muslim.uz
Нью-Йоркда араб аёллари ва спорт мавзусига бағишланган кўргазма очилди
Қатар музейи раҳбари Шайх Ал Маясса бинти Ҳамад ал Тани хоним жорий йилнинг 10 апрель куни Бирлашган Миллатлар Ташкилотининг Нью-Йоркдаги бош қароргоҳида “Hey Ya: Arab Women in Sport” (“Кетдик: Араб аёллари ва спорт”) номли фото кўргазманинг очилишида иштирок этди.
Ушбу кўргазмада икки халқаро фотосуратчи Бриджит ва Мариан Лакомбеларнинг ишлари намойиш қилинмоқда. Бу ҳақда “thepeninsulaqatar.com” нашри хабар берди.
Кўргазмани ўтказишдан мақсад араб аёлларининг жамиятда ўз ўрнини топишида спортнинг ўрни нақадар юқори эканини намойиш этишдир. Кўргазма ҳар йили 6 апрелда нишонланадиган Спорт тараққиёт ва тинчлик учун халқаро куни муносабати билан ташкил этилган.
Кўргазмадаги фотосуратларда 50 дан зиёд араб аёлларининг Олимпиада ўйинларидаги иштироклари жараёни акс эттирилган.
ЎМИ Матбуот хизмати
70 яшар отахон «Етти Пир» зиёратгоҳлари бўйлаб велосипедда саёҳатни амалга оширди
Юртимизда туризмга берилаётган эътибор ва ташкил этилаётган саёҳатлардан руҳланган ҳолда, 2018 йилнинг 7 апрел куни Бухоро вилояти, Пешкў туманида истиқомат қилувчи, 70 ёшни қарши олган отахон Қудратов Муҳаммад Қулназарович юртимиз бўйлаб саёҳат қилиш мақсадида велосипед орқали ўз саёҳатини бошлади.
Саёҳатчи отахонимиз Бухоро – Самарқанд – Тошкент – Наманган – Фарғона – Андижон – Термиз – Қарши – Бухоро йўналиши бўйича саёҳатни амалга оширишни режалаштирган бўлиб, – «мазкур саёҳат орқали юртимизда ички туризмни ривожлантиришга ўз ҳиссамни қўшмоқчиман», – деб таъкидлайди Муҳаммад бобо.
Туризмни ривожлантириш давлат қўмитаси Матбуот хизмати билдиришича, ҳозирги кунга қадар отахон, Бухоро – Самарқанд йўналишида ҳамда Бухоро вилоятидаги «Етти Пир» (бухоролик етти пир – Абдулхолиқ Ғиждувоний, Хожа Ориф Ревгарий, Маҳмуд Анжир Фағнавий, Али Ромитаний, Муҳаммад Бобо Саммосий, Амир Кулол ва Баҳоуддин Нақшбанд) зиёратгоҳлари бўйлаб велосипедда саёҳатни амалга оширган.
М.Қудратов саёҳатининг давоми тизимли равишда ёритиб борилади.
Ўзбекистон мусулмонлар идораси матбуот хизмати
Ўзбекистонда зиёрат туризмини кенг оммалаштириш имкони пайдо бўлмоқда
Бу ҳақда ЎзА мухбири билан суҳбатда туркиялик ватандошимиз, таниқли адиб Собир Сайҳон билдирди.
Унинг айтишича, туркиялик ватандошлари Ўзбекистонни ота юрт, дея тилга олишади. Тили ва дини, келиб чиқиши бир бу икки халқ асрлар давомида бирдамликда яшаб келган. Халқларимизнинг турмуш тарзи, урф-одат ва анъаналарида ўхшаш жиҳатлар кўплиги уларнинг ҳар доим маънавий яқинликда ҳаёт кечирганидан далолат.
“Ўзбекистон замини ислом оламида машҳур авлиёлар, буюк муҳаддислар, уламоларни етиштириб берган. Шунинг учун Ўзбекистондаги муқаддас қадамжоларни зиёрат қилиш мақсадида Туркиядан ҳам кўплаб зиёратчилар Тошкент, Самарқанд, Бухорога келади. Туркияликлар мусулмонлар орасида ҳам Нақшбандия тариқати кенг тарқалган. Ушбу тариқатнинг ватани Бухородир. Президент Шавкат Мирзиёев ташаббуси билан Ўзбекистонда қатор мамлакатлар, жумладан, Туркия Республикаси фуқаролари учун ҳам 30 кун муддатга визасиз тартиб жорий этилди. Бунинг ортидан Ўзбекистонда сайёҳликни ривожлантириш, биринчи навбатда, зиёрат туризмини кенг оммалаштириш имкони пайдо бўлмоқда”, – деди Собир Сайҳон.
Ўзбекистон мусулмонлари идораси матбуот хизмати
Масжидул Ақсонинг 1927 йилги зилзиладан кейинги манзараси
1927 йил бўлиб ўтган зилзиладан сўнг британиялик археолог Роберт Гамилтон Қуддусдаги Масжидул Ақсони сурат олган. Унда масжид томининг бузилганини кўриш мумкин. Масжид деворларига ҳам анча зарар етган. Маълум бўлишича, масжид томига ёпилган ёғочларнинг ёши икки минг йилга тенг экан. Ёғочлар кедр ва кипарис дарахтлардан олинган. Бу ҳудудда зилзилалар доим бўлавермайди, 80-100 йиллар орасида бир-бир бўлиб қолади.
Манба:kamolon.uz
Абу Убайда ибн Жарроҳ розияллоҳу анҳу
Исмлари Омир ибн Абдуллоҳ ибн ал-Жарроҳ ибн Ҳилол ибн Уҳайб ибн Заббат ибн Ҳорис ибн Фиҳр бўлиб, насаблари Пайғамбаримиз соллаллоҳу алайҳи васаллам билан Фиҳрда бирлашади. Милодий 584 йили Маккада таваллуд топган. Тириклигида жаннат башорати берилган ўн саодатманд саҳобанинг бири, яъни Ашараи Мубашшарадан. Абу Убайда розияллоҳу анҳу баланд бўйли, очиқ юзли, кўркам, гавдали, сийрак соқолли, ёноқлари бир оз бўртиб чиққан, теран фикрли, мулойим, ғоят ихлосли инсон бўлган. Ислом тарихида шижоатли, ўта жасур жангчи, буюк саркарда, одил, ҳаёли, ишончли киши сифатида танилган. Ҳижратнинг 18 (милодий 639) йили Шомда тарқалган бир касалликдан Ўрдунда вафот этган, қабри Амё қишлоғида.
Ориф АҲМЕДОВ,
Сирдарё вилояти вакиллиги ходими
ЎМИ Матбуот хизмати
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.