Аллоҳ таоло Қуръони Каримда шундай марҳамат қилган:

الرِّجَالُ قَوَّامُونَ عَلَى النِّسَاء بِمَا فَضَّلَ اللّهُ بَعْضَهُمْ عَلَى بَعْضٍ وَبِمَا أَنفَقُواْ مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِّلْغَيْبِ بِمَا حَفِظَ اللّهُ وَاللاَّتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ فَإِنْ أَطَعْنَكُمْ فَلاَ تَبْغُواْ عَلَيْهِنَّ سَبِيلاً إِنَّ اللّهَ كَانَ عَلِيّاً كَبِيراً

“Аллоҳ баъзиларини баъзиларидан устун қилгани ва молларидан сарфлаганлари учун эркаклар аёлларга раҳбардирлар. Солиҳа аёллар–итоаткор ва Аллоҳнинг ҳифзи-ҳимояси бўйича ғойиб(эр)ларининг муҳофазасини қилувчилардир. Бош кўтаришларидан хавф қилинган аёлларга ваъз-насиҳат қилинг, ётоқларида ҳижрон қилинг ва уринг. Агар итоат қилсалар, уларга қарши бошқа йўл ахтарманг. Албатта, Аллоҳ юксак мақомли буюк зотдир”.

(Аллоҳ таоло ҳеч бир ишни беҳикмат қилмайди. Жумладан, эркак киши оила раҳбари бўлса ва у ўз раҳбарлигини шариатда кўрсатилгандек адо этса, бундай оилалар бахт-саодатга соҳиб бўлмоқда. Бу кўрсатмага юрмаган оилалар эса, бахтсизликка учрамоқда, шундайлардан ташкил топган жамиятлар ҳам бахтсизликка дучор бўлмоқда. Бу ерда гапни чўзиб ўтиришнинг ҳожати бўлмаса керак. Мўмина, солиҳа аёлларнинг табиатида эрига итоаткорлик бордир. Биз «итоаткорлик» деб таржима қилаётган сўз ояти каримада «қонитатун» лафзи ила келган. Бу сўз ўз иродаси, рағбати ва муҳаббати ила итоат қилиш маъносини англатади. Демак, мўмина, солиҳа аёлларнинг эрларига итоати ўз масъулиятини тушунган ҳолдан келиб чиққан бўлади. Қўрққанидан, мажбурлашдан ёки бошқа бирор босқидан эмас. Бу итоат ўзини тушунган, ҳаётдаги ўрнини, вазифаси ва масъулиятини ҳис этган гўзал инсоннинг итоатидир.) (Нисо сураси, 34-оят).

Солиҳа аёл қандай бўлиши ва бунинг мукофотлари ҳақида мана бу ҳадисларга ҳам эътибор қаратайлик:

عَنْ سَعِيدِ بْنِ أَبِي سَعِيدٍ ، عَنْ أَبِي هُرَيْرَةَ ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : خَيْرُ النِّسَاءِ إِذَا نَظَرْتَ إِلَيْهَا سَرَّتْكَ وَإِذَا أَمَرْتَهَا أَطَاعَتْكَ، وَإِذَا غِبْتَ عَنْهَا حَفِظَتْكَ فِي مَالِكَ وَنَفْسِهَا

Имом ибн Жарир Тобарий ва Ибн Аби Ҳотимлар Абу Ҳурайра розияллоҳу анҳудан ривоят қилган ҳадисда Пайғамбаримиз соллаллоҳу алайҳи васаллам:

«Аёлларнинг яхшиси – назар солсанг, хурсанд қиладиган, амр қилсанг, итоат этадиган ва ғойиб бўлсанг, сени ўз нафсида ва молингда муҳофаза қиладиганидир», деганлар.

عن عبدالرحمن بن عوف قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ إذا صَلَّتْ المرأةُ خمسَها ، وصامَتْ شَهْرَها ، وحفظَتْ فَرْجَها ، وأَطَاعَتْ زَوْجَها ، قيل لها : ادْخُلِي الجنةَ من أَيِّ أبوابِ الجنةِ شِئْتِ .

Имом Аҳмад Абдурроҳман ибн Авф розияллоҳу анҳудан ривоят қилган ҳадисда Пайғамбаримиз алайҳиссалом: «Агар аёл киши беш вақт намозини ўқиса, бир ой рўзасини тутса, фаржини сақласа ва эрига итоат қилса, унга: «Жаннатнинг қайси эшигидан хоҳласанг, киравер», дейилади», деганлар.

Демак, аёл киши эри унга назар солганда, гап-сўзлари ва ташқи кўриниши билан эрини қувонтирса, эрининг буюрган ишларини чиройли қилиб бажарса, эри унга гуноҳ бўлмаган ишларни айтганда, “хўп” деб итоат қилса, эри борлигида ҳам, йўқлигида ҳам ўз иффатини, номусини, эрининг мол-мулкларини муҳофаза қилса, намозини вақтида ўқиса, рўзасини ихлос билан тутса, унга охиратда Жаннатга истаган эшигидан кириш имконияти берилар экан.

Ҳа, азизлар! Агар аёл киши юқоридаги оят ва ушбу ҳадисларга амал қилиб, ибодатларини ўз вақтида адо этиш билан бирга эрига итоат қилса, бу дунёда энг яхши аёл мақомига, охиратда эса Аллоҳнинг улуғ мукофоти – Жаннатга сазовор бўлади.

Шу боис ҳар бир аёл ана шундай улуғ мукофотга эришишга астойдил ҳаракат қилмоғи лозим.

Аллоҳ таоло барча аёлларни солиҳа аёл мақомига эришиб, охиратда Жаннат билан мукофотланишини насиб этсин!

Нозимжон Ҳошимжон тайёрлади

- Тўйни дабдабали қилишда мусобақалашиб, келин-куёв юрадиган машинани фалон пулга ижарага оладиган, дастурхонга ейилсаю ейилмаса, одамлар кўрсин учун деярли барча таом ва нозу неъматларни қўядиган, артистлар, раққосалар устидан пул сочадиган, пулдан чамбарак ясаб, тўй бошиларнинг бўйнига осиб қўядиган, тўйини фалон пулга тўйхоналарда қиладиганларни;

- Машинасини тез ҳайдаб, мусиқани ташқаридагилар эшитадиган даражада баланд қўйиб, ҳаммани ўзига қаратишга уринадиганларни;

- Залга бориб, тош кўтариб, тор футболка кийиб, шишган билакларини ҳаммага кўрсатишга интиладиганларни;

- Кўпчилик орасида кийимини, соатини, браслетини, машинасини фалон пулга олганини баланд овозда айтиб, айтганда ҳам гўё арзонга олгандек, ўзини ўша нархга нисбатан эътиборсиз тутиб гапирадиганларни;

- Кийимидан мусулмонлик, ўзбеклик асари ҳеч кўринмайдиган аёл-қизлар жамоат жойларида «ҳамма мени кўрсин, эркакларнинг мазаси қочсин» дея юриб, юрганда ҳам худди ўзини жиноят содир этмаётгандек, сипо кийингандек тутадиган, ўз либосининг фалокатли эканига нисбатан «эътиборсиз қиз» режимини ёқиб оладиганларни ҚЎЛИДАГИ ЎЙИНЧОҒИНИ ЎРТОҚЛАРИГА КЎРСАТИБ МАҚТАНАЁТГАН ЁШ БОЛАЧАГА ЎХШАТАМАН.

Мўмин-мусулмон одам айтаётган гапига, қилаётган амалига эътиборли бўлиши, буларнинг ҳар бири учун охиратда сўроқ-саволи борлигини бир лаҳза ҳам эсидан чиқармаслиги керак!

Бизнинг бу дунёда қилган барча ишларимиз ҳақида охиратда тилимиз эмас, тана аъзоларимиз гувоҳлик беради. Аллоҳ таоло Қуръони Каримда шундай марҳамат қилган:

الْيَوْمَ نَخْتِمُ عَلَى أَفْوَاهِهِمْ وَتُكَلِّمُنَا أَيْدِيهِمْ وَتَشْهَدُ أَرْجُلُهُمْ بِمَا كَانُوا يَكْسِبُونَ

“Бугунги кунда уларнинг оғизларига муҳр урамиз. Нима касб қилганларини Бизга қўллари сўзлар ва оёқлари гувоҳлик берур”. (Жиноятчиларнинг оғизлари муҳрлаб қўйилади, бошқа аъзолари шоҳидлик бера бошлайди. Қўли гапиради, оёғи гувоҳлик беради.) (Ёсин сураси, 65-оят).

Сиз қандай кийиняпсиз, нималар деяпсиз, қандай амал қиляпсиз, қиёмат куни Аллоҳ таолонинг ҳузурида ҳар бирига жавоб берасиз. Агар қабрдаги ва охиратдаги саволларга қийналмасдан осон жавоб беришни истасангиз, охиратда ўта оғир аҳволда қолиш истамасангиз, шунга яраша ҳаракатингизни қилинг!

Гуноҳларнинг барчасидан тийилиб, тавба қилиб, зиммангиздаги барча амалларни ўз вақтида бажаришга, намозни ўз вақтида адо этишга, солиҳ амалларни кўплаб қилишга интилинг!

Нозимжон Ҳошимжон тайёрлади

24 сентябрь куни Ўзбекистон мусулмонлари идораси раиси, муфтий Усмонхон Алимов ҳазратлари Россия Федерацияси сафарлари давомида ўзбекистонлик меҳнат мигрантлари билан учрашиб, самимий суҳбат қурдилар.
Муфтий ҳазратларининг Россия Федерациясига қилган сафарлари шу билан якунига етди. Сафар давомидаги ўтказилган тадбирлар, учрашувлар ва давра суҳбатларида муҳокама қилинган муҳим масалалар тўғрисида сайтимизда батафсил мақола эълон қиламиз.
Бизни кузатишда давом этинг!

Ўзбекистон мусулмонлари идораси Матбуот хизмати

Ушбу расмда кўриб турганингиз колибри қушидир. Бу – қушлар оламидаги энг ноёб ва ғаройиб жонзотдир.

Уни ўрганган олимлар айтишича, ушбу қуш ўз жуфтини жалб қилиш учун қўққисдан юқоридан пастга шўнғишни амалга ошира олади. Бундай ҳаракат ҳавода бажариладиган энг тезкор манёвр бўлиб, у мана шундай тезликда манёвр қилиш бўйича қирувчи реактив самолёт ёки фазодан қайтиб, атмосфера қобиғига кираётган космик кема ҳаракатидан ҳам устун турар экан.  

Колибрилар Ер шарининг ғарбий қисмида, аниқроғи, Шимолий ва Жанубий Америкада, Аляскадан то Оловли Ер оролигача бўлган ҳудудларда яшайди.

Улар турли рангларда товланадиган чиройли қушлардир. Колибри ўзининг кескин пастга шўнғишлари, ерга тегишига оз қолганда тўхтаб, қанотларини ёзган ҳолда юқорига ҳаракатланиши билан машҳур. У бу ҳаракатларни жуфтига ёқиш учун бажаради.

Колибриларнинг 350 дан ортиқ тури бор. Уларнинг орасида узунлиги 22 сантиметрли Анд тоғларида яшовчи тури ҳам, узунлиги 5 сантиметр, вазни 1.8 грамм келадиган асалари катталигидаги колибри ҳам бор. Бундай кичик колибрилар тез-тез қурбақаларнинг озуқасига айланиб туради.

Баъзи колибрилар қанотини бир сонияда тахминан 80 мартагача, баъзилари 25 марта атрофида қоқади. Айрим турлари эса жуфтлашиш мавсумида қанотларини сониясига 200 мартагача қоқиши мумкин. Инсон бир сонияда қўлини бир марта қимирлатади. Агар у ҳам колибрига ўхшаб 80 та ёки 25 марта қимирлатадиган бўлса, қўли синиб, майдаланиб кетиши мумкин.

Колибрилар гуллар нектари, дарахтлар шираси, баъзи ўсимлик ва ҳашаротлар билан озиқланади. Уларнинг душмани бургут ва қарғалардир.

Колибри орқага ҳам уча олиши билан дунёдаги барча қушлардан ажралиб туради.

Колибриларнинг тумшуғи турлича: ингичка узун, бироз ёки кўпроқ пастга эгилган, қисқа ва жуда узун бўлади.

Уларнинг думи ҳам турли кўринишда бўлиб, баъзиларининг думи жуда узун ва шаклдор бўлади.

Ушбу кичик қушлар бир дақиқада 250 мартагача нафас олади.

Юраги эса бир дақиқада 480 мартагача уради. Тезкор ҳаракатлар чоғида юрак уриши тахминан 1260 мартагача етиши мумкин.

У ҳавода муаллақ туриб, қанотларини қоққан ва мувозанатни сақлаган ҳолда гул нектари билан озиқланади.

Инини майин шохлар, ўсимлик қолдиқларидан доира шаклида қуриб, уни ўргимчак уяси ипига қориштириб, мустаҳкамлаб чиқади. Натижада, қўйган тухуми ва полапонлари қаттиқ шохда эмас, юмшоқ инда униб-ўсишига эришилади.

Вертолётлар колибрилардан андоза олиб тайёрланган.

Хўш, колибрига ҳавода муаллақ туриб озиқланиш имконини ким берган?

Инини ўргимчак уяси ипига қориштириб, юмшоқ қилиб қуришни унга ким таълим берган?

Орқага учишни унга ким ўргатган?

Қанотларини бир сонияда бу қадар кўп қоқишни унга ким таълим берган?

Шунчалик кўп қанот қоқиш учун унга бу даражадаги қувватни ким ато этган?

Албатта, буларнинг барчасини унга Буюк Холиқ Аллоҳ таоло ато қилгандир!

У Зот Қуръони Каримда шундай марҳамат қилган:

أَلَمْ يَرَوْاْ إِلَى الطَّيْرِ مُسَخَّرَاتٍ فِي جَوِّ السَّمَاء مَا يُمْسِكُهُنَّ إِلاَّ اللّهُ إِنَّ فِي ذَلِكَ لَآيَاتٍ لِّقَوْمٍ يُؤْمِنُونَ

“Осмон бўшлиғидаги беминнат, бўйсундирилган қушларга қарамайдиларми? Уларни фақатгина Аллоҳ ушлаб туради, холос. Албатта, бунда иймон келтирадиган қавмлар учун оят-белгилар бордир” (Наҳл сураси, 79-оят).

Аллоҳ таоло бизга яратган барча махлуқотлари ҳақида тафаккур қилиб боришимизни, Ўзига бўлган ихлосимиз, муҳаббатимиз янада зиёда бўлишини насиб этсин!

Интернет маълумотлари асосида Нозимжон Ҳошимжон тайёрлади

Қуйида келтириладиган ҳадис, фикрлар ва ҳикматлар сайтлардан ва ижтимоий тармоқлардаги турли саҳифалардан олиб таржима қилинган.

Расулуллоҳ соллаллоҳу алайҳи васаллам дедилар:

«Беш нарсадан олдин беш нарсани ғанимат бил:

Қаришингдан олдин ёшлигингни;

Касал бўлишингдан олдин соғлиғингни;

Камбағал бўлишингдан олдин бойлигингни;

Банд бўлишингдан олдин бўшлигингни;

Вафотингдан олдин ҳаётингни».

*****

Иймон энг буюк неъмат. Иймонли ҳолда яшаш энг буюк ҳаёт. Иймонли ҳолда ўлиш энг бахтли ҳолда ўлишдир. Аммо иймонли ҳолда ўлиш учун иймони тақозо қилган тарзда яшаган бўлиш керак.

*****

Қалбдан чиққан нарса қалбларни тешиб ўтади. Тил учида айтилган сўз эса, қулоқдан нарига ўта олмайди.

Ҳасан Басрий раҳимаҳуллоҳ

*****

Ким Аллоҳдан қўрқса, Аллоҳ ўша бандасидан ҳамма нарсани қўрқадиган қилиб қўяди.

Ҳасан Басрий раҳимаҳуллоҳ

*****

Мўмина аёлнинг пардози

Бир мўмина аёлдан пардозланиш учун нималардан фойдаланиши ҳақида сўрадим. Қуйидагича жавоб берди:

«Ростгўйликни лабим учун, Қуръонни овозим учун, раҳм-шафқатни кўзим учун, эҳсонни қўлим учун, истиқоматни барча аъзоларим учун, Аллоҳга ихлос қилишни қалбим учун ишлатаман».

*****

Ажиб одамлар орасида яшаяпмиз.

Бировнинг ҳақидан қўрқмайдиган кимса омонатдорлик ҳақида гапирса!

Хоин кимса хиёнатнинг зарарлари ҳақида гапирса!

Қўрқоқлар шижоат ҳақида асарлар ёзиб, шеърлар битса!

Ўғри, порахўр, судхўрлар ҳалоллик ҳақида ваъз ўқиса!

Беҳаё, ярим-ялонғоч, бетгачопар аёл-қизлар иффат, уят, ибо, мулойимлик ҳақида гапирса!

Золимлар адолат ҳақида насиҳат қилса!

Ташқи кўринишида, юриш-туришида, ҳаёт тарзида маънавият, зиёнинг асари йўқ кимса маънавий юксалиш, ахлоқий фазилатлар ҳақида нутқ қилса!

*****

Инсонлар қилган ёмон ишинг сабабли ўтмишингдаги барча яхшиликларингни унутадилар.

Аллоҳ таоло чин тавбанг сабабли ўтмишингдаги барча ёмонликларингни кечиради.

«Ховатир роқия журнали»

*****

Ким бир соатлик машаққатга бардош бермаса, бир умр жаҳолат хорлигида қолади.

Асмаъий

*****

Болажоним, шараф, баъзилар ўйлаганидек, фақат жасадда бўлмайди. Балки шараф сўзларда, ваъдада, амалда, муҳаббатда ҳам бўлади.

“Тарих муҳрлаган сўзлар”

*****

Муваффақиятли шахсга ҳужум қилиш ўрнига ундан-да муваффақиятлироқ бўлишга ҳаракат қил! Ҳасад билан ҳавас ўртасидаги фарқ шудир.

 “Тарих муҳрлаган сўзлар”

Интернет материалларидан тўплаб, таржима қилувчи

Нозимжон Иминжонов