muslim.uz
Ўзбекистон ва Саудия Арабистони олий ўқув юртлари ўртасида ҳамкорлик шартномаси имзоланди
Саудия электрон университетида Алишер Навоий номидаги Тошкент давлат ўзбек тили ва адабиёти университети раҳбарияти билан учрашув бўлиб ўтди.
Меҳмонлар университет биносини кўздан кечириб, талабаларга яратилган шароитлар билан танишди.
ЎзА хабарига кўра, Алишер Навоий номидаги Тошкент давлат ўзбек тили ва адабиёти университети ва Саудия электрон университети ўртасида ҳамкорлик шартномаси имзоланди. Бу ўзбек тили ва адабиёти университети талабалари нуфузли хорижий электрон университетнинг «Интернет орқали араб тилини ўрганиш» дастуридан фойдаланиш, араб тилини чуқурроқ эгаллашига имконият яратади.
– Интернет орқали араб тили дастури ўзга тилда сўзлашувчиларнинг араб тилини ўрганишга бўлган эҳтиёжини қондиришга мўлжалланган бўлиб, араб тили ўрганишни ҳеч қандай замон ва географик маконга боғламаган ҳолда ташкил қилиш имкониятини яратади, –дейди Алишер Навоий номидаги Тошкент давлат ўзбек тили ва адабиёти университети Шарқ тиллари кафедраси доценти Муртазо Сайдумаров. – Ушбу тизим кўп сонли талабалар учун таълим харажатларини тежаш имкониятини беради.
Учрашувда Электрон университетнинг хизматларидан фойдаланишни кўзда тутувчи тизим қулайликлари ва талабалар учун имкониятлари ҳақида Саудия электрон университети ректори, доктор Лайлак бинт Аҳмад ас-Сафадий батафсил маълумот берди.
Саудия электрон университети Саудия Арбистонида 2011 йили таъсис этилган давлат олий таълим муассасаси ҳисобланиб, у масофадан таълим олишни ва узлуксиз таълимни биринчи бўлиб йўлга қўйган. Университет бакалавр, магистрлик ва докторлик даражаларини бериш билан бирга узлуксиз таълим бўйича курслар ташкил қилади.
Ўзбекистон мусулмонлари идораси матбуот хизмати
Лангар ота масжиди ҳақида эшитганмисиз?
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Қашқадарё вилоятида тарихий ёдгорликлар, меъморий обидалар, қадамжолар талайгина.
Уларнинг аксари нафақат юртимизда, балки дунё миқёсида ном таратган сайёҳлик объектлари қаторига киради. Ана шундай зиёратгоҳлардан бири Қамаши туманининг Лангар қишлоғида денгиз сатҳидан минг метр баландликда барпо этилган Лангар ота масжиди ва Шайх Абулҳасан мақбарасидир.
Қизилтепа қишлоғидан 25-30 километр олисликда, Ҳисор тоғ тизмалари оралиғидаги Лангар қишлоғида жойлашган қадимий масжид айрим ёзма манбалар ҳамда оғиздан-оғизга ўтиб келаётган ривоятларга кўра, ХIV аср охирида Шайх Абулҳасан асос солган. У Бухородан иршод хатини олгач, ушбу манзил томон йўл олган экан.
Шайхнинг пири у кишига «Минган туянгиз учинчи марта чўккан жойда масжид барпо этинг» деган экан. Туяси сўнгги бор ҳозирги Лангар қишлоғи, яъни масжиднинг ўрнига чўкибди ва Шайх Абулҳасан шу ерга масжиднинг пойдеворини қўйибди. Маҳаллий аҳоли у кишига мурид бўлиб, масжид қурилишида кўмаклашган экан.
Ушбу масжидда куфий хатида битилган Қуръони каримнинг Ер юзидаги энг мўътабар нусхаларидан бири - Катта Лангар Қуръонининг факсимили нусхаси сақланади.
Масжид 2 та хонақоҳ, 1 айвон, 4 меҳроб, 19 та устун ва 7 эшикдан иборат. 2 та хонақоҳи катта масжид ва кичкина масжид деб номланади. Аввал кичкина масжид қурилган, намозхонлар кўпайганлиги сабабли кейинчалик катта масжид ва айвони қурилган. Лангар ота масжиди ислом олами меъморчилик санъати билан маҳаллий халқ ҳунармандчилик услублари уйғунлигида барпо этилган. Бу меъморий обидани Марказий Осиёда ягона десак муболаға бўлмайди.
Масжид томининг баландлиги, пойдеворига қўйилган тошларнинг улканлиги, устун ва ёғочларнинг қучоққа сиғмаслиги уни ўта маҳобатли қилиб кўрсатади. Масжид катта хонақоҳининг устуни тепасида ҳижрий 1362 йил (милодий 1905 йил)да уста Муҳаммадиёр томонидан таъмирлангани ёзилган. Масжид баландлиги 11 метр, бўйи ва эни 32 метрдан. Масжид шифтига вассажуфт тахланган. Унинг меҳроб қисми нозик дид ва юксак маҳорат билан безатилган.
Меҳроб атрофи сулс ёзувидаги битиклар билан тўла. Шунингдек, мовий фонга оқ рангли ёзувлар битилган ранг-баранг кошинлардан яратилган ажойиб мозаика киши диққатини ўзига жалб қилади. Бундан ташқари, зарҳал девор бўйлаб икки хил ёзув: арабча ҳамда оддий нақшга ўхшаб кетадиган номаълум ёзувлар муҳрланган.
Юқоридагиси қандай имлолиги, безакми ё рамзий белгиларми – маълум эмас. Қизиғи шундаки, улар тўғри чизиқлардан ҳосил қилинган бўлиб, кўпи свастика шаклидадир. Бундай рамзлар қадимги туркий халқлар буюмларида, лавҳаларда кўп учрайди. Мутахассисларнинг фикрича, бу безаклар Кўк турк подшоларининг ишоралари, аниқроғи давлат рамзлари экан.
ЎзА
ҲАМДАРДЛИК БИЛДИРАМИЗ
Ўзбекистон мусулмонлари идораси жамоаси Наманган вилоят вакиллиги мутахассиси, узоқ йиллар давомида ҳаж ва умра тадбирларида вилоят ҳожиларига хизмат қилиб келаётган Абдуллоҳ ака Каримовга волидаи муҳтарамасининг вафоти муносабати билан чуқур таъзия изҳор этади.
Аллоҳ таоло марҳум онахонни Ўз мағфиратига олсин! Ғариқи раҳмат, шоистаи жаннат, охиратларини обод қилсин! Барча яқинларига сабру жамил ато айлаб, ажру мукофотларини кўпайтириб берсин!
Иннаа лиллааҳи ва иннаа илайҳи рожиъун!
Расулуллоҳ соллаллоҳу алайҳи васаллам ҳаётларидан лавҳалар: Инсонларга манфаат етказиш (Аудио)
ЎМИ матбуот хизмати
Тошкент туманидаги «Ҳазрати Билол» жоме масжиди қайтадан қурилиб, илк жума намози адо этилди
Аллоҳга шукрлар бўлсинки, бугун юртимизнинг кўпгина масканларида мўмин мусулмонлар учун кўркам ва замонавий, барча шароитларга эга бўлган масжидлар қурилиб, фойдаланишга топширилмоқда.
Кеча 11 сентябрь куни Тошкент вилояти Тошкент туманидаги улуғ саҳобий номи билан аталган «Ҳазрати Билол» жоме масжиди ҳам қайтадан қурилиб фойдаланишга топширилди. Бугун ушбу масжидда мўмин мусулмонларимиз илк жума намозини жамоат билан адо қилишди.
Ушбу масжиднинг қурилиш ишлари 2018 йилнинг ёз фаслида бошланган бўлиб, ҳозирда янги қурилган масжид 1050 нафар намозхонни ўз бағрига сиғдира олади.
Бундан ташқари «Ҳазрати Билол» масжидида замонавий таҳоратхона қуриб битказилган. Шунингдек, масжид ҳовлисининг том қисми ҳам ёпилган. Бу эса мусулмонларнинг ёғингарчилик пайтида ҳам ўз ибодатларини тўла тўкис адо қилишлари учун қулай шароитлардан биридир. Ҳозирда масжид кутубхонаси, қоровулхона, имом ноиб ҳамда имом хатиб хоналарининг қурилиш жараёни давом этмоқда.
Авваллари ушбу масжид мўмин мусулмонларнинг ибодат қилиши учун яроқсиз ҳолатга келиб қолган эди, дейди масжид имом хатиби Аҳмаджон домла Шамсихўжаев. — Масжид асосан ҳашар йўли билан қайтадан қурилди. Бугун замон талабларига тўла жавоб берадиган масжид барпо этилди. Масжидимиз қурилишида кўмакдош бўлган барча юртдошларимиздан Аллоҳ таоло рози бўлсин! Ҳақ таоло икки дунё саодатидан баҳраманд қилсин!
Тошкент вилояти вакиллиги матбуот хизмати
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.