muslim.uz
Шавкат Мирзиёев “Евроосиё олдидаги хизматлари учун” юксак мукофотига лойиқ кўрилди
Туркия пойтахтида ишбилармон кишиларнинг “EcoAvrasya” жамоатчилик бирлашмаси томонидан таъсис этилган “Евроосиё олдидаги хизматлари учун” юксак мукофотининг дастлабки лауреатларини тақдирлаш маросими бўлиб ўтди.
Тантанали тарзда ташкил этилган маросимда ушбу давлат Президенти Р. Эрдоганнинг мафкура бўйича маслаҳатчиси Ёлчин Топчи, фан, саноат ва технологиялар вазири Фарук Озли, Туркия парламенти аъзолари, хорижий давлатлар, Анқарада аккредитациядан ўтказилган дипломатик миссиялар ва халқаро ташкилотлар вакиллари иштирок этди. Тадбирга “EcoAvrasya” раиси Ҳикмет Эрен модераторлик қилди.
Х. Эрен ўз нутқида қайд этиб ўтганидек, мазкур бирлашма 2012 йилдан буён “Турк халқлари олдидаги хизматлари учун” танловини ўтказиб келади. Унда мамлакатлар ўртасидаги ўзаро алоқаларни ривожлантириш ва мустаҳкамлашга салмоқли ҳисса қўшган таниқли сиёсатчилар ва иқтисодиёт арбоблари мукофотланиб келинади.
“Евроосиё олдидаги хизматлари учун” танлови эса илк бор таъсис этилди. Мазкур юксак мукофот тақдим этилиши Евроосиё мамлакатлари ўртасидаги ўзаро фойдали муносабатларни равнақ топтиришга сезиларли ҳисса қўшган шахслар ва институтларга кўрсатилган катта ҳурмат ҳамда эҳтиром намунаси ҳисобланади.
“EcoAvrasya” уюшмаси бошқаруви кенгаши “Евроосиё олдидаги хизматлари учун” танловининг асосий номинацияси ғолиблиги учун турли номзодларни ўрганиб чиқди ва уни Ўзбекистон Президенти Шавкат Мирзиёевга беришга қарор қилди. Юксак мукофот давлатимиз раҳбари томонидан мамлакатимизда амалга оширилаётган ва нафақат республика, балки кенг минтақани ўзгартираётган, материкда иқтисодий алоқаларни фаоллаштиришнинг асосий омилига айланган чуқур ҳамда жадал ислоҳотлар учун берилди.
Х. Эрен Ўзбекистон Марказий Осиё давлатлари ва Афғонистон, Россия, Хитой, Жанубик Корея, Туркия билан ўзаро алоқаларда мисли кўрилмаган ўсишга эришганини алоҳида эътироф этди. Унинг сўзларига кўра, комиссия аъзолари Ўзбекистонда мазкур йўналишда қўйилаётган тарихий қадамларни катта завқ-шавқ билан кузатиб боришди ва биринчи мукофотни ушбу давлат етакчисига топширишга аҳд қилишди.
Уюшма раҳбарининг айтишича, бу борадаги қарор бир овоздан қабул қилинган.
Ушбу ташкилот бошқаруви кенгаши ва унинг барча аъзолари номидан Х.Эрен Ўзбекистоннинг Туркиядаги Фавқулодда ва мухтор элчисини саҳнага чақирди ҳамда мукофотни давлат раҳбарига бутун Евроосиё жамоатчилиги олдидаги мисли кўрилмаган ва тарихий хизматлари белгиси сифатида топширишни сўраган ҳолда тантанали равишда тақдим этди, дейилади “Жаҳон” АА хабарида.
Ўзбекистон мусулмонлар идораси матбуот хизмати
Ўзбекистон Тожикистон жанубида тиббий мажмуа қуради
Ўзбекистон Тожикистон жанубидаги Хатлон вилоятида тиббий мажмуа қуради ва уни қўшни давлатга беғаразлик асосида беради.
“Халқ сўзи” нашрининг ёзишича, ўзаро келишувга кўра Тожикистон томони 200 ётоқ ўрнига мўлжалланган мазкур объект қурилиши учун зарур ер участкаси ажратиб беради.
Ўз навбатида, Тожикистон томони мазкур иншоот қурилишига ёрдам беради. Жумладан, ишларни бажариш ва хизмат кўрсатиш учун ушбу давлат ташкилотлари ҳамда фуқароларини жалб этиш масаласида кўмаклашади.
ЎМИ Матбуот хизмати
“Пайғамбар шоири” мусобақаси ўтказилади
Қатар пойтахти Доҳа шаҳрида жорий йилнинг 25-28 апрель кунлари “Пайғамбар шоири” шеърий мусобақасининг финал босқичи бўлиб ўтади.
Мазкур беллашувда қатнашиш учун дунёнинг турли давлатларидан 942 дона ариза келиб тушгани ҳақида "info.islom" нашри хабар берди.
Бу йилги мусобақада мумтоз шеърият йўналиши бўйича 853 та ва ҳалқ анъанавий шеърияти бўйича 89 асар ҳайъат аъзолари ҳукмига ҳавола этилган бўлиб, улардан 86 донаси аёллар ижодига мансуб эканлиги айтилди.
Мусобақа ташкилотчилари фикрига кўра, мазкур тадбир ёш авлодда Пайғамбаримиз соллаллоҳу алайҳи васалламга муҳаббат ҳиссини уйғотишга ҳамда мусулмон умматини бирлаштиришда шеъриятининг ўрни муҳимлигини таъкидлашга қаратилган.
ЎМИ Матбуот хизмати
Тожикистонда биринчи Исломий банк очилади
Тожикистон ҳукумати мамлакатда биринчи Исломий банкни ташкил этиш ишларига киришди. Бу ҳақда Islam-today хабар тарқатди.
“Соҳибкорбанк” молиявий муассасаси Ислом шариати асосида фаолият кўрсата бошлайди. Улар шариат бўйича хизмат кўрсатиш ишларини кейинги йилдан бошлашади.
Тожикистондаги Исломий банкингни ташкил этиш жараёнларини Ислом тараққиёт банки назорат қилади ва “Соҳибкорбанк”ни “қайта қуриш” ишлари билан боғлиқ харажатни ўз зиммасига олади.
Исломий банкингни ташкил этиш орқали Тожикистон халқининг банк тизимига бўлган ишончини қайтаришдан умид қилмоқда.
Исломий банк тизимида фоиз эвазига пул бериш ва олиш ҳолатлари кузатилмайди.
ЎМИ Матбуот хизмати
Ҳадис мусобақасида иштирок этишни истаганлар учун маълумот
Ўзбекистон мусулмонлари идораси, Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита, Олий ва ўрта махсус таълим вазирлиги, Ўрта махсус, касб-ҳунар таълим маркази, Халқ таълими вазирлиги, Ўзбекистон Ёшлар иттифоқи, Республика Маънавият ва маърифат маркази билан ҳамкорликда жорий йилнинг май ойи давомида “Ҳадислар билимдони” кўрик-танловини ўтказилади.
Танловнинг асосий мақсади – ислом динининг асл инсонпарварлик моҳиятини чуқур очиб берадиган, инсонларни эзгулик, меҳр-оқибат ва ҳамжиҳатлик йўлида бирлашишга даъват этадиган ғояларни ўзида мужассам этган ҳадисларни ёшларнинг барча қатламларида кенг тарғиб қилишдан иборат.
Танловда Ўзбекистон мусулмонлари идораси тасарруфидаги диний таълим муассасалари талабалари, ёш имом-хатиблар ҳамда ҳадис илмига қизиқиши бўлган 14 ёшдан 30 ёшгача бўлган фуқаролар иштирок этишлари мумкин.
Танловда иштирок этиш истагида бўлган фуқаролар 2018 йилнинг 26 апрель кунига қадар Ўзбекистон мусулмонлари идорасининг Қорақалпоғистон Республикаси қозиёти, Тошкент шаҳри ва вилоятлар вакилликларида рўйхатга олинади.
Танловнинг биринчи босқичи 2018 йилнинг 1-5 май кунлари давомида вилоятлар кесимида ўтказилади.
Танловда иштирок этиш шартлари:
Танловда диний таълим муассасалари талабалари, ёш имом-хатиблар ҳамда ҳадис илмига қизиқиши бўлган камида 40 та ҳадисни (арабча матни билан) ёддан билган 14 ёшдан 30 ёшгача бўлган фуқаролар иштирок этишлари мумкин.
Танлов учта шартдан иборат:
– Имом Бухорий ва Имом Термизийнинг ҳаёти ва илмий фаолиятини ёритиб бериш;
– Берилган ҳадисни шарҳлаб бериш (ҳадисни таржима қилиш ва ундан олинадиган фойдаларини баён қилиш);
– Ҳадисни араб тилидаги матнини ровийлари билан ёддан айтиб (берилган боблар бўйича биттадан ҳадис айтиш) бериш.
Иштирокчилардан қуйидаги ҳужжатлар талаб этилади:
– Паспорт ёки туғилганлик ҳақидаги гувоҳнома нусхаси,
– Турар-жойдан маълумотнома,
– 2 дона 3x4 шаклда фотосурат.
ЎМИ Матбуот хизмати