muslim.uz
Фатво ҳайъатига келган саволлар (19-қисм)
Саволларга Ўзбекистон мусулмонлари идораси Фатво ҳайъати жавоб беради.
Савол: Ассалому алайкум. Саволим шуки никоҳдан кейин 2 ракат шукрона намоз ўқиш керак деб эшитдим. Бу намоз қандай ўқилади. Тартиби ҳақида маълумот берсангиз илтимос.
Жавоб: Ва алайкум ассалом! Бу ихтиёрий-нафл намоз. Махсус номли намоз эмас.
Савол: Ассалому алайкум. Намозни тиззадан узун шортик ва футболкада ўқиса бўладими? Шу ҳақда маълумот беринг илтимос сизлардан олдиндан раҳмат.
Жавоб: Ва алайкум ассалом! Бўладию, макруҳ бўлади.
Савол: Ошхонада чумолилар жуда кўпайиб кетди доридан сўнг ҳам келаяпти, гоҳида сув билан идишда ўлдиришга тўғри келаяпти бу гуноҳми?
Жавоб: Бунинг зарари йўқ.
Мазлумнинг ҳақи
Шайх Иброҳим Ҳаққий ёшлигида авлиёуллоҳлардан бўлган Исмоил Фақируллоҳ ҳазратларининг қўлларида таҳсил ва тарбия кўрган эди. Бир куни устози уни чақиртирди. Иброҳим югуриб келди:
- Лаббай, устоз?
- Шу кўзада булоқдан сув олиб келгин. Иброҳим кўзани олиб ьулоққа борди. Кўзани тўлдираётганида бир отлиқ келди ва:
- Қани, нари тур, деб Иброҳимни итариб юборди. Иброҳимнинг кўзаси ерга тушиб, синди. У йиғлаб устозининг ҳузурига келди.
Нима бўлди, ўғлим? деб сўради устози.
Булоқдан сув олаётувдим, бир отлиқ келиб, итариб юборганида, кўза қўлимдан тушиб, синди.
Кўзани синдирган одамга бирон нима дедингми?
Йўқ, ҳеч нима демадим.
Бир оғиз ҳам гапирмадингми?
Йўқ.
Тезда у ерга бориб, отлиққа бирор нарса дегин. Яна тезда ортга қайт.
Исмоил фақируллоҳнинг бундай буйруқ беришларидан ҳамма ҳайрон қолди. Иброҳим югуриб булоқ бошига келди. Ҳалиги киши отини ювар эди. Иброҳим анчагача талмовсиранди, лекин ҳеч нарса деёлмай, қайтиб келди.
Устози:
Гапирдингми? деб сўради.
Йўқ.
Вақт ўтказмай югур. Унга бирор ёмон гап айтиб кел!
Иброҳим яна югуриб булоқ бошига келди. Қараса, уни итарган отлиқ ерда ётибди. Унга яқин келди. Отлиқ боши ёрилган ҳолда беҳуш ётарди.
Бу ҳолатдан юраги
ёрилаёзган Иброҳим устозининг ёнига келди. Устози яна суради:
Бирор нарса дедингми, Иброҳим?
Йўқ, устоз. Бу сафар борганимда унинг боши ёрилган, қонга беланиб ётган экан. Пешонасида от туёғининг изи кўринди.
Исмоил ҳазратлари:
Эй ўғлим, биргина кўза учун бир одамни ўлдиртирдинг!
Бу энди қандоқ бўлди?! Унга бир оғиз сўз, бир оғиў ёмон сўз айтганингда, бу ҳодиса рўй бермасмиди... дедилар.
Исмоил Фақируллоҳ ҳазратларининг атрофидагилар: Устоз, айтган гапингизга унча яхши тушунмадик, дейишди.
Ҳа, деди Исмоил Фақируллоҳ ҳазратлари, бир золим бирор кишини ҳафа қилса, йиғлатса-ю, мазлум у золимга қарши ҳеч нарса қилолмаса, мазлумнинг кўнгли озор топгани учун Ҳақ таоло золимдан унинг ҳақини олади. Иброҳим ҳам кўзаси сингач, у отлиққа ҳеч бўлмаса:
Нима қилиб қўйдинг? деганида отининг тепкисидан омон қолармиди...
"Ғам-қайғусиз яшай десангиз ўксинма" китобидан.
ФҲДЁларда имомлар ва отинойилар никоҳланувчилар билан суҳбат ўтказмоқда
Тошкент шаҳрида бўлажак келин-куёвлар ва уларнинг ота-оналари билан тўй олди жараёнлари ҳамда тўйдан кейинги муносабатларни яхшилаш, расмий никоҳнинг афзалликлари, оила муқаддаслиги, оилада эрнинг ва аёлнинг вазифалари, эрта ва қариндошлар ўртасидаги никоҳнинг салбий оқибатлари, жойларда тўй ва маросимларни ихчам ҳолда ўтказиш, ажримларнинг олдини олиш, оилавий муносабатларни яхшилаш мақсадида масжид имом-хатиблари ва отинойилари ФҲДЁ органлари ходимлари билан биргаликда бўлажак келин-куёвлар билан суҳбатлар ўтказишлари йўлга қўйилди. Бу ҳақда Тошкент шаҳар ҳокимлиги Ахборот хизмати хабар берди.
Тошкент шаҳрида мавжуд 11 та туман ФҲДЁ бўлимларига, никоҳ уйларига ушбу туманда фаолият олиб борувчи имом-хатиблар ва отинойилар бириктирилиб, улар томонидан бўлажак келин-куёвлар билан “Оила ва никоҳнинг муқаддаслиги”, “Эр-хотиннинг оиладаги бурч ва вазифалари” мавзуларида суҳбатлар ташкил этилмоқда. Ушбу суҳбатларда имом-хатиблари ва отинойилар томонидан бўлажак келинларга шарм-ҳаё, муомала маданияти, кийиниш маданияти, қайнота-қайнонага бўлган муносабат ҳамда турмуш ўртоғи олдидаги ўз вазифалари Қуръон оятлари ва ҳадисларга суянган ҳолда тушунчалар бериб борилмоқда.
Сўнгги 3 ой давомида ФҲДЁ бўлимларида имом-хатиблар ва отинойилар иштирокида бўлажак келин-куёвлар билан 269 маротаба суҳбатлар олиб борилди.
Олиб борилган суҳбатларда натижасида бўлажак куёвлар мебель жиҳозларининг харид қилинишини ўз зиммаларига олмоқдалар ва никоҳланувчи оилалар ўртасидаги зиддиятларнинг, ажримларнинг олди олинмоқда ҳамда тўй-ҳашамларнинг қисқариши кузатилмоқда.
ЎМИ Матбуот хизмати
Индонезия бош имоми: ҳар куни бешта ОАВга Ўзбекистон ҳақида гапираман
Аввалроқ, Ўзбекистон мусулмонлари идораси ходимлари ҳам бўлган Ўзбекистон делегацияси Индонезияда сафарда эканликлари ҳақида хабар берган эдик.
Бугун, 12 июль куни делегациямиз аъзолари Жакарта шаҳридаги "Истиқлол" жоме масжидига ташриф буюрдилар. Масжид бош имоми Насуриддин Умар ҳазратлари делегациямиз аъзоларини масжид тарихи, бугунги куни билан таништириб, қимматли маълумотларни билдириб ўтган.
Масжид имоми Ўзбекистон ҳақида ўз фикрларини билдирар экан, бугунги кунда мамлакатимизда зиёрат туризмини янада ривожлантириш борасида ўз қарашларини айтди. Индонезия ва Ўзбекистон ўртасида тўғридан тўғри авиақатновнинг йўлга қўйилиши, имомлар ўртасида алмашувнинг жорий этилиши, индонезияликлар орасида Ўзбекистон ҳақида кўпроқ тарғибот қилиниши зарур эканини қайд этди. Имом деярли ҳар куни Индонезиянинг бешта оммавий ахборот воситасига Ўзбекистон ҳақида интервю беришини таъкидлаб, Имом Бухорий юрти эканини айтишини, бу ҳар бир индонезиялик бориб зиёрат қилиши лозим бўлган маскан эканини айтишини таъкидлади.
ЎМИ Матбуот хизмати
Қозоғистоннинг "Вақф" фонди ҳаж йўлланмасини берувчи танлов эълон қилди
Қозоғистон мусулмонлари идорасининг расмий сайтида маълум қилинишича, жорий йилда "Вақф" фонди томонидан "Хайрли иш" акцияси ўтказилиши бошланган.
"Хайрли иш" акциясида иштирок этишни истовчилар "Вақф" фонди ҳисоб рақамига уч минг тенге миқдоридаги эҳсон қилиши лозим. Шунда эҳсон қилган киши акция иштирокчисига айланади. Акция 2018 йилнинг 3 августида якунланиб, якунда иштирокчилар орасидан ғолиблар аниқланади. Ғолибга Ҳаж зиёрати йўлланмаси совға қилинади.
Маълумот учун, Фонд маблағлари муҳтожларга хайрия қилинади. Акциянинг якуний тадбири Нур-Астана масжидида ўтказилиши айтилган.
ЎМИ Матбуот хизмати