ЎЗБЕКИСТОН МУСУЛМОНЛАРИ ИДОРАСИ
АХБОРОТ ХАТИ

Ҳурматли иштирокчилар, қадрли ҳамкасблар!

Ўзбекистон мусулмонлари идораси томонидан 2021-2024 йилларга мўлжалланган, Ўзбекистон ­Республикаси Инновацион ривожланиш вазирлигининг илмий-тадқиқот ишларига давлат буюртмаси асосида ажратган №AJIM-202110011 – “Шарҳ ал-Ақоид ан-Насафия” асарининг академик илмий-изоҳли таржимаси ҳамда унинг андроид ва мультимедиа дастурларини яратиш” мавзусидаги мақсадли илмий-амалий лойиҳа доирасида ­“МАРКАЗИЙ ОСИЁ КАЛОМ ИЛМИ ТАРИХИ: ЯНГИ ИЛМИЙ ТАДҚИҚОТЛАР ВА ЁНДАШУВЛАР” ­мавзусидаги ­илмий мақолалар тўпламида ўз мақолангиз билан иштирок этишга таклиф этамиз. 

Мазкур тўпламда замонамиз уламолари, таълим муассасаларининг профессор-ўқитувчилари, докторантлар, мустақил изланувчилар, магистрантлар ва салоҳиятли толиби илмлар ўзларининг илмий мақолалари билан иштирок этишлари мумкин.

Илмий тўпламга қуйидаги йўналишларда мақолалар қабул қилинади:

Калом илми тарихи ва таълимоти, Ўрта Осиёда калом илмининг ривожланиши;
Калом илмининг ўзига хос масалалари;
Адашган оқимларга қарши курашишда калом илмининг аҳамияти;
Мутакаллим уламолари ҳаёти ва ижоди;
Ўрта Осиёда ёзилган калом илмига оид манбалар ва рисолалар;
Мотуридия тарихи ва таълимоти, Имом Мотуридий ҳаёти ва ижоди;
Мотуридийлик ва ашъарийлик ўртасидаги муносабатлар;
Мотуридийликнинг Самарқанд, Бухоро, Фарғона ва Хоразм мактаблари;
Ҳанафийлик ва мотуридийлик ўртасидаги муносабатлар;
Абу Ҳафс ан-Насафий ҳаёти ва ижоди;
Саъдуддин ат-Тафтазоний ҳаёти ва ижоди;
Ислом фалсафаси ва теологияси, Исломда мантиқ илми.

Мақолага қўйиладиган талаблар:
1. Илмий мақоланинг асосий матни 8-10 саҳифадан кам бўлмаслиги, (А-4 формат, ҳарфлар катталиги 14 кегел, қаторлар оралиғи 1.5 интервал; юқоридан, пастдан, чапдан, ўнгдан 2.5 см жой қолдириб, Times New Roman шрифтида расмийлаштирилиши лозим);
2. Мақоланинг номи бош ҳарфлар билан ёзилиши, 12 сўздан ортмаслиги, навбатдаги ­қатордан муаллифнинг исми, фамилияси, бир қатордан кейин илмий даражаси, ташкилот номи ва алоқа учун телеграм рақами кўрсатилиши талаб этилади;
3. Мақолалар ўзбек, араб ёки инглиз тилларида қабул қилинади. Мақолада қисқача ­аннотация, калит сўзлар 5 тадан кам бўлмаслиги лозим;
4. Мақоланинг асосий матни остида анъанавий тарзда сноскаларда манба ва адабиётларга ҳаволалар кўрсатилиши лозим, фойдаланилган манба ва адабиётлар рўйхати эса шарт эмас;
5. Файл номи муаллиф ёки биринчи муаллифнинг фамилияси билан номланиши лозим.
6. Матнда келтирилган маълумотларнинг ҳаққонийлиги ва аниқлигига муаллиф ёки муаллифлар жамоаси жавобгар ҳисобланади.

Мақоласи қабул қилинган иштирокчиларга тўплам бепул тақдим этилади.

Изоҳ: кўрсатилган талабларга жавоб бермаган мақолалар таҳрир ҳайъати томонидан чоп этмаслик ҳуқуқига эгалиги ҳамда муаллифларга қайтарилмаслигини маълум қиламиз.

Мақолаларни 2022 йил 1 мартга қадар ташкилий қўмитанинг қуйидаги (телеграм)
@Ilm_ahli_utkirbek манзилга юқоридаги кўрсатилган талаблар асосида электрон вариантда жўнатишингиз лозим. Тўплам ҳақидаги маълумотларни қуйидаги https://t.me/kalom_ilmi телеграм канали орқали кузатиб боришингиз мумкин.

Телефон ва телеграм: +998 (99) 105-05-03;  +998 (93) 569-15-57 Манзил: Тошкент шаҳар, Олмазор тумани, Қорасарой кўчаси 47-уй.  Мўлжал: “Ҳазрати Имом” мажмуаси. 

✅ You tube: https://youtu.be/75qTFXH0xsk

✅ Facebook: https://fb.me/e/287BpCHei

✅ ITV (tas-ix) https://itv.uz/#!/concert/34

Ўзбекистон мусулмонлари идораси Матбуот хизмати
Muslim.uz
@muslimuzportal | @mp3muslim | @diniysavollar

Кеча, 25 январь куни эрта тонгда Тошкент шаҳридан умра ибодатларини адо этиш учун жўнаб кетган андижонлик зиёратчилар Саудия Арабистонидаги Жидда шаҳрига етиб борди. Сўнгра ушбу шаҳардан замонавий автобусларда Мадина шаҳрига борган ҳамюртларимиз барча зарур шароитларга эга бўлган меҳмонхонага жойлашдилар.

Эндиликда зиёратчиларимиз Мадинаи мунавварадаги муборак жойларни зиёрат қилиб, Пайғамбар алайҳиссалом ва саҳобаи кромларга ўзларининг ва яқинларининг саломларини айтишга киришишади, Масжиду Набавий, “Қубо” ва “Қиблатайн” масжидларида ибодатларни адо этишади, иншоаллоҳ.

Аллоҳ таоло умра зиёратини бошлаган ҳамюртларимизнинг сафарларини хайрли ва баракали қилсин, муборак зиёратни барча мўмин-мусулмонларга насиб этсин!

Умра сафари тафсилотларини сайт ва ижтимоий тармоқдаги саҳифаларимизда кузатиб боринг.

Ўзбекистон мусулмонлари идораси Матбуот хизмати
muslim.uz #умра2022
@muslimuzportal | @mp3muslim | @diniysavollar

Айни кунларда бир гуруҳ ҳамюртларимиз Пайғамбаримиз алайҳиссалом шаҳри – Мадинаи мунавварада муборак умра амалини имону ихлос, чексиз бахт ва шукроналик туйғуси ила адо этишмоқда. Хусусан, Масжидул Набавийда, Росулуллоҳ соллоллоҳу алайҳи ва салламнинг Равзаи мутоҳҳараларида, минглаб саҳобаи кромлар абадий қўним топган “Бақи” қабристони, “Қубо” ва “Қиблатайн” масжидлари ва Ухуд тоғида зиёрат ва ибодатда бўлмоқдалар.

Муборак зиёратга мушарраф бўлган юртдошларимиз соғинч билан узоқ кутилган, пандемия шароитида бу диёрга дунёдаги кўплаб мусулмон давлатлари аҳолисининг қадами етмай турган паллада умра амалини мавжуд тартиб-қоидаларга амал қилган ҳолда, эмин-эркинликда, бекаму кўст ва юқори кайфиятда бажариш баробарида ушбу сафарга юқори даражада шароит яратиб берган Юртбошимиз, диний соҳа раҳбарлари, Ўзбекистон мусулмонлари идораси раиси, муфтий Нуриддин домла ҳазратлари, зиёратчиларга хизмат қилаётган мутасаддилар, умуман, барча мўмин-мусулмон халқимиз ҳақига тўхтовсиз дуои хайрлар қилишмоқда.

Шу маънода “Умра – 2022” мавсуми қандай ўтаётгани ҳақида Мадинаи мунавварада зиёратда бўлиб турган ҳамюртларимизнинг таассуротлари билан қизиқдик.

– Масжидул Набавийда ўқилган бир намоз бошқа масжидлардагидан минг марта афзалдир. Айни дамда ана шундан бахту саодатга мушарраф бўлиб турибмиз, – дейди пойтахтимиздаги “Новза” жоме масжиди имом-хатиби Жалолиддин домла Ҳамроқулов. – Расулуллоҳ соллаллоҳу алайҳи васаллам: «Ким қабримни зиёрат қилса, унга шафоатим вожиб бўлади», деганлар. Имом Байҳақий келтирган ривоятда: «Ким мени савоб умидида Мадинага келиб зиёрат қилса, қиёмат кунида менинг қўшним бўлади», деганлар. Бугун биз Пайғамбаримиз алайҳиссаломга салом ва саловотлар айтмоқдамиз. Ушбу хурсандчиликларнинг барчаси юртимизда Муҳтарам юртбошимиз бошчилигида олиб борилаётган хайрли ишлар меваси, диний соҳа мутасаддилари ташаббуси ва саъй-ҳаракатлари натижасидир.

Аллоҳ таоло марҳамат қилади: “Албатта, ҳар бир қийинчилик билан бирга енгиллик бордир. Албатта, ҳар бир қийинчилик билан бирга енгиллик бордир” ("Шарҳ" сураси 5-6-оятлар). Ушбу ояти каримадан келиб чиқиб Равзаи муборакдаги ибодатлардан кейин бир нарсани аниқ айтамизки, авваллари Равзаи муборакка ибодатга киришда одамлар кўп бўлгани учун бироз заҳмат бўларди, икки ракат намозни ҳам ҳаловот билан ўқишга имкон бўлмасди. Ҳозир эса зиёратчиларни белгиланган алоҳида жойларда икки ракат эмас, балки бир неча марта нафл намозларни ҳотиржам ўқиш имкониятига эга бўляптилар. Масжудил Набавийнинг ғарбий тарафида 10 мингдан зиёд саҳоба қўним топган “Бақи” қабристонида зиёратлар давомида улуғларимиз ҳақига хатми Қуръонлар бағишлаб, мўмин-мусулмон халқимизни ҳам дуоларда эсламоқдамиз.

– Айни кунларда Ўзбекистондаги барча мўмин-мусулмонлар жуда хурсанд. Чунки узоқ кутилган умра зиёрати 2 йилдан кейин яна қайтадан бошланди. Бундай қувонч Тошкент халқаро аэропортига кириб келганимизда бизни, айниқса, ҳаёжонга солди, – дейди Санобар ая Ҳасанова. – Минглаб ҳамшаҳарлар, ОАВ вакиллари, масъул ходимлар чиройли кузатишди. Тўғриси, бунчалик шараф мени тўлқинлантириб юборди. Зиёратга келган тошкентликлар номидан Президентимиз Шавкат Миромоновичга, умра зиёрати ташкилий қўмитасига, Ўзбекистон мусулмонлар идораси раиси ва бизга хизмат қилаётган мутасадди вакилларга катта раҳматлар айтаман. Бундай чиройли шароит ва эътибордан жуда мамнунмиз.

Дарҳақиқат, Аллоҳнинг байтини тавоф этиш ва Пайғамбар алайҳиссалом равзаларини зиёрат қилиш учун борган кишилар Ҳақ таолонинг меҳмонидир. Шу боис улар эҳтиромга муносибдир.

Бир сўз билан айтганда, юртимиз зиёратчилари муборак умра амалини пандемия тартибларига амал қилган ҳолда, эмин-эркинликда, бекаму кўст ва юқори кайфият ва шарт-шароитда адо этиш давомида Ҳақ таолодан Ватанимиз тинчлиги, халқимиз фаровонлигини сўрашмоқда.

Аллоҳ таоло барча умрачиларимизнинг ибодатларини Ўз даргоҳида қабул айласин!

Ўзбекистон мусулмонлари идораси матбуот хизмати