muslim.uz
Ҳожиларга енгиллик буюк мурувватдир
Аллоҳ таборака ва таолога чексиз ҳамду саноларимиз, Ҳазрати Муҳаммад мустафо соллаллоҳу алайҳи ва салламга беҳисоб саловоту саломларимиз бўлсин.
Мамлакатимизда ҳаж ва умра тадбирларини ташкил этиш билан боғлиқ ишларнинг самарадорлигини ошириш, зиёратларни юқори савияда ташкил этиш ва муборак сафарларнинг нархларини пасайтириш борасида тизимли ишлар амалга оширилди. Шунга мувофиқ, Ўзбекистонда 2019 йилги Ҳаж мавсуми учун сарф-харажатлари сметаси бўйича ҳар бир зиёратчидан олинадиган маблағ 33 млн. 300 минг сўм этиб белгиланди. Қайд этиш керакки, ўтган 2018 йил учун ҳаж зиёрати нархи 38 млн. сўм эди. Бу йилги сарф-харажатлар эса тахминан 42-43 миллион сўм бўлиши кутилаётган эди.
Тараққиётимизнинг янги даврида муҳтарам Президентимиз томонларидан динимиз арконларини адо этиш учун улкан шарт-шароитлар берилаётгани, хусусан, она-Ватанимиздан муборак ҳаж сафарига бораётган фуқароларимиз учун яратилаётган қулай имкониятлар халқимизга бўлган ғамхўрликнинг ёрқин намунасидир.
2019 йилда ҳаж ибодатини адо этишга тараддуд кўраётган мўмин-мусулмонларимиз учун ҳаж сафарининг баҳоси пасайтирилиши тарихий воқеа бўлди. Ўтган йиллар давомида бундай енгиллик кузатилмаган эди, бу ҳам бўлса, муҳтарам Президентимизнинг шахсий ташаббуслари билан биринчи марта муборак сафарга борувчилар учун сафар нархининг кескин даражада пасайтирилиши бўлди. Кўрсатиладиган хизматлар савиясини янада ошириш баробарида, сафар баҳосининг қарийб 10 миллион сўмга камайиши жуда катта мурувватдир.
Давлатимиз Раҳбарининг муборак сафар зиёратчиларига кўрсатаётган мана шундай юксак эътибор ва ғамхўрликка мос равишда келгусида фуқароларимиз ҳаж ибодатини адо этиб, Ватанимизга қайтгач, ўзбекистонлик ҳожилар шахсий ҳаётда, ижтимоий фаолиятда бошқаларга ибрат ва намуна кўрсатишади, савоб ишларда бор куч-ғайратларини сарфлашади, иншаа Аллоҳ.
Муҳтарам Президентимизга чуқур миннатдорлик билдирган ҳолда эл-юрт саодати ва халқимиз фаровонлиги йўлида олиб бораётган фидокорона меҳнатларида улкан зафарлар ато этишини Яратган Парвардигордан сўраймиз.
Биз, мўмин-мусулмонлар халқимиз ҳаёти янада фаровон, муҳтарам Президентимиз раҳнамоликларида амалга оширилаётган барча хайрли ишлар бардавом бўлишини Ҳақ таборака ва таолодан сўраб дуолар қиламиз.
Усмонхон АЛИМОВ,
Ўзбекистон мусулмонлари идораси раиси, муфтий
Сафвон ибн Сулаймнинг азизлиги
Касир ибн Яҳё отасидан ривоят қилади: “Сулаймон ибн Абдулмалик Мадинага келди. У пайтда Умар ибн Абдулазиз у ерда волий эди. Сулаймон одамлар билан бирга пешинни ўқигач, уларга ўгирилиб, меҳробга суяниб ўтирди. Шу пайт кўзи Сафвон ибн Сулаймга тушди ва Умардан “Бу киши ким? Ундан кўра хушбичим, келишган одамни кўрмаганман” деб сўради. Умар: “Сафвон” деб жавоб берди.
Халифа Сулаймон бир хизматкорга: “Ҳой бола, мана бу халтада беш юз динор бор. Буни олиб, анави турган одамга олиб бор!” деди. Йигит Сафвоннинг олдига бориб, намоз ўқиб бўлгунича кутиб турди. Сафвон намоз ўқиб бўлиб, салом бергач, йигитдан: “Нима ҳожатинг бор?” деб сўради. Йигит: “Мўминларнинг амири “Буни оиласига ишлатсин” дедилар” деб айтди ва (халтани кўрсатди).
Сафвон хизматкор йигитга: “Сен юборилган одам мен эмасман” деди. Йигит ҳайрон бўлиб, “Сиз Сафвон ибн Сулайм эмасмисиз?” деб сўради. У киши “Сафвонман” деб жавоб берди. “Унда бу халтани сизга юборишди” деди йигит.
Шунда Сафвон йигитга: “Сен бориб, буни аниқлаштир” деди. Йигит қайтиб кетди. Сафвон дарҳол поябзалини олди-да, масжиддан чиқиб кетди. Шу билан Сафвон то Сулаймон Мадинадан қайтиб кетгунича кўринмади”.
Сафвон ибн Сулайм раҳимаҳуллоҳ мадиналик машҳур тобеинлардан бўлиб, катта фақиҳлардан, зоҳид ва ибодатли зотлардан эдилар. Ҳижрий 132 йилда 72 ёшларида вафот этганлар.
Ҳоний Ҳожининг “Солиҳлар ва солиҳалар,
зоҳидлар ва зоҳидалар ҳаётидан минг бир қисса”
китоби асосида Нозимжон Иминжонов тайёрлади
Халқ манфаати йўлидаги эзгу ишларнинг амалий ифодаси
Юртимизда сўнги йилларда барча соҳалар қатори ижтимоий-маънавий, диний-маърифий соҳаларга, хусусан, мўмин-мусулмонлар Умра ва Ҳаж зиёратларини адо этишлари учун қулай шарт-шароитлар ҳозирлашга алоҳида эътибор қаратилмоқда.
Мисол учун, 2016 йилда мамлакатимизда 5200 киши Ҳаж амалларини адо этиб келган бўлса, 2017 йилдан бошлаб 7200 нафар фуқароларимиз Ислом динининг муқаддас арконларидан бирини адо этиш имконига эга бўлди.
Илгари Умра зиёратига фуқароларимиз чекланган квота асосида юборилган бўлса, ўтган йилдан эътиборан фуқароларимизнинг йил давомида квотасиз Умра зиёратига юбориш имконияти яратилди.
Мўмин мусулмон борки, Ҳаж ибодатини адо этишни орзу қилади. Аммо ҳамманинг ҳам бунга қурби етавермайди. Муҳтарам Президентимиз Шавкат Миромонович Мирзиёевнинг шахсий ташаббусларига асосан фуқароларимизга Ҳаж ва Умра сафари мобайнида кўрсатиладиган хизматлар сифатини янада ошириш, сарф-харажатларни арзонлаштириш мақсадида, махсус ишчи гуруҳи ташкил этилиб, Саудия Арабистонидаги ширкатлар билан музокаралар олиб борилди.
2018 йилда фуқароларимиз учун Ҳаж зиёратини амалга ошириш харажатлари 38 миллион сўмни ташкил этган эди. 2019 йилдан Саудия Арабистонида барча хизматларга 5 фоизлик қўшилган қиймат солиғи ва меҳмонхоналарга 2,5 фоизлик солиқ киритилди. Шунга кўра бу йил ҳаж зиёрати сарф-харажатлари тахминан
42-43 миллион сўм бўлиши кутилаётган эди.
Давлатимиз Раҳбарининг иродалари ва саъй-ҳаракатлари натижасида жорий йилдан фуқароларимизнинг ҳаж сафари харажатлари 33,3 миллион сўмгача туширилди, яъни ҳаж ибодатини амалга оширишни қарийб 10 миллион сўмга арзонлаштиришга эришилди. “Ҳаж – 2019” мавсумидан сўнг умра сафари 1,3 миллионга арзонлаштирилди. Шунингдек, “Ҳаж – 2018” тўловидан ортган 926,5 минг сўм миқдоридаги маблағ ҳар бир зиёратчига қайтариб берилди.
Буларнинг барчаси мамлакатимизда фуқаролар манфаатларини кўзлаб амалга оширилаётган халқпарвар сиёсат ва эзгу ишларнинг яна бир ёрқин амалий ифодаси бўлди.
Ўзбекистон мусулмонлари идораси Матбуот хизмати
Тошкент вилояти вакили Жамбулда ҳалок бўлган юртдошларимиз оиласига таъзия билдирди
Кеча, 22 апрель куни Қозоғистон Республикасида юз берган фожеада ҳалок бўлган Тошкент вилоятида яшаган юртдошларимиз жамоатчилик иштирокида сўнгги манзилга кузатилди.
Тошкент вилояти ҳокими Ғуломжон Ибрагимов, вилоят имом-хатиби Хайрулло Турматовлар автоҳалокатда ҳалок бўлганларнинг оила аъзоларига таъзия билдирдилар.
Бундан ташқари, автоҳалокатда жароҳатланганларнинг оиласидан хабар олинди.
Ўзбекистон мусулмонлари идораси Матбуот хизмати
Нишонга урилган гаплар: “Бир инсоннинг қандайлигини билмоқчи бўлсанг, унга мол ёки мансаб бериб кўр”
Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Албатта, ҳаққининг риоясини қилмайдиган кишининг муҳаббатини қозонишга уринувчи одам ўзига энг кўп зулм қилувчилардандир.
Имом Шофеий раҳимаҳуллоҳ
*****
Кучли бўлишинг учун ҳеч бир одамдан ҳеч нарса кутмаслигинг керак.
“Тарих муҳрлаган сўзлар”
*****
- Баъзи одамлар билан суҳбатлашсанг, юксаласан.
- Баъзи одамлар билан гаплашмасанг, сукут қилсанг, юксаласан.
“Тарих муҳрлаган сўзлар”
*****
Ижобий фикрлайдиган кишилар билан бирга ўтир. Чунки, донолик ва аҳмоқлик, шодлик ва маҳзунлик “юқумли”дир.
“Тарих муҳрлаган сўзлар”
*****
Бир инсоннинг қандайлигини билмоқчи бўлсанг, унга мол ёки мансаб бериб кўр.
“Тарих муҳрлаган сўзлар”
*****
Мағлубият ёқасига келиб қолган бўлсанг, сени мағлуб бўлганингни кўриш орзусида юрганлар ҳам борлигини ўйла!
“Тарих муҳрлаган сўзлар”
*****
Ҳасад, гина муваффақиятсизликнинг энг сўнгги босқичидир.
“Тарих муҳрлаган сўзлар”
*****
Таълим – фақатгина ҳақиқатлар ва маълумотларни билиб олиш эмас, балки ақлни фикрлашга ўргатиш ҳамдир.
“Тарих муҳрлаган сўзлар”
*****
Интернет материалларидан тўплаб, таржима қилувчи
Нозимжон Иминжонов