Тараққиёт инсон учун хизмат қилади, унинг ҳаётини енгиллаштириш учун қулай шароитлар яратади. Аммо, тараққиётдан тўғри фойдалана олмаслик охири... инсонни зериктира бошлайди. Натижада, афсуски, инсоний зеҳн-заковат хиралаша бошлайди. 

Бугун дунёнинг турли бурчакларида одамлар замонавийлик, эркинлик, “демократия” номи остида янгидан-янги бемаъниликларни ўйлаб топмоқда. Масалан, бир жинсли “никоҳ”ларни қонунийлаштириш, оммавий равишда шир ялонғочлар намойишларини ўтказиш, бузуқчилик ва фоҳишалик бўйича очиқчасига “жаҳон чемпионати”ни уюштириш ана шундай куракда турмайдиган “хурмача қилиқ”лардан саналади. Бу жабҳаларда иймон-эътиқод, одамгарчилик, ибо-ҳаё каби азалий тушунчалар четга суриб қўйиляпти. Натижада, шўрлик бани Одам, баъзан ҳайвонлардан ҳам тубанроқ аҳволга тушиб қолмоқда. “Дунёда ҳамма нарсани пулга сотиб олса бўлади”, деган хомхаёл авж олмоқда.

Масалан, айрим мамлакатлар тараққиёт кетидан қува-қува шахсий ҳаёт, оила қуриш каби “майда-чуйда”ларга вақт топа олмаяптилар. Шу сабабли бу мамлакатларда “Ижарага оила” хизмати ташкил этилган. Бу антиқа хизматнинг моҳияти шундай: агар Сиз ўзингизни буткул ишга бағишлаб, шахсий ҳаёт учун вақт топа олмаётган бўлсангиз, хотин ва фарзандларингиз бўлмаса, бу вазиятдан чиқиш йўли бор! Мазкур фирмага мурожаат қилсангиз, унисига ҳам, бунисига ҳам эришишингиз мумкин.

Уйга келсанг, сени кимоно кийган “буюртма хотин” нозли таъзим ила кутиб олади. Икки нафар (ёки учта, бу шартлашувга боғлиқ) “болажонларинг” югуриб чиқиб, бўйнингга осиладилар. Мазали таом тайёр, “хотининг” таъзим ила чой узатади... Хуллас, ҳаммаси ҳақиқий оиладагидек. Бундай антиқа хизматнинг баҳоси соатига “атиги” 700 АҚШ доллари турармиш. Шунга қарамай, мижозларнинг кети кўринмаяпти – бир ой олдинга ҳам буюртмалар қабул қилинмоқда.

Янги ташкил этилган “Ижарага дўст бериш” хизмати эса европаликлар ўртасида тобора оммалашиб бормоқда. Социологлар мулоқотнинг бундай тури замонавий жамиятда жуда муҳимлигини таъкидлашмоқда. Энди европаликлар интернет орқали махсус сайтга кириб, ўзларига дўст буюртма қилишлари мумкин. “Ижарага дўст бериш” жамиятига аъзо бўлган киши қисқа муддат ичида ўзига маъқул бўлган дўстни танлайди. Соатига 60 доллар эвазига буюртма “дўст” сиз билан истаганингизда дўкон айланиши, ҳар  ерда ҳамроҳ бўлиши мумкин...

Тўрт оёқли эркатойларни зериктирмаслик мақсадида, америкада итлар учун махсус телеканал – DOGTV иш бошлади. У сутка давомида узлуксиз ишлайди, асосан итларни “қизиқтирувчи” кўрсатувлар намойиш этилади. Телеканал дастурларини тузишда ветеринарлар, ҳайвонлар руҳшуноси (шундай мутахассис ҳам бор!) ва ҳайвонларни ҳимоя қилиш жамияти фаоллари астойдил тер тўкишди.

Ғамхўр итсеварлар, “энди уйда йўқлигимизда итларимиз зерикмайдиган бўлишди”, дея қувонишмоқда.

Ташкилотчилар, мушукларни-да “хафа” қилмаслик мақсадида, энди улар учун ҳам махсус телеканал очиш ҳаракатини бошлаб юборишган.

Охирги йилларда Буюк Британияда итларга қарайдиган энагаларга бўлган талаб ўсиб бормоқда.

Киев шаҳри (Украина)да эса уй ҳайвонлари учун никоҳ уйи ишга тушди.

“Келин-куёвлар”га никоҳ тузилганлиги ҳақида гувоҳнома ва никоҳ шартномаси тақдим этилади. “Келин-куёв”ни кузатиб келган ўн нафар меҳмон учун мўлжалланган тантана жонивор эгасига минг долларга тушади. Ташкилотчилар никоҳ маросими учун либослар тикишади, “келин” ва “куёв”ни байрамона безатилган никоҳ уйига олиб келишади.

Агентликда, шунингдек, жониворларнинг бир-бирига мос келиш-келмаслигини аниқлаб берувчи профессионал астролог (мунажжим) ҳам хизмат кўрсатади.

Ҳа, Калвак Маҳзум ибораси билан айтганда, ақлсизнинг катта-кичиги бўлурму? Лекин бу қип-қизил бемаънигарчиликка тилсиз ҳайвонлар айбдор эмас-ку. Оммавий ахборот воситаларида тарқалаётган бундай хабарларни ўқиб, эшитиб ёки кўриб беҳосдан “Астағфируллоҳ” деб юборасан киши. Негаки, бундай ҳолатлар фақатгина ҳаддан ошиш, кибрга берилиш ва ахмоқликдан бўлак ҳеч нарса эмас.

Энди эса Oxfam (Oxford Committee for Famine Relief) ташкилоти томонидан 2017 йилда тақдим этилган  қуйидаги маълумотларга диққатингизни қаратинг!

Таҳлилчиларнинг фикрича, ер юзи аҳолисининг 10 фоизи қашшоқликда, ҳар тўққизтасидан биттаси очликда кун кечирмоқда. 3 миллиард киши ҳаёт кечириш учун даромадга эга эмас. Жаҳонда 1 миллиард бола қашшоқликда яшайди. ЮНИСEФ маълумотига кўра, бир кунда ўртача 22 минг бола очлик туфайли вафот этади. 805 миллион киши озиқ-овқат маҳсулотларидан маҳрум бўлса, 750 миллион киши тоза ичимлик сувидан бебаҳра яшамоқда. Ҳар йили сув етишмаслиги, антисанитария ва гигиена ёмонлиги сабаб 842 минг киши вафот этади. Бу ҳар куни ўртача 2 минг 300 кишининг бевақт кўз юмишини англатади. Ер юзи аҳолисининг чорак қисми, тахминан 1 миллиард 600 миллион киши электр манбаидан маҳрумлигича қолмоқда.

Бу каби статистикалар рўйхатини ҳали узоқ давом эттириш мумкин. Аммо, шу нарса қизиқки сайёрамизнинг бир бурчагида одамлар пулларини қаерга ишлатишни билмай, итига, мушугига тўй қилаётган бир пайтда ер шарининг бошқа томонида мурғак болалар очликдан, сувсизликдан вафот этишмоқда. Мантиқ қаерда...?

Мақоламиз сўнгини Аллоҳ таолонинг Каломи бўлмиш Қуръони каримда келтирилган очиқ оятлар билан тугатишни лозим топдик. Негаки, бугунги ер куррасида кечаётган мантиқсиз жараёнларга нисбатан қалбимиз ва ақлимизда Аллоҳ таолонинг Каломида келтирилган оятларданн бўлак ҳеч бир таскин, воқеъликларга ва кимсаларга изоҳ, шунингдек, саволларимизга жавоб топилмади.   

“Дарҳақиқат, инсон ҳаддидан ошар”. (Алақ сураси, 6) 

“(Улар) худди ўзларидан озгина олдин ўтган, ўз қилмишларининг уволига қолган кимсаларнинг ўхшашидирлар. Уларга (охиратда ҳам) аламли азоб бордир”. (Ҳашр сураси, 15)

“Уларга расулларимиз (илоҳий) ҳужжатларни келтирганлар. Сўнгра уларнинг кўпчилиги ўшандан кейин (ҳам) Ерда исроф қилувчилардир”. (Моида, 32)

“Шунингдек, еб-ичингиз, (лекин) исроф қилмангиз! Зеро, У исроф қилувчиларни севмагай”. (Аъроф сураси, 31)

“Чунки, исрофгарлар шайтонларнинг биродарларидир. Шайтон эса, Парвардигорига нисбатан ўта ношукур эди”. (Исро сураси, 27)

Аллоҳ таоло барчамизга тўғри йўл кўрсатиб Ўзи кифоя қилсин!

Интернет манбалари асосида

Саидаброр Умаров тайёрлади

Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.

*****

Гуноҳлар сени ҳар қанча булғаган бўлса ҳам, Аллоҳга қайтишга иккиланма! Маъсият шифтининг остида турганингда сени сатр қилган Зот тавба қаноти остида турганингда ҳаргиз сени шарманда қилмайди!

Шайх Муҳаммад Мутавалли Шаъровий раҳимаҳуллоҳ

*****

«Гўзаллик қаерда?» деб сўрасалар, «Аллоҳ таолодан ҳаё қиладиган юзларда» деб жавоб бергин!

«Ҳаётнинг нариги юзи»

*****

Агар ўз нафсингни яхши танисанг, сен ҳақингда айтилган гаплар сенга зарар бермайди.

Суфён Саврий раҳимаҳуллоҳ

*****

Онам фақир эди. У менга шундай дерди: “Албатта, фақирлик айб эмас. Аслида айб, хато – киши бой бўла туриб, бошқаларни пастга уришидир”.

Феодор Достоевский

*****

Донишманд бўлишни истайсанми? Атрофингдаги аҳмоқларни кузат ва уларнинг ишини такрорлама.

“Тарих муҳрлаган сўзлар”

*****

Бир инсоннинг қанақалигини билмоқчи бўлсанг, ўзидан заифроқ кишилар билан қандай муомала қилишига боқ.

“Тарих муҳрлаган сўзлар”

*****

Ўқиш-ўрганишнинг оғриғи бир лаҳзалик бўлиб, тезда тўхтайди. Аммо таълимга бепарволикнинг оғриғи умр бўйи давом этади.

“Тарих муҳрлаган сўзлар”

*****

Ғазабланиб турганингда тўртта ишдан тийил:

• Бошқалар ҳақида ҳукм чиқаришдан;
• Қарорлар қабул қилишдан;
• Бошқалар билан гаплашишдан;
• Бирорта иш қилишдан.

“Тарих муҳрлаган сўзлар”

*****

Мен дунёдаги энг ақлли инсон эмасман. Аммо менинг ўрнимга кимдир тафаккур қилишига мутлақо рухсат бермайман.

Алберт Эйнштейн

*****

Интернет материалларидан тўплаб, таржима қилувчи

Нозимжон Иминжонов

Тошкент вилояти Зангиота туманида жойлашган аёллар жазони ижро этиш муассасасида маънавий-маърифий тадбир ўтказилди. Бу ҳақда ЎзА хабар берди.

”Соғлом авлод учун” халқаро хайрия фонди томонидан ташкил этилган мулоқотда фонд масъуллари, нашриёт соҳаси ходимлари, санъаткорлар, маҳкум аёллар иштирок этди.

Мамлакатимизда хотин-қизларни ҳар томонлама қўллаб-қувватлаш, уларнинг тадбиркорлигини ривожлантириш, жамиятда тутган мавқейини янада юксалтириш борасида амалга оширилаётган ишлар юксак самара бераётгани таъкидланган.

Айниқса, ижтимоий оғир вазиятдаги аёлларга тиббий, моддий ва ҳуқуқий жиҳатдан ёрдам кўрсатиш, жиноят кўчасига кириб қолган аёлларни соғлом турмуш тарзига йўналтириш борасида тизимли ишлар йўлга қўйилгани алоҳида қайд этилди.

Тадбирда “Ҳилол нашр” нашриёти ва китоб савдоси билан шуғулланувчи тадбиркорлик субъектлари томонидан маҳкумаларга 130 дан ортиқ китоблар совға қилинди.

“Сўғдиёна” ўзбек давлат халқ чолғулари камер оркестри санъаткорлари томонидан концерт дастури намойиш этилди.

Ўзбекистон мусулмонлари идораси Матбуот хизмати

Жорий йилнинг 11 март куни Ислом тараққиёт банки президентининг Илм-фан, технология ва инновация бўйича катта маслаҳатчиси Хаят Синди бошчилигидаги делегация ташриф билан мамлакатимизга келди.

Ташриф доирасида Ислом тараққиёт банки делегацияси аъзолари бугун, 12 март куни Халқаро ҳамкорлик марказида ташкил этиладиган ”Илм-фан, технология ва инновациялар” мавзуси бўйича стартап лойиҳалар илмий семинарида иштирок этади.

Маълумот ўрнида, делегация таркиби Ислом тараққиёт банки бизнес таҳлил доира вакиллари, “Leverage Science LLC”, “Freuds LLC” каби халқаро ташкилотлар раҳбарларидан иборат.

Ўзбекистон мусулмонлари идораси Матбуот хизмати

Аллоҳ чин тавба қилувчи бандаларини яхши кўради: “Албатта, Аллоҳ (шунгача билмай йўл қўйган хатоларидан) чин тавба қилувчиларни ва обдон покланиб юрувчиларни севади” (Бақара сураси, 222-оят).

Чин тавба қандай бўлади?

Чин тавба дилдан пушаймон бўлиш, тил билан мағфират сўраш, гуноҳдан воз кечиш ва унга бошқа қайтмасликка аҳд қилиш билан бўлади. 

Аллоҳ Расулуллоҳ соллаллоҳу алайҳи васалламга эргашувчи бандаларини яхши кўради: Айтинг (эй Муҳаммад!): “Агар Аллоҳни севсангиз, менга эргашингиз. Шунда Аллоҳ сизларни севади ва гуноҳларингизни мағфират этади. Аллоҳ кечирувчи ва раҳмлидир” (Оли Имрон сураси, 31-оят).

Набий алайҳиссаломга эргашиш нима дегани?

Набий алайҳиссаломга эргашиш у зот келтирган шариат кўрсатмаларига итоат этиш деганидир. 

Аллоҳ тақво қилувчи бандаларини яхши кўради: “Аслида эса, ким (Аллоҳ) аҳдига вафо қилса ва тақволи бўлса, албатта, Аллоҳ (бу каби) тақводорларни севади” (Оли Имрон сураси, 31-оят).

Тақво нима?

Тақво – тиканзорда яланг оёқ ўзингизни тикандан сақлаб юрганингиздек гуноҳ ва маъсиятлардан ҳам эҳтиёт, узоқ бўлишингиздир. 

Аллоҳ яхшилик қилувчи бандаларини яхши кўради: “Албатта, Аллоҳ эзгулик қилувчиларни севади” (Моида сураси, 13-оят).

Эзгулик нима?

Эзгулик бу яхшиликдир. Ҳар бир савобли иш – яхшилик.

Аллоҳ адолатли бандаларини яхши кўради: “Агар ҳукм қилсангиз, ўрталарида адолат билан ҳукм қилинг! Албатта, Аллоҳ одилларни севади” (Моида сураси, 42-оят). 

Аллоҳ ҳар бир ишни гўзал бажарувчи бандаларини яхши кўради: “(Барча ишларни) чиройли қилингиз. Албатта, Аллоҳ чиройли (иш) қилувчиларни яхши кўради” (Оли Имрон сураси, 195-оят). 

Аллоҳ сабрли бандаларини яхши кўради: “Аллоҳ (эса) сабрлиларни севар” (Оли Имрон сураси, 146-оят).

Сабр нима?

- Тоат-ибодатларни адо этишда сабр.

- Гуноҳлардан тийилишда сабр.

- Мусибатга сабр. 

Аллоҳ таваккул қилувчи бандаларини яхши кўради: “(Бирор ишга) азму қарор қилсангиз, Аллоҳга таваккул қилинг, зеро, Аллоҳ таваккул қилувчиларни севар” (Оли Имрон сураси, 159-оят).

Даврон НУРМУҲАММАД