Фарзандларингизга намоз уйқудан, севгидан, суҳбатлашиб ўтиришдан, гапдан, молу дунёдан, кулгудан, ишдан, сафардан, орзу қилган дунёвий нарсаларидан, қўлга киритган ва киритмаган барча нарсаларидан, заифлигидан, куч-қувватидан, дунё ва ундаги жамики нарсалардан ҳам яхшироқ эканини ўргатинглар!

*****

Пешинни ўқигач, рўзадор ҳолда, ёзнинг жазирамасига қарамай, ифторлик учун лаззатли таомлар пиширишга ҳозирлик кўра бошлади. Дастурхонга нималар қўйишни ўйларди. Пиширган таомларини кўрганда оила аъзоларининг юзларида розилик аломати пайдо бўлишини кўриш илинжида шомнинг азонини қалби шодликка тўлган ҳолда кутарди.

Эй Роббим! Рўзадор ҳолда рўзадорларга ифторлик ва саҳарлик таомлари тайёрлайдиган оналаримиз, опа-сингилларимиз, турмуш ўртоқларимиз ва қизларимизни паноҳингда асраб, гуноҳларини мағфират этгин!

*****

Ота-оналар учун олтин насиҳат 

Агар ўзига ишонадиган фарзанд тарбия қилмоқчи бўлсангиз, болангизнинг юзига қараб бақиришдан, уни масхара қилишдан, устидан кулишдан, камситишдан, бошқа тенгқурлари билан солиштиришдан, хўрлашдан, уришдан, хоссатан, юзига уришдан тийилинглар! Унутманг! Бу айтилганлар боланинг шахсиятини вайрон қилувчи иллатлардир!

*****

Ибн Қаййим раҳимаҳуллоҳ дедилар: “Ким молини Аллоҳнинг тоати йўлида сарфлашдан юз ўгирса, гарчи истамаса ҳам, молини Аллоҳдан бошқа учун сарфлаш билан балоланади”.

*****

Истиғфор – ҳар бир дард учун даво, ҳар бир бало учун нажотдир!

Нозимжон Иминжонов таржимаси

Бизнинг динимизда ниятнинг ўрни жудаям катта. Инсон қилаётган дунёвий ишини ниятни гўзал қилиш билан савобли амалга айлантириб олади.

Умар розияллоҳу анҳудан ривоят қилинади: «Пайғамбар соллаллоҳу алайҳи васаллам:

«Албатта, амаллар ниятга боғлиқдир. Албатта, ҳар бир кишига ният қилган нарсаси бўлади. Бас, кимнинг ҳижрати Аллоҳ ва Унинг Расули учун бўлса, унинг ҳижрати Аллоҳга ва Унинг Расулига бўлади. Кимнинг ҳижрати дунё учун бўлса, унга эришади. Ёки аёл учун бўлса, уни никоҳлаб олади. Бас, унинг ҳижрати нима учун қилган бўлса, ўшанга бўлади»,

дедилар». Бешовлари ривоят қилишган.

Бу ҳадисда инсон бир ишни нима ниятда амалга оширса, натижаси ўша ниятига қараб бўлиши зикр қилинмоқда. Амалнинг кўриниши бир хил – барчасида ҳижрат, кўчиш. Аммо ниятлар турлича бўлгани учун уларнинг натижаси шу ниятларга қараб бўляпти. Аллоҳ ва Расули учун кўчгани савоб олади. Дунё ёки аёл учун кўчгани ниятига етади, аммо савоб ололмайди. 

Ухлаш оддий, мубоҳ амал. Агар инсон ухлашдан олдин таҳорат олиб, уйқуга ётиш олдидан айтиладиган зикрларни айтиб, суннатга мувофиқ ўнг ёни билан ётадиган бўлса, шу уйқуси учун савоб олади.

Агар инсон таҳажжудга туриш мақсадида хуфтонни ўқиган заҳотиёқ уйқуга ётса, бунинг учун ҳам савоб олади.

Агар инсон солиҳ фарзанд кўриш, умматнинг сонини ошириш, фарзанд туғилса уни Аллоҳни танийдиган ихлосли мусулмон қилиб тарбия этиш мақсадида аёли билан қўшилса, шу иши учун ҳам савоб олади.

Агар инсон сочини тараётганда, “Пайғамбаримиз соллаллоҳу алайҳи васаллам “Кимнинг сочи бўлса, икром қилсин!” дея марҳамат қилганлар” дея шуни кўнглидан ўтказса, сочини ислоҳ қилгани учу савоб олади.

Агар инсон оддий, мубоҳ бўлган ишларни қилиш олдидан ниятини чиройли қилиб олса, савобга эришади.

Ерга уруғ экаётган инсон, “Агар шу уруғдан ҳосил олсам, уни мусулмонларга арзон нархда сотиб, уларга ёрдам беришга ҳаракат қиламан” деб ният қилса, шу деҳқончилигига савоб олади.

Юзини, қўлини, тишини юваётган инсон “Пайғамбаримиз соллаллоҳу алайҳи васаллам “Поклик иймондандир” деганлар” дея ният қилиб ювадиган бўлса, шу иши учун савоб олади.

Агар инсон “Пайғамбаримиз соллаллоҳу алайҳи васаллам “Либосларингизни гўзал қилинглар. Одамларнинг юзидаги хол каби чиройли бўлиб юринглар” деган ҳадисларини дилидан ўтказиб, шунга амал қилиш мақсадида янги кийим сотиб оладиган бўлса, шу хариди учун савоб олади.

Бир киши уйининг орқа томонидан дарча очаётган эди. Қўшниси кўриб қолиб, “Нима қиляпсиз?” деб сўради. “Тоза ҳаво кириши учун дарча очяпман” дея жавоб берди у. Шунда қўшни: “Сиз айтмасангиз ҳам дарчадан тоза ҳаво киради. Аммо “Муаззиннинг азонини эшитиш учун дарча очяпман” деганингизда, савоб олган бўлардингиз” деди.

Қаранг, уйининг орқа томонидан дарча очиш оддий иш. Аммо азонни эшитиш мақсадида дарча ўрнатиш савобга сазовор қилар экан.

Энди охират амали бўлган, фарз ибодат - намозни олайлик. Агар инсон намозга риё учун, биров кўриши учун келадиган бўлса, ибодат қилаётган бўлса ҳам савоб олмайди. Чунки, у ибодатнинг савобини йўққа чиқарадиган риёга қўл урди.

Бошқа ибодатларда ҳам риё аралашса, уларнинг савобини еб битиради. Шунинг учун фарз амаллар олдидан ҳам, мубоҳ амаллар олдидан ҳам ниятни чиройли, тўғри қилиб олишга ҳаракат қилайлик!

Аллоҳ таоло барчамизга ниятларимизни гўзал ва тўғри қилишимизни насиб айлаб, ажру савобларимизни кўпайтириб берсин!

Нозимжон Иминжонов

Инвестиция ва ташқи савдо вазирлиги ҳузуридаги Экспортни рағбатлантириш агентлиги, Ўзбекистоннинг Уммон султонлигидаги элчихонаси, Наманган, Фарғона вилоятлари ҳокимликлари, ҳудудлардаги экспортёр корхоналар вакиллари Уммон султонлигининг нуфузли “Aytab Foodtech” компанияси вакиллари билан Тошкентда учрашди. Бу ҳақда ЎзА хабар берди.

Унда Уммонлик меҳмон Моҳиб Аҳмад ўз юртида Ўзбекистонда ишлаб чиқарилаётган товарларга қизиқиш ва талаб ошиб бораётганини маълум қилди. Унинг айтишича, Ўзбекистонда озиқ-овқат маҳсулотлари соҳасида банд бўлган тадбиркорларнинг тижорат таклифлари, улар етиштирган ва ишлаб чиқарган ўзбек маҳсулотларининг сифати ва нархлари унга манзур бўлган. Шу боис халқаро стандартларга мос равишда тайёрланган юқори сифатли озиқ-овқат маҳсулотлари ва истеъмол товарларини Уммонга импорт қилишда ҳамкорлик қилмоқчи.

Учрашувда тадбиркорлар экспорт учун ишлаб чиқараётган маҳсулотларини намойиш қилган бўлса, ҳокимият вакиллари юртимизда экспортёрларга берилаётган имтиёзлар ва инвестицион муҳитни яхшилаш борасидаги чора-тадбирлар ҳақида ахборот берди. Шунингдек, Сирдарё вилоятидаги Оқ-Олтин масъулияти чекланган жамияти ўзининг инвестицион лойиҳасини Уммонлик инвестор ва импортёрларга тақдим этди. Ана шу жараёнда “Aytab Foodtech” компанияси ва Оқ-Олтин корхонаси ўртасида келишувга эришилди.

Музокаралар якунида бир қатор корхоналар Уммонга озиқ-овқат маҳсулотлари етказиб бериши тўғрисида келишиб олинди.

Ўзбекистон мусулмонлари идораси Матбуот хизмати

Татаристонда бир нечта жамоат ташкилотлари президент Рустам Миннихановга мактуб йўллаб, Рамазон ойида алкогол сотувини тақиқлашни сўради. Бу ҳақда Islam.ru нашрига таяниб Азон интернет сайти хабар берди.

“Рамазон – эзгу ишлар ойи. Биз сиздан ушбу муқаддас ойда Татаристон Республикасида спиртли ичимликлар савдосини тақиқлашингизни сўраймиз. Бу хайрли амал Татаристон ҳукуматининг мусулмонларга нисбатан ҳурматини кўрсатган, Татаристоннинг обрўсини 1,5 миллиардлик Ислом дунёсида оширган ва татар халқини соғлом ҳаётга ундаган бўлар эди”, – дейилади Татаристон оқсоқоллар шўроси, Бутунтатар жамоатчилик маркази ва “Муслима” аёллар ташкилоти томонидан йўлланган мактубда.

Президентга мурожаат қилган жамоатчилик ташкилотлари тегишли қарор қабул қилинишига ва Рамазонда алкогол савдосининг тақиқланишига умид билдирган.

Ўзбекистон мусулмонлари идораси Матбуот хизмати

tj.sputniknews.ru нашрининг хабар беришича, 2019 йилда Ҳаж зиёратига бориш ниятида бўлган Тожикистон фуқаролари 35 128 сомони (қарийб 3,5 минг АҚШ доллари) тўлаши зарур.

Тожикистон Республикаси Дин ишлари, халқ анъаналари, тантаналар ва маросимларни мувофиқлаштириш қўмитаси "Ҳаж-2019" мавсумида ушбу белгиланган нархга Саудия Арабистонига бориш ва келиш учун чипта, Макка ва Мадинада яшаш, овқатланиш, йўлбошловчи хизмати, Мино, Муздалифа, Арафотда бўлиш, қурбонлик сўйиш, тиббий хизмат ва бошқалар киришини маълум қилган. Жидда-Макка-Мино-Арафот-Муздалифа-Мино-Макка-Мадина йўналишида транспорт ҳаражатлари ҳам ушбу тўланадиган маблағ таркибига киради.

2018 йилда Тожикистон фуқаролари ҳажга бориш учун 33 минг сомони тўлашган. Ҳажга борувчилар учун бир қатор талаблар мавжуд бўлиб, булар 30-60 ёш орасида бўлиши лозим.

Сўнгги 5 йил ичида Ҳаж зиёратини амалга оширган фуқаролар 534 АҚШ доллари миқдоридаги божни тўлашлари талаб қилинади.

Маълумот учун, 2018 йилда 6 минг нафар тожикистонлик Ҳаж зиёратига борган.

Ўзбекистон мусулмонлари идораси Матбуот хизмати