Келинг эй рўзадорлар, бирга ифтор этайлик, 
Беҳуда сўзни ташлаб ширин гуфтор этайлик. 

Ўлтириб дастурхон атрофида ёронлар, 
Шукрони неъмат айлаб, қуллик изҳор этайлик. 

Саҳар туриб Худога тавба тазарруъ айлаб, 
Нури имонимизни соф, беғубор этайлик. 

Рўзани амр этибдур Исломга Ҳақ таоло, 
Адо этиб бу фарзни талаб дийдор этайлик. 

Сабр ила бу кечирган очлик ва ташналикдан, 
Ибрат олиб муҳтожлар кўнглин шуккор этайлик. 

Моҳи шариф келганда журму-хатодин ўзни, 
Сақлаб қилиб ибодат, таввоб саййор этайлик. 

Рўза билан баробар нафс йўлини беркитиб, 
Гуноҳ лойига ботмай элни ҳушёр этайлик. 

Рўзани ажрини хос Тангри Ўзи берармиш, 
Дамни ғанимат айлаб, тоатни ёр этайлик. 

Бир кечани бу ойда пинҳон этибдур Субҳон, 
Истаб ани ёронлар ўзни бедор этайлик. 

Фазилати бу кечани қадри минг ойга тенгдир, 
Муборак хислатини хўп эътибор этайлик. 

Аллоҳнинг изни бирла фаришталар тушарлар, 
Алар билан баробар тасбеҳ такрор этайлик, 
Ҳушнудни ҳам қаторда соҳиб асрор этайлик. 

Зарифа Маҳкам қизи оққа кўчирди. 

Рамазон – ўзи билан боғлиқ ширин-ширин хотираларни ҳар дамгидан ҳам ёрқинроқ ёдга соладиган ажиб фурсат.

Қўлчаларидан бирида пул, биттасида идишни маҳкам ушлаб, кўча бошига нишолда олишга кетаётган бола қалбидаги қувончдир Рамазон.

Нимагадир қоқиниб, қўлидаги нишолда ер билан битта бўлган гўдакни турғизиб, уст-бошини қоқиб, яна бошқа косага нишолда тўлдиртириб берган бобо ҳақидаги хотиралардир.

“Бирпасда тугаб қолди-я рўза”, деб кўзёш тўкаётган бувисини кўриб: “Эртага ҳайит бўладиган кунда ҳам йиғлайдими?” дея ўйланаётган кичкинтой кўзидаги ҳайратдир Рамазон.

Катталарнинг мурғак кўнгил иштиёқини сўндирмаслик учун “Ёш болалар рўзани иккига бўлиб тутади”, деган гаплари сабаб тушда қорнини тўйғазиб, ифтор пайтида ҳамма билан бирга оғиз очаётган кичкинтой қалбида кўз очган ибодатга муҳаббатдир.

Ифторлик дастурхонига тайёрланган таомларнинг ёқимли иси димоғини қитиқласа ҳам, бобоси гапига кириб одоб сақлаб ўтирган болакайда шаклланаётган сабр кўникмасидир Рамазон.

Бир ой давомида ифторликка тансиқроқ нарса пишириш учун эринмай супра очадиган онаси, опалари қаватида кичкина жўвасида жиддият билан сомсага хамир ёяётган қизчанинг уринишларидир.

Қадр кечаси ухламай чиқиш яхшилигини ўзича тушуниб, эрталабгача ўтиришга қарор қилган, бироқ ифтордан кейиноқ ухлаб қолган, тонг отганида уйғониб ўксинаётган сабийни қучиб тасалли бераётган онанинг жонга малҳам сўзларидир Рамазон.

Бобоси, дадаси, амаки-тоғаси, акалари берган ҳайитлик пулларига орзу қилган қўғирчоғини олиш учун шошаётган, эгнидаги янги атлас кўйлагининг шитирлашига қувониб чопаётган қизалоқнинг шодликларидир...

Аслида шулар эмасми ҳали жуда кичкиналигимиздан мурғак кўнгилларимизда Рамазонга муҳаббат уйғотган? Ана шу хотиралар эмасми бизга Рамазонни янада азиз, янада севимли қилган? Боболаримиз, бувиларимиз, ота-оналаримиз, ёши улуғларимизнинг энг катта хизматларидан биттаси шу экани рост-ку!

Энди ўзимиз ҳам катталар қаторидамиз. Фарзандларимиз қалбида Рамазонга, рўзага иштиёқ, муҳаббат, шавқни шакллантириш, улар ёдида энг гўзал хотираларни қолдириш бизнинг зиммамизда. “Бунинг учун ундай қилишимиз керак, бундай қилмоғимиз лозим”, дейишга эса ҳожат йўқ. Болалигимиз Рамазонлари билан боғлиқ хотираларни, катталарнинг хатти-ҳаракатларини эсласак, кифоя.

Рамазонни ҳурматига муносиб ўтказиш, жажжи кўнгилларда бу ой билан боғлиқ энг гўзал таассуротларни қолдириш барчамизга насиб қилсин!

Зумрад Фозилжон қизи

Бугун, 2 июнь, муборак Рамазон ойининг мағфират даҳаси, 17-кунидир. Тошкент шаҳридаги бир неча жоме масжидларда бу кеча Қуръони Карим хатмонаси яъни, Каломуллоҳнинг сўнгги суралари ўқилиб, чин ихлос ила дуолар қилинади.

Бугун Тошкент шаҳридаги қуйидаги учта масжидда Қуръони Карим хатмонаси якунига етади:

1. “Тўра бува” жоме масжиди. (Мирзо Улуғбек тумани, Султония кўчаси, 70а-уй. Тел.: +998 71 264 03 31)
Қорилар: Усмонов Шахобиддин Нуриддинович, Юнусов Абдурашид Анварович, Мирхабибов Миркамол Миразиз ўғли

2. “Мевазор ” масжиди.
(Манзил: Олмазор тумани, Намуна маҳалласи, Қизилқўшин кўчаси, 10а-уй.. Тел.: +998 71 240 17 45, +90 987-19-81)
Қорилар: Исломов Ёрбек Зокирович, Холматов Воситжон Вахидович, Абдумажидов Абдухамид Абдупаттох ўғли

3. “Масжидул хайр” жоме масжиди. (Юнусобод тумани, Бободеҳқон маҳалласи, Мирзаобод кўчаси, 74-уй. Тел.:+998 71 223-88-08, 212-81-59, +90 922-79-69,)
Қорилар: Маҳмудхонов Муҳаммад Исохон Маҳмуд ўғли

Хатми Қуръондан кейинги дуолар мустажобдир. Рамазоннинг энг баракотли онларини қўлдан бой берманг азизлар.

ЎМИ Тошкент шаҳар вакиллиги Матбуот хизмати

Ставрополь ўлкаси мусулмонлари идораси бошқармасида ўлка муфтийси Муҳаммад ҳожи Раҳимов ва Ўзбекистон мусулмонлари идораси раиси маслаҳатчиси Абдулҳамид Турсун ўртасида учрашув бўлиб ўтди.
Муҳаммад ҳожига Ўзбекистон мусулмонлари идораси раиси, муфтий Усмонхон Алимов ҳазратларининг дуои саломларини етказган Абдулҳамид Турсун домла ушбу ташриф қардош халқларнинг дўстона алоқаларини янада мустаҳкамлаш, диний-маънавий ришталарнинг янада мустаҳкам боғланишига, мусулмонларнинг беҳад қувончига сабаб бўлишини билдирди.
Ўз навбатида муфтий Муҳаммад ҳожи Раҳимов Ставрополь ўлкаси мусулмонлари идораси фаолияти, ислом ва православь жамоаларининг ўзаро алоқалари, ўлкадаги маданий-миллий автономиялари ва диаспоралари билан ишлаш борасида сўзлаб берар экан, жумладан, бундай деди: “Бугунги кунда халқаро терроризм ва экстремизмга қарши самарали курашиш учун жамики миллий ва диний жамоатлар бирлашмоқлари даркор”.
Суҳбат чоғида ёшлар тарбияси масаласига алоҳида эътибор қаратилиб, уларга ислом таълимотининг асл моҳиятини тушунтириш, ёш авлодни ислом маданиятининг беқиёс қадриятлари билан ошно қилиш масалалари юзасидан ҳам фикр алмашилди.

Ўзбекистон мусулмонлари идораси Матбуот хизмати

Ёрдам қўлини чўзиш – савобли амал

Аллоҳга шукр-ки, ўлкамизда тоат-ибодат, қут-барака ойи – рамазони шариф яхши кайфиятда ўтмоқда. Унинг фазилатларидан барчамиз баҳра оляпмиз, имкон қадар кўп ва хўб ибодатлар қилишга ошиқяпмиз. Бир оз хотиржамроқларимиз одатий амалларимиз ила чекланаётган бўлсак, шижоатлиларимиз имкон борида кўп савобли ишлар қилиб қолишга интиляпмиз. Илло, барчамизга аёнки, бу ойда қилинган нафл ибодатининг ажру савоби – фарз амалнинг ажру мукофотига тенглаштирилган, яна шу ойдаги ҳар бир эзгу амалнинг савоби етти юз баробаргача кўпайтириб берилиши башорат қилинган. Бу ойнинг меҳмон эканини билганлар “бир кўнгли бузуқнинг хотирин шод айлаш”га, ёрдамга муҳтож юртдошларимизни йўқлаб, улардан ҳол-аҳвол сўраб, яхши гаплар билан кўнглини кўтариб эса-да ажр олишга шошади. Яна кимдир зиммасидаги масъулиятни зиёдаси билан адо этишга ҳаракат қилади. Бир сўз билан айтганда, бу ойда имонли одамларнинг ҳамма-ҳаммаси одатдагидан ҳам меҳрибон ва масъулиятли бўлиб қолади.

Ана шундай ғанимат ойнинг раҳмату мағфират даҳаларида Ўзбекистон мусулмонлари идораси раиси, муфтий Усмонхон Алимов ҳазратлари ҳам юртимиз аҳолиси билан самимий суҳбатлар қилиш, масжидлар ва имом-домлалар фаолияти билан яқиндан танишиш, мўмин-мусулмонларнинг қалб-қўрларидаги гапларини тинглаш, улар билан фикр алмашиш мақсадида бир неча кундан бери сўлим водий вилоятларида хизмат сафарида юрибдилар.

Хайрли дуо, эзгу ният – мазмунли сафар омили

Рамазоннинг биринчи жума кечасида азим пойтахтимиздаги “Ҳазрати Имом” масжидида таровеҳ намозини адо этган муфтий ҳазратлари ўн дақиқа чиройли маъруза қилиб берганларидан сўнг водий халқини рамазон ойи билан қутлаш ва уларга пойтахтдаги намозхонларнинг дуои саломларини етказиш, бошлаётган сафарларининг хайрли ва баракали бўлишини сўраб, жамоадан дуо олган эдилар.

Дуои хайрлар, яхши ниятларнинг ижобати ўлароқ муфтий ҳазратларининг сафарлари сермазмун ва баракотли бошланди. Аслида одамлар билан дилдан суҳбатлашиш, уларнинг ҳолидан хабар олиб, ёрдамга муҳтожларга кўмак бериш, масжидларда жамоат билан намозларни бирга-бирга ўқиб, масжид аҳлига маърузалар қилиб бериш, таровеҳ намозларида Каломуллоҳга сомеъ бўлиш – Аллоҳ таолонинг амри, Пайғамбаримиз Муҳаммад мустафо соллаллоҳу алайҳи васалламнинг суннати, қолаверса, муҳтарам Президентимизнинг бугунги раҳбарлар олдига қўйган вазифаларни бажариш йўлидаги эзгу саъй-ҳаракатлардир.

Сафар машаққатини енгган олий туйғу

Барчамиз сафарга чиққанмиз. Сафарда юриш осон эмаслигини жуда яхши биламиз. Айниқса, иссиқда. Устига-устак рамазон ойида сафар қилиш янада машаққатли бўлади. Бироқ, шундай бўлса-да, ана шундай кунда қийинчиликларни зиммасига олиб, сафарда юрган кишининг қалбида, албатта, ана шу чарчоқларни сездирмайдиган бир туйғу – дин хизмати, халқ манфаати, миллат, Ватан муҳаббатини барча нарсадан устун кўриш туйғуси устувор бўлади.

Тасаввур қилинг, тасодифан, эшигингиз қўнғироғи чалинди. Қўшнилардан бири бўлса керак, дея чиқиб қарасангиз, қаршингизда Ўзбекистон мусулмонлари идораси раҳбари, муфтий ҳазратлари салом бериб турибдилар. Бундан ортиқ ҳаяжонли дақиқа бўлиши мумкинми?! Ана шундай дилга яқинлик учун ҳам водий халқи муфтий ҳазрат борган масжидга қараб ошиқиб, у зотнинг амри маъруфларини, наҳйи мункарларини тинглашга, дуоларини олиб қолишга тўп-тўп бўлиб келишмоқда.

Юракка яқин эътирофлар

Мана шундай ҳузурбахш суҳбатлардан баҳраманд бўлган кишиларимиздан бири ўзининг ўй-кечинмаларини шундай ҳикоя қилади:

“– Беш кун аввал қўнғироқ бўлди. Эртага соат тўққизда фалон жойдаги сўлим оромгоҳлардан бирига боришимни айтишди. “Сафарга чиқишим керак эди”, деб узримни айтдим. Бормасам бўлмаслигини, жуда муҳимлигини тайинлашди. Эртасига бордим, Норин дарёси бўйига, мажнунтолларнинг салқин соясига жой ҳозирланибди. Билсам, маҳалламизга муфтий ҳазрат бошчилигида бир гуруҳ мутасаддилар ташриф буюришибди. Икки соатларча чиройли суҳбат бўлди.

Шу билан сафарга чиқиб кетдим. Орадан яна икки кун ўтди. Кеча уйга келсам, муфтий Усмонхон домла ҳазратлари, устоз Абдулҳай домла ва бир неча илм аҳллари, уламоларимиз хонадонимизга ташриф буюришибди (афсуски, меҳмонларга мезбонлик қилолмадим). Ҳол-аҳвол сўраб, “қандай камчиликларингиз бор? Қай ишингизда кўмакчи бўлайлик? Фарзандларингизни ўқитасизми, ёрдам берайлик? Уй керакми? Жой керакми? Биздан не хизмат?” деб лутф қилишибди... Субҳоналлоҳ! Бу не кунлар-ки, катталар кичикка илтифот қилиб келса!? Бу қандай дориламон давр-ки, энг катта раҳбарлар хизмат сўраб эшигингиз қоқишса…

Куни кеча қариндошларимиз келишди. Улар ҳам эшитишибди. “Таклиф қилсангиз келишга вақт ажратаолмайдиган кишилар ўзлари келишса-я!?” деб ҳайрон бўлишди...

Муфтий ҳазратнинг мухлисларидан яна бири айтади: “Муфтий ҳазрат қаерда маъруза қилишларини эшитсам, ўша ерга етиб боришга ҳаракат қиламан. Чунки у киши одамларни Қиёмат, дўзах азоблари билан қўрқитмасдан, балки энг эзгу ишлардан, улуғ ажру савоблардан, жаннат сифатларидан сўз юритиб, кўнглимизни кўтарадилар ва хайрли ишларга ҳавасманд қилиб қўядилар”.

Ҳақиқатан, бу иш ҳазрати Пайғамбаримиз соллаллоҳу алайҳи васалламнинг: “Одамларга хушхабар беринглар, бездирманглар, осонлаштиринглар, қийинлаштирманглар”, деган (Имом Муслим ривояти) ҳадиси шарифларига тўла мос келади.

Дин ва миллат ғамида

Муфтий ҳазратлари сафар чоғида илм аҳлларини бошида кўтариб юрадиган ажойиб табиатли халқимиз вакиллари билан учрашиш билан чекланмасдан, масжидларнинг имом-хатиблари билан ҳам суҳбатлар ўтказиб, уларга фойдали йўл-йўриқлар кўрсатмоқдалар. Зотан, улар билан учрашувларда, бугунги имом ўз устида мунтазам ишламоғи, нафақат, диний илмни, балки дунёвий илмларни ҳам пухта билмоғи, дунёда юз бераётган ўзгаришларни зийраклик билан кузатиб бормоғи, воқеа-ҳодисалар юзасидан ўзининг қатъий фикрига эга бўлмоғи айтилмоқда.

Яна муфтий ҳазрат имом-хатибларга имомлик бу – пешволик эканини айтиб, уларни одамларнинг, хусусан, ёшларимизнинг тарбиясига ижобий таъсир кўрсатиш учун сўзи билан иши бир бўлиши кераклигига, Жалолиддин Румий ҳазратлари таъбири билан айтганда, “Ё аслинг каби кўрингил, ё кўринганинг каби бўл” шиорига амал қилиб яшашга даъват этмоқдалар.

Мана шундай мазмунли сафар давом этмоқда, таассуротлар билан яна ўртоқлашамиз, иншоаллоҳ.

Ўзбекистон мусулмонлари идораси Матбуот хизмати