Йил бошидан буён қор-ёмғирли кунларга қарамай, Шайх Муҳаммад Содиқ Муҳаммад Юсуф роҳимаҳуллоҳ номлари учун барпо этилаётган мажмуада қурилиш ишлари бир лаҳза бўлсин-да, тўхтагани йўқ. Бир йилдан ортиқ вақт давомида олиб борилган қурилиш, ниҳоят ўз якунига етиш арафасида.

Мажмуа таркибидаги масжидга кириш жойидаги муҳташам ички ва ташқи пештоқ тўла қуриб битказилди.  Мажмуани безаб турадиган иккита минора устига кичик гумбазлар ўрнатилди. Масжид ичидаги безак ишлари якунига етиш арафасида.

Мажмуадаги анжуманлар саройи, минораларнинг қурилиш ишлари якунига етди ҳамда уларнинг қуббасига ҳилол ўрнатилди.

Шунингдек, “Сўгалли ота” мақбарасида  ҳам бунёдкорлик ишлари ўз якунига етди. Масжид ҳудудидаги намозхона, аёллар намозхонаси, таҳорат хоналари, минора, 3 та кириш пештоқи, 200 ўринга мўлжалланган анжуманлар саройи, ташқи ва ички фавворалар, мажмуа саҳни, автоуловлар учун тўхташ жойларида қурилиш ва безак бериш ишлари якунланди.

Мажмуа ҳовлиси тўлиқ кўкаламзорлаштирилди, шунингдек ташриф буюрувчи зиёратчиларга қулайликлар яратиш мақсадида замонавий русумдаги ўриндиқлар, чиқинди қутилари ўрнатилди.

Мажмуа ҳудудида бунёд этилган музейда эса Шайх Муҳаммад Содиқ Муҳаммад Юсуф роҳимаҳуллоҳнинг умр йўлига оид қимматли маълумотлар, у кишининг илмий меросини жамлаш режалаштирилган.

Тез кунларда мажмуанинг фойдаланишга топширилиши кутилмоқда.

islom.uz портали таҳририяти

Манба: https://islom.uz

2019 йилнинг 24-26 апрель кунлари Татаристоннинг Қозон шаҳрида «Россия ва Ислом дунёси» шиори остида XI-халқаро иқтисодий саммити бўлиб ўтди. Бу ҳақда islom.uz манбаси хабар берди.

Ушбу саммит доирасида «Russia Halal Expo – 2019» кўргазмаси ҳам ташкил этилди. Унда дунёнинг 50 яқин мамлакатларидан 3000 дан зиёд иштирокчилар қатнашди.

Кўргазма давомида тадбир иштирокчилари томонидан муқаддас қадамжоларга зиёрат туризми йўналишидаги сайёҳларни жалб қилиш бўйича ишларни фаоллаштириш, уни ривожлантириш истиқболлари, бу борада зарур реклама тадбирларини ўтказиш, логистикаларни ташкил этиш масалаларига алоҳида урғу берилди.

Хусусан, саммитда иштирок этган юртимиз вакиллари томонидан Ўзбекистонда туризм ҳамда зиёрат туризми инфратузилмаларини ривожлантириш ва янги туризм объектларини ташкил этишга қаратилган чора-тадбирлар жадаллик билан амалга оширилаётгани ҳақида сўз юритилди. Ушбу соҳада халқаро ҳамкорликни кенгайтириш, мазкур йўналишга тўғридан-тўғри инвестицияларни жалб этиш, Ўзбекистонни зиёрат туризмининг йирик марказларидан бирига айлантириш зарурлиги таъкидлаб ўтилди.

Шу ўринда дунё мўмин-мусулмонлари учун ҳалолликни доимо таъминлаш ва келажак авлодга мерос қолдириш лозимлиги, шу боис, бутун дунёда озиқ-овқат, сув, кийим-кечак, соғлиқ ва тижорат каби барча соҳаларда ҳалол ишлаб чиқариш йўлга қўйилгани эътироф этилди. Бундан кўзланган асосий мақсад – ҳалол озиқ-овқат, ҳалол туризм, ҳалол текстиль, ҳалол тиббиёт каби соҳаларни замонавий технологиялар ёрдамида аслини йўқотмаган ҳолда ривожлантириш ва келажак авлодга мерос қолдириш.

Тадбир давомида «Hilol nashr» матбаа нашриёти фаолияти ҳақида ҳам сўз борди. Юртимиз вакиллари ўз маърузаларида мазкур нашриётнинг фаолияти, бугунги кунда олиб бораётган ишлари, келажакдаги истиқболлари ҳақида тўхталиб ўтишди. Маъруза давомида тадбир иштирокчиларига нашриёт томонидан мамлакатимизда илк марта чоп этилган Қуръони карим нусхаси тақдим этилди.

Ушбу Қуръони каримдан бир нусхаси Татаристон муфтийси Камил Самигуллинга ҳадя қилинди.

Қозон шаҳрида ўтказилган саммит барча иштирокчиларда катта ва унутилмас таассуротлар қолдирди.

Islom.uz портали таҳририяти

Манба: https://islom.uz

Фарзандларингизга намоз уйқудан, севгидан, суҳбатлашиб ўтиришдан, гапдан, молу дунёдан, кулгудан, ишдан, сафардан, орзу қилган дунёвий нарсаларидан, қўлга киритган ва киритмаган барча нарсаларидан, заифлигидан, куч-қувватидан, дунё ва ундаги жамики нарсалардан ҳам яхшироқ эканини ўргатинглар!

*****

Пешинни ўқигач, рўзадор ҳолда, ёзнинг жазирамасига қарамай, ифторлик учун лаззатли таомлар пиширишга ҳозирлик кўра бошлади. Дастурхонга нималар қўйишни ўйларди. Пиширган таомларини кўрганда оила аъзоларининг юзларида розилик аломати пайдо бўлишини кўриш илинжида шомнинг азонини қалби шодликка тўлган ҳолда кутарди.

Эй Роббим! Рўзадор ҳолда рўзадорларга ифторлик ва саҳарлик таомлари тайёрлайдиган оналаримиз, опа-сингилларимиз, турмуш ўртоқларимиз ва қизларимизни паноҳингда асраб, гуноҳларини мағфират этгин!

*****

Ота-оналар учун олтин насиҳат 

Агар ўзига ишонадиган фарзанд тарбия қилмоқчи бўлсангиз, болангизнинг юзига қараб бақиришдан, уни масхара қилишдан, устидан кулишдан, камситишдан, бошқа тенгқурлари билан солиштиришдан, хўрлашдан, уришдан, хоссатан, юзига уришдан тийилинглар! Унутманг! Бу айтилганлар боланинг шахсиятини вайрон қилувчи иллатлардир!

*****

Ибн Қаййим раҳимаҳуллоҳ дедилар: “Ким молини Аллоҳнинг тоати йўлида сарфлашдан юз ўгирса, гарчи истамаса ҳам, молини Аллоҳдан бошқа учун сарфлаш билан балоланади”.

*****

Истиғфор – ҳар бир дард учун даво, ҳар бир бало учун нажотдир!

Нозимжон Иминжонов таржимаси

Бизнинг динимизда ниятнинг ўрни жудаям катта. Инсон қилаётган дунёвий ишини ниятни гўзал қилиш билан савобли амалга айлантириб олади.

Умар розияллоҳу анҳудан ривоят қилинади: «Пайғамбар соллаллоҳу алайҳи васаллам:

«Албатта, амаллар ниятга боғлиқдир. Албатта, ҳар бир кишига ният қилган нарсаси бўлади. Бас, кимнинг ҳижрати Аллоҳ ва Унинг Расули учун бўлса, унинг ҳижрати Аллоҳга ва Унинг Расулига бўлади. Кимнинг ҳижрати дунё учун бўлса, унга эришади. Ёки аёл учун бўлса, уни никоҳлаб олади. Бас, унинг ҳижрати нима учун қилган бўлса, ўшанга бўлади»,

дедилар». Бешовлари ривоят қилишган.

Бу ҳадисда инсон бир ишни нима ниятда амалга оширса, натижаси ўша ниятига қараб бўлиши зикр қилинмоқда. Амалнинг кўриниши бир хил – барчасида ҳижрат, кўчиш. Аммо ниятлар турлича бўлгани учун уларнинг натижаси шу ниятларга қараб бўляпти. Аллоҳ ва Расули учун кўчгани савоб олади. Дунё ёки аёл учун кўчгани ниятига етади, аммо савоб ололмайди. 

Ухлаш оддий, мубоҳ амал. Агар инсон ухлашдан олдин таҳорат олиб, уйқуга ётиш олдидан айтиладиган зикрларни айтиб, суннатга мувофиқ ўнг ёни билан ётадиган бўлса, шу уйқуси учун савоб олади.

Агар инсон таҳажжудга туриш мақсадида хуфтонни ўқиган заҳотиёқ уйқуга ётса, бунинг учун ҳам савоб олади.

Агар инсон солиҳ фарзанд кўриш, умматнинг сонини ошириш, фарзанд туғилса уни Аллоҳни танийдиган ихлосли мусулмон қилиб тарбия этиш мақсадида аёли билан қўшилса, шу иши учун ҳам савоб олади.

Агар инсон сочини тараётганда, “Пайғамбаримиз соллаллоҳу алайҳи васаллам “Кимнинг сочи бўлса, икром қилсин!” дея марҳамат қилганлар” дея шуни кўнглидан ўтказса, сочини ислоҳ қилгани учу савоб олади.

Агар инсон оддий, мубоҳ бўлган ишларни қилиш олдидан ниятини чиройли қилиб олса, савобга эришади.

Ерга уруғ экаётган инсон, “Агар шу уруғдан ҳосил олсам, уни мусулмонларга арзон нархда сотиб, уларга ёрдам беришга ҳаракат қиламан” деб ният қилса, шу деҳқончилигига савоб олади.

Юзини, қўлини, тишини юваётган инсон “Пайғамбаримиз соллаллоҳу алайҳи васаллам “Поклик иймондандир” деганлар” дея ният қилиб ювадиган бўлса, шу иши учун савоб олади.

Агар инсон “Пайғамбаримиз соллаллоҳу алайҳи васаллам “Либосларингизни гўзал қилинглар. Одамларнинг юзидаги хол каби чиройли бўлиб юринглар” деган ҳадисларини дилидан ўтказиб, шунга амал қилиш мақсадида янги кийим сотиб оладиган бўлса, шу хариди учун савоб олади.

Бир киши уйининг орқа томонидан дарча очаётган эди. Қўшниси кўриб қолиб, “Нима қиляпсиз?” деб сўради. “Тоза ҳаво кириши учун дарча очяпман” дея жавоб берди у. Шунда қўшни: “Сиз айтмасангиз ҳам дарчадан тоза ҳаво киради. Аммо “Муаззиннинг азонини эшитиш учун дарча очяпман” деганингизда, савоб олган бўлардингиз” деди.

Қаранг, уйининг орқа томонидан дарча очиш оддий иш. Аммо азонни эшитиш мақсадида дарча ўрнатиш савобга сазовор қилар экан.

Энди охират амали бўлган, фарз ибодат - намозни олайлик. Агар инсон намозга риё учун, биров кўриши учун келадиган бўлса, ибодат қилаётган бўлса ҳам савоб олмайди. Чунки, у ибодатнинг савобини йўққа чиқарадиган риёга қўл урди.

Бошқа ибодатларда ҳам риё аралашса, уларнинг савобини еб битиради. Шунинг учун фарз амаллар олдидан ҳам, мубоҳ амаллар олдидан ҳам ниятни чиройли, тўғри қилиб олишга ҳаракат қилайлик!

Аллоҳ таоло барчамизга ниятларимизни гўзал ва тўғри қилишимизни насиб айлаб, ажру савобларимизни кўпайтириб берсин!

Нозимжон Иминжонов