Тошкент ислом институти Кенгаши тавсиясига биноан Ўзбекистон Республикаси Олий Аттестация комиссияси институт ўқитувчиларига доцент илмий унвони бериш йўлга қўйилди.

Институт Кенгаши тавсиясига биноан доцент илмий унвони олган иккинчи ўқитувчи, Илмий ишлар ва фан бўйича проректор Примов Соатмурот Уралович бўлди.

Шу муносабат билан профессор-ўқитувчилар ва илмий ходимлар иштирокида тадбир ўтказилди. Ўзбекистон мусулмонлари идораси раисининг ўринбосари, институт ректори, профессор Муҳаммадолим Муҳаммадсиддиқов юртимизда олиб борилаётган диний-маърифий ислоҳотлар, масжидлар ва диний таълим муассасалари ташкил этилаётгани, магистратура ва докторантура босқичлари очилиши, имом-хатиб ва устозларнинг диссертация ҳимоялари жадаллашгани борасида сўз юритиб, институт ўқитувчи ва илмий ходимларини илмий-тадқиқот йўналишидаги фаолиятлари бўйича тавсиялар берди. Илмий даража олиб, унвонли ўқитувчилар сафи кенгайишининг самаралари ҳақида тўхталди.

Шундан сўнг профессор Муҳаммадолим домла  “24.00.03 – Фиқҳ, калом илми. Илоҳиёт” ихтисослиги бўйича доцент илмий унвони гувоҳномасини Соатмурот домла Примовга топширди.

Примов Соатмурот Уралович 2003 йилда Имом Бухорий номидаги Тошкент ислом институтида бакалавриат, 2008 йили Тошкент ислом университети магистратура босқичини томомлаган. Тошкент ислом институтида қарийб 20 йилдан буён фаолият юритиб, “Ақоид ва фиқҳий фанлар” кафедрасида ўқитувчи, кафедра мудири бўлиб, Илмий ишлар ва фан бўйича проректор лавозимида меҳнат қилмоқда.

С.Примов 2021 йилда Ўзбекистон халқаро ислом академияси ҳузуридаги илмий даражалар берувчи Илмий Кенгашда “Абу Шакур Кеший “Тамҳид” асарининг мотуридия таълимоти ривожида тутган ўрни” мавзусида Исломшунослик фанлари бўйича фалсафа доктори (PhD) диссертациясини ҳимоя қилди.

Маълумот ўрнида, Имом Бухорий номидаги Тошкент ислом институтининг Кенгашида тақдимномасига биноан институт тарихида илк бор “Ижтимоий фанлар” кафедраси катта ўқитувчиси Иргаш Даминовга доцент унвони берилган эди.

Тадбир сўнгида Ҳақ таолодан Соатмурот домла Примовга келажакдаги илмий фаолиятига улкан зафарлар ва Тошкент ислом институтининг илмий салоҳияти янада ривожланишини сўраб дуолар қилинди.

Ўзбекистон мусулмонлари идораси
Матбуот хизмати

Ер юзида қурилган илк масжид - Масжидул Ҳаром

Аллоҳ таоло бундай марҳамат қилади: "Одамлар учун энг аввал қурилган уй муборак ва оламлар учун ҳидоят қилиб қурилган Баккадаги уйдир" (Оли Имрон сураси, 96-оят).

"Бакка" – Маккаи мукарраманинг номларидан бири.

Ўзбекистон мусулмонлари идораси Матбуот хизмати

Ҳаёт замонавийлашган, лекин муаммолар тугамаяпти

Камбағал бўлиб қолсамчи, саратон касалига дучор бўлсамчи? деган саволлар тобора кўпаймоқда....

Ўзбекистон мусулмонлари идораси Матбуот хизмати

Ғафлатда қолманг! Жума куни бу вақтда нима дуо қилсангиз барчаси қабул бўлади.

Жума кунида шундай бир вақт борки, Аллоҳдан нимани сўрасангиз албатта ижобат қилади. Бу вақтни ўтказиб юборманг!

Ўзбекистон мусулмонлари идораси Матбуот хизмати

Cавол: “Абобил” деган қуш бор экан. У жума куни учмас экан, чунки муқаддас Маккани қўриқлагани учиб кетаркан. Бир танишим дўстлари билан шу мавзуда баҳслашибди. Дўстлар у қушнинг фақат пайшанба куни учмаслигини айтишибди. Ҳақиқатан ҳам шундай – жума куни учмайдиган қуш борми, у ростдан ҳам Маккани қўриқлайдими?

Жавоб: Бисмиллаҳир Роҳманир Роҳийм.

Дўстларингиз йўқ нарсалар ҳақида баҳс қилиб, вақтини беҳудага сарф қилишибди. Ўшандай қуш бўлган тақдирда ҳам, инсон уни қачон учиб, қачон қўнишини билгани учун савоб ваъда қилинган эмас.

Абобил сўзининг маъносида тўп-тўп, тўда, гала деган маънони англатади. Пайғамбаримиз соллаллоҳу алайҳи васаллам туғилишларидан 50 кунлар аввал Каъбани бузиш мақсадида Абраҳа қўшин тортиб келади. Аллоҳ таоло Ўз байтини ҳимояси учун тўп-тўп қушларни юборади ва улар оёқ ва тумшуқларида тош олиб келиб, душман қўшини устига ташлайди.

Аллоҳ таоло Фил сурасининг учинчи оятида “Фаарсала алайҳим тойрон абаабийл” деб марҳамат қилган.

Маъноси: “Улар устига гала-гала қушларни юборди”.

Тойр сўзининг маъноси қуш, абаабил сўзининг маъноси юқорида айтилгандек “тўп-тўп”, “гала-гала” деган маънода.

“Фокиҳатул бўстон” китобида бундай дейилган: “Қомусда: Абобил сўзи “тўп”, “жамоа” деган маънони англатади. Бу сўз кўплик шаклида бўлиб, унинг бирлик шакли йўқ. У қушлар, отлар ёки туяларнинг бир тўдаси, жамоасига айтилади”, дейилган.

Ибн Ҳишом ёзади: “Абобил сўзи гуруҳ-гуруҳ, деганидир. Араблар бу сўзни бирлик шаклида ишлатганларини кўрмадик” (“Сийратун-Набавийя” китоби).

Каъбани ҳимоя қилган қушлар ҳақида тафсир китобларимизда турли сўзлар бор. Оиша онамиз розияллоҳу анҳо уларни қалдирғочларга ўхшатганлар.

Муфассир Қатода раҳимаҳуллоҳ улар денгиз томондан учиб келган тўда-тўда қора қушлар бўлганини айтганлар. Баъзилар қизил ва қора кўршапалакларга ўхшатган. Бошқалари у қушларни Аллоҳ таоло ўша вақтнинг ўзида ҳавода яратганини айтганлар. Айрим тафсирларда умуман ҳозирги қушларда учрамайдиган кўринишлар тасвирланган. Уларни ҳозиргача сақланиб қолгани ҳақида маълумот учрамайди.

Демак, бугунги кунда Абобил номли қуш борлиги, уларнинг жума ёки пайшанба куни учиши, Маккани қўриқлаши ҳақидаги гаплар асоссиздир. Валлоҳу аълам.

Ўзбекистон мусулмонлари идораси Фатво маркази