www.muslimuz
Юқоричирчиқ туманида масжид биносига ғишт қўйилди
Жорий йилнинг 28 июнь куни Тошкент вилояти Юқоричирчиқ тумани "Миям Қангли" жоме масжидининг янги биносига дастлабки ғишт қўйиш тадбири бўлиб ўтди. Ушбу тадбирда Ўзбекистон мусулмонлари идораси Тошкент вилоят вакили, вилоят бош имом-хатиби Хайруллоҳ Турматов иштирок этди.
Тадбирда туман имом-хатиблари, масжид жамоати вакиллари ҳам иштирок этишган. Масжиднинг янги ва замонавий биносининг қурилиши хайрли бўлишини тилаб дуои хайрлар қилинди.
Ўзбекистон мусулмонлари идораси Матбуот хизмати
Суриялик болакайнинг ўлими ҳақида филм тасвирга олинади
Туркия қирғоқларида уч ёшли суриялик болакайнинг фожиали ҳалок бўлиши воқеаси кино санъати вакилларининг ижодий ишлари марказида бўлиб қолмоқда. Islam-today нашри бу ҳақда маълум қилди.
Болакай ҳалок бўлганида олинган фотосуратлар бутун дунё аҳолисининг жунбушга келтирган. Тасвирга олинаётган бадиий филм сюжети асосида ушбу фожиа тургани айтилган.
Филм Бодрум шаҳрида тасвирга олиниши бошланди. Филм намойишидан тушган фойда хайрия ишларига сарфланиши маълум қилинган. Актёрлар ҳам филмда гонорар олмасдан суратга тушишмоқда.
Айлан курди билан боғлиқ фожиа 2015 йилда содир бўлган эди.
Ўзбекистон мусулмонлари идораси Матбуот хизмати
Ўзбекистонда афғонистонлик илк битирувчи талабаларга диплом топширилди
Олий ва ўрта махсус таълим вазирлиги тасарруфидаги Афғонистон фуқароларини ўқитиш таълим марказининг илк битирувчиларига тантанали равишда диплом топширилди. Бу ҳақда Олий ва ўрта махсус таълим вазирлиги матбуот хизмати хабар берди.
Жорий ўқув йилида марказни тамомлаган 96 нафар битирувчига ўзбек тили ва адабиёти таълим йўналиши бўйича бакалавр дипломи берилди.
Афғонистонлик ёшлар икки йил давомида марказда ўзбек тили ва адабиёти йўналишида таҳсил олишди. Машуғотларни самарали ташкил этиш мақсадида Алишер Навоий номидаги Тошкент давлат ўзбек тили ва адабиёти университетининг малакали профессор-ўқитувчилари ҳам дарс жараёнига жалб қилинди.
Ҳозирда марказда 25 нафар афғонистонлик талаба темир йўл соҳаси йўналишида таҳсил олмоқда.
Ўзбекистон мусулмонлари идораси Матбуот хизмати
75 минг киши бошланғич ислом таълимотини ўрганади
Туркиянинг Диёр бакир шаҳрида оммавий Қуръонни ўргатиш курслари бошланмоқда. Бу ҳақда islam.ru сайти хабар беради.
Режага кўра, ёз фасли давомида 75 минг киши курсни тамомлаши кўзда тутилмоқда. Yeni Safak маълумотига кўра, бундай шарт-шароитлар Туркия Дин ишлари бўйича қўмита томонидан ташкил этилиб, ушбу курсларда таълим олувчиларнинг ёши чегараланмаган.
Бу ерда Қуръон мухлислари тажвид илмини ўрганишади ва дарслар нафақат масжидда балки тайёрлов ўқув марказларида ҳам бўлиб ўтади. Қўмитанинг мониторинги бўйича ҳозирги кунда 64 минг киши таълим олмоқда ва уларнинг сони 75 мингдан ортиши кутилмоқда.
Ўзбекистон мусулмонлари идораси Матбуот хизмати
Хайриддин Султонов: Президентимизнинг сўзлари Муҳаммад бин Рошид Ол Мактумни тўлқинлантирганди
Ислом цивилизацияси марказида ўтказилаётган Халқаро Пресс-клубда бу ҳақда маълумот берилди.
Унда Ўзбекистон Республикаси Президентининг маслаҳатчиси – Спичрайтер Х.Султонов ўз фикрларини билдирди:
“Мамлакатимизда сўнгги йилларда китобхонликка жуда катта эътибор қаратилмоқда. Китоб, адабиёт нафақат ўз маданиятимизни бойитадиган, халқаро дипломатик муносабатларда ҳам таъсирчан восита эканлиги Президентимизнинг олиб бораётган сиёсати мисолида яққол англаш мумкин.
Президентимиз ўтган икки ярим йиллик фаолиятлари давомида дунёнинг жуда кўп мамлакатларида бўлганида ўша давлатларнинг раҳбарларига улуғ мутафаккирларимиз асарларини совға қилиш амалиётини йўлга қўйдилар. Бу эса ижобий натижа бермоқда. Жумладан, давлатимиз раҳбарининг Бирлашган Араб Амирликларига бўлган расмий давлат ташрифлари давомида мамлакатимизда чоп этилган БАА Вице-президенти, Дубай амирлиги ҳокими, машҳур давлат ва сиёсат арбоби Муҳаммад бин Рошид Ол Мактумга муаллифнинг юртимизда нашр қилинган иккита “Менинг тарихим”, “Менинг тасаввурим” номли китоблари давлатимиз раҳбари томонидан совға қилинди.
Мен шунга гувоҳ бўлдимки, китоб совға қилинган вақтда Президентимиз Амирга “Китобингизнинг бешинчи саҳифасида бизнинг буюк бобомиз Имом Бухорий ҳазратларининг муборак ҳадислари келтирилган экан”, деб қайд этганларида сиёсатчининг жуда қаттиқ тўлқинланганига гувоҳ бўлдик”.
Ўзбекистон мусулмонлари идораси Матбуот хизмати
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.