Сув Аллоҳнинг улкан неъматидир. Рангсиз, таъмсиз, ҳидсиз суюқлик танамизни, либосларимизни поклайди, ташналигимизни қондиради, ҳаётимизнинг давом этишига сабаб бўлади. Бежизга сувни “Обиҳаёт” (“Ҳаёт суви”) дейишмайди.

Дунёда ичишга яроқли сув захираси жуда оз. Денгиз ва уммонлар суви шўр. Чучук сувлар асосан тоғдаги музликларда жамланган. Ундан кейин дарё ва кўлларнинг сувлари ҳам чучукдир. Дарё ва кўл сувлари қайта ишланиб, аҳолига етказилади.

Аммо дунёнинг ҳамма давлатларида ҳам бундай эмас. Ичимлик суви танқислигидан қийналаётган кўплаб мамлакатлар бор. Буларнинг асосий қисми Африка қитъаси мамлакатларига тўғри келади. Ёғингарчиликнинг камлиги, сув ҳавзаларининг мавжуд эмаслиги ва бошқа омиллар шундай ҳолга сабаб бўлган.

Аллоҳга шукрки, бизнинг юртимизда ичимлик суви борасида бундай муаммолар йўқ. Аммо бу дегани сувни исроф қилса бўлаверади дегани эмас. Бизда ҳам сув миқдори ўлчовлидир. Банда неъматни қадрига етса, шукр қилса, ўша неъмат зиёда қилиб берилади. Бордию ношукрлик қилиб, исрофга йўл қўйса, неъмат тортиб олинади ва ўрнига азоб келади.

Афсуски, сувни исроф қилиш ҳолларига тез-тез гувоҳ бўлиб қоляпмиз. Жўмраги бузилган сув қувурларидан тоза ичимлик суви шариллаб оқиб ётади. Ўша сувдан ичадиган аҳоли вакилларидан бирортаси: “Кел, шу жўмракни тузаттириб қўяй! Ахир бу сувдан ўзимиз ичамиз-ку! Шунча сув исроф бўлиб оқиб ётмасин. Бу исрофнинг ҳам сўроғи бор” деб ўйлаб кўрмай, ўша қувур ёнидан бепарволарча ўтиб кетаверади.

Сув шариллаб оқиши у ёқда турсин, ҳатто томчилаб оқиб турса ҳам исроф бўлади. Чунки шу томчилар жамланса, катта миқдорда сув исроф бўлаётгани ойдинлашади.

Биз турли кафе, ошхона ва бошқа овқатланиш жойларига кирганимизда, официантга “Бу муздек эмас-ку! Бошқа муздекроғидан олиб чиқ!”, “Мен кўк чой ичмайман, қора чой ичаман”, “Менга лимонли чой опкелинг!” деб ўз истакларимизни баён қиламиз. Шу пайтда дунёнинг қайсидир нуқтасида одамлар лойқа, иссиқ, шўр, тозаланмаган, ҳайвонлар ичиб юрадиган сувдан истеъмол қилиб ҳаёт кечираётганини унутмасак бўлди!

Ҳа, дунёнинг айрим жойларида инсонлар танага зарарли микроблар билан тўла бўлган, дизбактериоз, диарея ва бошқа заҳарланиш кўринишларига олиб келадиган сувларни ичишмоқда.

Шуларни ўйлаб, ичаётган мусаффо, пок, муздек сувимиз учун Роббимизга кўп-кўп шукрлар қилайлик!

Аллоҳ таоло бизга ато қилаётган чучук сув неъмати ҳақида шундай марҳамат қилган:

أَفَرَأَيْتُمُ الْمَاء الَّذِي تَشْرَبُونَ أَأَنتُمْ أَنزَلْتُمُوهُ مِنَ الْمُزْنِ أَمْ نَحْنُ الْمُنزِلُونَ لَوْ نَشَاء جَعَلْنَاهُ أُجَاجاً فَلَوْلَا تَشْكُرُونَ

“Ўзингиз ичадиган сувни ўйлаб кўринг-а! Уни булутлардан сиз туширасизми ёки Биз тушурувчимизми? Агар хоҳласак, Биз уни шўр қилиб қўямиз. Шукр қилсангиз-чи!” (Воқеа сураси, 68-70-оятлар).

Азизлар, Роббимизнинг берган барча неъматлари қатори, истаганимиздек сув ичиш неъматини бергани учун ҳам кўпроқ шукр қилайлик! Шунда Аллоҳ бу неъматларини янада зиёда қилиб беради!

Нозимжон Иминжонов тайёрлади

Ўзбекистон мусулмонлари идораси тасарруфидаги олий ва ўрта махсус диний таълим муассасаларига 2019-2020 ўқув йили учун бўлиб ўтган қабул имтиҳонлари натижалари эълон қилинди.

Қуйидаги линк орқали барча таълим даргоҳларида бўлиб ўтган имтиҳон натижалари билан танишишингиз мумкин.

Президент Шавкат Мирзиёев 26 июль куни мамлакатимизнинг Биринчи Президенти Ислом Каримов қабрига гул қўйиб, унинг хотирасига ҳурмат бажо келтирди.

Қуръон тиловат этилиб, марҳумнинг ҳақига дуо қилинди. Нуронийлар, уламолар билан суҳбатда Ислом Каримовнинг халқимиз, давлатимиз манфаати йўлидаги хизматлари, инсоний фазилатлари ёдга олинди.

https://president.uz/uz/2768

Мадина бутун дунё мусулмонлари талпиниб келаётган энг қутлуғ ва табаррук масканга айланган. Айниқса, 2019 йил ҳаж мавсуми бошлангач, зиёратчиларнинг сони кескин ортмоқда. Ҳар куни шаҳар аэропортида бир неча ўнлаб рейслар қабул қилиниб, Ислом динининг бешини фарзини адо этиш умидида келаётган мусулмон олами вакилларига ўз қучоғини очаётир. Хусусан, Ўзбекистондан ўртача ҳар куни 700 нафар киши келиб, ибодатчилар сафига қўшилмоқда.
Маҳаллий аҳолининг айтишича, жорий йилги ҳаж мавсуми йилнинг нисбатан иссиқ пайтига тўғри келди. Шундай бўлса-да, ҳаво ҳарорати у қадар баланд эмас мўътадил. Майин эсиб турган шабада тоғ бағрида жойлашган шаҳарга салқинлик улашмоқда. Зиёратгоҳлар эса совитиш ва салқинлантириш ускуналари билан тўлиқ жиҳозланган. Буларнинг бари бўлғуси ҳожилар белгиланган арконларни тўлиқ бажаришида айни муддао бўлаётир. Ҳар бир гуруҳга бириктирилган элликбошилар уларга энг яқин кўмакчига айланган. Соғлиқлари эса Ишчи гуруҳи таркибидаги шифокорларнинг доимий назорати остида.
Тажрибали шифокорларнинг тасдиқлашича, юртимиз зиёратчиларнинг барчаси соғ-саломат ва ибодатларини беками-кўст бажаришмоқда. Бу муборак сафарга чиқаётган юртдошларимизнинг барчаси чуқурлаштирилган тиббий кўрикдан ўтказилгани, касалликларга қарши эмлангани самарасидир, десак, муболаға бўлмайди.
“Масжид ан-Набавий” масжида кеча-ю кундуз намозхонлар билан тўла.
— Бу бежиз эмас, албатта, — дейди элликбоши Меърожиддин Ҳайдаров. — Расулуллоҳ соллаллоҳу алайҳи васалламнинг муборак масжидлари зиёратининг фазли ҳақида кўплаб ҳадислар келтирилган. Уларнинг бирида, жумладан, шундай дейилади: “Менинг масжидимдаги бир намоз бундан бошқасидаги мингта намоздан яхшидур, фақат “Масжидул Ҳаром”гина ундан мустасно”. Шу боис ҳам юртдошларимиз ҳар бир дамни ғанимат билиб, вақтларини “Масжид ан-Набавий”да ўтказишга интилмоқда.
Дарҳақиқат, 700 минг кишига мўлжалланган бу масжидга одамлар сиғмай кетяпти. Унинг ҳовлилари, тепа қисмлари ҳам ибодатчилар билан тўлиб-тошган. Зотан, ҳамма савоб умидида, гуноҳларга мағфират илинжида олис йўл босиб келинган.
Ўзбекистонлик зиёратчилар Пайғамбаримизнинг энг севимли масканларидан бири бўлган Уҳуд тоғида ҳам бўлдилар. Саҳиҳ ҳадисларда келтирилишча, Расулуллоҳ соллаллоҳу алайҳи васаллам “Биз Уҳудни яхши кўрамиз, Уҳуд ҳам бизни яхши кўради”, дея марҳамат қилган эканлар.
Тоғ 7 километрга чўзилиб кетган бўлиб, баланд нуқтаси 2 минг метргача етади. У мўмин ва мушриклар ўртасида бўлиб ўтган Уҳуд жанги орқали тарихда қолган. Диний манбаларда келтиришича, дунё тоғлари орасида фақат Уҳуд жаннатга кирар экан.
Зиёратчилар мазкур тоғ этагида мангу қўним топган Пайғамбаримиз алайҳиссаломнинг амакиси ҳазрати Ҳамза ибн Абдулмутталиб қабрини зиёрат қилдилар. У ва Уҳуд жангида ҳалок бўлган саҳобалар руҳига Қуръони карим тиловат қилинди. Яратгандан юртимизга тинчлик, халқимизга омонлик, давлатимиз мустақиллиги абадий бўлишини сўраб, дуо қилдилар.
— Ҳажнинг фазилатлари ҳақида кўп эшитганмиз, китобларда ўқиганмиз, аммо ихлос қилиб, бу муқаддас манзилларга келгандан кейин руҳиятингизда шундай ўзгариш рўй бериб, қалбингизни ўзгача туйғулар чулғаб оларкан. Буни сўз билан ифодалаб бўлмайди. Бизга шундай имкониятни яратиб берган давлатимиз Раҳбарига ташаккур! Қаранг, зиёратчилар учун ҳамма шароит муҳайё қилинган. Ташкилий ишлар бундан ортиқ бўлмаса керак.
Шундан сўнг зиёратчилар Ислом оламида биринчи қурилган масжид — Қубога йўл олдилар. Бу ерда икки ракат нафл намози ўқидилар. Диний уломаларнинг таъкидлашича, кимки “Қубо” масжидига таҳорат олиб келиб, икки ракат нафл намозини ўқиса, бир умранинг савобига тенг савоб берилар экан.
Зотан, ҳаж ибодатининг айнан Мадинадан бошланиши замирида ҳам ҳикмат кўп. Бу муборак манзил бир қанча табаррук зиёратгоҳларни ўз бағрига олган, кўплаб оятлар айнан шу ерда нозил бўлган. Шу боис у нафақат Ислом оламининг маркази, балки пайғамбарлик ери, ваҳий манзили сифатида алоҳида қадрланади.

Саид РАҲМОНОВ

         Ҳар бир ота-она фарзандининг бахтли бўлишини истайди. Уларнинг қорни тўқ, усти бут, яхши касб-ҳунар эгаси бўлиши, тенги билан турмуш қуриб, уйли-жойли, бола-чақали бўлиши учун ҳаракат қилади.

         Ота-она фарзандга берадиган ва қолдирадиган энг яхши ва икки дунёда кор қиладиган мероси чиройли хулқи ва тарбиясидир. Зеро ҳадиси шарифда: “Ота ўз фарзандига гўзал хулқдан яхшироқ нарсани мерос қилиб қолдира олмас”, дейилган.

         Тарбия фарзанд камчиликка йўл қўйган пайтида унга хатосини тушунтириш ва қайтаришдангина иборат эмас, балки ота-она томонидан уларга яхши хулқ-одобларнинг мазмуни ва аҳамиятини ўргатиб, эслатиб бориш билан амалга ошади. Айниқса, азалий қадриятларимиздан бири - дастурхон атрофида жамланганда оила аъзоларининг биргаликда таомланиши, қўлларни ювган ҳолда “бисмиллаҳирроҳманирроҳим” дея бошлаш, катталардан олдин дастурхонга қўл узатмаслик, таомланиб бўлгач Яратганга шукр айтиб, дуо қилгач, биргаликда туриш, уйнинг катталари  вақти-вақти билан фарзандларга дастурхон атрофида каттага ҳурмат, кичикка иззат, ҳалоллик, поклик, яхшилик, сабр, адолат, шижоат, иффат каби ахлоқнинг муҳим жиҳатлари тўғрисида панд-насиҳат қилиши бугунги кунда долзарб бўлиб бормоқда.

         Лекин, тил билан тушунтириш ва панд-насиҳатнинг ўзи етарли эмас. Ота-она аввало ўзлари фарзандларига амалда ўрнак бўлиши керак. Чунки ҳар қандай фарзанд учун комил инсон – унинг ота-онасидир. Қуш уясида кўрганини қилади, ота-она фарзанд учун андоза.

         Баъзан кимдир бизни чақириб келса ёки телефонда сўраса, фарзандимизга “Дадам уйда йўқ эди, деб юбор” – деймиз. “Болам, китоб ўқи, дарс тайёрла” - деймиз-у, ўзимиз эса телефонда вақтимизни беҳуда ўтказаётганимиз уларга салбий таъсир кўрсатаётганини унутиб қўямиз, насиҳатимиз эса қулоқларидан у ёққа ўтмайди.

Кунларнинг бирида ота ўз болаларини илк бор гольф ўйингоҳига томоша кўриш учун олиб келди. Кассага келиб, чипта нархини сўради.

-Олти ёшгача бепул, ундан катталар учун уч доллар. Нечта чипта берай?

-Кичигим уч ёшда, каттаси еттида. Демак, иккита чипта оламиз, мана олти доллар.

Чиптачи кулиб:

-Жаноб, агар катта ўғлингизни олти ёш деганингизда мен бунга ишонган ва сиз пулингизни тежаб қолган бўлардингиз. Ахир кўпчилик шундай қилади. Олтими, еттими, болаларни фарқлаш қийин.

-Тўғри, сиз пайқамасдингиз, - деди ота. – Лекин ўғлим билади-ку! Атига уч доллар деб уни ёлғонга ўргатишни истамадим...

         Дарҳақиқат, донишмандлар фарзандларнинг яхши хулқли бўлишида ростгўйлик ва хиёнатнинг зидди бўлмиш омонатдорлик хулқларининг аҳамияти беқиёс эканлигини таъкидлашган. Зеро, тил дил калитидир.

         Пайғамбаримиз Муҳаммад (соллаллоҳу алайҳи васаллам): “Агар сенда тўрт хислат бўлса, дунёнинг қолгани йўқотсанг ҳам зарари йўқ, улар - омонатни сақлаш, ростгўй бўлиш, чиройли хулқ-одоб ва ҳалол луқма ейиш”, дедилар.

Бошқа бир ҳадисда эса: “Тўғрисўзлик яхшиликка етаклайди, яхшилик эса жаннатга олиб боради”, деб таъкидланган.

Фарзандларга илм ва амал билан яхши тарбия бериб, икки дунёда раҳмат олиб келадиган инсонлар этиб вояга етказиш барчамизга насиб қилсин!

Сирдарё вилояти “Исломобод” масжиди имом-хатиби

ДИЛМУРОД СУЛАЙМОНОВ