг хизматидан фойдаланиши мумкин. Бироқ гап ким қандай фойдаланишига боғлиқ. Ҳозир тўртбеш яшар бола ҳам компьютердан бемалол фойдаланиши, эртадан кечгача “автопойга” ўйнаши ёки “жангари филм иштирокчиси”га айланиши мумкин. Бир қарашда бунинг ёмон жойи йўқдек. Бироқ бу нарса одат тусига кирса, нохуш оқибатларга олиб келиши ҳеч гап эмас.

Агар ўтган асрнинг 90-йилларида ёшларнинг энг севимли машғулотлари мусиқа тинглаш ва телекўрсатувлар кўриш бўлса, айни кунда компьютер ва интернет олдинги қизиқишларни ёш авлод ҳаётидан сиқиб чиқарди. Ҳозирги замон ёшлари қизиқиш ва севимли машғулотлари ҳақида сўз юритганида, спорт, дўстлар билан суҳбатлашиш, маънавий ва маданий ҳордиқ чиқариш билан бир қаторда компьютер технологиялари ва интернетга бўлган қизиқишларини биринчи ўринда тилга олади.

Сўнгги илмий текширувлар натижаларига кўра, бутун дунё тармоғига уланаётган ёш болаларнинг сони соат сайин ошмоқда. 2007 йил Европада ўсиб келаётган ёш авлод вакилининг учдан бир қисми онлайн тизимида бўлиши кузатилди. 2010 йил дунё тармоғида 10 миллион ёшлар “сайр қилган” бўлса, ҳозир уларнинг сони аллақачон 20 миллионга етган. Кундан кунга интернетдан фойдаланувчи оилалалар, фарзандлар сони кўпаймоқда. Бундай ёшларнинг катта қисми – 4,5 миллиондан ортиғи Буюк Британияга тўғри келади. Улар ҳар куни электрон манзилларини текширади, турли хил сайтлардан маълумот излайди ва чат орқали мулоқотда бўлади. Германияда ҳозирча 3 миллиондан ва Францияда 1,5 миллиондан ортиқ ёшлар вақтини асосан онлайн тизимида ўтказади.

Яна бир муҳим маълумот: “Болаларни асрайлик” (Save the Children) халқаро ҳуқуқий ташкилоти ўтказган сўровномалар натижасидан маълум бўлдики, АҚШдаги 1517 яшар ўсмирларнинг 85 фоизи, Канада ёшларининг 93 фоизи мунтазам равишда интернетдан фойдаланади.

Дарҳақиқат, бугун интернетдан фойдаланувчиларнинг деярли барчаси ёшларни ташкил этади. Тадқиқотлар натижаларидан шу маълум бўлдики, ҳозир мактаб ёшидаги болалар ҳам интернетдан тобора эрта фойдаланмоқда.

Ёшларнинг интернетдан фойдаланиши ҳақида сўз юритар эканмиз, юқорида тилга олинган ҳолат – интернетдаги танишувлар, SMS, чатларга тўхталиб ўтамиз. Алоҳида таъкидлаш жоизки, бундай интернет аро ёзишувлар ёшлар ўртасида бугун кенг оммалашиб бормоқда, аста-секинлик билан чатга кирган ёшлар асосий вақтини ёзишмаларга сарфлаб, SMSларга, бу орқали интернетга муккасидан кетмоқда. Америкалик тадқиқотчиларнинг огоҳлантиришларича, SMSга бундай муккадан берилиш ўсмирлар соғлиғи, шунингдек, хулқатвори билан алоқадор бўлиши мумкин экан.

Тадқиқот ўтказилган ёшлардан 20 фоизи SMSга “ўта муккасидан кетганлар” тоифасига кириб, кунига 120 дан кўпроқ хабар жўнатар экан. Улар орасида, шунингдек, спиртли ичимликлар ичиш, тамаки чекиш, гиёҳвандлик ва шаҳвоний амалларга берилиш ҳам кўп учрар экан.

Интернетдаги ижтимоиий тармоқларда кунига уч соатдан кўпроқ ўтирган ўсмирлар орасида ҳам шунга ўхшаш ҳолатлар қайд этилган. Ушбу тадқиқот шундан далолат берадики, SMSга, интернет ижтимоий тармоқларига берилиб кетиш ҳолатини назардан қочириш ўсмирлар соғлиғига хавфли таъсир ўтказиши мумкин. Ана шу ҳолат SMS ё интернет ижтимоий тармоғидан ҳаддан ташқари кўп фойдаланувчиларнинг ичкилик ва тамакига кўпроқ берилиб кетиши сабабларига ҳам ойдинлик киритади.

Олимжон КАРИМОВ

Пешку тумани “Хўжа Пешку”

Жоме масжиди имом-хатиби

Published in МАҚОЛА

الأربعاء, 25 تموز/يوليو 2018 00:00

Умр сафаридан олинадиган фойдалар

Ҳаждан кўзланган асосий мақсад, Аллоҳ улуғлаган ва шарафлаган муқаддас маконда Унинг зикрини қоим қилиш ва ундаги фойдалар ва яхшиликларга шоҳид бўлиш ва қўлга киритишдир. Бу эса банданинг дунё ва охиратда саодат топишига сабаб бўлади.

«Одамлар орасида (юриб уларни) ҳажга чорлагин! (Шунда)улар сенга (Каъбага) пиёда ва ҳар қандай туяда узоқ йўллардан келурлар. Улар ўз (диний ва дунёвий) манфаатларига шоҳид бўлиш учун ва маълум кунларда(Аллоҳ) уларга ризқ қилиб берган чорва ҳайвонларига(қурбонлик учун сўйишда) Аллоҳ номини зикр қилиш учун келурлар. Бас, ундан ўзларингиз ҳам еяверингиз, бечора камбағалларга ҳам едирингиз!» (Ҳаж, 27-28).

Уламолар, Қуръони карим ва суннати шарифда келган далиллардан фойдаланиб ҳаждан олинадиган фойдаларнинг баъзиларини зикр қиладилар.

1) Масжидул ҳаромда ўқилган намоз бошқа жойдаги намозлардан афзаллиги.

Пайғамбар соллаллоҳу алайҳи васаллам айтдилар: «Менинг масжидимда ўқилган намоз бошқа масжидларда ўқилган намоздан минг марта афзалдир. Масжидул ҳаромда ўқилган намоз бошқа масжидларда ўқилган намоздан юз минг марта афзалдир» (Имом Аҳмад ва Имом Ибн Можа ривояти).

2) Мабрур ҳаж, энг афзал амаллардан биридир.

Абу Ҳурайра розияллоҳу анҳудан ривоят қилинади:

«Расулуллоҳ соллаллоҳу алайҳи васалламдан: «Қайси амал афзал?» деб сўралди. «Аллоҳга ва Унинг Расулига иймон келтириш», дедилар. «Кейин нима?» дейилди. «Аллоҳнинг йўлида жиҳод қилиш», дедилар. «Ундан кейин нима?» дейилди. «Мабрур ҳаж», дедилар» (Икки шайх ва Насаий ривоят қилган).

3) Гуноҳлар мағфират қилинади.

Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам: «Ким Аллоҳ учун ҳаж қилса, фаҳш сўз айтмаса ва фисқу фасод қилмаса, худди онаси туққан кунидек қайтади», дедилар».

4) Мабрур ҳажнинг мукофоти жаннатдир.

Пайғамбар соллаллоҳу алайҳи васаллам: «Умрадан кейинги умра иккисининг орасидаги нарсаларга каффоротдир. ҳажжи мабрурнинг мукофоти жаннатдан бошқа нарса эмас», дедилар».

5) Ҳожилар ва умра қилувчилар Аллоҳнинг меҳмонларидир.

Абу Ҳурайра розияллоҳу анҳудан ривоят қилинади: “Расулуллоҳ соллаллоҳу алайҳи васаллам дедилар: “Ҳожилар ва умра қилувчилар Аллоҳнинг меҳмонларидир, агар Унга дуо қилсалар дуоларини қабул қилади, Ундан мағфират сўрасалар уларни мағфират қилади” (Ибн Можа ривоят қилган).

6) Ҳажда қилинган нафақа Аллоҳ йўлида қилинган нафақа кабидир.

Бурайда розияллоҳу анҳу отасидан ривоят қилади:

“Набий соллаллоҳу алайҳи васаллам:

“Ҳажга қилинган нафақа Аллоҳ йўлида қилинган нафақа кабидир. Бир дирҳам эвазига етти юз баробардир” дедилар” (Муъжамул авсат).

7) Унда шифобахш замзам суви бор

Оиша розияллоҳу анҳодан ривоят қилинади:

“У замзам сувини шиша идишларда кўтариб олиб кетар ва Расулуллоҳ соллаллоҳу алайҳи васаллам шундай қилар ва касаллар устидан қуяр ва уларга ичкизар эдилар деб айтарди”.

Юқорида зикр қилинган фазилатлар, улуғ манфаатлар бўлиб, ҳожилар ҳаж ибодати давомида бу файзу баракотларга ноил бўладилар.

Аллоҳ таоло муборак сафарга кетган ва кетиш арафасида юрган ҳожиларимизни соғу саломатликда ибодатларини адо этиб, гуноҳлардан покланиб келишларини насиб қилсин. Муқаддас жойларда ўзлари, фарзандлари, сизу биз ватандошлари ҳақларига қилган дуоларини қабул этсин. Уларнинг дуолари шарофати ила юртимизнинг тинч ва осойишталигини бардавом айласин.

Нўъмонжон СОЛИЕВ

Тошкент тумани

“Чувалачи” жоме масжиди имом-хатиби

Published in Ҳаж ва умра

الأربعاء, 25 تموز/يوليو 2018 00:00

Ҳиндистон мактабларига бахт дарси киритилди

Деҳлидаги мактабларга бахт дарси жорий қилинди. Таълим вазири ўринбосари Маниша Сисолининг таъкидлашича, бахт дарси минг йиллар давомида ўтиб келинган. Дарс 30-45 дақиқа давом этади.

Дарс қоидасига кўра, ўқувчилар ёшига қараб гуруҳларга бўлинади: битта гуруҳда мактабгача таълим ёшидигилардан тортиб иккинчи синфгача бўлган ўқувчилар; иккинчи гуруҳда учинчи синфдан бошлаб бешинчи синфгача бўлган ўқувчилар ва учинчи гуруҳга 6-синфдан 8-синфгача бўлган ўқувчилар киради.

Ўқувчиларнинг дарсни қанчалик ўзлаштиргани баҳоланмайди, чунки бу дарсда тест ва уй вазифалари бўлмайди. Дарснинг мақсади – ўқувчиларнинг онгини, ҳушёрлигини ошириш, салбий фикрлардан йироқ бўлишга ёрдам этиш, муомалани ўргатиш, сиқилишларни бартараф этишдан; талабаларда эса ўзини ҳар қандай вазиятда қўлга ола билиш, турли вазиятларда тезкор қарор қабул қила олиш ва ботинидаги қувватни ишга солишни ўргатишдан иборат.

Бахт дарси болаларда руҳий тушкунликка тушиб қолиш, сиқилишларга барҳам бериш ва безовталанишнинг олдини олади. Дарснинг фаолият йўналиши ўз қадрини ҳис қилишни, фикрини тиниқ ифода этиш ва руҳий тарбияни ўзида мужассам этади.

Дарснинг самарадорлигини Деҳли ҳукумати қошида ташкил этилган 200 ўқитувчидан иборат комиссия кузатиб боради.

Маълумотларга кўра, Ҳиндистон ўсмирларининг тўртдан бир қисми 13 дан 15 ёшгача кучли депрессияни бошдан кечиради.

Робия ЖЎРАҚУЛОВА

тайёрлади.

ЎМИ Матбуот хизмати

Published in Дунё янгиликлари

الأربعاء, 25 تموز/يوليو 2018 00:00

Янги уйлар – янги орзулар (Тўртинчи мақола)

“Халқ давлат идораларига эмас, давлат идоралари халқимизга хизмат қилиши керак”. Президентимиз Шавкат Мирзиёевнинг бу ҳаётбахш ғояси бугун мамлакатимизда амалга оширилаётган туб ислоҳотларни ҳаракатлантирувчи кучга айланиб, халқимиз ҳаётидаги улкан ўзгаришларга асос бўлмоқда. Хусусан, мамлакатимиз раҳбари ташаббуси билан аҳолининг уй-жой шароитини яхшилаш, айниқса, уй-жойи йўқ, эҳтиёжманд, ногиронлиги бўлган шахсларни қўллаб-қувватлаш мақсадида янги тизим амалиётга жорий қилингани бунинг яққол далилидир.

Мазкур тизим самарасида ўз уйига эга бўлмаган, ногиронлиги бўлган юртдошларимизга узоқ муддатли имтиёзли ипотека кредити асосида уйлар ажратилиб, бошланғич бадали давлатимиз томонидан тўлаб берилмоқда. Жиззах ва Самарқанд вилоятларида ҳам ана шундай инсонлардан бир гуруҳи янги уйларга кўчиб кирди.

Президентимиз Шавкат Мирзиёев Олий Мажлисга Мурожаатномасида мазкур ўткир ижтимоий муаммонинг амалий ечимини кўрсатиб бергани замирида халқ дарди, инсонларнинг дарду ташвишлари билан ёнаётган беором ва бедор қалб туғёнлари, шиддатли бунёдкорлик кучи ва қуввати бўй кўрсатди.

“Аҳолимизни, айниқса, кам таъминланган оилаларни уй-жой муаммоси кўпдан буён қийнаб келарди. Бу оғир ижтимоий муаммога биз деярли эътибор бермай келганимиз ҳам бор гап. Халқимизнинг талаб ва истакларини инобатга олиб, биз жорий йилда имтиёзли ипотека кредитлари асосида арзон уй-жойлар қуриш лойиҳасини амалга оширишга киришдик...

Одамларимизнинг ҳаётий эҳтиёж ва манфаатларини таъминлашда бу муҳим масаланинг нақадар ўткир ва долзарб муаммо бўлиб турганини ҳисобга олиб, бу ишларнинг ҳажмини оширган ҳолда, биз янги йилда ҳам албатта давом эттирамиз. Чунки, халқимиз эртага эмас, узоқ келажакда эмас, айнан бугун ўз ҳаётида ижобий ўзгаришларни кўришни истайди. Бизнинг меҳнаткаш, оқкўнгил, бағрикенг халқимиз бунга тўла ҳақлидир”.

Уй-жойга муҳтож, ногиронлиги бўлган фуқароларни қўллаб-қувватлаш мақсадида янги тизим амалиётга жорий қилингани самарасида ана шундай инсонларга тикув машиналари совға қилиниб, уларнинг ҳам ишлаб-даромад топиши, ҳам имтиёзли кредит асосида янги турар-жойга эга бўлиши учун ана шундай қулайликлар яратилмоқда.

Аниқ рақамларга мурожаат этамиз. Жиззах вилоятида 2017 йилда 831 нафар фуқарога намунавий лойиҳалар асосида арзон уй-жойлар берилган бўлса, уларнинг 519 таси ижтимоий ҳимояга муҳтож оилаларга топширилди. Президентимизнинг Виртуал қабулхонаси ва Халқ қабулхоналарига уй-жой масаласида мурожаат қилган ногиронлиги бўлган инсонларни имтиёзли кредит асосида уй-жой билан таъминлаш мақсадида бошланғич бадални тўлаб бериш учун 650 миллион сўм маблағ ажратилди.

Мирзачўллик Рустам Болибеков иккинчи гуруҳ ногирони. 3-гуруҳ ногирони бўлган турмуш ўртоғи Мавлуда Болқибоева ва 3 фарзанди билан таъмирталаб аҳволдаги ижара уйда яшаб келаётган эди. Президент Халқ қабулхонасига мурожаатидан сўнг дастлаб унга бепул тикув машинаси берилиб, пахта тозалаш корхонасига касаначи сифатида ишга бириктирилди. Янги уй-жой учун 12,5 миллион сўм маблағ бошланғич бадал сифатида ўтказиб берилди ва оила қулайликларга эга бўлган икки хонали замонавий хонадонга кўчиб кирди.

Ирина Мишанованинг ота-онаси бир вақтлар чўлни ўзлаштириш учун бу заминга келиб, яшаб қолган. Бироқ улар 1975 йилдан бери чўлқуварлар учун вақтинча қурилган кулбада, айрим ҳолларда туман машина-трактор парки қоровулхонасида яшаб келган. Камига Ирина болаликдан ногирон: қийналиб ҳаракатланади, шу ҳолида ёлғиз ўғлини ўзи катта қилмоқда. Иринанинг ҳаётини тубдан яхшилаш учун аввал у касаначи сифатида иш билан таъминланди, Президентимиз ажратган маблағ ҳисобидан уй учун бошланғич бадал пули тўлаб берилди.

Ғаллаорол туманининг Олимлар маҳалласида яшовчи Дилфуза Тоирова саломатлиги ёмонлашгач, уч марта жарроҳлик амалиётини ўтказди. Тор ва таъмирталаб хонадонда яшаётган 7 жон – икки оиланинг топган-тутгани Дилфуза опани даволашга сарф бўлган. Ўз-ўзидан равшанки, бу оила учун янги уй олиш тугул, борини таъмирлаш ҳам ушалмас орзудек туюлар эди. давлатимиз раҳбари томонидан халқимизни ҳаётдан рози бўлиб яшаши йўлида олиб борилаётган шиддатли ислоҳотларнинг қудратли тўлқини бу оила ҳаётида ҳам янги бир саҳифа очди.

Пахтакорлик Жамшид Пардаев айни навқирон ёшида автоҳалокатга йўлиқиб, 2-гуруҳ ногирони бўлиб қолган. Бор даромади соғлигини тиклашга кетди. 2 хонали уйда 9 кишидан иборат икки оила сиқилиб яшаётгани боис унда ҳам алоҳида уй-жойга эҳтиёж бор эди. Бироқ қўли калта, ўзи бу аҳволда: осмон узоқ, ер қаттиқ. Агар Президентимиз асос солган янги тизим бўлмаганида, бу оила бошидаги оғир ташвишлар ёқимсиз бир тушдек ортда қолармиди?..

Пахтакор туманининг “Пахтакор” қишлоқ фуқаролар йиғинида яшаётган 1-гуруҳ ногирони Шуҳрат Жозилов педагогика институтида ўқиб, олий маълумотли бўлган. Унинг ота-онасида ҳам ногиронлик бор. Ижтимоий ҳимояга муҳтож бу оиланинг ҳам уй-жойга эҳтиёжи бор эди. Уларни узоқ йиллар давомида қийнаб келган муаммо Президентимизнинг Халқ қабулхонасига мурожаатдан сўнг ечим топди.

Зарбдорлик 1-гуруҳ ногирони Бобомурод Хўжакелдиев қарийб 10 йилдирки, турли жойларда ижарада яшаб келаётган эди. Икки фарзанди вояга етаётган бу оиланинг барча ташвиши хонадон бекасининг зиммасида қолиб кетган эди. Президент эътибори туфайли Хўжакелдиевлар оиласининг ҳам уй-жой ва бандлик билан боғлиқ муаммолари ҳал бўлди. Энди улар барча қулайлик ва шароитларга эга янги хонадон соҳиби.

Табиийки, уй эгалари кредитларнинг қолган қисмини тўлаб бориши учун уларга иш ўринлари керак. Бу борада Мирзачўл туманида хайрли лойиҳага қўл урилди: туман ҳокимлиги қошида ташкил этилган тикувчилик корхонасида ногиронлиги бўлган 8 нафар хотин-қиз доимий иш билан таъминланди. Корхона ўқув курсида эса ана шундай аёлларга тикувчиликни ўргатиш йўлга қўйилди.

Жиззах шаҳри, Зилол маҳалласида яшовчи Икром Иномовни кўпчилик уста соатсоз деб билади. Аслида Икром ака бу ҳунарни анча йиллар олдин оғир хасталикдан қийналиб, политехника институтидаги ишини ташлашга мажбур бўлганида ўрганган. Ҳозир эса оиласи билан тадбиркорликни йўлга қўйган: новвойчилик ва мўъжаз иссиқхонадан келаётган даромад уни ҳам, оиласини ҳам бировнинг қўлига қарам қилиб қўймади. Инсон бор вужуди билан ҳаётга, ёруғликка интилса, ўз тақдирига ўзи таъсир қила олишини амалда исботлаётган Икром Иномов кўксида ярақлаб турган давлатимизнинг юксак мукофоти – “Жасорат” медали унинг букилмас иродасидан ҳикоя қилаётгандек гўё.

Жиззах вилоятида ҳам давлат ва жамиятнинг алоҳида эътиборига муҳтож юртдошларимиз турмуш сифати ва ҳаёт даражасини яхшилаш йўлида катта ишлар амалга оширилмоқда ва давлатимиз раҳбарининг айни соҳадаги фармони ижросини таъминлаш юзасидан комплекс чора-тадбирларни амалга оширишга киришилди.

Ўзбекистон Республикаси Президентининг Виртуал қабулхонаси материаллари асосида Дамин ЖУМАҚУЛ тайёрлади.

Published in Мақолалар