muslim.uz
Москва муфтийси: Маҳаллий ислом тарихини ҳам чуқур ўрганиш керак
Россия мусулмонлари диний жамоасининг раҳбари, муфтий Альбир ҳазрат Крганов, 29 июнь куни Қабардин-Болқор Республикасида бўлиб ўтган "Россиянинг илмий ва таълим тизимида исломнинг роли ва ўрни" Бутунроссия конференциясида сўзга чиқди, хабар бермоқда 26-news.ru.
Муфтий Альбир ҳазрат ўз нутқида тадбир иштирокчиларини Россия мусулмонлари диний жамоаси, ташкилотнинг вилоят муфтийлари ва Россия Федерацияси жамоат палатасидаги ҳамкасблари номидан қутлар экан, университетларда маҳаллий исломнинг тарихини алоҳида ўрганиш муҳимлигини қайд этди.
"Биз таълим муассасаларимизда исломнинг умумий тарихини ўргатамиз, лекин маҳаллий исломнинг тарихига, илоҳиётчиларимизга ва уларнинг асарларига жуда ҳам кам эътибор берилади. Ислом илоҳиётининг классиклари ҳақида кўплаб докторлик диссертациялари ёзилаётгани яхши, аммо маҳаллий илоҳиётчиларимиз ҳақида кўпроқ тадқиқотлар чоп этишимиз қизиқ бўларди. Мен бунга кўпроқ урғу беришимиз керак, деб ҳисоблайман", - дейди муфтий.
Альбир ҳазрат 2000 йилда Россия президенти Владимир Путин сайлангач, унинг илк халқаро сафари Ўзбекистон Республикасига бўлганига ҳам эътибор қаратди.
"Ўшанда Россия Федерацияси Президенти Тошкент Ислом университетига ташриф буюрган, унинг фахрий меҳмонлар китобидаги эзгу тилаклари ҳамон асраб-авайлаб сақланмоқда. Кавказда уруш бўлаётган бир пайт эди ва Владимир Владимирович ўзи учун бу мафкурани фақат бошқа кучлироқ мафкура мағлуб этиши мумкинлигини жуда аниқ тушунди. Давлат раҳбари президентлигининг дастлабки кунлариданоқ диний таълим асосларини мустаҳкамлашга эътибор қаратиб келмоқда", - дейди Муфтият раҳбари.
Ўзбекистон мусулмонлари идораси матбуот хизмати
Исломда сабр ва шукр масаласи
Бисмиллаҳир роҳманир роҳийм
Аллоҳ таолога битмас-туганмас ҳамду санолар бўлсин!
Пайғамбаримизга мукаммал ва батамом салавоту дурудлар бўлсин!
Инсон бу дунёда яшар экан, икки ҳолатнинг бирида бўлиши тақозо қилинади. Неъматлар ва хотиржамлик ичида бўлганда, шукр қилади ёки мусибат ва қийинчиликлар вақтида сабр қилади. Шукр ва сабр соҳиби қарам бўлиб эмас, ўзига ҳокимлик ҳисси билан яшайди. Бу фазилатлар тоқатли бўлиш, вазминлик, босиқлик каби инсоний хислатларни ўзида жамлайди. Бу хислатлар инсонни эзгуликка, эзгулик эса комилликка етаклайди. Шунинг учун инсон етукликка эришиши, турмушининг мазмунли ўтиши, ҳаёт маъносини теран тушуниши учун сабрли ва шукрли бўлиши жуда муҳим саналади.
Киши нафс талаби, кўнгил орзуларини сабр орқалигина чегаралай олади. Шу боис, ҳадиси шарифда сабр имоннинг ярмидир, дейилади. Сабр ва шукр икки дунё саодатининг калити ҳисобланади. Агар ҳар бир киши қилаётган ишида сабр ва шукрни дастур қилса, албатта, муваффаққиятга эришади. Зеро, ҳадиси шарифда “мусибат етганда сабр қилувчи, берилган неъматларга шукр қилувчи, бировларнинг қилмишларини кечирувчи, ўзи бировга зулм етказса, тавба қилувчи кишиларга хотиржамлик ва ҳидоят адо этилур” дейилади.
Инсон ҳар бир ишни сабр билан олиб борса, борига шукр, йўғига қаноат қилса мақсадига эришади, тинч ва осуда ҳаёт кечиради. Инсонийлик қадрини сақлаш билан бирга, турли ноинсоний йўлларга кириб кетмайди. Инсон ўз етуклигига эришиши, турмушининг фаровон бўлиши, умрининг мазмунли ўтиши, ҳаётнинг маъносини чуқурроқ билиши учун ҳам бу хислатлардан насибадор бўлиши керак. Шунинг учун шукр ва сабр киши маънавияти хазинасининг асоси бўлиб, бунга эришиш иззат ва шараф йўли саналади.
Улуғларимиз “ғалаба сабр билан биргадир” дейишади. Сабр ғалаба сари етаклайди. Инсон сабр қилгани сайин ҳақ устида тобора муқимроқ ўрнашади. Ҳаёт турли-туман мусибат ва қийинчиликлар билан тўла. Киши улар қаршисида сабот-матонат билан турмас экан, ўзини йўқотиб қўйиши турган гап. Имоннинг афзали-сабр ва бағрикенгликдир.
Пайғамбаримиз алайҳиссалом уч хил нарсага қасамёд қиладилар: 1. Садақа қилган билан банданинг моли камайиб қолмайди. 2. Қайси бир бандага зулм билан унинг молига хиёнат қилинса-ю, у унга сабр айласа, албатта Аллоҳ таоло унинг иззат ва шарафини зиёда этади. 3. Қайси бир банда тиламчилик эшигини очиб қўйса, Аллоҳ таоло унга фақирлик эшигини очиб қўяди.
Умуман, бу ҳаётда инсон учун сабрдек муҳим ва зарур эҳтиёжни топмоқ мушкул. Биз тоат-ибодат қилишда ҳам, гуноҳ-маъсиятларни тарк этишда ҳам, бало-кулфатларга бардош беришда ҳам сабрга муҳтожмиз. Шу боис, сабр барча қувватлардан устун қўйилди. Аллоҳнинг сабрли бандалари сабр зиёси остида мангу ҳақ йўл соҳибларига айланадилар. Шукр ва фикр қилиш сабр-қаноатнинг чироғи бўлиб, ҳалқимизда “Сабр таги сариқ олтин” деган мақол бежизга айтилмаган.
Нормурод ШОИМОВ,
Қашқадарё вилояти Китоб тумани “Севаз” жоме масжиди имом-хатиби
Абдулазиз Комилов АҚШ Давлат котиби ёрдамчиси билан диний эркинликлар бўйича мулоқот қилди
Ўзбекистон ташқи ишлар вазири Абдулазиз Комилов бошчилигидаги делегация Вашингтонда АҚШ Давлат котиби ёрдамчиси, Демократия, инсон ҳуқуқлари ва меҳнат бюроси раҳбари Лиза Петерсон билан учрашди, деб хабар бермоқда «Дунё» АА мухбири.
Суҳбат чоғида Ўзбекистоннинг инсон ҳуқуқлари ва демократик эркинликларни таъминлаш, жумладан, давлат бошқарувининг очиқлиги ва ҳисобдорлигини ошириш, коррупцияга қарши курашиш, қонун устуворлигини таъминлаш, сўз эркинлиги ва оммавий ахборот воситалари масалалари, шунингдек, фуқаролик жамияти институтларини ривожлантириш бўйича шароитларни яхшилаш борасидаги асосий ютуқлари юзасидан фикр алмашилди. Ўзбекистоннинг мажбурий меҳнат ва одам савдосига қарши курашиш, шунингдек, диний эркинликларни таъминлашдаги тараққиёти алоҳида муҳокама қилинди.
Америка дипломати Президент Шавкат Мирзиёев раҳнамолигида мамлакатни демократлаштириш, жамиятни эркинлаштириш ва қонун устуворлигини мустаҳкамлаш борасида амалга оширилаётган чора-тадбирларни олқишлади. Шу билан бирга, бюро раҳбари янада эркин жамият қуриш ва самарали давлат бошқарувини таъминлаш борасидаги саъй-ҳаракатларни давом эттириш муҳимлигини таъкидлади.
Томонлар ўзаро манфаатли соҳаларда Ўзбекистон-АҚШ ҳамкорлигини фаоллаштиришга содиқлигини тасдиқлади.
Эслатиб ўтамиз, 2020 йил 17 ноябрь куни ташқи ишлар вазири Абдулазиз Комилов бошчилигидаги делегация Вашингтонда АҚШ Давлат котибининг ёрдамчиси, Демократия, инсон ҳуқуқлари ва меҳнат бюроси раҳбари Роберт Дестро билан учрашган эди.
Ўзбекистон мусулмонлари идораси матбуот хизмати
Сўраган эдингиз: Фарзандингиз кимлар билан дўстлашаётганига аҳамиятли бўлинг! (видео)
Ғуломиддин домла Холбоев
Фатво бўлими
Бурҳанеттин Дуран: Буюк ўзбек олимлари Исломнинг дунёга ёйилишига бевосита ҳисса қўшдилар
Ўзбекистоннинг Истанбулдаги Бош консуллиги вакиллари "Сиёсий, иқтисодий ва ижтимоий тадқиқотлар фонди" (Siyaset, Ekonomi ve Toplum Araştırmaları vakfı, SETA) нотижорат тадқиқот институти раҳбарияти билан музокаралар ўтказди, деб хабар бермоқда «Дунё»ахборот агентлиги.
Музокаралар чоғида фонд Бош координатори Бурҳанеттин Дуран SETA фаолияти ҳақида маълумот бериб, тузилма миллий, минтақавий ва халқаро муаммоларни инновацион тадқиқ этиш билан шуғулланувчи нотижорат тадқиқот институти эканини таъкидлади. Унинг асосий мақсади сиёсат, иқтисодиёт ва жамият соҳасидаги маълумотларни тўплаш ва таҳлил қилиш, шунингдек, дунёдаги маданий ўзгаришлар ҳақида сиёсатчилар ва жамоатчиликни хабардор қилишдир.
"Ўзбекистон туркий ўзликнинг келиб чиқишининг асосий манбаларидан бири сифатида минтақада энг катта тарихий, маданий ва диний аҳамиятга эга. Ислом Арабистон ярим оролида пайдо бўлишига қарамай, буюк ўзбек олимлари унинг яхшилик, тинчлик ва бунёдкорлик дини сифатида дунёга ёйилишига бевосита ҳисса қўшдилар, шунингдек, математика, астрономия, тиббиёт ва бошқа фанлар соҳасида ҳам кўплаб кашфиётлар қилдилар", - дейди Бурҳанеттин Дуран.
Ўзбекистон мусулмонлари идораси матбуот хизмати