muslim.uz
Муҳаммад Амин
Биласизки, Каъбани таъмир қилиш пайтида ўртада мунозара, баҳс пайдо бўлди. Яъни Каъбанинг эски, дарз кетган деворларини йиқитиб, қайтадан тиклай бошлаётган пайтда Ҳажарул Асвадни ўз ўрнига кўтариб қўйиш масаласида ораларида ихтилоф чиқди.
Мен Қурайшнинг фалон қабиласиданман, фалон насабиданман, ҳаммангиздан юқори тураман. Шунинг учун қабилам шарафини ҳимоя қилишим, бу тошни ўз ўрнига мен кўтариб қўйишим керак, – деса, бошқаси бунга қарши:
Бу қандай гап? Менинг қабилам сеникидан анча устун, мен фалончи қабиладанман, ундай, бундай...
Шу тахлит масала чигаллашди. Бориб-бориб, гап жанжалга, ҳатто қилич яланғочлашга борди. Шунда бир киши:
Илтимос, тинчланинглар, Масжиди Ҳарамда жанжаллашманглар! Бу ер жанжаллашадиган жой эмас! Келинглар, ҳаммамиз кутиб турамиз. Эшикдан биринчи бўлиб ким кириб келса, ўшани ҳакам қиламиз. Ҳакам кимни бу ишга лойиқ деб билса, кимни кўрсатса, ўша одам тошни ўрнига қўйсин! – дебдилар.
Худди қуръа ташлаш каби... Чунки эшикдан ким кириб келади, у кимни тайинлайди – ҳар икки ҳолат ҳам мавҳум — маълум эмас...
Шу пайт эшикдан Пайғамбаримиз соллаллоҳу алайҳи васаллам кириб келдилар.
Эшик деганимиз: Каъбанинг атрофи девор билан ўралган... Шу ерда бир эшик бўлиб, “Бобус Салом” дейилган ва эшикдан ҳовлига кирилган. Кейинчалик у ерлар кенгайтирилган. У эшик ҳам анча орқага сурилиб кетган.
Шундай қилиб, ўша эшикдан Пайғамбаримиз соллаллоҳу алайҳи васаллам киришлари билан ҳамма: “Э, Муҳаммад ал-Амин келди; бўлди, биз розимиз! Унинг ҳакам бўлгани яхши бўлди”, – дейишди. Ҳаммалари адолатли, энг ақлли ва ишончли кишининг биринчи бўлиб эшикдан кириб келгани ва унинг ҳакам бўлгани учун жудаям севинишди. Бу вақтда Расулуллоҳ соллаллоҳу алайҳи васаллам ҳали пайғамбар эмас, қурайшнинг бир етим боласи эдилар. Бой эмас, мавқе-мақоми йўқ, лекин ҳамма пулини унга омонат топширади, унга нарсаларини ишонишади... Чунки энг ишончли, диёнатли инсон эдилар, улуғ хулқ соҳиби бўлиб етишган, Аллоҳ таоло шундай тарбия қилган эди.
“Эй Муҳаммад! Биз бир муаммони ҳал қилишда келишолмай қолдик. Сен ҳакамлик қилиб айт, шу тошни бизлардан қайси биримиз ўз ўрнига қўяйлик? Майли, сен кимни лойиқ кўрсанг, биз розимиз. Сенинг айтганинг бўлади!...” – дейишди.
Шунда Расулуллоҳ соллаллоҳу алайҳи васаллам:
“Бир матоҳ келтиринг!”– дедилар.
Дастурхондек мустаҳкам, пишиқ бир матоҳ олиб келишди. Тошни унинг устига қўйишди ва Расулуллоҳ соллаллоҳу алайҳи васаллам: “Ҳаммангиз баробар кўтаринглар!” дедилар. Ҳамма қабила бошлиқлари баробар кўтаришди. Тошни ўзлари олиб, ўз қўллари билан жойига қўйдилар. Шундай қилиб, тош ҳам энг яхши инсон томонидан қўйилди, ҳамда ҳеч ким ҳеч кимдан хафа ҳам бўлмади. Масалани энг қулай йўл билан ҳал қилдилар...
Бу мисол пайғамбар соллаллоҳу алайҳи васаллам нинг пайғамбар бўлишларидан олдинги жамиятдаги мавқеъини ҳамда ижтимоий масалаларни ҳал қилиш қобилиятини кўрсатади. Мана, у киши шундай улуғ шахсият соҳиби бўлганлар.
Расулуллоҳ соллаллоҳу алайҳи васаллам ҳали пайғамбар бўлмасидан олдин ҳам марҳамат, меҳр-шафқатли, ёмон ишларга аралашмаганликлари билан машҳур эди. Каъбанинг ичида 360 та бут бўлгани, у зот ҳеч қачон бутларга сиғинмаганликлари билан танилган сокин инсон эдилар. Ҳамма сиғинган, лекин у зот сиғинмаганлар. Расулуллоҳ соллаллоҳу алайҳи васалламнинг мозийларига, ўтмишларига, ёшликларига соя солган, доғ бўлиб қолган бирор воқеа йўқ... Демак, ҳали пайғамбар бўлмаган вақтларида ҳам Аллоҳ Таоло у муборак зотни Ўзи ҳимоя қилган, тарбия қилган.
"Ислом ва ахлоқ" китобидан олинди
Оқтўба шаҳрида янги масжид очилди
Оқтўба шаҳрида саховатли инсонлар ёрдамида яна бир янги масжид очилди. Muftyat.kz хабар беришича, очилиш маросимида Оқтўба вилояти бош имом-хатиби Толеби Оспан, шаҳар ҳокими Асхат Шахаров ва дин ишлари бошқармаси бошлиғи Алимбек Туралиев ҳамда масжид қурилишида иштирок этган тадбиркорлар, оқсоқоллар ва қишлоқ аҳли иштирок этди.
Қишлоқ аҳолиси талабига биноан, 2018 йилда вилоят ҳокимлиги муфтиятга масжид қуриш учун ер участкаси ажратди ва қурилиш 2019 йилнинг май ойида бошланди. 1 йилу 4 ойдан сўнг капитал қурилиш натижасида 800 ўринли масжид муваффақиятли якунланди. Масжиднинг ер ва биноси Қозоғистон Мусулмонлар диний идораси балансида тўлиқ рўйхатга олинган ва филиал сифатида рўйхатга олинган.
Диний идора қарорига кўра, масжидга "Каирхўжа" номи берилди ва Олий муфтий буйруғи билан Сунгат Саметов имом жтиб тайинланди.
Оқтўба шаҳридаги 800 кишига мўлжалланган "Каирхўжа" масжиди биноси икки қаватдан иборат. Масжид ҳар бир қаватининг майдони 324 квадрат метрни ташкил этади. Биринчи қаватда катта асосий намозхона, кутубхона, Қуръон ўқиш хонаси ва имом хонаси мавжуд. Иккинчи қаватда аёллар зали бор. Шунингдек, биринчи қаватда эркаклар учун қўшимча хона ва дарсхона мавжуд. Масжид ҳовлисида 240 квадрат метр майдонга эга қўшимча мажмуавий бино мавжуд. 4 хонали имом кабинети, қозонхона, эркаклар ва аёллар ҳожатхонаси бор. Масжиднинг умумий майдони 0.500 гектарни ташкил этади. Ташқи ҳудуд бутунлай ўраб олинган. Ушбу масжид вилоятдаги 68- ва шаҳардаги 11-масжид сифатида рўйхатга олинган.
Ўзбекистон мусулмонлари идораси матбуот хизмати
АФВ ЭТИШДАН МАҚСАД — ХАТО ҚИЛГАН ИНСОН ҚАЛБИГА РЎШНОЛИК ОЛИБ КИРИШ
Янги Ўзбекистон. Унда одамларни рози қилиш, уларнинг эркин яшаш, ўқиш, ишлаш, ижтимоий ҳимояланиш каби ҳуқуқлари давлат сиёсатининг устувор йўналиши этиб белгиланди. Бугун ана шу улуғвор тамойил асосида, қолаверса, халқимизга хос кечиримлилик, инсонпарварлик ва бағрикенглик қадриятларидан келиб чиқиб, ҳаётда билиб-билмай адашган, хато қилган инсонларга мурувват қўли чўзилмоқда, уларни тўғри ҳаётга қайтаришнинг самарали чоралари кўрилмоқда.
Ўзбекистон Президенти Шавкат Мирзиёев ташаббуси билан ҳаётимизда илк бор янги институт сифатида намоён бўлган афв этиш принципи ана шу мақсадни амалга ошириш йўналишидаги муҳим қадам бўлди. Зеро, бу жараёнда чин кўнгилдан пушаймон бўлган, билиб-билмай жиноят содир этган, қилган иши хато эканини англаб, тузалиш йўлига қатъий ўтган маҳкумлар афв этилмоқда.
Вазирлар Маҳкамаси ҳузуридаги Дин ишлари бўйича қўмита раиси Абдуғофур АҲМЕДОВ билан бўлиб ўтган суҳбатимиз ҳам айнан афв этилган фуқароларни ижтимоий реабилитация қилиш, ҳар томонлама қўллаб-қувватлаш, муаммоларини ҳал этиш, уларни қийнаётган ва ўйлантираётган саволларга уламолар, имом хатиблар ва турли соҳа вакиллари иштирокида батафсил жавоб бериш, умуман олганда, бу борада олиб борилаётган кенг кўламли ишлар хусусида бўлди.
Манба: “Янги Ўзбекистон” газетаси
2020 йил 3 октябрь, 189-сон
Расулуллоҳ соллаллоҳу алайҳи васаллам ҳаётларидан лавҳалар: Тилингни эҳтиёт қил! (Аудио)
ЎМИ матбуот хизмати
Мусибатлар гуноҳлар сабабли келади-ми?
— Гуноҳи кўп инсонлар бу дунёда кўп қийналади-ми? Негадир ниятларимга етишим қийин, ташвишларим кўп. Баъзан гуноҳларим учун шунақа бўлса керак, деб ўйлайман...
— Улуғ уламолардан Шамсуддин Димашқий раҳимаҳуллоҳ айтади: “Гуноҳкорлик барча нарсадаги – умрдаги, ризқдаги, илмдаги, тоат-ибодатдаги барча баракотни ўчириб юборади. Умуман олганда, дину-дунёдаги бирор баракотни қолдирмай барчасини батамом маҳв этади. Аллоҳ таолога гуноҳкор бўлган банда, дини-ю дунёсидаги барча баракотдан маҳрум этилган кишидир деб айтилса, хато бўлмайди. Ер юзидан баракотнинг кўтарилиб кетишининг бирдан-бир сабаби ҳам бандалар тарафидан содир этилган гуноҳлардир”.
Банда гуноҳи туфайли баракотли ризқдан маҳрум қилинади. Гуноҳкорлик ризқдаги ва умрдаги баракотни ўчириб юборишининг сабаби шуки, гуноҳкор шахсларни шайтон жиловлаб олади. Улар эса ўзларини шайтонга бутунлай топшириб кўядилар, натижада у уларнинг устиларидан ҳокими мутлаққа айланади. Шайтон эгалик қилган ўринлардан баракот батамом ўчиб кетади. Шунинг учун тоат-ибодатда, зикрда, яхшилик қилишда бардавом бўлиш, истиғфорни кўп айтиш лозим. Зеро, ҳадислардан бирида Пайғамбаримиз алайҳиссалом: “Ким истиғфор айтишни ўзига лозим тутса, Аллоҳ унинг мушкулини кушойиш қилади, оғирини енгил қилади ва ўзи ўйламаган томондан ризқ беради”, деганлар (Имом Абу Довуд, Имом Ибн Можа ривояти).
Банданинг “Астағфируллоҳ” ва шу маънодаги калималарни тилида айтиб, дили билан тасдиқлаши истиғфордир. Умумий маънода эса истиғфор диндорликни ифода этади. Валлоҳу аълам!
Муҳаммад Айюб ҲОМИДОВ