muslimuz
Чеченистонда Aҳмат ҳожи Қодиров номидаги мадраса очилди
Чеченистон Республикаси Грозний туманида Республиканинг биринчи президенти, Россия Қаҳрамони Aҳматҳожи Қодиров номидаги мадраса очилиш маросими бўлиб ўтди. Бу ҳақда Чеченистон мусулмонлари диний бошқармаси хабар бермоқда.
Тантанали тадбирда Чеченистон Республикаси Президенти маслаҳатчиси, муфтий Салоҳ ҳожи Межиев ва қатор дин олимлари, оқсоқоллар ва маҳаллий аҳоли вакиллари иштирок этди.
Ўқув муассасаси 100 талабага мўлжалланган бўлиб, 260 квадрат метр майдонни ўз ичига олади. У ерда талабалар тўлиқ таълим-тарбия олиши учун барча шароитлар яратилган.
Мадрасанинг қурилиши Чеченистон Республикасининг биринчи президенти, Россия Қаҳрамони Aҳмат ҳожи Қодиров номидаги минтақавий жамоат фонди томонидан молиялаштирилган.
Маълумотларга кўра, бугунги кунда Чеченистон Республикасида жами 1400 дан ортиқ масжид фаолият кўрсатмоқда. Жумладан, 2023 йилда 33 та янги масжид қуриб битказилди. Шунингдек, айни пайтда 81 та зиёратгоҳ қурилмоқда.
Ўзбекистон мусулмонлари идораси
Матбуот хизмати
Сажда изи
Мўмин-мусулмонлар Аллоҳ таолога сажда қилади. Натижада уларнинг вужудида сажда изи қолади. Намозхонларнинг бу сифати дунё ва охиратдаги белгисидир. Улар шу билан бошқа пайғамбарлар умматидан ажралиб туради.
Аллоҳ таоло Қуръони каримда марҳамат қилади: “Муҳаммад Аллоҳнинг расулидир. У билан бирга бўлганлар кофирларга қаҳрли, ўзаро раҳм-шафқатлидирлар. Уларни Аллоҳнинг фазли ва ризосини истаб руку ва сажда қилган ҳолларида кўрасиз. Юзларида сажда асоратидан аломатлар бор. Бу уларнинг Тавротдаги мисолларидир...” (Фатҳ сураси, 29-оят). Тафсир китобларида “Ояти каримада Пайғамбар саллоллоҳу алайҳи ва салламга эргашган иймонли бандалар ва у зотдан кейин келадиган ер юзидаги барча мўмин-мусулмонларнинг сифати баёни келади.
Дарҳақиқат, саҳобалар Аллоҳга куфр келтирган кимсаларга, улар ҳатто энг яқин кишилар бўлсалар ҳам, ниҳоятда қаттиққўл, қаҳрли, муросасиз бўлишган, ўзларига ўхшаган иймон эгаларига эса ўта раҳм-шафқатли, ҳар бир ишда дарров ёрдам, меҳрибонлик кўрсатишган.
Яна улар Аллоҳнинг фазли ва розилигини истаб, у буюрган ибодатларни тўкис адо этишган, руку ва сажда каби арконларига тўлиқ риоя қилган ҳолда намозларини вақтида ўқишади. Улар дунё ҳаётида парвардигорига шунчалар кўп сажда қилишадики, бундан уларнинг пешонларида сажда излари қолган бўлади. Мўминларнинг мана шундай сифатлари Аллоҳ нозил қилган Таврот ва Инжил каби самовий китобларда ҳам келган...”, дейилади.
Мўмин-мусулмонлардаги сажда излари ҳақида Пайғамбар соллаллоҳу алайҳи васаллам: “Дўзах Одам боласининг сажда изинигина емайди. Чунки Аллоҳ дўзахга сажда изини ейишни ҳаром қилган", дедилар (Имом Бухорий ривояти).
Аллоҳ таоло ибодатларимизни мақбул, вужудимизда сажда изларини барқарор айласин!
Руҳиддин АКБАРОВ,
Қашқадарё вилоят вакиллиги ходими
Иорданияда Қуръон тиражи бир миллион нусхага етди
Иорданиянинг Вақфлар ва Ислом ишлари вазирлиги 1968 йилда ташкил этилганидан бери Қуръони каримнинг бир миллион нусхасини чоп этганини маълум қилди.
“Saraha News” хабарига кўра, унда жумладан бундай дейилади: “Бу Қуръон нусхалари исломий мамлакатлардан ташқари Иорданиядаги мактаб ва масжидларга ҳам тарқатилган”.
Унга кўра, бу мамлакат ҳукмдорлари кўмагида махсус қўлёзмалар нашр этилган: Мусҳаф ал-Байт, Мусҳаф Ҳошимий, Мусҳаф Малик Ҳусайн ва Иордания қироли Мусҳафи.
Иорданиянинг Вақфлар ва ислом ишлари бўйича вазири Муҳаммад ал-Халайла ушбу илоҳий китобга хизмат қилишда Қуръони карим фаолияти такомиллашганини эълон қилиб, жумладан бундай деди: “Қуръони карим нашрини қўллаб-қувватлаш ва яқин келажакда Aллоҳнинг китобини ўргатиш учун махсус эҳсон дастури ташкил этилди”.
Ўзбекистон мусулмонлари идораси
Матбуот хизмати
Исломга оид сўзлар ёзилган газета ва журналларни ташлаб юбориш
Cавол: Уйимизда турли тақвимлар, Ислом динига оид сўзлар ёзилган газеталар бор. Шуларни ташлаб юборсам гуноҳкор бўлмайманми?
Жавоб: Бисмиллаҳир роҳманир роҳийм.
Уламоларимиз ўқишга яроқсиз ҳолга келган оят ва ҳадис ёзилган китоб, газета ва журналларни покиза матога ўраб кўмилади ёки уни эҳтиромини сақлаган ҳолда ёқиб юборилади. Албатта бундан мақсад, Аллоҳ таолонинг улуғ каломи ёки Расули акрам алайҳиссаломнинг муборак ҳадислари ёзилган нарса оёқ остида қолиб кетишни олдини олишдир.
Қуръон оятлари ёки Аллоҳ таолонинг ва Расулуллоҳ соллаллоҳу алайҳи васалламнинг муборак исмлари ёзилган қоғозларни кўмишда ҳам ўша китоб ёки варақларнинг юзига тупроқ тортилмасдан худди вафот этган инсонни дафн қилингани каби чуқур қазиб, сўнг ён тарафидан ғовак ковлаб ўша ерга худди токчага қўйгандек кўмилиши керак, дейдилар уламоларимиз. Аллома Ҳаскафий раҳимаҳуллоҳ айтадилар:
“Фойдаланиб бўлмайдиган китоблардан Аллоҳ таолонинг фаришталар ва Пайғамбарларнинг исми ўчирилади ва ёқиб юборилади. Ўчирмасдан туриб ҳам оқар сувга оқизиб юборишнинг зарари йўқ. Кўмиш ҳам мумкин. Кўмиш энг афзал йўлдир. Зеро, анбиёлар ҳам дафн этилганлар” (“Дуррул мухтор” китоби).
Аллома Ибн Обидин раҳимаҳуллоҳ Ҳаскафийнинг мазкур гапларига қуйидагиларни қўшимча қилганлар:
“Шунингдек, эскириб, чириб, яроқсиз ҳолга келиб қолган барча китобларни кўмиш афзал саналади. Бунда китобни эҳтиром қилишга зид ҳолат йўқ. Чунки инсонларнинг энг афзаллари ҳам ерга дафн қилинган” (“Раддул муҳтор” китоби). Валлоҳу аълам.
Ўзбекистон мусулмонлари идораси Фатво маркази.
Аллоҳнинг ҳузурида обрўли эди…
Баъзи одамлар сизни тақводор деб ўйлаши мумкин…
Яна баъзилар нотавон, ёмон одам деб ҳисоблаши мумкин…
Хуллас, сиз ҳақингизда ҳамма ҳар хил гап гапиради, лекин сиз ўзингиз қандайлигингизни ўзингиз биласиз. Сиздан бошқа биров билмайдиган ягона сир бу Роббингиз билан алоқангиз сиридир!
Шундай экан, маддоҳларнинг мақтови сизни алдаб қўймасин ва айбловчиларнинг таъна-дашномлари зарар бермасин! “Ҳа, инсон ўз нафсига қарши ўзи шоҳиддир. Гарчи узр-маъзурларини тўкиб соладир” (Қиёмат сураси, 14-15-оятлар).
Абул Утоҳия ўлим ёқасида туриб ёзган шеъри сўнггида Аллоҳга истиғфор айтиб бундай сатрлар битган:
Мени қаттиқ азобга тутмагин, Роббим,
Хато экан иқрорман, мен юрган йўлак.
Ҳузурингда йўқдир мутлақо чорам,
Афву марҳаматингга умиддан бўлак!
Қанча қоқилсам ҳам раҳм айладинг,
Мени азобга дучор этмадинг дарҳол.
Энг ёмон одамман афв этмасанг,
Одамлар-чи ўйлар: “Бу энг яхши ҳол”.
Роббингиз сиздан хоҳлаганидек бўлинг, сиз хоҳлаган нарсалар рўёбга чиқади. Аллоҳ таолонинг қуйидаги оятини тафаккур қилинг: “Ва у Аллоҳнинг наздида обрўли эди” (Аҳзоб сураси, 69-оят).
Оятда “Аллоҳнинг наздида” дейилди, “одамлар наздида” дейилмади.
Зеро, ҳақиқий обрў одамлар наздидаги обрў эмас!
Шундоқ экан, фақат ташқи кўринишингизга эътибор қаратиб, қалбингиз ва руҳиятингизни ислоҳ қилишни унутиб қўйманг!
Ҳақиқий обрў – Аллоҳнинг наздида обрўли бўлишдир. Бу эса Аллоҳга яқин, Унга итоатли бўлишингиз, қалбингиз ва амалларингизни ислоҳ қилишга эътибор беришингиз орқали бўлади. Одамлар сизни таниши ҳам шарт эмас.
Муҳими Аллоҳнинг ҳузурида тоатингиз, одамларга қилган яхшиликларингиз билан таниқли бўлишингиздир.
Одамлар қадрингизни билишмаса хафа бўлманг, Аллоҳнинг наздидаги қийматингизга боқинг, одамларнинг гап-сўзини қўйинг!
Доктор Ҳассон Шамси Пошонинг "Метин қоялар" китобидан
Ғиёсиддин Ҳабибуллоҳ, Неъматуллоҳ Исомов таржимаси.
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.