muslim.uz
Муфтий ҳазратнинг Бухоро вилоятига ташрифлари бошланди
Бугун 28 март куни Ўзбекистон мусулмонлари идораси раиси, муфтий Усмонхон Алимов ҳазратларининг Бухоро вилоятига сафарлари бошланди. Аввал Когон туманида жойлашган "Баҳоуддин Нақшбанд" зиёратгоҳига ташриф буюрдилар. Қуръони карим оятлари тиловат қилиниб, савоби Ҳазрати Баҳоуддин Нақшбанд руҳи покларига бахшида этилди.
Ташриф давомида, зиёратгоҳ бошқаруви, ходимлар фаолияти, олиб борилаётган амалий ишлар, биноларнинг ҳолатини кўздан кечириб, амалга оширилган ишлар билан танишдилар.
Бухоро вилояти бош имом-хатиби Жобир Элов, "Баҳоуддин Нақшбанд" жоме масжиди имом-хатиби Абдуғофур Раззақов ва Мир Араб олий мадрасаси мудири Ҳайдархон Юлдашходжаевга муфтий ҳазратлари иш фаолиятни янада такомиллаштириш бўйича ўз тавсияларини бердилар. Зиёратгоҳдаги ободонлаштириш ишларини кўздан кечириб, бу ерда хизмат қилган барча ҳамкор ташкилотлар ва саховатпеша инсонларнинг ҳақларига дуо қилдилар. Келгусида зиёратгоҳни янада ободонлаштириш, халқимизнинг манфаати учун хизмат қилувчи масканга айлантириш бўйича фикр-мулоҳазалар билдирилди.
Муфтий ҳазратнинг Бухоро вилояти сафари давом этмоқда.
Ўзбекистон мусулмонлари идораси Матбуот хизмати
“MAN Auto-Uzbekistan” автозаводига уламолар ташриф буюрди
Ўтган куни Самарқанд вилоятидаги “Маҳмуд аз-Замахшарий ва унинг ал-Кашшоф асари” мавзусидаги илмий-амалий семинар доирасида муфтий ҳазратлари бошчиликларида таниқли уламолар, бош имом-хатиблар, тажрибали имом-хатиблар ва мадрасалар мудирлари Жомбой туманида жойлашган “MAN Auto-Uzbekistan” юк автомашиналарини ишлаб чиқувчи завод фаолияти билан яқиндан танишдилар.
Ушбу ташриф чоғида ўзбек-герман қўшма корхонаси фаолияти билан яқиндан танишишди ҳамда ушбу заводда ишлаб чиқарилаётган техника намуналарини кўришди. Танишув жараёнида меҳмонлар қўшма корхонада замонавий технологиялар асосида ишлаб чиқарилаётган замонавий автобуслар, юк автомобиллари ва махсус автотранспорт воситларини кўздан кечиришди. Транспорт воситаларининг техник имкониятлари ҳақида маълумотларга эга бўлишди. Ҳар томонлама қулай, замонавий автотранспорт воситалари меҳмонларда катта қизиқиш уйғотди.
Ташриф давомида меҳмонлар Самарқанд вилояти Пайариқ туманидаги намунавий шаклда ободонлаштирилган “Чоштепа” қабристонини ҳам зиёрат қилдилар.
Ҳазрати Пайғамбаримиз соллаллоҳу алайҳи ва салламдан ривоят қилинган ҳадисларда қабрларни бир-биридан фарқ қилмаган ҳолда бир текис бўлиши, яъни бири баланд, бири паст, бири ҳашамдор, бири қаровсиз бўлиши дуруст эмаслиги баён қилинган. Ислом дини манбаларида қабр ердан бироз кўтарилиши, қор ва ёмғирларда ювилиб, чўкиб кетмаслиги учун сомон аралаштирилган лой билан суваб туриш жоизлиги айтилган.
Муҳтарам Президентимизнинг қабристонларни обод қилиш ва қабрларни оддий бўлишига эътибор қаратиш борасидаги тавсияларидан келиб чиқиб, республикамизда жойлашган мозорларни имкон қадар юқорида қайд этилган шаклда қилиш борасида амалий ишлар олиб борилмоқда.
Шу билан илмий-амалий семинар доирасидаги тадбирлар якунлади.
Ўзбекистон мусулмонлари идораси Матбуот хизмати
Нишонга урилган гаплар: “Бирорта одам “Бахтлимисан?” деб сўрамайди”
Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Агар ўғрилар кўчаларда бемалол юраётган бўлса, бунинг икки сабаби бор:
Ё низомнинг ўзи ўғриликка имкон беради;
Ёки халқ ўта бепарводир.
Ли Куан Ю
*****
Донишманд Ойга ишора қилса, жоҳил бармоққа қарайди.
“Тарих муҳрлаган сўзлар”
*****
Аёлнинг ҳуррияти, озодлиги дегани либослардан озодлик дегани эмас! Балки фикрлаш, танлаш борасидаги ҳурриятдир.
Доктор Али Шариатий
*****
Диплом – сенинг таълим олганингни тасдиқловчи қоғоздир, ўқиганларингни англаганингни эмас.
“Тарих муҳрлаган сўзлар”
*****
Зироат, деҳқончилик очликдан тўсади. Саноат эҳтиёжларни қондиради. Лекин таълим уруғ экиб, ундан Ватан деган нарсани ундириб-ўстиради.
Жалол Омир
*****
Соғлом фақир одам бемор подшоҳдан кўра бахтлироқдир.
“Тарих муҳрлаган сўзлар”
*****
Ҳар сафар бирор таниш одамим билан кўришиб қолсам, “Қаерда ишлаяпсан?”, “Уйландингми?”, “Уйинг борми?” каби саволларни беради. Аммо бирорта одам “Бахтлимисан?” деб сўрамайди.
“Тарих муҳрлаган сўзлар”
*****
Урушишга пуллари бор. Аммо улар фақирларга таом беролмайдилар.
“Тарих муҳрлаган сўзлар”
*****
Интернет материалларидан тўплаб, таржима қилувчи
Нозимжон Иминжонов
Деҳқончилик – пайғамбарлар суннати
Баҳор зироат соҳиблари деҳқонларнинг фаслидир. Деҳқончилик улуғ ва фазилатли амаллардан бири ҳисобланади. Муқаддас динимизда бу касб соҳибларига алоҳида эътибор берилади. Деҳқончилик қилиш билан инсон кўп фазилатларга эга бўлади.
Деҳқончилик Одам (алайҳиссалом)нинг суннатидир. Пайғамбарлар тирикчилик учун касб-кор билан шуғулланишган. Одам (алайҳиссалом) ерни ҳайдаб, буғдой эккан. Ерни суғориб, ҳосил етиштирган. Буғдой туйиб, хамир қориган. Деҳқончилик ва чорвачилик билан шуғулланадиганлар учун Одам (алайҳиссалом)нинг сийратларида гўзал намуна бор.
Инсон дунёда меҳнат билан улуғ мартабаларга эришади. Меҳнат сабабли юксак чўққиларга етади. Касб сабабли дунёда бахтли бўлади. Деҳқончилик ҳам улуғ касблардан ҳисобланади. Абул Ҳасан Мовардий “Дунё ва дин одоби” китобида: “Касбларнинг асл устуни уч нарсага боғлиқ. Улар зироат, тижорат ва саноатдир. Менимча, деҳқончилик касбларнинг энг покизаси ва афзалидир”, деган. Мусулмон учун ҳалол луқма топиш учун сарфлаган вақти ибодат ҳисобланади. Демак, инсон деҳқончилик билан шуғулланса улуғ ибодатни бажарган ҳисобланади. Чунки деҳқонни иссиқ кунларда ҳалол касб қилиш учун далада меҳнат қилиши улкан жасоратдир. Ҳалол ризқ талабида касб қилиши еса унинг азизлигини зиёда қилади.
Деҳқон олий сифатлар соҳибидир. Жумладан, унинг имони мустаҳкам, қалби доимо Аллоҳга боғланган ва Раббига таваккули кучли бўлади. Уруғни ерга экиб, қолганини Аллоҳга топширади. Мўтадил обҳаво, ёмғир ва ҳосилни баракали бўлишини сўраб, Аллоҳ таолога дуо қилади. Деҳқон Аллоҳ таоло уруғни қандай ундириб, ўстирётганига гувоҳ бўлади. Шунинг учун, Раббининг қудратини қалбидан ҳис қилади. Бу борада Қуръони каримда бундай марҳамат қилинади: “Сизлар экаётган зироатларингизни (ўйлаб) кўрдингизми?!. Уни сизлар ундирурмисиз ёки Биз ундирувчимизми?!” (Воқеа сураси, 63-64 оятлар). Бошқа оятда бундай дейилади: “У (Аллоҳ) шундай зотки, (сўритокларга) кўтариб қўйиладиган ва кўтариб қўйилмайдиган (узумзор) боғларни, таъми турлича (бўлган) хурмо ва мевали дарахтларни, (ранг ва таъмда) ўхшаш ва ўхшамас зайтун ва анорларни пайдо қилди. Мева ҳосил қилганда, мевасидан тановул қилингиз! Ҳосил йиғиш кунида (муҳтожларга) ҳаққини (ушри ва хирожини) берингиз ва исроф қилмангиз! Албатта, У исроф қилувчиларни севмайди” (Анъом сураси, 141-оят).
Экин экиш савобли иш. Мўмин яхши ният билан кўчат экса улуғ ажр-савобга эга бўлади. Жобир (розияллоҳу анҳу)дан ривоят қилинади: “Расулуллоҳ (соллаллоҳу алайҳи ва саллам): “Қайси мусулмон экин экса, ундан ейилса унга садақа бўлади. Ўғирлангани ҳам унинг учун садақадир. Йиртқичлар егани ҳам унинг учун садақадир. Қушлар егани ҳам унинг учун садақадир. Ўша экиндан бирортаси манфаат олса унинг учун садақа бўлади”, дедилар” (Имом Муслим ривояти). Ҳадисдан кўчат экиш, деҳқончилик қилиш нечоғлик улуғ ва фазилатлик касб экани маълум бўлади. Кўчат экмоқчи бўлган киши нафақат ўзини, балки, ён атрофдагилар, келажак авлодларни ҳам манфаатини ўйлаши керак. Бу амалнинг деҳқонга нафақат тириклигида, балки, вафотидан сўнг ҳам манфаати етиб туради.
Расулуллоҳ (соллаллоҳу алайҳи ва саллам) умматларини кўчат ўтказиш ва экин экишга тарғиб қилганлар. Анас ибн Молик (розияллоҳи анҳу)дан ривоят қилинади: “Расулуллоҳ (соллаллоҳу алайҳи ва саллам): “Агар қиёмат бўлиб қолса ва биронтангизнинг қўлида хурмо дарахти бўлса, уни экиб қўйсин”, дедилар (Имом Аҳмад ривояти).
Деҳқон умид билан ерга эруғ қадайди, баъзилар эса кўчат ўтказишади. Униб чиққан уруғ ва барг ёзган ниҳол то қуриб қолгунча Аллоҳ таолога тасбеҳ айтади. Буларни етиштирганлар ҳам айтилган тасбеҳнинг савобига эга бўлишади. Қуръони каримда бундай марҳамат қилинади: “Етти осмон, Ер ва улардаги бор жонзот Унга тасбеҳ айтур. Мавжуд бўлган барча нарса ҳамд билан Унга тасбеҳ айтур. Лекин сизлар уларнинг тасбеҳларини англамайсиз. Дарҳақиқат, У ҳалим ва кечиримли зотдир” (Исро сураси, 44-оят). Биринчи жумладаги “жонзот”дан мурод Ер ва осмондаги инсонлар, фаришталар, жинлар. Кейинги жумладаги тасбеҳ айтадиган нарсалардан мурод жонли ёки жонсиз нарсалар эканида ихтилоф бор. Дарахтлар, гиёҳлар, сув, кийим, таом, ҳайвонлар, қушлар ҳам “Субҳоналлоҳи ва биҳамдиҳ” деб тасбеҳ айтар экан. Жонсиз нарсаларнинг гапириши ва тасбеҳ айтиши тўғрисида ҳадисларда айтилган. Суддий (раҳматуллоҳи алайҳ)нинг сўзига кўра, ҳар бир нарса асл ҳолида турганда тасбеҳ айтади, бошқа нарсага айлангач, тасбеҳдан тўхтайди. Масалан, дарахт шохлари тасбеҳ айтади, улардан кесиб олиб буюм ясалгач,
Деҳқончилик билан шуғулланиб, ҳалол меҳнат қилган, ҳалол ризқ топган, ўзи ва бошқаларнинг манфаати учун кўчат ўтказган инсон ажру мукофотга эришади. Кўчат ўтказиш нақадар улуғ иш. Буни дунёда қилинган солиҳ амал учун жаннатда мукофат сифатида бир дарахт экилишидан ҳам билиш мумкин. Жобир (розияллоҳу анҳу)дан ривоят қилинади: “Расулуллоҳ (соллаллоҳу алайҳи ва саллам): “Ким: “Субҳаналлоҳи ва биҳамдиҳи (Аллоҳ таолони барча айбу нуқсонлардан поклайман, ҳамд Унгагина хосдир)”, деса у учун жаннатда бир хурмо кўчати экилади”, дедилар” (Имом Термизий ривояти). Бошқа ҳадисда Расулуллоҳ (соллаллоҳу алайҳи ва саллам) бундай деганлар: “Исро кечаси Иброҳим (алайҳиссалом) билан кўришдим. У менга: "Эй Муҳаммад (соллаллҳу алайҳи ва саллам), умматингга мендан салом йўлла. Уларга хабар бер: “Жаннатнинг тупроғи хушбўй, суви шириндир. У бир текислик бўлиб, унга кўчат ўтқазиш учун: “Субҳоналлоҳи вал ҳамдулиллаҳи ва лаа илаҳа иллаллоҳу валлоҳу акбар (Аллоҳ таолони барча айбу нуқсондан поклайман, ҳамд Унгагина хосдир. Аллоҳдан ўзга илоҳ йўқ. Аллоҳ буюк Зотдир)”, дейиш керак”, деди” (Имом Термизий ривояти).
Обиджон МИРҲАМИДОВ,
Қибрай туманидаги “Саъдулла ота”
жаме масжиди имом-хатиби