Вашингтондаги бу мўъжазгина ресторан 2013 йилда ўз фаолиятини бошлаган бўлиб, АҚШдаги ёрдамга муҳтож, кам таъминланган, бошпанасиз инсонларга бепул мазали таомларни улашиб келмоқда. Ресторан покистонлик тадбиркорнинг онаси хотирасига Sakina Halal Grill деб номланган.

«Биз жаҳоннинг етакчи мамлакатимиз. Бироқ биз ўз фуқароларимизни ҳимоя қилишда ортда қоляпмиз. Бу жуда ҳам уятли ҳолат. Мен бу тамаддихонани қудратли давлатимизнинг дунёқарашини оз бўлса-да ўзгартириш мақсадида, катта умид билан очганман.

Ҳар куни кўплаб инсонларнинг бирор озуқа илинжида чиқинди қутиларини кавлаб юрганини кўриш менга жуда ҳам қаттиқ таъсир қилар эди. Чунки бу ҳол менинг эски хотираларимни ёдга соларди», - дейди ресторан асосчиси Кази Маннан.

Кази Покистондаги кичик қишлоқларнинг бирида туғилган бўлиб, болалигидан қашшоқлик ва очликни кўриб катта бўлади. Вояга етгач, унинг орзуси ушалиб, 1996 йилда Америкага йўл олади. Ҳозирда у ўзининг муваффақиятли бизнесини йўлга қўйган.

«Қашшоқлик - бу завқ эмас. Болалик чоғимда мен ҳар куни зиддиятли вазият, оғир кунларга дуч келар эдим», - дейди у.

Айни дамда Кази Маннан муҳтож инсонларга ҳар йили 16 мингдан зиёд бепул таомларни етказишни мақсад қилган. Унинг фикрича, у таомларга сарфлаётган пулига сира ачинмайди, аксинча, бу ишдан фақат кўнгли тўлади.

Маҳаллий аҳоли Казининг ташаббусидан жуда миннатдор.

«Бундай ҳол ҳар кимнинг бошига тушиши мумкин. Егулик топа олмай юрганимда мени қучоқ очиб кутиб олувчи ва мазали таомлар берувчи шундай ажойиб маскан борлигидан хурсандман», - дейди ресторан мижозларидан бири.

Ўзбекистон мусулмонлари идораси Матбуот хизмати

Нишонга урилган гаплар: “Жамиятни фасоддан тозалаш зинани тозалашга ўхшаб, юқоридан пастга қараб бўлади” 

Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.

Ким биродарига махфий тарзда насиҳат қилса, чиндан ҳам насиҳат қилган бўлади. Аммо ким биродарига ошкора насиҳат қилса, уни шарманда қилган бўлади.

Имом Шофеий раҳимаҳуллоҳ

*****

Чинакам эркакларнинг вафоси, садоқати дастурхон, зиёфат устида эмас, қийин дамларда билинади.

Муҳаммад Ғаззолий раҳимаҳуллоҳ

*****

Энг катта хатарлардан бири инсон ҳақ билан ботил ўртасидаги фарқни ҳис қилиш қобилиятини йўқотишидир.

“Тарих муҳрлаган сўзлар”

*****

Умр ўтгани сайин кўз хиралашиб, кўриш равшанлашиб боради.

“Тарих муҳрлаган сўзлар”

*****

Энг гўзал нафс турларидан бири ўртадаги келишмовчилик кучайган бўлишига қарамасдан ўзаро тақдим этилган яхшиликларни инкор қилмайдиган нафсдир.

“Тарих муҳрлаган сўзлар”

*****

Нонингни ўғирлашади. Кейин сенга ўшандан бир бурда беришади. Сўнгра сени шу “саховат”лари учун ташаккур айтишга мажбурлашади. Нақадар жирканчлик!

“Тарих муҳрлаган сўзлар”

*****

Ўзларини доим “Биз тўғри иш қиляпмиз” деб ўйлайдиган кишилар билан бирга яшашинг жуда қийиндир.

Доктор Али Шариатий

*****

Жамиятни фасоддан тозалаш зинани тозалашга ўхшаб, юқоридан пастга қараб бўлади.

Ли Куан Ю

*****

Одамларга ишонмасликнинг икки сабаби бор:

• Биз уларни танимаганимиз учун ишонмаймиз.
• Биз уларни таниганимиз учун ишонмаймиз.

“Тарих муҳрлаган сўзлар”

*****

Ватанлар урушдаги вайроналардан сўнг ўлмайди. Балки улар ўша ерда яшовчилардан баъзиларининг хиёнати туфайли ўлади.

“Тарих муҳрлаган сўзлар”

*****

Одамлар сен йўқ пайтингда сен ҳақингда қандай гапларни гапиришларини билмоқчи бўлсанг, сенинг олдингда бошқалар ҳақида қандай гапларни гапираётганларига қара.

“Тарих муҳрлаган сўзлар”

*****

Интернет материалларидан тўплаб, таржима қилувчи

Нозимжон Иминжонов

Танловга!     

Аллоҳ таолога ҳамд, пайғамбаримиз Муҳаммад соллаллоҳу алайҳи васаллам ва у зотнинг аҳли байтлари ва саҳобаларига саловоту саломлар бўлсин!

          Рамазон… Бу сўзни эшитганда қалбларга қувонч, кўнгилларга хушнудлик киради. Мўмин кишиларнинг қалбларини сакинат ўраб олади. Беихтиёр унинг хотирига хурсандчилик, шодлик дамлари келади. Ўтган раамазон ойининг шукуҳини эслайди. Ҳам жисмий ҳам ботиний кирликлардан тозаланишини ўйлаб хурсанд бўлади. Қандай қилиб ҳам бундай бўлмасин? Ахир бу ойда шайтонлар кишанланиб, Аллоҳ субҳанаҳу ва таолонинг биз гуноҳкор бандаларга раҳмат эшиклари очилиб, Аллоҳ таоло “Қани тавба қилувчи борми? Унинг тавбасини қабул қиламан. Қани дуо қилувчи борми? Унинг дуосини ижобат қиламан” деб бизларга Ўзининг раҳматини ва мағфиратини айнан мана шу ойда ёғдирадиган бўлса. Биздан фақат гуноҳлардан ҳақиқий тавба қилиб, Аллоҳ таолога ҳамдлар айтиб, Аллоҳ таолонинг буйруқларига холис амал қилиб, қайтариқларидан қайтиб, ўзимизни ислоҳ қилиб, ҳабибимиз Муҳаммад соллаллоҳу алайҳи васалламнинг манҳажларини маҳкам ушлаб, дунё ва охират саодатларини қўлга киритишимизгина қолмайдими? Рамазон ойи келди. Чин тавба қилиш вақти келмадимикан?

          Аслида тавба эшиклари ҳар доим очиқ. Модомики, жонимиз ҳалқумимизга тиқилмас экан ва қуёш мағрибдан чиқмас экан бизларнинг чин дилдан қилган тавбаларимиз қабул қилинади ин ша Аллоҳ. Лекин ҳозир Рамазон ойида турибмиз, бу ой тавба учун айни фурсат эмасми? Шубҳасиз бу ойда бошқа ойларга қараганда чин тавба қилишимиз осон бўлади. Чунки, биз бу ойда бошқа ойларга қараганда Роббимизнинг раҳматини кўпроқ ҳис қиламиз. Лекин бу гапдан тавба учун Рамазон ойини кутиш керак экан деган гап келиб чиқмайди. Жон Аллоҳ таолонинг омонати. Уни қачон хоҳласа ўша пайт олади. Шундай экан, бизга ҳозир Рамазон ойида турибмиз, бу ойни ғанимат билиб, тавба-тазарруга шошилишимиз лозим бўлади. Бекорга ҳабибимиз Расулуллоҳ соллаллоҳу алайҳи васаллам “Рамазонга етиб, мағфират қилинмаган кишининг бурни ерга ишқалсин, хор бўлсин!” демаганлар. Чунки Рамазонни ғанимат билмаган киши тавба қилмаган, мағфират сўрамаган бўладида. Биродарларим! Бундай бадбахт кишилардан бўлиб қолмайлик. Бу ойда гуноҳлардан тавба қилиб, бу ойдан чиққанимиздан кейин ҳам бу гуноҳларга қайтмайлик. Зероки, Рамазонда тавба қилмасак, қачон тавба қиламиз? Рамазонда Аллоҳга қайтмасак қачон Аллоҳга қайтамиз?

          Шу ўринда бир савол туғилади. Чин тавба қандай бўлади? Бу саволга Аллоҳ таолонинг Китоби Қуръони каримдан жавоб қидириб кўрайлик. Аллоҳ таоло шундай марҳамат қилади “Ва улар фоҳиша иш ёки ўзларига зулм қилган чоғларида Аллоҳни эслаб, гуноҳларини мағфират қилишини сўрайдилар, гуноҳларини Аллоҳдан ўзга ким ҳам мағфират қилади? Ва улар, билиб туриб, қилган гуноҳларида бардавом бўлмаслар”.

          Демак, оятдан келиб чиқадики, гуноҳда бардавом бўлинмаса, гуноҳни эътироф қилинса ва истиғфор айтиладиган бўлса, Аллоҳ таоло гуноҳларни кечирар экан. Чин тавба қандай бўлиши борасида уламоларимиз ҳам кўп гапларни айтганлар. Шулардан баъзиларини келтирамиз.

          Абдуллоҳ ибн Масъуд розияллоҳу анҳу шундай дейдилар “Ҳақиқий тавба, худди соғилган сут елинга қайтмаганидек, тавбадан кейин гуноҳларга қайтмасликдир”.

          Саид ибн Жубайр роҳимаҳуллоҳ айтадилар “Учта шарт бўлмаса тавба қабул бўлмайди:

1. Тавбани қабул бўлмай қолишидан қўрқиш
2. Тавбани қабул бўлишига умид қилиш
3. Тоат-ибодатда давомли бўлиш”.

Ҳасан Басрий роҳимаҳуллоҳ шундай дейдилар “Ҳақиқий тавба ўзи аввал яхши кўрган гуноҳидан нафратланиш. Гуноҳини эслаганда истиғфор айтишдир”.

Али ибн Ҳусайн роҳимаҳуллоҳ шундай дейдилар “Тавба амал билан ва гуноҳлардан қайтиш билан бўлади. Тавба шунчаки сўз билан бўлмайди”.

Шайх Шаъровий роҳимаҳуллоҳ ўзларининг “Тавба” китобларида қуйидаги лафзларни келтирадилар “Тавба қилган киши уч нарсани доим ёдда тутиши лозим бўлади:

1. Қилган гуноҳининг ниҳоятда қабиҳлигини
2. Аллоҳ таолонинг бу гуноҳга азоби қаттиқлигини ва Аллоҳ таолонинг бу гуноҳга бўлган азобига, У Зотнинг ғазабига банда тоқат қила олмаслигини
3. Ўзининг заифлигини ва тадбири озлигини”.

Имом Нававий роҳимаҳуллоҳ айтадилар “Ҳар битта гуноҳга тавба қилиш вожибдир. Агар гуноҳ банда ва Аллоҳ таоло ўртасида бўлиб, бу гуноҳга бошқа бир банданинг ҳаққи аралашмаган бўлса, тавбанинг учта шарти бор:

1. Қилган гуноҳидан батамом ажралиш
2. Қилган гуноҳига надомат қилиш
3. Гуноҳига абадул абад қайтмасликка азму-қарор қилиш”.

Имом Нававий роҳимаҳуллоҳнинг гапларидан келиб чиқадики, агар гуноҳга бошқа бир банданинг ҳаққи аралашган бўлса, тавба токи у бандани рози қилмагунча қабул бўлмайди. Шунинг учун бировнинг ҳаққига эъҳтиёт бўлиш керак. Яна шуни айтиб ўтиш керакки, тавбада яна бир дақиқ сир бор. Тавба фақат гуноҳ сабабидан қилинмайди. Қанчадан-қанча солиҳ инсонлар, Аллоҳ таолонинг авлиёлари бор, улар ҳар дамларида тавба билан, истиғфор билан машғуллар. Ҳаттоки, Пайғамбаримиз Муҳаммад соллаллоҳу алайҳи васаллам ҳам ҳар куни юз марта истиғфор айтганлари ҳадисларда ривоят қилинади. Бунинг сабаби эса, бу Аллоҳ таолога тавозуъ намунаси, ҳар доим Аллоҳ таолога муҳтож эканини эътироф этишдир. Бошқа жиҳатдан олиб қарайдиган бўлсак, инсонларнинг ҳеч қайси бири, Аллоҳ таолонинг берган мўл-кўл неъматларига шукр қилиб, адоғига етказа олмайди. Шунинг учун ҳам у тавба билан машғул бўлади.

Мана бу – гуноҳлар билан машғул бўлиб юрганидан сўнг, биз юқорида баён қилгандек чин тавба қилиб, солиҳ амалларда бардавом бўладиган кишиларнинг тавбасидир. Бу эса Аллоҳ таолонинг олдидаги улуғ даража ҳисобланади.

Азизлар! Мана чин тавба қандай бўлишни ҳам оз бўлсада билиб олдик. Рамазон ойларида турибмиз, бу ойни мана шундай тавбалар қилиш учун ғанимат билайлик. Салафи солиҳларимиз Рамазон ойи тугаса, бу ойдан ажралганлари учун йиғлар эканлар. Кўп нарсаларга улгурмай қолганларидан надомат чекар эканлар. Мана бу нарса ҳам уларнинг тавбаларига далолат қилади. Албатта бу уларнинг ўта солиҳ бўлганларидан ва қалблари тоза бўлганликларидандир. Биз ҳам ҳабибимиз Расулуллоҳ соллаллоҳу алайҳи васалламнинг суннатларига эргашиб, мана шундай солиҳ кишиларнинг йўлларини тутишимиз керак бўлади.

Аллоҳим бизларни солиҳ бандаларингни муваффақ қилган нарсаларга муваффақ қилгин. Бизларни тўғри йўлингга ҳидоят қилгин! Амийн.

Манбалар асосида “Кўкалдош” ўрта махсус ислом билим юртининг

4-курс талабаси Хушвақтов Абдулҳай тайёрлади.

Танловга! 

Рамазон хайр-барака ойидир. Чунки, бу ойда қилинган ҳар бир нафл ибодат учун фарз амалининг савоби, битта фарз амали учун эса, бошқа ойда қилинган етмишта фарз амалининг савоби берилади. Шунинг учун Мусулмонлар бу ойда Аллоҳ таолога ёқадиган ва уни рози қиладиган амалларга шошиладилар.

Қуйида бу ойда қилинадиган энг афзал амалларни санаб ўтамиз:

- Рўза тутишлик. Рўза тутишлик фақатгина еб-ичишдан тийилиш эмас, балки ҳар қандай маъсиятлар ва ёлғон, туҳмат ва ғийбат каби Аллоҳнинг ғазабини келтирадиган амаллардан ҳам узоқ бўлиш лозим.

- Қуръон тиловат қилиш. Бу ойда Қуръон тиловат қилиш Аллоҳ таолога энг маҳбуб ишлардандир.

- Намозларни кўпайтириш. Фарз бўлган 5 маҳал намоздан ташқари, суннат ва нафл ибодатларини ҳам кўпайтириш лозим. Хусусан,  жамоат билан ўқиладиган Таровеҳ намозларни ғанимат билиш керак.

- Силаи-раҳм қилиш. Яқинлар ва қариндошларни зиёрат қилиш. Чунки бундай амаллар кишилар ўртасида ўзаро муҳаббат ришталарини мустаҳкамлайди.

- Хайр-эҳсон қилиш. Бу ойда садақа қилиш – энг афзал ишлардан бўлиб, Аллоҳ таоло бу амални қилувчини Ўзи мукофотлайди. Шунингдек, Росулуллоҳ соллаллоҳу алайҳи васаллам бу ойда бошқа ойлардан кўра сахийроқ бўлар эдилар.

- Зикрларни кўпайтириш. Бу ойда қилинадиган зикр, тасбеҳ ва истиғфор учун кўп савоб берилади. Бундан ташқари, бундай амаллар ёмонлик эшикларини ёпиб, мағфират эшикларини очади ва қалбни хотиржам қилади. Ҳамда нафсни ҳаром ишлардан узоқ қилади.

- Закот бериш. Мусулмонлар бу ойда закотларини фақир ва мискинларга берадилар.

- Эътикоф ўтириш. Бу ойда мусулмонлар кўпроқ вақтларини масжидларда намоз ўқиш, Қуръон тиловат қилиш ва Аллоҳ таолони зикр қилиш билан ўтказишга ҳарис бўлишлари лозим. Асосан, Рамазоннинг охирги кунларида. Чунки, Росулуллоҳ соллаллоҳу алайҳи васаллам Рамазоннинг охирги ўн кунлигида эътикоф ўтирар эдилар.

- Лайлатул қадр кечасини бедор ўтказиш. Расулуллоҳ соллаллоҳу алайҳи васаллам саҳобаларини Лайлатул қадрни топишга ва уни бедор ўтказишга ундар эдилар. Чунки, Аллоҳ таоло бу куннинг қадрини бошқа кунларнинг мингтасидан афзал қилган.

- Қуёш чиққунича масжидда ўтириш. Бомдод намозидан сўнг то қуёш чиққунча масжидда ўтириш мустаҳаб амал ҳисобланади. Чунки, Росулуллоҳ соллаллоҳу алайҳи васаллам саҳобаларни шундай қилишга чақирар эдилар.

- Рамазон кунларида Умра зиёратини қилиш. Чунки, бу ойда қилинган Умра Ҳаж ибодатига тенглаштирилади.

Аллоҳ таоло барчамизни бу ойда шундай фазилатли амалларни бажаришга муваффақ айласин.

Тошкент Ислом институти талабаси

Муҳаммад Али Муҳйиддин

Танзания пойтахти Доруассаломдаги футбол стадионда бўлиб ўтган қорилар мусобақасини томоша қилиш учун қарийб 60 минг киши йиғилди. Бу ҳақда MSUMBA NEWSга таяниб Азон интернет нашри хабар берди.

Мусобақани кузатиш учун Танзания президенти Жон Помбе Магуфули ва турли мамлакатлардан нуфузли меҳмонлар келди. Мусобақада биринчи ўрин сенегаллик Муҳаммад Мужабага, иккинчилик Нигериядан келган Фаруқ Яқубга, учинчи ўрин эса танзаниялик Шамсиддин Ҳусайн Алига насиб этди. Барча совриндорларга пул мукофоти топширилди.

Қатнашчилар орасида ягона қория танзаниялик 12 ёшли Сумайя Абдуллоҳ бўлди. Махсус пул мукофотини унга Танзания президенти тақдим этган.

Маълумот учун, Танзанияда аҳолининг 60 фоизи насронийлардан, 36 фоизи мусулмонлардан иборат, қолган 4 фоиз аҳоли турли динларга эътиқод қилади.

Ўзбекистон мусулмонлари идораси Матбуот хизмати