www.muslimuz

www.muslimuz

 Шу кунларда баъзи интернет тармоғида “Ўттиз минг ўзбекча-туркча Қуръони карим таржима китоби Ўзбекистонда тарқатилди” деган мазмундаги хабарлар кенг тарқатилмоқда. Айрим ижтимоий тармоқ юритувчилари хайрия тариқасида улашилаётган мазкур китоблар дўконларда сотувга чиқарилиши мумкинлиги ҳақидаги асоссиз ахборотларни ҳам ёйишга уринмоқдалар.

Таъкидлаш зарурки, марҳум муфтий Усмонхон Темирхон ўғли ҳазратлари томонидан нашр этилган “Тафсири Ирфон” китобининг мухтасар шаклда таълиф этилган – “Қуръони карим ва ўзбек тилидаги маънолари таржимаси” китоби муаллифнинг саъйи-харакатлари билан Туркия Диёнат ишлари бошқармаси ҳомийлигида чоп этилган эди.

Айни кунларда ушбу Қуръони карим китобининг илк нусхаларини диний идора тасарруфидаги олий ва ўрта махсус ислом билим юртлари устоз-талабалари ва диний соҳа ходимларига хайрия сифатида улашиш бошланди. Бу тўғрисида Ўзбекистон мусулмонлари идораси тасарруфидаги ижтимоий тармоқларда маълумотлар эълон қилинди   https://t.me/muhaddisuz/5315,   https://t.me/oliymahad/13779,   https://t.me/oliymahad/13795.

Яқин кунларда масжидлар имом-хатиблари, имом ноиблари, отинойилар, шунингдек, Қуръони карим ўқишга иштиёқи бор, лекин имконияти йўқ фуқароларга ҳам ушбу Қуръони карим китобларидан бепул тарқатиш бошланади. Республикадаги барча масжидларда намозхонлар ушбу китобни мутлоаа қилиш имкониятига эга бўладилар.

Қайд этиш лозимки, Қуръони каримнинг ушбу нашри вақф мулки сифатида чоп этилган бўлиб, диний идора уни текинга тарқатиш учун нашр этди. Китобни сотиш мутлақо жоиз эмас. Шу сабабли диний идоранинг талаби билан ушбу китобнинг ички муқоваларида “Қуръон совға қиламан” ва “Сотиш мумкин эмас” деган қайдлар ёзилган.

Шу нуқтаи-назардан, Ўзбекистон мусулмонлари идораси келгусида, мазкур “Қуръони карим ва ўзбек тилидаги маънолари таржимаси” китоби кенг тарқатила бошлагандан сўнг ким ушбу нашрни савдода кўрса 71-240-39-33 телефони орқали хабар беришларини ёки ЎМИнинг Интернетдаги “Muslim.uz” сайтидаги электрон манзилига маълумот юборишини илтимос қилади.

Ижтимоий тармоқларда тарқатилган хабарда яна бир нотўғри ёритилган жиҳат шуки, ушбу Қуръони карим таржимаси фақат ўзбек тилида бўлиб, оятларнинг турк тилидаги таржималари баён этилмаган.

Хўш, шундай экан, мазкур хабарни аниқлаштирмасдан туриб, ижтимоий тармоққа атайин қўйиб юборган кимса ёлғончи, мусулмон биродарига зиён-заҳмат етказган, уни обрўсизлантирган бўлиб қолмайдими?!

Ҳар бир мўмин-мусулмон киши бундай ёлғон-яшиқларга, асоссиз гапларга учмаслиги даркор. Аллоҳ таоло бундай огоҳлантиради: « Эй иймон келтирганлар! Агар фосиқ хабар келтирса, аниқлаб кўрингиз, билмай бир қавмга мусибат етказиб қўйиб, қилганингизга надомат чекувчи бўлмангиз» (“Ҳужурот” сураси, 6-оят). Ҳадиси шарифларда эса: “Эшитган нарсасини гапиравериш кишининг ёлғончилигига кифоя қилади”(Имом Муслим ривояти),  дейилган.

Муфассирлар ояти каримани шарҳлаб, келтирилган ҳар қандай хабарга ишонавермасликни, агар фосиқ киши бирор гап олиб келса, уни яхшилаб текшириб кўриш зарурлигини таъкидлашади.

Хулоса ўрнида айтиш жоизки, ҳар бир мўмин-мусулмон киши бундай ёлғон-яшиқларга, ҳақиқатдан йироқ гапларга учмаслиги, фитналардан огоҳ бўлиши даркор. Шунингдек, тўғри ахборот олиш, уни тўғри етказа билиш бугунги кун кишисининг шиори бўлиши керак.

Аллоҳ таоло ҳаммамизга инсофи тавфиқ берсин.

 

Ўзбекистон мусулмонлари идораси Матбуот хизмати

 2021 йил 14 сентябрь. Ўзбекистон мусулмонлари идораси ташаббуси билан Вақф хайрия жамоат фонди томонидан Андижон вилоятидаги 180 нафар имконияти чекланган (эшитиш ва сўзлашишда нуқсони бор) фуқаролар иштирокида тадбир ўтказилди.

Тадбирда Ўзбекистон мусулмонлари идораси мутаҳассиси Мунирахон Абубакирова, вилоят бош имом-хатиби Мирзамақсуд домла Алимов, Вақф фонди Андижон вилояти филиали раҳбари Нуруллоҳ Қодиров, вилоят бош отинойиси Шоирахон Қосимова, Андижон шаҳар бош имом-хатиби Мифтоҳиддин домла Рожиддиновлар қатнашди.

Тадбирда нотиқлар томонидан Миссионерлик ва унинг зарарлари, Тинчлик ва осоишталикни қадрига етиш, юртимиздаги ислоҳотлар тўғрисида кенг тушунчалар берилди.

2021 йил 15 сентябрь. Навбатдаги манзил Наманган вилояти бўлди. Наманган шахрида имконияти чекланган (эшитиш, нутқида) инсонлар билан учрашув ўтказилди. Уни Ўзбекистон мусулмонлари идораси Наманган вилояти ЎМИ “Вақф” хайрия жамоат фонди Наманган вилояти филиали рахбари Турсунов Шукрулло кириш қисми билан очиб бердилар.

ЎМИ “Вақф” хайрия жамоат фонди Наманган вилояти филиали рахбари Турсунов Шукрулло ўз маърузаларида “Вақф” жамоат фонди томонидан олиб борилаётган эзгу амаллар борасида сўзладилар. Шундан сўнг, “Миссионерликдан огоҳ бўлинг” мавзусида Наманган вилояти Наманган шахри “Абдулқодир қори” жоме масжиди бош имом – хатиби Аълохўжаев Маъруфхон батафсил маъруза қилдилар.

Тадбирни “Сиз бизга кераксиз” кўргазмали маърузалари билан – ЎМИ мутахассиси М.Абубакирова давом эттирди.

Тадбир давомида сўзга чиққан Салима Назирова 3-4 йилдан бери миссионерликда юрганлигини, бугунги тадбирдан таъсирланиб, Ислом динига киришни истаётганини билдирди.

Сўнгра Муножат Холмирзаева, Озода Абдуолимова, Анора Холбекова, Акром Исмаилов, Ботир Мирсаидов, Юнусжон Мирмаматов жами 7 нафар имконияти чекланган фуқаролар иймон калималарини имо-ишорада айтиб Ислом динини қабул қилишди.

2021 йил 16 сентябрь. Фарғона вилоятида ҳам имконияти чекланган инсонлар учун “Сиз бизга кераксиз” шиори остида тадбир бўлиб ўтди. Учрашувни Ўзбекистон мусулмонлари идораси Фарғона вилояти бош имом-хатиби Убайдуллоҳ Абдуллаев кириш сўзи билан очиб, Ислом динининг моҳияти ҳақида сўзладилар. Сўнгра “Миссионерликдан огоҳ бўлинг” мавзусида маъруза қилдилар.

Тадбирни ЎМИ мутахассиси М.Абубакирова давом эттирди. ЎМИ ташаббуси билан 2018 йилдан бери давом этиб келаётган “Сиз бизга кераксиз!” тадбири эшитиш ва нутқида имкони чекланган инсонларнинг ҳаёт тарзини яхши томонга ўзгараётганини, улар орасида “Асмоул хусна” мусобақаси, қўл меҳнати кўргазмалари ва бошқа турли тадбирлар ташкил этилаётгани ҳақида сўзлаб берди.

Тадбир давомида сўзга чиққан Мелибоев Хикматилло бир неча йилдан бери миссионерликда юрганлигини, бугунги тадбирдан таъсирланиб, Ислом динига киришни хохлаётганлигини билдирди.

Иштирокчилардан Махкамов Хуршид, Мусаева Махбуба, Исматиллаев Акром, Содиқов Нодир жами 6 нафар имконияти чекланган фуқаролар шаҳодат калималарини келтириб, Ислом динини қабул қилишди.

Тадбир доирасида имконияти чекланган ҳамюртларимизга Вақф фонди томонидан озиқ-овқат маҳсулотлари тарқатилди, шунингдек, ош дастурхони ҳам ташкил этилиб, имконияти чекланган ҳамюртларимизнинг дуолари олинди.

 

 

Ҳаёт давом этар экан, муаммолар ҳам бўлиши табиий. Халқимиз якдил-ҳамфикр бўлса, муаммоларни биргаликда ҳал қилишга киришсак, ҳаётдан розилик, ишонч ва адолат тўла қарор топади.

Давлатимиз раҳбари ҳаётимизда янги даврга, тараққиётимизнинг янги босқичига асос солди. Президентимизнинг “Инсонларнинг дарду ташвишларини ўйлаб яшаш – одамийликнинг энг олий мезонидир”, деган ҳаётбахш сўзлари бугун асосий тамойилга айланган.

Дарҳақиқат, инсонларнинг синиқ кўнгилларини кўтариб, дилларига мамнунлик улашиш ҳар бир виждонли инсон учун ҳузурбахш амаллардан ҳисобланади. Расулуллоҳ соллаллоҳу алайҳи васаллам бир ҳадисларида: “Аллоҳ таолога фарзлардан кейинги энг севимли амал мусулмоннинг қалбига хурсандлик киргизишдир”, деганлар.

Бугун Ўзбекистон мусулмонлари идораси раисининг маслаҳатчиси Салоҳиддин домла Шарипов Ҳазорасп туманидаги “Шохпир” жоме масжидига ташриф буюриб, жума намози асносида мўмин-мусулмонларга маъруза қилдилар. Ушбу ташрифдан масжид аҳлининг калби сурурга тўлиб мамнун бўлди.

Аллоҳнинг уйларидан бир уй бўлмиш масжидда юртимизда олиб борилаётган улкан ижобий ислоҳотлар янада равнақ топиши, эл-юртимиз тинчлиги, мамлакатимизнинг ободлиги, ҳаётимизнинг янада фаровон бўлишини тилаб, хайрли дуолар қилдилар. Мухлислар ўзларининг қизиқтирган саволларига жавоблар олдилар.

 

 

 

Ўзбекистон мусулмонлари идораси

Хоразм вилоят вакиллиги

Матбуот хизмати

Пятница, 17 Сентябрь 2021 00:00

"Сарҳисоб" танловида иштирок этинг!

 Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита, Ўзбекистон мусулмонлари идораси, Ўзбекистон халқаро ислом академияси билан ҳамкорликда янгиланётган Ўзбекистонда диний-маърифий соҳада амалга оширилаётган ислоҳотларни кенг тарғиб этиш, тинчлик ва осойишталикни қадрлаш, динлараро бағрикенглик ва ҳамкорлик ғояларини оммалаштириш, халқимиз, айниқса, ўсиб келаётган ёш авлодни ёт ғоялардан ҳимоя қилишда фаоллик кўрсатган ижодкорларни қўллаб-қувватлаш ва муносиб рағбатлантириш мақсадида «Сарҳисоб» танловини ўтказади.

Танловнинг ҳудудий босқичида 2021 йилнинг 1 январидан 2021 йилнинг 1 ноябргача газета ва журналларда босилган, радио орқали эфирга узатилган, телевидениеда кўрсатилган ва Интернет тармоғида эълон қилинган материаллар 2021 йилнинг 10 ноябрига қадар қабул қилинади. Ҳудудий босқич ғолиблари республика босқичида қатнашиш ҳуқуқини қўлга киритишади.

Танловнинг ҳудудий босқичи 20 ноябргача ўтказилиши кўзда тутилган.

Республика босқичи ғолиблари ҳудудий босқичда ғолиб чиққан иштирокчилар орасидан ҳакамлар ҳайъати томонидан танлов асосида сараланади. Танлов ғолиблари ОАВда эълон қилинади.

Танловнинг республика босқичида ғолиб деб топилганлар қуйидаги йўналишлар бўйича тақдирланади:

Бош мукофот: «Жаҳолатга қарши – маърифат» мавзусидаги энг яхши ижодий иш.

Fолиб махсус диплом ва ташкилотчиларнинг қимматбаҳо совғалари билан тақдирланади.

Асосий мукофотлар:

энг яхши ижодий иш учун мукофот (телевидение – I, II, III ўринлар);

энг яхши ижодий иш учун мукофот (радио – I, II, III ўринлар);

энг яхши ижодий иш учун мукофот (даврий матбуот – I, II, III ўринлар);

энг яхши ижодий иш учун мукофот (Интернет – I, II, III ўринлар);

энг фаол тарғиботчи (I, II, III ўринлар);

Танловга теле-, радио-, босма материаллар ҳамда Интернетда эълон қилинган ишлар тақдим этилади (3 тадан кам бўлмаслиги керак).

Телевидение бўйича видеоматериаллар, ахборот ташувчи воситанинг қандай кўринишда бўлишидан қатъи назар, 5 минутдан 30 минутгача бўлиши керак.

Радиоэшиттиришлар (аудиокассета ёки системали диск) 5 минутдан 30 минутгача бўлиши керак.

Матбуот ва Интернет материаллари даврий нашрнинг асл нусхаси ёки кўчирма нусхасида тақдим этилиши лозим.

 

 

Танловга юборилган материалларга қуйидагилар илова қилинади:

– муаллифнинг исми-шарифи, турар жойи, уй ва иш телефонлари;

– ўз соҳасида олиб бораётган фаолияти тўғрисида қисқача маълумот;

– паспорт нусхаси.

Танловда иштирок этувчиларнинг материаллари ҳар бир ҳудуд бўйича Ўзбекистон мусулмонлари идорасининг ҳудудий вакилликларига топ­ширилади. Мурожаат учун маълумотлар:

Андижон вилояти  (74) 228-01-58

Бухоро вилояти  (65) 224-40-51

Жиззах вилояти  (72) 223-85-30

Навоий вилояти  (36) 225-17-47

Наманган вилояти  (69) 226-10-01

Самарқанд вилояти  (66) 235-34-18

Сирдарё вилояти  (67) 227-23-00

Сурхондарё вилояти  (76) 225-52-00

Фарғона вилояти  (73) 226-72-44

Хоразм вилояти  (62)  228-44-38

Тошкент вилояти  (95) 142-14-54

Тошкент шаҳри  (71)  235-22-21

Қашқадарё вилояти  (75) 225-56-32

Қорақалпоғистон Республикаси  (61) 229-02-64

 

«Сарҳисоб» танловида иштирок этинг ва ғолиб бўлинг!

 

Ташкилий қўмита

 

 

Пятница, 17 Сентябрь 2021 00:00

ДУО ҚАБУЛ БЎЛАДИГАН ВАҚТ ВА ҲОЛАТЛАР

1. Саҳарда дуо қилиш. Аллоҳ таоло: “Саҳарларда улар (Аллоҳдан) мағфират сўрар эдилар”, деб марҳамат қилган (Зориёт сураси, 18-оят).

Саҳар вақтида қалб соф, ихлосли ва чалғитадиган нарсалардан холи бўлади. Расулуллоҳ соллаллоҳу алайҳи васаллам айтадилар: «Аллоҳ таоло ҳар кеча, кечанинг охирги учдан бири қолганида “Ким менга дуо қилади, Мен унга ижобат қилай, ким Мендан сўрайди, Мен унга (сўраган нарсасини) берай, ким Мендан кечирим сўрайди, Мен уни кечирай”, дейди» (Имом Буҳорий, Имом Муслим ривояти).

 2. Азон ва иқоматдан кейин дуо қилиш. Набий (алайҳиссалом): “Азон ва иқомат орасидаги дуо рад қилинмайди”, дедилар (Имом Абу Довуд, Имом Термизий ривояти)

 3. Ифторлик ва саҳарликда дуо қилиш. Расулуллоҳ соллаллоҳу алайҳи васаллам: “Рўзадорнинг дуоси қайтарилмайди” (Имом Термизий, Имом Ибн Можа ривояти), деганлар.

 4. Қалблар “эриган” вақтда дуо қилиш. Расулуллоҳ соллаллоҳу алайҳи васаллам: “Қалблар юмшаган вақтда дуо қилиб қолинглар, чунки у раҳматдир!” дедилар.

 5. Фақат мусибат етганидагина эмас, балки, тинч-осуда вақтда ҳам дуо қилиш. Агар Банда кенгчилик вақтида Аллоҳни зикр қилса, Аллоҳ уни торчилик вақтида зикр қилади.

Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Кимни шиддатлар пайтида Аллоҳ уни истижобат қилиши масрур қилса, оройиш пайтида дуони кўпайтирсин”, дедилар.

 6. Саждада дуо қилиш. Абу Ҳурайра розияллоҳу анҳу Расулуллоҳ соллаллоҳу алайҳи васалламнинг бундай деганларини ривоят қилади: “Банда Роббисига энг яқин бўладиган ҳолати сажда қилган вақтидир. Бас, шу вақтда дуони кўпайтиринг” (Имом Муслим ривояти).

 7. Ҳар намоздан сўнг дуо қилиш. Абу Умома розияллоҳу анҳу: “Ё Расулуллоҳ, қайси дуо эшитилувчироқ (кўпроқ қабул бўлади)?”, деди. Шунда Расулуллоҳ соллаллоҳу алайҳи васаллам: “Кечанинг охиридаги ва фарз намозлар ортидаги лаҳзаларда”, дея жавоб бердилар деди (Имом Термизий ривояти).

Мужоҳид (раҳматуллоҳи алайҳи) айтади: “Намоз энг яхши вақтга белгиланган. Шунинг учун намозлардан сўнг дуо қилишни қўйманг”.

 8. Ёмғир ёққанда дуо қилиш. Абу Ҳурайра розияллоҳу анҳудан ривоят қилинади: “Сафлар Аллоҳ йўлида жипслашганида, ёмғир ёққанда, фарз намозлари адо этиладиган вақтларда осмон эшиклари очилади. Бу пайтларда дуо қилишни ғанимат билинг”.

 9. Жума туни ва кундузи дуо қилиш. Абу Ҳурайра розияллоҳу анҳу ривоят қилади: Расулуллоҳ соллаллоҳу алайҳи васаллам жума куни ҳақида бундай дедилар: “Унда бир соат борки, унга тик туриб намоз ўқиётган мусулмон банда Аллоҳдан бирон нарсани тилаб тўғри келиб қолса, Аллоҳ унга бу тилагини беради” (Имом Бухорий, Имом Муслим ривояти).

10. Сафарда дуо қилиш. Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Учта дуо, шубҳасиз, ижобатдир: мазлумнинг дуоси, мусофирнинг дуоси ва отанинг боласига қилган дуоси”, дедилар (Имом Термизий, Имом Абу Довуд ривояти).

Страница 1 из 481
Top