www.muslimuz
Самарқандда Ҳажга борувчилар учун ўқув-семинари ташкил этилди
Маълумки, юртимизда ҳар йил Ҳаж ва Умра ишлари юқори савияда ташкил этилади. 2017 йилдан бошлаб 7200 та ҳамюртларимиз Ҳаж амалини адо этиш бахтига муяссар бўлиб келмоқдалар. 2019 йил Ҳаж ибодатини амалга ошириш учун Самарқанд вилоятидан 450 нафар фуқаролар Саудия Арабистони мамлакатига жўнаб кетадилар.
Ҳаж ишларини янада юқори савияда ташкил этиш, Самарқанд вилоятидан Ҳаж сафарига борувчилар учун ибодатга доир малака ва кўникмаларни шакллантириш мақсадида ўқув-семинар ҳамда зиёрат ташкил этилди. Ушбу ўқув-семинар ва зиёрат 9 кундан иборат бўлиб, Ҳаж амалини адо этувчи 450 нафар номзодлар 50 кишидан 9 та гуруҳга бўлинган ҳолда машғулотларда иштирок этадилар.
22 июнь куни мана шундай ўқув-семинарнинг биринчиси ташкил этилди. 50 нафар семинар иштирокчилари ўзларига бириктирилган гуруҳ раҳбари ҳамкорлигида Самарқанд вилоят вакиллиги биносидан махсус ажратилган автобусда Имом Бухорий мажмуасига йўл олдилар. У жойда дастлаб Имом Бухорий ҳазратларининг қабрлари зиёрат қилиниб, ҳақлари тиловат ва дуолар ўқилди.
Шундан сўнг Имом Бухорий номли олий ҳадис мактаби ва халқаро илмий тадқиқот маркази фаолияти билан танишув бўлиб ўтди. Имом Бухорий халқаро марказининг йиғилишлар залида Ҳаж ва Умра зиёратини бажариш бўйича тайёрланган видео қўлланма монитор орқали намойиш этилган ҳолда ўқув машғулоти ўтказилди. Жума намози адо этилиб, тушлик қилинганидан сўнг ўқув-семинар қатнашчилари Самарқанд шаҳрига келиб, биринчи Президентимиз И.А.Каримов қабрлари ва "Ҳазрати ҳизр" мажмуасини зиёрат қилдилар.
Бу каби ўқув машғулотлар орқали кўникмага эга бўлган зиёратчиларда ўз ибодатларини янада мукаммал ва бекамикўст бажаришлари учун малака ҳосил бўлиши шубҳасиздир. Ўқув-семинар давом этмоқда.
Ўзбекистон мусулмонлари идораси Матбуот хизмати
Ўзбекистон Уммонга қовун ва шафтоли етказа бошлади
Ўзбекистон Уммоннинг халқаро логистика компанияси ASYAD билан бирга Уммон пойтахти Маскатга ҳўл меваларнинг синов партиясини етказди. Айни вақтда Уммонга самолёт билан 200 кг га яқин шафтоли ва қовун етказилган.
25 июнда Ўзбекистоннинг Маскатдаги элчихонасида бу лойиҳага бағишланган кўргазма-тақдимот бўлиб ўтди. Тадбир давомида Уммон Ўзбекистонда етиштирилган ҳўл мевалар экспорти учун устувор йўналишлардан бири ҳисобланиши таъкидлаб ўтилган.
Кўргазмада Баҳрайннинг Уммондаги элчиси Жума ал-Кабий, Баҳрайн савдо-саноат палатаси делегацияси, БАА, Қатар, Atyab foodtech, Al-Hosn, Al Hamdani group компаниялари ҳамда Уммоннинг бир қатор йирик дистрибьюторлари вакиллари иштирок этишган.
ASYAD вакиллари ўзбек мева-сабзавотларининг Форс кўрфазига етказилиши ва тарқатилиши бўйича хаб ташкил этиш учун барча зарур шароитларни тақдим қилишга тайёрликларини таъкидлаб ўтишган.
БАА ва Баҳрайн вакиллари ўзбек меваларининг таъмини юқори баҳолашган ва ўзбек қишлоқ хўжалиги маҳсулотларининг Уммондан ўз давлатларига реэкспорт қилиш истиқболларини муҳокама қилишга тайёрликларини билдиришган.
Томонлар, шунингдек, ўзбек маҳсулотларини етказиб беришнинг янги ва самарали йўналишларини излаш бўйича фикрлар алмашишган.
Ўзбекистон мусулмонлари идораси Матбуот хизмати
МЎМИН НАСИҲАТГА РИОЯ ҚИЛАДИ
Жобир ибн Абдуллоҳ разияллоҳу анҳудан ривоят қилинган ҳадиси шарифда, Ҳазрати Пайғамбаримиз соллаллоҳу алайҳи ва саллам: “Мўмин мўминнинг биродаридир, ҳеч бир ҳолатда унинг насиҳатини ерда қолдирмайди”. (“Жомиъ ас-сағир” 2/157), деб марҳамат қилганлар.
Динимизда мўминлар бир-бирлари билан ака-ука кабидирлар. Шундай экан, мўминлар ўртасидаги ҳақиқий муносабат туғишган биродарлари билан қиладиган муносабати каби бўлиши керак. Ҳатто зиёдароқ бўлиши лозим. Шу сабабдан биродарини севмоқ, унга гўзал муомала қилмоқ, унинг олдида камтар бўлмоқ, ўзининг ва ака-укасининг обрўсини ҳимоя килгани каби унинг ҳам шарафини ҳимоя қилмоқ мўъминлик, биродарлик шартларидандир.
Бундай биродарлик Расулуллоҳ соллаллоҳу алайҳи васаллам ҳазратлари Мадинага борган вақтларида саҳобаи киром ўртасида тадбиқ этилган. Бундай самимий биродарликни дунё бир маротаба кўрди. Яна бир бор кўриши, балки, фақат жаннатда насиб этар. Чунки бу биродарлик Маккада бор-йўғини қолдириб, фақат Аллоҳнинг розилиги учун ҳижрат қилган маккалик муҳожирлар билан уларни қучоқ очиб кутиб олган Ма-дина халқи – ансорлар орасида юзага келди. Исломга ёрдам берганлари учун мадиналик мусулмонлар ансор – ёрдамчи дейилди. Мадиналик ансор маккалик муҳожир биродарига бор-йўғини топшириб, ҳақиқий биродарлик муомаласи қилган бўлсалар ҳам, аҳли Макка – муҳожирлар ўзларига кўрсатилган бу инсоний биродарликка миннатдорлик билдириш билан бирга, биродарларига ортиқча юк бўлмаслик учун савдо-сотиқ би-лан шуғуллана бошладилар. Бироз вақтдан сўнг эса уларнинг ўзлари бошқа муҳтожларга ёрдам бера бошладилар. Муҳожирлардан ҳазрати Абдурраҳмон ибн Авф (Аллоҳ ундан рози бўлсин) Шом сафаридан келган савдо молларини туялари билан бирга Мадина камбағалларига эҳсон қилганлар.
Маълумки, инсон нуқсондан холи эмас. Аммо мусулмон ўз биродаридаги баъзи камчиликларни шартта юзига солмайди. Балки муносиб бир вақтда муносиб бир забон билан ҳамда танҳо бир жойда айтади ва насиҳат қилади. Биродарининг ха¬тою камчиликларини ошкор айтиш жоҳилларнинг ҳаракатидир. Зеро, бунинг фойдадан кўра зарари кўпроқ бўлади. Чунки ўртада ҳасад, кин-адоват, жанжаллар келиб чиқиши мумкин. Шунинг учун насиҳат қилувчилар, мутлақ танҳо бир жойда, ширин тил билан ўзининг камчиликларини ҳам бироз мисол келтириб, уни ўзидан совутиб, узоқлаштирмайдиган даражада ўгит беришлари лозим. Ҳар ҳолда, барчамиз насиҳатга муҳтожмиз.
Бир-биримизни тўғри кузаттан ҳолда тўғри йўлга чақиришимиз ҳам динимиз амри, ҳам дунёю охиратимизнинг саодати учун зарурдир. Файёзи Мутлақ ҳаммамизга шундай гўзал хулқ эгаси бўлмоғимизни насиб айласин.
Шайх Муҳаммад Зоҳид Қўтқунинг
“Мўминнинг сифатлари” китобидан
Қуръон ила сафар
Аввал, юртимиздаги қироат илми олимларидан энг машҳури бўлган Алижон қори Файзуллоҳ Махдум ўғлининг “Қуръон қалб шифоси” мавзусидаги туркум маърифий суҳбатларини muslim.uz сайтида намойиш этиш ҳақида хабар берган эдик.
Ушбу лойиҳамиз муқаддимасида мусулмон дунёсида машҳур бўлган, энг нуфузли қори устозлар чиқадиган «Аҳлул Қуръан» телеканалида намойиш этилган Алижон қори Файзуллоҳ Махдум ўғлининг таржима ҳоли тўғрисидаги маълумотларни эътиборингизга ҳавола этамиз.
Маълумот ўрнида, «Аҳлул Қуръан» («Қуръон аҳли») канали — Қуръони каримни ўргатиш, унга хизмат қилиш, Қуръон ихлосмандларининг унга бўлган муҳаббатини ошириш, Қуръон ахлоқи билан хулқланишга чорлаш, Қуръонни ёйиш орқали динни етказиш жараёнларини амалга ошириш ва бу билан «Мендан бир оят бўлса ҳам етказинглар!» деган муборак ҳадиси шарифга амал қилишга қаратилган сунъий йўлдош орқали намойиш этиладиган телеканалдир.
Ушбу каналнинг мақсадлари:
1. Одамларга Аллоҳ азза ва жалланинг Китобини севдириш.
2. Қуръонни ўрганиш ва ўргатишга қизиқтириш.
3. Қуръони каримга хизмат қилиш услубларини ривожлантириш.
4. Қуръон ҳофизларини халққа кўрсатиш, танитиш, икром қилиш, жамият орасида обрў-эътиборларини юксалтириш.
5. Одамларнинг Қуръонни тушуниш салоҳиятини, онгини ўстириш.
6. Одамларни Қуръонга боғланиш, нафсни поклаш ва Қуръони ҳаёт кечиришга ундаш.
7. Қуръон эъжозлари ва хоссатан, унинг илмий эъжози ҳақида инсонларга маълумотлар тақдим этиш.
Каналнинг мақсадларини амалга оширишда қуйидаги омиллар ишга солинади:
1. Саҳиҳ тиловат ва қироатларда моҳир, пухта бўлган қироат устозларининг ҳаёт йўлларини намойиш этиш.
2. Қуръон таълимига ихтисослашган турли ўқув курслари, марказлар фаолияти ҳақида ҳикоя қилиш.
3. Гўзал овоз соҳибларининг тиловатларини бериб бориш.
4. Қуръони карим таълими бўйича янги-янги услублар билан халқни таништириб бориш.
5. Қуръони карим мусобақалари ҳақида маълумот берувчи репортаж ва кўрсатувлар бериб бориш.
6. Қуръон ҳофизлари, хусусан, кичик болалар орасидаги ғаройиб қориларнинг маҳоратларини халққа намойиш этиш.
7. Катта устозларнинг Қуръонни ўрганиш ва ўргатиш борасидаги тажрибаларидан халқни хабардор қилиш.
8. Қуръони каримга ҳар куни амал қилиш бўйича йўл-йўриқ ва кўрсатмалар, кунлик дастурларни тақдим этиб бориш.
9. Қуръонга муҳаббатли болалар, аёллар, ишчилар ва бошқа шахсларнинг дил сўзларини эшиттириш.
Ушбу видео-суҳбатни қуйидаги тамоша қилишингиз мумкин.
Tas-ix: https://mover.uz/watch/yBe5CfDm/
Youtube: https://youtu.be/f_DkO_KfOrA
Ўзбекистон мусулмонлари идораси Матбуот хизмати
“Ҳаж-2019”: гуруҳ раҳбарлари учун йиғилиш ўтказилди
Жорий йилнинг 25 июнь куни Тошкент шаҳридаги “Шайх Зайниддин” жоме масжидида “Ҳаж-2019” мавсумида зиёратчиларга хизмат кўрсатувчи гуруҳ раҳбарлари учун йиғилиш бўлиб ўтди.
Унда Тошкент шаҳри ва Тошкент вилояти, Сирдарё, Жиззах ҳамда Самарқанд вилоятлари зиёратчиларига хизмат кўрсатувчи жами 44 нафар гуруҳ раҳбари қатнашди.
Мазкур тадбирда Дин ишлари бўйича қўмита масъул ходимлари М.Йўлдошев, Д.Бабаджанов, ЎМИ Халқаро алоқалар бўлими мудири М-А.Шакиров, тиббиёт гуруҳи раҳбари А.Саатов томонидан Ҳаж мавсуми давомида ўзбекистонлик зиёратчиларга хизмат кўрсатувчи гуруҳ раҳбарларига керакли тавсия ва маслаҳатларни беришди.
Шуниндек, йиғилишда гуруҳ раҳбарларининг бурч ва масъулиятлари, ҳаж ибодатининг рукнлари, зиёратчиларнинг ибодатини мукаммал ташкил этиш чоралари, сафарга жўнаб кетиш ҳамда Саудия Арабистонидаги ташкилий ишлар ҳақида атрофлича маълумот берилди.
Ўз навбатида, гуруҳ раҳбарларига сафар билан боғлиқ ҳужжат ишлари, гуруҳдаги зиёратчиларнинг паспорт ва бошқа ҳужжатларини юритиш қоидалари борасида ҳам керакли эслатмалар берилди.
Гуруҳ раҳбарлари учун ташкил этилган мазкур тадбирда, яна бир муҳим жиҳатга алоҳида эътибор қаратилди. Яъни, зиёратчиларнинг соғлиғини муҳофаза қилиш, доимий равишда уларга ўз саломатликларини асраш борасида муҳим кўрсатма ва маслаҳатлар бериб туриш кераклиги таъкидланди.
Йиғилиш якунида мутасаддилар гуруҳ раҳбарлари томонидан берилган барча саволларга батафсил жавоб бердилар.
ЎМИ Матбуот хизмати