Меҳр-мурувват ва хайру саховат ойи, бирдамлик, олижаноблик ва шукроналик тимсоли бўлган Рамазон ойида эзгу ишлар кўлами янада кенгаяди. Кексалар, беморлар, боқувчисини йўқотган инсонлар, ота-она меҳридан бебаҳра қолганлар ҳолидан хабар олиш ҳар биримизнинг инсонийлик бурчимиздир.

Айни кунларда Наманган вилоятидаги 190 дан зиёд жомеъ масжидларда юртимиздаги тинчлик ва фаровонлик шарофатидан таровеҳ намози ва хатми Қуръон эмин-эркин адо этилмоқда. Кўплаб масканларда ифторлик дастурхони ёзилиб, халқимизга осойишталик, файзу барака тилаб дуолар қилинмоқда.

Жумладан, Поп туманида Ўзбекистон Мусулмонлари идораси вилоят вакиллиги ташаббуси билан туман ҳокимлиги ва туман “Инсон” ижтимоий хизматлар маркази ҳамкорлигида 300 нафар кам таъминланган, ижтимоий ҳимояга мухтож, ногиронлиги бўлган шахсларга ифторлик дастурхони ёзилди. Дуога қўл очганлар юртимизда тинчликик-омонлик бардавом бўлишини сўрадилар. Ижтимоий дафтарларга киритилган кишиларга эсдалик совғалари, озиқ-овқат маҳсулотлари топширилди.

Қайд этиш жоиз, вилоятдаги имом-хатиблар, маҳаллий ҳокимликлар мутасаддилари, ҳомий ташкилотлар раҳбарлари, маҳаллалар фаоллари иштирокида жойларда инсон қадрини улуғлаш мақсадида муҳтож инсонларни йўқлов тадбирлари мунтазам равишда уюштириб келинмоқда. Муқаддас динимизнинг инсонпарварлик руҳи билан йўғрилган эзгу анъанларини муносиб давом эттиришга қаратилаётган бу эътибор юртдошларимиз томонидан мамнуният ила қарши олинмоқда.

Наманган шаҳридаги “Яҳёхон тўра” жомеъ масжиди Диёр ва Байналмилал маҳаллалари аҳолисига хизмат кўрсатади. Масжид фаоллари маҳаллалар масъуллари билан биргаликда бир қатор йўқлов тадбирларини ташкил этди.

Латифа Абдуғаниева Андижон кўчасида истиқомат қилади. Турмуш ўртоғи вафот этгач ёлғизланиб қолди. Қизини турмушга узатгач эса маҳалладошлари кўмагига суюнган онахон бу йўқловдан боши осмонга етди. Яна бир фуқаро Улуғбек Файзиев эса қўли гул уста эди. Хасталик сабабли бир йил аввал ётиб қолган бу бемор ҳам маҳалладошларининг кўнгил сўраганидан хурсанд. Зафар кўчасининг нуронийларидан бири Ҳалимахон Абдуллаева бу йил табаррук 83 ёшни қарши олди. Тақдир тақозосига кўра, ҳозир якка ўзи истиқомат қилаётган онахондан маҳалладошлар тез-тез хабар олиб туришади.  

Вилоятдаги масжидлар имом-хатиблари бошчилигида ҳамкор ташкилотлар, шунингдек, жойлардаги “Инсон” ижтимоий хизматлар марказининг маҳаллалардаги ходимлари билан биргаликда “Рамазон – меҳр-мурувват, хайру саховат ойи” шиори остидаги йўқлов тадбирлари давом этмоқда. Қолаверса, диний соҳа ходимлари хонадонларга бориб, ифторлик тадбирини ўтказмоқда.  

– Диёримизда ойларнинг султони, меҳр-шафқат рамзи бўлган, фазилати жиҳатидан бошқа ойлардан улуғ бўлган моҳи Рамазон уфуриб турибди. Рамазони шариф яхши амалларда мўминлар бир-бирлари билан мусобақалашадиган ойдир, – дейди “Яҳёхон тўра” жомеъ масжиди имом-хатиби Нуруллоҳ Жамолов. – Пайғабаримиз Муҳаммад алайҳиссалом “Кимки Рамазонда иймон билан савоб умидида рўзасини тутар экан, унинг ўтган гуноҳлари кечирилади”, дедилар. Зеро, бугунги қилинаётган хайрли ишлар ўксик кишиларнинг дилларига ҳузур, лабларига табассум улашиш, албатта. Бу “Инсон қадри учун” тамойилининг амалдаги кўринишидир.  

Оқилхон Дадабоев,  

ЎзА мухбири

Ёшлик пайтларимизда катта бувим оила аъзоларимизни доимо эрта туришга, хонадонларни озода ва покиза сақлашимизга тарғиб қилар эдилар. Мурғак чоғларимданоқ қулоғимга сингиб қолган сўзлари шу эди: “Эрта турган кишини, худо ўнглар ишини”.

Ҳаттоки, баъзи оилалар ҳақида фикр сўралганда: “У хонадоннинг аёли, эрта туради. Аллохдан яхшиликларни сўрайди.  Шунинг учун унинг хонадони тартибли ва барокатли”, дердилар.

Йиллар мобайнида хизмат юзасидан кўплаб хонадонларга кирига тўғри келди. Баъзиларини кўриб ибрат олсак, яна бошқаларини тинглаб ислоҳ қилишга, муросага келтириб, яраштиришга ҳаракат қиламиз. Бу билан кимнидир айбини айтиш, ошкор қилиш эмас, балки ён атрофимизда учраётган бу иллат, хонадонлардан файз-баракотни кеткизаётгани, оилаларни бузилиб кетишига сабаб бўлаётганига жамоатчилик эътиборини қаратиш холос.

Қайноналардан бири билан бўлиб ўтган суҳбатдан иқтибос келтирсам:

— Келин туширганимга ўн икки йилдан ошди. Аввалида келинимни уйқуни яхши кўришини ёшлигига, кейинчалик ҳомиладорлигига йўйдим. Яхши гапириб тушунтирдим. Ўғлим азонда хизматга кетади. Эр-хотин ўртасидаги кўп жанжаллар аёлини эрта турмаслиги сабаб доимий гап эшитишидан содир бўлади. Минг афсус, ёшлигидан одат бўлмагани учун шунча йил ўтса ҳам, эрта туришга ўрганолмади. Қиз ўстираётган аёллар фарзандларига эрта туришни ўргатишсин. Сиз шуни аёлларга етказинг, — дея илтимос қилди.

Дарҳақиқат, динимиз ҳам эрта турган кишининг руҳи тетик ва ишлари баракали бўлишини таъкидлайди. Айниқса, бу борада Расулимиз соллаллоҳу алайҳи васаллам барчага ибрат эдилар.  Оиша розияллоҳу анҳо Расулуллоҳ соллаллоҳу алайҳи васалламдан ривоят қилади: “Барвақт туриб ризқларингизни талаб қилинглар. Зеро, куннинг аввали барака ва нажот вақтидир” (Имом Баззор ва Табароний ривояти).

Фотима бинту Муҳаммад розияллоҳу анҳодан ривоят қилинади: “Мен субҳ пайтида ухлаб ётган эдим. Шунда Расулуллоҳ соллаллоҳу алайҳи васаллам менинг олдимдан ўтиб қолдилар ва оёқлари билан мени турғазиб: “Эй қизим тур, Роббингнинг ризқ тақсимлашига шоҳид бўл ва зинҳор ғофиллардан бўлма! Зеро, Аллоҳ таоло тонг отгандан қуёш чиққунгача бўлган вақт ичида одамларнинг ризқларини тақсимлайди”, дедилар.

Пайғамбаримиз алайҳиссалом барвақт ризқ талаб қилишга ундаб тонг пайтида ғафлат ҳолидан чиқариш мақсадида ўз умматлари ҳаққига  хайр ва барака сўраб дуо қилганлар. У Зот алайҳиссалом: “Аллоҳим, умматимнинг барвақт қилган ишларини баракали қилгин”, дея сўраганлар.

Минг афсуски,  кўпчилик аёл ва қизларимиз олтинга тенг вақтларини беҳудага сарфлаб, ярим кечасигача ижтимоий тармоқларда кимнидир ҳаётини кузатиш, маъносиз сериалларни томоша қилиш билан банд. Тиббиёт ва руҳиятшунос олимлар ҳам эрта ётиб эрта туриш инсон соғлиги руҳияти учун катта фойда бериши ҳақида айтишмоқда. Азал-азалдан эрта туриш диний ва миллий қадрият сифатида авлоддан-авлодга ўтиб келаётган энг гўзал одатларимиздан биридир. Хонадон бошлиқлари ота-оналар, бу борада фарзандларига ўрнак бўлишса, бу суннатга эргашувчилар кўпайса, оилаларимиз файзли ва ҳаётимиз баракали бўлади, инша Аллоҳ!

Ҳилолахон КОМИЛОВА,
Фарғона вилояти бош имом-хатибининг
хотин-қизлар масалалари бўйича ёрдамчиси,
вилоят бош отинойиси

Куни кеча муҳтарам Президентимиз Шавкат Мирзиёев Наманган вилоятига ташрифлари чоғида бутун мамлакатимиз бўйлаб ўтказилган ифторликда иштирок этиб, юртимиз мўмин-мусулмонларини Рамазон ойи билан яна бир бор табрикладилар.

Давлатимиз раҳбари: “Бугун барчамиз – муҳтарам уламоларимиз ва нуронийларимиз, жамоатчилигимиз вакиллари биргаликда ифтор қилмоқдамиз. Ягона, аҳил оила бўлиб яшаётган кўп миллатли Ўзбекистон халқи бугун гўёки бир дастурхон атрофида жам бўлиб ўтирибди. Ўйлайманки, бу савобли тадбир инсон қадрини улуғлашга, ўсиб келаётган ёшларимизни мана шундай олижаноб руҳда тарбиялашга хизмат қилади”, – дея таъкидладилар.

Тошкент вилояти туманлар/шаҳарлар бош имом-хатиблари, домлалар, нуроний отахонлар, маҳалла фаоллари билан биргаликда биз ҳам Қибрай туманида ташкил этилган ифторлик дастурхонида иштирок этдик.

Рамазон файзли, баракотли ой бўлиши баробарида кўп-кўп хайр-эҳсон қилинадиган, кам таъминланган, эҳтиёжманд, боқувчисини йўқотган оилалар ҳолидан хабар олиш, ўзгалар кўмагига муҳтож инсонлардан кўнгил сўраш, бир сўз билан айтганда, меҳр-оқибат, мурувват, саховат мавсумидир.

Салмон Форсий розияллоҳу анҳудан ривоят қилинади: «Расулуллоҳ соллаллоҳу алайҳи ва саллам шаъбон ойининг охирги куни бизга хутба қилиб: “Эй инсонлар улуғ ой, муборак ой, минг ойдан яхши кечаси бор ой сизларга яқин келиб турибди. Аллоҳ унинг рўзасини фарз, тунги бедорлигини нафл қилди. Ким бу ойда яхши амал билан қурбат ҳосил қилса, бошқа (ой)да бир фарзни адо қилган каби бўлади. Ким унда бир фарзни адо қилса, бошқа (ой)да етмишта фарзни адо қилган каби бўлади. У сабр ойидир. Сабрнинг ажри жаннатдир. У кўнгил сўраш ва мўминнинг ризқи зиёда қилинадиган ойдир. Ким унда бирор рўзадорга ифторлик қилиб берса, гуноҳлари мағфират бўлиб, дўзахдан озод қилинади. Рўзадорнинг ажридан бирор нарса камайтирилмай, шу ажр мислича унга (ифторлик қилиб берувчига) бўлади”, дедилар. Шунда саҳобалар: “Эй Аллоҳнинг расули! Ҳаммамиз ҳам рўзадорни ифторлантирадиган нарса топа олмайди”, дедилар. Шунда Расулуллоҳ соллаллоҳу алайҳи ва саллам: “Аллоҳ ушбу савобни сув қўшилган сут ёки хурмо ёки бир қултум сув билан рўзадорни ифторлантирган кишига ҳам беради. Ким рўзадорни тўйдирса, Аллоҳ уни менинг ҳавзимдан бир қултум сув билан суғоради ва у жаннатга киргунча чанқамайди. У – аввали раҳмат, ўртаси мағфират, охири дўзахдан озод қилиш ойидир. Ким у ойда қули (қўл остидагилари)нинг ишларини енгиллатса, Аллоҳ уни мағфират қилади ва дўзахдан озод қилади”, дедилар» (Имом Байҳақий ривояти).

Ана шу ҳадис ҳам Рамазоннинг улуғ ой эканини очиқ-ойдин баён қилган. Зайд ибн Холид Жуҳаний розияллоҳу анҳудан ривоят қилган бошқа бир ҳадисда Набий соллаллоҳу алайҳи ва саллам: “Ким рўзадорни ифтор қилдирса, унга унинг ажрича ажр бўлур. Шу билан бирга, рўзадорнинг ажридан ҳеч бир нарса кам бўлмас”, дедилар (Имом Термизий ва Аҳмад ривояти).

Давлатимиз Раҳбари ифторликда: “Чиндан ҳам, халқимиз азал-азалдан бир-бирига таянч бўлиб, меҳр-мурувват кўрсатиб яшашни одамийликнинг олий мезони деб билади. Айни шу олижаноб фазилатлар бизларни доимо ягона халқ, ягона миллат этиб бирлаштиради, ҳаёт синовлари ва қийинчиликларини енгиб ўтишда беқиёс куч-қувват беради”, деган сўзлари биз – имом-хатибларни ҳам тўлқинлантириб юборди.

Вилоятимиз туман ва шаҳарлари бош имомлари, ноиблар ҳомийлар ва саховатпеша инсонларни жалб қилган ҳолда ҳар куни кам таъминланган, эҳтиёжманд, боқувчисини йўқотган оилалар, жисмоний имконияти чекланган фуқаролар ҳолидан хабар олиб, уларга зарур озиқ-овқат маҳсулотлари етказиб бериляпти.

Амалга оширилаётган бундай хайрли ишларимиз бошқаларни ҳам эзгуликка чорласин деган мақсадда ҳар куни вакилликнинг телеграм каналига суратлари билан жойлаб бориляпти.

 Мухтасар айтганда, куни кеча бутун республикамиз бўйлаб ташкил этилган ифторликлар нуронийларимизни, имомларимизни, маҳалла фаолларини бир дастурхон атрофида жипслаштиргани сингари барчамизни ягона мақсад – Ватан равнақи, халқимиз маънавиятини янада юксалтириш, шу эл, шу юрт учун хизмат қилишда янада ҳамжиҳат ишлашга чорлайди.

Аллоҳ таоло ифторликларни даргоҳида қабул қилсин. Савобларини кўпайтириб берсин. Бу хайрли ишларнинг бошида турган азиз инсонлардан Ўзи рози бўлсин.

Жасурбек домла РАУПОВ,

Тошкент вилояти бош имом-хатиби

Иномжон домла Тўйчиев

Фарғона вилояти Тошлоқ тумани бош имом-хатиби

Наманган вилоятида фаолият кўрсатаётган имом-хатиблар жойлардаги кам таъминланган ва эҳтиёжманд оилалар ҳамда ногиронлиги бор шахслар ҳолидан хабар олиб, уларнинг кўнгилларини кўтариб шодлик улашмоқдалар.

Бугун, манашундай саховат тадбирларидан бири Наманган шаҳрида ўтказилди. Унда эшитиш ва гапиришда имконияти чекланган фуқароларнинг бир гуруҳига Рамазон ҳадяларни улашилди.

Ўзбекистон мусулмонлари идораси Наманган вилояти вакиллиги Матбуот хизмати