Шу кунларда Ўзбекистон мусулмонлари идораси тасарруфидаги барча масжидлар имом-хатиб ва имом ноиблари билимлари, касб-маҳоратлари ҳамда иш фаолиятлари натижалари баҳоланмоқда.
Таъкидлаш керакки, ушбу жараёнда имом-хатиб ва имом ноибларининг профессионал малакаси, ишчанлик фазилати, касбий тайёргарлик даражаси, вазифага муносибликлари ҳамда зиммаларига юклатилган вазифаларга масъулият билан ёндашиш хислатларига алоҳида эътибор қаратиляпти.
Шунинг билан бирга имомларнинг нотиқлик иқтидори, қироати, илмий-ижодий, маънавий-маърифий фаолияти, чет тилларини билиш даражаси ҳамда ахборот-коммуникация технологияларини қай даражада ўзлаштирганликлари тест синовлари ва суҳбатлар асосида намоён бўлмоқда.
Ушбу синовлардан муваффақиятли ўтиб диний-маърифий, меҳнати самарадорлиги ва касбий билимларини оширган имом-хатиб ва имом ноибларга олий, биринчи ва иккинчи даражали малака тоифалари тақдим этилади. Бу эса уларнинг келгусидаги фаолиятида янада юқори натижаларга эришишида муҳим омил бўлиб хизмат қилади.
Айни пайтда Ўзбекистон мусулмонлари идораси раиси ўринбосарлари, масъул ходимлари, диний-таълим муассасалари педагог-ўқитувчилари ҳамда ҳамкор ташкилот вакилларидан иборат баҳолаш комиссияси аъзолари гуруҳларга бўлинган ҳолда Андижон, Наманган, Фарғона ва Жиззах вилоятларида фаолият олиб бормоқда. Ўз навбатида мазкур жараёнга бошқа вилоятларда ҳам қизғин тайёргарлик ишлари кўриляпти. 

Ўзбекистон мусулмонлари идораси Матбуот хизмати

Шу йил 23 октябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ва Дин ишлари бўйича қўмита раисининг биринчи ўринбосари Даврон Мақсудов Доғистон Республикаси ҳукумати раиси Абдулмуслим Абдулмуслимов бошчилигидаги делегацияни қабул қилди.
Дин ишлари бўйича қўмита раисининг биринчи ўринбосари Даврон Мақсудов давлатимиз раҳбари ташаббуси билан диний-маърифий соҳада амалга оширилаётган кенг кўламли ислоҳотлар, шунингдек, юртимизда фаолият юритаётган турли диний конфессиялар ўртасидаги дўстона алоқалар, уларга тақдим этилган имтиёз ва имкониятлар хусусида тўхталди. Шунингдек, у юртимизда 130 дан зиёд миллат, элат ва турли диний конфессия вакиллари ўртасида ҳамжиҳатлик таъминланганини ҳам қўшимча қилди.
Муфтий Шайх Нуриддин Холиқназар ҳазратлари меҳмонларни Ўзбекистон мусулмонлари идораси фаолияти ҳақида маълумот бериб, сўнгги йилларда масжид-мадрасалар сони кўпайиб, улар ибодат ва маърифат масканига айланиб бораётганини мамнуният билан таъкидладилар. Шунинг билан бирга 13 та диний таълим муассасасида салоҳиятли диний соҳа кадрлари тайёрланаётганини қайд этдилар.
Имом Бухорий, Имом Термизий ва Имом Мотуридий номли халқаро марказлар ҳамда Ислом цивилизацияси маркази ташкил этилгани нафақат халқимиз, балки хорижликларнинг ҳам эътирофига сазовор бўлаётганини Муфтий ҳазратлари сўзладилар.
Доғистон Республикаси ҳукумати раиси Абдулмуслим Абдулмуслимов ўзаро мулоқотда самимий қабул учун миннатдорлик билдириш баробарида Доғистонда эътиқод қилувчиларга яратилган шарт-шароитлар, хусусан, мўмин-мусулмонлар ҳаёти ҳақида сўз юритди. Шунингдек, у Ўзбекистонда диний-маърифий жабҳадаги улкан ўзгариш ва янгиланишларнинг гувоҳи бўлганини изҳор этди. Айниқса, меҳмон Ўзбекистон алоҳида эҳтиромга лойиқ юрт экани, бу диёрдан Ислом дини ривожига улкан ҳисса қўшган забардаст уламолар етишиб чиққани, хусусан, ҳадис илмининг султони Имом Бухорий ҳазратларини алоҳида ёдга олди.
Мартабали меҳмон сўзини давом эттириб, айни кунларда Доғистонда хизмат қилаётган дин пешворларининг аксарияти Бухоро ва Тошкент шаҳарларидаги ўқув даргоҳларида таълим олганини мамнуният билан эътироф этди.
Мулоқотда томонлар Ўзбекистон ва Доғистон муносабатлари сўнгги йилларда янги босқичга кўтарилгани, бугунги кунда бир қатор соҳалар, жумладан, зиёрат туризми йўналишидаги ҳамкорлик алоқалари жадал ривожланиб бораётгани, икки йил аввал Ўзбекистон делегацияси Доғистонда “Имомлар юртига саёҳат” мавзуида зиёрат туризми кўргазмасини тақдим этгани, ушбу тадбир икки халқ ўртасидаги ишончли мулоқот, диний-маърифий жабҳадаги алоқаларнинг мустаҳкамланишига ҳам туртки бўлганини таъкидладилар.
Учрашув якунида диний-маърифий соҳадаги ўзаро ҳамкорликни ривожлантириш ва ўзаро тажриба алмашиш учун Ўзбекистон мусулмонлари идораси раиси, муфтий Шайх Нуриддин Холиқназар ҳазратларини Доғистон давлатига таклиф этилди.
Учрашув дўстона ва самимий руҳда ўтди.

“Жумадан жумагача” рукни орқали muslim.uz сайтида эълон қилинган энг муҳим хабарларнинг қисқача шарҳи билан танишиш мумкин.

Бугун Тошкент шаҳар бош имом-хатиби  Абдуқаҳҳор домла Юнусов пешин намозида  Шайхонтоҳур  туманидаги "Фотимаи Заҳро" жоме масжидига ташриф буюриб, намоздан сўнг шу пайтгача пойтахтимизнинг Шайхонтоҳур тумани "Хўжа Аҳрор Валий" жоме масжиди имом ноиби бўлиб ишлаб келаётган Тоҳир домла Пўлатовни "Фотимаи Заҳро"  масжидига имом-хатиб этиб тайинланганини жамоатга таништирди.

Абдуқаҳҳор домла янги тайинланган имом-хатибнинг фаолиятига Аллоҳ таолодан улкан муваффақиятлар тилаб, хайрли дуолар қилди.