Аввал хабар берганимиздек, бугун 25 август куни Ўзбекистон мусулмонлари идорасида Ички назорат комиссияси томонидан халқ орасида “Исоқжон домла” деб танилган Тошкент шаҳридаги “Имом Термизий” жоме масжиди имом-хатиби Исоқжон Бегматовнинг ижтимоий тармоқлардаги бир қатор чиқишлари кенг муҳокама қилинди.

Комиссия аъзолари томонидан имом-хатибнинг турли баҳс-мунозараларга сабаб бўлган ҳиссиётга берилиб қилган кескин чиқишлари, уламолар фатволарига нисбатан айрим тескари фикрлари, ихтилофли масалаларни кўтариши оқибатида, низо ва қарама-қаршиликларга сабаб бўлгани қаттиқ танқид остига олинди.

Ички назорат комиссияси аввал ҳам ушбу имом-хатибнинг мана шундай чиқишларини бир неча бор кўриб чиқиб, уни жиддий огоҳлантирган эди. Афсуски, бундай ҳолатлар яна такрорланишда давом этди.

Йиғилишда И.Бегматовнинг мазкур чиқишлари Ўзбекистон мусулмонлари идораси муносабатини мутлақо ифода этмаслиги, балки унинг ўзбилармонлик ила айтган шахсий фикр-мулоҳазалари экани таъкидланди.

И.Бегматов ижтимоий тармоқларда муҳокамага сабаб бўлган чиқишларида жиддий хатога йўл қўйганини эътироф этди ва пушаймонлигини билдирди.

Ички назорат комиссияси қарорига асосан имом-хатиб мазкур чиқишларида ушбу йўналишдаги буйруқлар талаблари, ички тартиб-қоидалари ҳамда меҳнат мажбуриятларига мунтазам равишда риоя этмагани учун Исоқжон Бегматов Тошкент шаҳридаги “Имом Термизий” жоме масжиди имом-хатиби вазифасидан озод этилди.

Маълумот ўрнида, Ўзбекистон мусулмонлари идорасида тузилган Ички назорат комиссияси диний соҳа ходимлари фаолиятини тартибга солиш, камчиликларга йўл қўйганларга таъсир чораларини қўллаш ва ҳалол-пок хизмат қилаётганларни рағбатлантириш каби ваколатларга эгадир.

Ўзбекистон мусулмонлари идораси Матбуот хизмати

Она қишлоғим Олақўйлиқ баҳаво, хушманзара ва обод маскан. Саришталик, тоза-озодалик унинг ҳар бир гўшасида кўзга ташланади. Қишлоқдошларимиз ободликни севади. Мисол учун, ҳудудимиздаги “Ғойиб ота” қабристони дарвозасидан кирар экансиз, истироҳат боғига келиб қолдимми, деган иккиланиш пайдо бўлади: боғу роғлар, гулзорлар, ишком арклар, сўри-супалар... Деворларга зарҳал ҳарфлар билан оят ва ҳадислар битилган. Мусофирлар учун ётоқхона, мини артезиан қудуқ мавжуд. Қабр қазиш пайтида тепаликдан топилган турли сопол идишлар, сопол қувурлар ва бошқа осори атиқалар алоҳида хонада сақланмоқда. Мактаб ўқувчилари учун ўлкашунослик музейининг айни ўзи.

Уч йил олдин қурилган “Олақўйлиқ” жоме масжиди барча талабларга жавоб беради. 50 ўринли таҳоратхона, мусофирхона, кутубхона, гардероб хонаси – намозхонлар учун қулайлик яратган. Масжиднинг ўзида 400 нафар ва ҳовлисида 800 нафар намозхон сиғими мавжуд. Энг муҳими, масжидимизда соғлом муҳит, меҳр-оқибат, иззат-ҳурмат ўрнида. Шу боис намозхонлар сафи кун сайин кенгайиб-ёшариб бормоқда.

Қишлоғимиз аҳолиси барча шароитга эга. Замонавий мактаб, болалар боғчалари, стадион, 3 та кичик ўйингоҳ, билярд ва стол тенниси, соғломлаштириш тренажёр хонаси, стоматология, 3 та қассобхона, 2 та дорихона, 3 та кафе, токарлик-пайвандлаш хонаси, Маданият уйи, тўйхона, 3 та супермаркет ва 3 та мини маркет, 3 та хўжалик дўкони, 2 та сартарошхона, гўзаллик салони, почта ва ҳоказолар. Қишлоғимиздан кўплаб ижодкорлар ва олимлар етишиб чиққан.

Юз ёш билан юзлашаётган кексаларимиз – Абдували бобо, Жўрақул бобо, Эргаш бобо, Қурбон бобо, Ҳаким бобо, Мунаввар буви, Рўзихол буви, Фаина аяларнинг ҳаёт йўллари барчамизга ибрат. Уларнинг дуолари, панд-насиҳатлари ёшларимизни яхшиликка, диёнатга, ҳақгўйликка ўргатмоқда.

Ражаб ИБРОҲИМОВ,

Китоб тумани

Бир подшоҳнинг вазири бўлиб, у ҳар бир ишда Аллоҳга таваккул қилар, қандай ҳодиса содир бўлса ҳам, “Худо хоҳласа, яхшиликка”, дер эди.

Кунларнинг бирида подшоҳ бармоғини кесиб олди. Табиийки, қон оқди. Вазир буни кўриб: “Худо хоҳласа, яхшиликка”, деди. Вазирнинг сўзидан ғазабланган подшоҳ: “Қўлим кесилиб қон оқса-ю, қанақасига яхшиликка?” деди-да, соқчиларига: “Вазирни зиндонга ташланг”, деб буйруқ берди. Вазир эса одатдагидек: “Худо хоҳласа, яхшиликка”, деганча зиндонга қараб йўл олди.

Подшоҳнинг ҳар жума ўрмонга ов қилгани чиқадиган одати бор эди. Одатига кўра, жума куни овга чиқди ва бир ҳайвоннинг ортидан қувиб кетаркан, навкарларидан ажралиб, ўрмонда адашиб қолди. Ўрмонда эса бутга ибодат қиладиган қабила бўлиб, ўша куни уларнинг қурбонлик қиладиган куни экан. Шу сабаб, қабила сардори қўл остидагиларга учраган биринчи жонзотни қурбонлик учун тутиб келишни ҳамда унинг шикастланган, нуқсонли жойи бўлмаслигини тайинлаганди.

Тасодифни қаранг, подшоҳ уларнинг қўлига тушиб қолди. Қурбонлик майдонига келтириб қарашса, подшоҳнинг бир бармоғи кесилган. “Бармоғи кесилганни қурбонлик қилиб бўлмайди”, дея қабила сардори подшоҳни қўйиб юборди. Подшоҳ саройга келиши билан вазирни зиндондан озод қилди.

Подшоҳ узр сўраб: “Бармоғимнинг кесилгани сен айтгандай яхшиликка бўлди. Бироқ сени зиндонга ташлашни буюрган вақтимда ҳам “Худо хоҳласа, яхшиликка” деган гапингнинг маъноси нима эди?” дея сўради.

Вазир: “Мен вазирингизман, сиз билан доим биргаман, агар мени зиндонга ташламаганингизда, сиз билан доимгидек ўрмонга борган бўлардим ва улар бизни тутиб олгач ҳеч қаерим кесилмаганини кўриб, мени қурбонликка танлашар эди. Шунинг учун зиндонбанд бўлишим мен учун яхшиликка бўлди”, дея жавоб берди.

Қиссадан ҳисса, Аллоҳнинг ҳар бир ишида ҳикмат, яхшилик бор. Биз ҳаётимизда учраётган ҳодисалардан доимо яхшилик умид қилиб яшашга одатлансак, барча муаммоларимизга хайрли ечим топган бўламиз, иншоаллоҳ.

Жалолиддин МАМАТҚУЛОВ,

Учкўприк тумани “Шоҳ Муқаддам” масжиди имом-хатиби